Fotoalbum i Ulqinit 2

[GRUDJANE]

Fotoalbum i Ulqinit 2
http://i721.photobucket.com/albums/ww218/Besa_1980/1243839962.jpg

Para disa ditësh doli nga shtypi libri i ri i karakterit monografik “Fotoalbum i Ulqinit 2” i autorit Gazmend Çitaku. Ky është libri i dytë i këtij lloji i botuar nga ky koleksionist i vyer dhe paraqet vazhdimësinë e albumit të parë.
Derisa libri i parë kishte përmbajtje më tepër detare, vazhdimi i tij, pra pjesa e dytë, sjell dëshmi të reja nga sfera etnografike, arkitektonike si dhe dokumente të rralla që kanë të bëjnë me Ulqinin dhe ulqinakët.
Libri është i ndarë në gjashtë kapituj: harta dhe gravura, vite me ujëra, etnografike, pamje të harruara, dokumente dëshmi dhe urlaub in Ulqin.
Si tërësi, libri përmban 86 fotografi, harta, gravura dhe dokumente shumica e të cilave botohen për herë të parë.
Libri është i shtypur në letër shumë cilësore dhe përmban një numër të konsiderueshëm të fotografive me ngjyra.
Redaktor i këtij botimi është Hajro Ulqinaku, recensent kritiku i artit Mustafa Ferizi, ndërsa shtypin e ndihmoi komuna e Ulqinit përmes konkursit për bashkëfinancimin e projekteve të organizatave joqeveritare.


(Kohapress)

[GRUDJANE]

U PËRURUA LIBRI I GAZMEND ÇITAKUT “FOTOALBUM I ULQINIT 2”
http://i721.photobucket.com/albums/ww218/Besa_1980/gazmend-citaku.jpg
Fotografi që dëshmojnë shumë
Shkrimtari Hajro Ulqinaku theksoi se madhështia e fotoalbumit qëndron në faktin se në të janë botuar fotografitë e fotografëve anonimë, prej Ulqinit e deri në Vjenë.
“Është një punë shumëvjeçare e qëmtimeve të fotografive të rralla shumë karakteristike që flasin shumë, që dëshmojnë shumë, që e përshkruajnë Ulqinin për mrekulli”, tha ai.
Dr. Maksut Haxhibrahimi tha se fotoalbumi paraqet një monografi historiko-shoqërore dhe etnokulturore për Ulqinin. Ai e vlerësoi atë si një monografi të mirëseardhur për tryezën e shumë studiuesve shqiptarë qofshin ata historianë, letrarë, gjuhëtarë, folklorist, etnografë e më gjerë, sepse, sipas tij, “ai na jep një pamje të gjerë të një prej trevave jo vetëm interesante e të pasur, por edhe jo gjithaq të njohur për shumë kohë siç është Ulqini, vend me të cilin autori ka lidhje të fortë shpirtërore”.
“Fotoalbumi Ulqini 2” ndër të tjera ka meritën se u bën vend në radhë të pare atyre fakteve dhe të dhënave historike urbanistike dhe kulturore që dëshmojnë qytetarinë, kulturën, jetesën me punë e krijimtari të pandërprerë me frymë ndërtuese të një qyteti shqiptar ndër më tipikët në bregdetin e Malit të Zi”, tha ai.
Autori i librit Gazmend Çitaku falënderoi të gjithë ata të cilët i kanë hapur albumet e tyre dhe i kanë dhënë një pjesë të historisë së familjes së tyre.
Ai tha se mbledhja e fotografive është një punë shumë e zorshme.
“Këto fotografi nuk mblidhen as për një ditë, as për dy, as për pesë, as për një vit. Kjo është një punë e cila zgjat, e cila vazhdimisht e plotëson shoqa shoqën”, theksoi Çitaku, duke nënvizuar se puna më e vështirë ka qenë sistematizimi i fotografive.
Libri “Fotoalbum i Ulqinit 2” është vazhdimësi e librit “Fotoalbum i Ulqinit 1” dhe përbën librin e dytë të këtij lloji të botuar nga koleksionisti Gazmend Çitaku. Ai përmban 86 fotografi, harta, gravura dhe dokumente shumica e të cilave botohen për herë të parë.


i.k.