Lajme Nga Futbolli Shqiptar..

[the_best]

Ardian Gjokaj nenshkruan kontrate 2 vjecare me Trabzonspor

Kane kaluar shume kohe qe heren e fundit eshte folur per ndonje futbollist malesor. Edhe pse Malesia ka pas talent te medhenj te ketij sporti, pak prej tyre arriten qe te debutojne per ndonje klub te madh. E nje nder te radhet ishte edhe Ardian Gjokaj, Malesori tash 27 vjecar, qe para pak viteve ishte emer qe klubet e medha boterore e deshironin ne ekipin e tyre. Mbas kontrates se tij famoze per “Mallorca� te Spanjes, Ardianin nuk e deshte fati. Karriera e tij filloi te shkoje teposhte per shkak te lendimeve dhe operacioneve te shumta qe kishte, por ai edhe nje here tregoi karakterin e fort qe kane Malesoret dhe nuk u dorezua. Mbas 4 viteve ne Spanje u kthye ne ligen e SMZ, luajti nje kohe per “Obiliq�, pastaj per “OFK Beograd�, e se fundi kaloi ne “Crvena Zvezda� te Beogradit me te cilen nenshkroi kontrate deri me 2008.

Ashtu si para shtate viteve kur e vezhguan menaxheret e “Mallorca� ne reprezentacionin e te rinjve te ish-Jugosllavise dhe menjehere e kerkuan ne rendet e tyre, keshtu kesaj here ne ndeshjen e “Crvena Zvezda� me Strazbur (ku edhe shenoi gol fantastik) para dy muajve talentin e tij e verejti trajneri i klubit turk Trabzonspor Halilhoxhiq dhe kerkoje qe kete lojtar universal (si e quanin ne “Crvena Zvezda�) ta sjellin ne klubin turk. “Marreveshjet kane zgjate dy muaj, nje kohe mendoja se nga kjo marreveshje s’do te kete asgje ngase kishte kaluar shume kohe, mirepo ndolli ndryshe� theksoi Gjokaj. Sipas shtypit, nga ky transfer, klubit te fundit te Gjokajt, “Crvena Zvezda� e Beogradit nga Trabzonspor do te inkasoje 400-500 mije euro si demshperblim.Gjokaj me klubin turk nenshkroi kontraten deri me 2008. Klubi qe Gjokaj do te mbroje ngjyrat e tij per momentin ndollet ne vendin e 5 ne tabelen turke dhe eshte njeri nder klubet me te forta ne Turqi.

Gjokaj per klubin e ri debutoi mbas nje jave ne ndeshjen e liges se Turqise kunder Gaziatepspor dhe ne minuten e 73 te lojes u aktivizua ne vend te Yong Lee. Ne minuten e 90 Yatarra pason te Gjokaj i cili shenon golin e pare per Trabzonspor ne ndeshjen e tij debutuese. Vetem mbas 4 diteve ne ndeshjen e kubit te Turqise qe u luajt dje ne mes te Altay dhe Trabzonspor Gjokaj fillon ndeshjen ne 11-shen e pare dhe ne minuten e 19 shenon serish edhe nje gol per ekipin e tij. Shpresojme se Gjokaj do vazhdoje mbare keshtu edhe si ka filluar dhe cdo jave do te shenoi per Trabzonspor e ndoshta deri me 2008 serish Adrianin do ta shohim ne ndonje klub prestigjioz Evropian.

[SantaKruz]

Pershendetje...

Une e njof personalisht Ardianin Gjokaj,dhe jemi nje gjenerate me te dhe po ashtu kemi mesuar se bashku disa vite...!
Per te folur per Adrianin Gjokaj me duhet shume kohe sepse aj ka nje histori te vecant qysh ne femiri ne sportin e fudbollit!
Ardiani esht ken qysh ne femirine e tij nje talent i rrqadhe i fudbollit ne malesi!
Une per vete e ndiej veten krenar qe kemi edhe nga fudbollistet nje malesor te cilin e njef po thuajse tere bota e futbollit
Shpresoj se nete ardhmen dote kemi edh eme shum sportiste nga malesia qe dote marrin fame boterore!

Urime nete ardhmen i deshiroj Ardianit Gjokaj....

Mire mbetshi!

[BENI]

Edhe une i uroj ketij Futbollisti,suksese te metejshme ne te arrdhmen ;) !
_______________________

SHQIPERIA E BASHKUAR

[kobra a.k.a Helmusi]

urime ja uroj radian gjokaj kontrten

[wxz]

Ketu Do Te Gjeni Lajme Cdo Dite Nga Futbolli Shqipetare.

http://upload.wikimedia.org/wikipedia/en/thumb/4/41/Tifozatkuqezi.JPG/300px-Tifozatkuqezi.JPG

[wxz]

Një fakt një problem: Mungesa e kushteve stërvitore, diktojnë "emigrimin" e ekipeve tona për pargatitore.

Futbolli shqiptar merr "arratinë"...!!!


Të premten, ekipi i Partizanit kaloi pikën kufitare të Murriqanit dhe iu drejtua Ulqinit të Malit të Zi, për të zhvilluar fazën përgatitore. Sot, këtë itinerar do të përshkojnë edhe ekipet e Flamurtarit dhe Lushnjës. Edhe ato do të stacionohen në hotelet e Ulqinit, për të kryer fazën përgatitore gjatë këtyre ditëve dimërore. Një gjë të tillë, gjatë javës së kaluar e kanë bërë edhe ekipe të tjera shqiptare, si Vllaznia, Teuta, Besa apo edhe Besëlidhja. Bardheblutë e Tiranës, gjithashtu, sot do të nisen për të kryer një minifazë përgatitore 15 ditore. Ndryshe nga të tjerët, ata, duke qenë më të fuqishëm ekonomikisht, kanë preferuar hotelet luksoze të Antalias së Turqisë, atje ku vitin e kaluar kanë qenë akomoduar, po në këtë periudhë, kandidatët kuqezinj të kombëtares së Brigelit. Të hënën, drejt Malit të Zi do të udhëtojë edhe Luftëtari. Ndërkohë, nga sa jemi të informuar, thuhet se Elbasani ende nuk e ka përcaktuar destinacionin. Gjithsesi, Mali i Zi apo Maqedonia, do të jenë strehëzat e tij për fazën përgatitore dimërore. Nga ekipet e superligës, në "llogoret" e tyre duket se kanë mbetur vetëm Dinamo, Apolonia, Shkumbini dhe Kastrioti...
Pra, këto ditë, thuajse të gjithë ekipet tona të futbollit po largohen nga Shqipëria. Peisazhi të krijon përshtypjen sikur futbolli ynë ka marrë arratinë... Një formë e tillë "shtegtimesh", për të kryer jashtë vendit minifaza përgatitore, nuk është e panjohur në futbollin ndërkombëtar. Madje, kjo praktikë është kthyer në një normë për vendet me klimë të ftohtë e dimër të acartë, ekipet e të cilëve gjejnë strehëza në vende me kushte klimatike më të ngrohta dhe të përshtatshme për të kryer aktivitetin e tyre. Mjediset stërvitore në pikat turistike të Malit të Zi, Turqisë apo edhe të Spanjës, në këtë periudhë dimri u ofrojnë ekipeve sportive kushte ideale për t'u përgatitur. Një gjë e tillë ka bërë që vitet e fundit, kjo praktikë të kthehet si modë edhe në futbollin shqiptar. Varfëria e tejskajshme në infrastrukturë, mungesa e terreneve stërvitore, e sallave, palestrave të forcës e të tjerave nevoja për të funksionuar normalisht një ekip sportiv, e detyrojnë edhe futbollin shqiptar të marrë rrugët jashtë kufinjve të vendit, edhe pse është janar dhe po përjetojmë një pranverë të parakohëshme. Po të shtosh këtu edhe krizën energjitike, që po përjeton vendi ynë, atëhere shprehja "për një jetë më të mirë", e justifikon dhe e përligj më tepër shtegtimin drejt Malit të Zi apo Turqisë.
Përse nuk janë larguar Apolonia dhe Dinamo nga vend-strehimet e tyre? A thua nuk kanë kaq lekë dhe mjete financiare presidentët respektivë Koço Kokëdhima dhe Besnik Sulaj për një gjë të tillë? Vështirë që nga ndokush kjo të besohet. Arsyeja është fare e thjeshtë. Sikurse dihet, Apolonia ka në Fier një infrastrukturë stërvitore tepër moderne, por edhe Dinamo në klub i ka kushtet e nevojshme për t'ua arritur qëllimeve të saj përgatitore. Ky është shkaku i vetëm dhe i vërtetë i këtij qëndrimi në shtëpi. Gjykimi i problemit brenda këtij konteksi na çon në përfundimin se, deri sa Shqipëria të krijojë infrastrukturën e nevojshme stërvitore për ekipet e futbollit, ne duhet të mbajmë me lekë fqinjët tanë, të cilët ua dinë mirë vlerat dhe leverditë kësaj pune. E po t'i biesh lapsit, del se nuk janë pak. Vetëm për 10-15 ditë stërvitore në Mal të Zi, ekipet tona të futbollit do të shpenzojnë më shumë se sa 100 mijë euro!
Futbolli shqiptar sot është në arrati. Dhe sa do të vazhdojë kështu?

[wxz]

Mesfushori kosovar në provë tek ekipi kavajas vlerëson fillimin e fazës përgatitore në Ulqin.

Duraku: Do ta bind Besën për vlerat e mia.


Një ndër futbollistët për të cilët ekipi kosovar i Besës së Pejës ka shprehur ankesën e tij është edhe mesfushori Mensur Duraku. Kosovari nga Peja ka qenë ndër shtyllat e pejanëve dhe falë golave të tij dhe të Haxhi Zekës pejanët e shpallën dy herë kampionë të Kosovës. Po çfarë vlerëson në startin e përgatitjeve në linjë telefonike nga Ulqini mesfushori kosovar? Sa të vështirë do ta ketë të sigurojë një vend në formacionin kavajas? Si e vlerëson në tërësi forcën e ekipit të tij të ri? Për të gjitha këto ja dhe intervista e marrë në linjë telefonike nga Ulqini:
Si e vlerësoni startin e përgatitjeve dhe kushtet e stërvitjes?
Nga sot (dje) kemi startuar fazën përgatitore sipas një programi që parashikon dy stërvitje në ditë. Jemi sistemuar në hotelin "Imperial" në kushte mjaft të mira. Fare pranë kemi disa terrene sportive në gjendje mjaft të mirë, si dhe sallën e përgatitjes speciale. Jemi mjaft të kënaqur nga gjithçka që na është vënë në disponim.
Pas kaq ditësh, si e vlerësoni ekipin tuaj të ri?
Mjafton vetëm emri i njëjtë i Besës së Pejës me ekipin e ri që psikologjikisht të ndihesh mirë. Sa për kontigjentin e futbollistëve, që të jem i sinqertë, shumicën nuk i njoh për vlerat e tyre. Më shumë kam informacion nga shokët e mi, si Dragusha, Babaj e Krasniqi, të cilët ma kanë bërë të qartë vështirësinë që kam për të zënë një vend në formacion. Kjo krahas punës së madhe që më imponon, më ngroh se kam me kë të luaj. Nuk mund t'i tregosh vlerat e tua reale nëse nuk ke shokë të mirë. Me pak fjalë, Besa është ndër ekipet më të mira të superligës, të paktën nga trajtimi financiar e profesional, të cilin e shoh.
Sa do të ndikojë kjo konkurrencë në të ardhmen tuaj, kur me Besën e Pejës keni qenë gjithnjë titullar?
Edhe te Besa e Pejës askush nuk më ka falur gjë. Më është dashur të djersij shumë për të qenë ai që tifozët pejanë njohën. Në këtë mënyrë gjithçka varet nga ecuria e formës sime, ku edhe fati ka pjesën e vet. Do të vlerësoj në maksimum çdo seancë stërvitore si kushtin bazë për të qenë në formën time më të mirë. Konkurrenca jo gjithmonë duhet parë si pengesë. Përkundrazi, unë mendoj se me futbollistë cilësorë askush nuk humbet, as unë, as ekipi vetë. Fundja, askush nuk e ka marrë me tapi formacionin përgjithnjë. Më e vështirë mbetet mbajtja e tij, sepse publiku nuk pranon ulje ngritje të formës, por vetëm suksese. Sipas klimës që shoh, si nga presidenti, ashtu dhe nga trajneri Bici, te Besa luan ai që e meriton.
Krahas jush, janë edhe katër kosovarë të tjerë, që tashmë janë pjesë e Besës në merkaton dimërore...
Secili futbollist nuk shihet nga certifikata e lindjes nga vjen. Edhe futbolli është tashmë biznes. Ai që bind se vlen për ekipin, mund ta tregojë në fushën e lojës. Kam dëgjuar diku nën zë se erdhën shumë kosovarë. Jua garantoj se shumica e tyre, pa folur me emra konkretë, kanë më shumë ndershmëri dhe energji sesa futbollistët e huaj, pa llogaritur koston jo të madhe me të cilën merren. Në futboll ka vend për të gjithë. Kontributi dhe fusha e lojës i jep kujtdo certifikatën që meriton. Pastaj nuk është vetëm Besa. Shihni Elbasanin sesa kosovarë ka afruar. Duhet të bindeni se Kosova ka mjaft talente futbolli dhe vetëm mospasja e shtetit tonë na ka penguar të ngremë nivelin e futbollit. Pavarësia e Kosovës do të sjellë një fytyrë krejt tjetër të futbollit kosovar. Cana, Kuqi, Curri, Dallku, Mehmeti dhe mjaft të tjerë janë konkretizimi i kësaj që po them.

[wxz]

Elbasani:

Stojku, mbrojtësi goleador merr çmimin e vitit
Gentian Stojku ka marrë çmimin e vitit si lojtari më i mirë i Elbasanit për vitin 2006. Veterani që ka provuar të luajë në të gjitha repartet, me përjashtim të portës, po kalon një nga moment me kulminante të karrierës së tij sportive. Madje Stojku i rinuar mund të mbajë mbi shpatulla edhe për këtë vit barrën e sulmit dhe me eksperiencën që ka mbi supe mund të premtojë të tjerë gola. Stojkut i është dorëzuar edhe trofeu i futbollistit më të mirë të vitit. Stojku u zgjodh futbollisti më i mirë i Elbasanit për 2006 pas një votimi që u bë në faqen e internetit të ekipit kampion dhe ka triumfuar nga votat e tifozëve mbi të tjerët, duke lënë pas futbollistë të tillë, si Kotorri dhe Çapja.

[wxz]

Elbasani:

Presidenti Laze inspekton Malin e Zi
Presidenti Arben Laze ka udhëtuar sërish për në Malin e Zi, ku po inspekton edhe vendin ku do të akomodohen kampionët e Shqipërisë. Por burime pranë tij bëjnë të ditur se ka shumë pak shanse që Elbasani fazën përgatitore ta zhvillojë në Malin e Zi, ku ditët e fundit janë akomoduar shumë ekipe të superligës. Ndërkohë, një alternativë e mundshme mbetet tashmë Maqedonia, më saktë Struga.

[wxz]

Bien pistat e Bejzades dhe Norës, përflitet Bylykbashi, ndërkohë që shikohet edhe nga Kroacia.

Elbasani, vetëm sulmi i paplotësuar.

Elbasani nuk do të ndalet me kaq. Burime pranë ekipit verdheblu bëjnë të ditur se kampionët në fuqi po vëzhgojnë me imtësi edhe disa futbollistë të tjerë nga kampionatet e huaja. Ndërkohë që sipas disa burimeve kanë rënë poshtë përfundimisht pistat që mund të sillnin në Elbasan, Norën dhe Bejzaden. Këto mundësi janë sfumuar plotësisht dhe tashmë Elbasani po mendon pistat jashtë vendit. Verdheblutë, që këtë javë do të nisen për zhvillimin e fazës përgatitore jashtë vendit, po mendojnë seriozisht për gjetjen e një sulmuesi tipik goli, por që për momentin asnjë emër konkret nuk bëhet i ditur. Edhe prania e Bylykbashit nuk premton shumë, pasi Dori mund të nënshkruajë për një ekip turk, kështu që shanset e një rikthimi të tij te verdheblutë janë tepër të pakta, ndonëse dëshira e sulmuesit është e madhe për t'u veshur verdheblu në rast se nuk firmos për një ekip jashtë vendit. Gjithsesi, drejtuesit e Elbasanit janë në kontakte me disa futbollistë ciëlsorë, por që nuk bëjnë me dije se cilët janë ata. Pistat e mundshme janë disa sulmues kroatë, të cilët mund të vihen në provë gjatë fazës përgatitore që Elbasani do të kryejë jashtë vendit. Ndërkohë që drejtuesit e Elbasanit janë shprehur se e kanë mbyllur përfundimisht merkaton për mbrojtjen e mesfushën dhe tashmë e gjithë vëmendja e tyre është përqendruar në sulm. Manovra e radhës nga Laze pritet të jetë gjetja e një sulmuesi potent që të sigurojë një mesatare të kënaqshme golash për pjesën e mbetur të kampionatit, por që për momentin asnjë prej emrave që janë në ndjekje nuk mund të bindë drejtuesit e Elbasanit që të bëjnë hapin e duhur për të afruar një sulmues. Elbasani mund të quhet ekipi më aktiv në merkato, sepse ka bërë disa blerje të rëndësishme, por këto goditje mund të quhet shumë pak efikase nëse Elbasani nuk arrin të blejë një sulmues të aftë për të shënuar gola. Laze e ka më se të qartë se, nëse nuk ndërhyn në merkato sërish për të siguruar ndonjë sulmues, Elbasani i tij nuk mund të shkojë shumë larg nga çfarë pretendojnë vetë kampionët me fillimin e sezonit. Gjithsesi, zëra flasin për një prenotim të Bylykbashit, por duket disi e vështirë, madje në ambientet e klubit kanë besim se fantazisti i të kuqve do të debutojë me Elbasanin më 2 shkurt, pavarësisht ofertave që mund t'i vijnë apo ka në dorë. Vetë djaloshi i rritur te kampionët nuk e hedh poshtë një mundësi të tillë, por për momentin mjaftohet me largimin nga Shqipëria për t'u provuar në Turqi. Që Elbasani pritet të bëjë goditjen e radhës këtë nuk e vë kurrkush në dyshim, por cili do të jetë emri, kjo mbetet për t'u parë, pasi Laze ka ende surpriza në mendjen e tij pas disa përforcimeve serioze që ka bërë këto ditë.

[wxz]

Trajneri Ilir Spahiu tregon programin e stërvitjes dhe planin e ndeshjeve miqësore këtu dhe në Ulqin.

Spahiu: Luftëtari, denjësisht në superligë.


Rrallëherë mund të jetë parë një mobilizim i tillë si këtë herë në vigjilje të pjesës së dytë të kampionatit në kampin e Luftëtarit, ku nuk lihet bosh asnjë ditë. Kështu, edhe pse e hëna është ditë udhëtimi Gjirokastër Ulqin, përsëri Luftëtari ka luajtur një ndeshje miqësore në Ballsh. Kështu sot do të kthehet në Tiranë jo për të pushuar, por për t'u ndeshur me Kastriotin në Kamëz në një miqësore. Pra, të gjitha flasin për një seriozitet të paparë në kampin gjirokastrit, që me çdo kusht do superligën edhe për vitin tjetër. Trajneri i këtij ekipi, Ilir Spahiu, para nisjes për në Ballsh, u shpreh:
Ku qëndrojnë vlerat e miqësores Bylis Luftëtari?
Pas 15 seancash stërvitore, kjo miqësore është një test i domosdoshëm për të parë se në çfarë gjendjeje është skuadra në përgjithësi, si edhe individë të rinj në të. Ky vlerësim do ta ndihmojë stafin për të korrigjuar në të mirë programimin e stërvitjes që do të bëjmë në Ulqin.
Donatorët, që me ardhjen tuaj te Luftëtari, ju kanë premtuar një merkato të fortë dimërore. A po i qëndrojnë këtij premtimi?
Mbrëmë donatori ynë Mihal Delijorgji më telefonoi dhe më dha një lajm të mirë si për skuadrën, ashtu dhe për fansët e saj, se së shpejti do të arrijë në ekipin tonë një sulmues brazilian nga Sao Paolo dhe një organizator afrikan. Kualitetet e tyre do t'i shohim kur t'i testojmë në fushë. Për këtë unë besoj shumë te Delijorgji, sepse korrektësinë dhe besnikërinë e tij po e shikoj dhe e provoj edhe në pika të tjera, për të cilat kemi biseduar përpara ardhjes sime te Luftëtari. Shpresoj të bashkëpunoj gjatë me të.
Çfarë përmban programi juaj deri në mbërritje në Ulqin?
Vetë pozita gjeografike e Gjirokastrës nuk të lejon për të zhvilluar ndeshje miqësore me ekipet e elitës. Për këtë del e nevojshme të shfrytëzojmë zhvillimin e një ndeshjeje miqësore gjatë udhëtimit për në Ulqin. Ditën e hënë do të bëjmë një ndalesë gjatë udhëtimit tonë dhe në kompleksin e futbollit në Kamëz do të luajmë me Kastriotin një miqësore. Edhe në kthim do të luajmë me një nga ekipet e kryqytetit, përveç atyre në Ulqin. Këto ndeshje do të na shërbejnë shumë për formimin e skuadrës sonë.
Pasi zhvilluat testet me futbollistët, cilat janë konkluzionet?
Duke i krahasuar këto me testimet që kam bërë në të njëjtën kohë edhe me skuadrat, të cilat kam drejtuar më parë, si dhe nga informacionet e marra nga testimet e dy skuadrave të tjera të superligës, gjendja e Luftëtarit është e kënaqshme. Duke i vënë ato përballë të dhënave të ekipeve profesioniste të niveleve të larta në Europë, asnjë për fat të keq nuk e kalon "klasën". Kjo është çështje e një mentaliteti amatoresk e mediokër, e një edukate dhe kulture sportive që ka përfshirë të gjithë futbollin e vendit tonë. Dhe kjo ka shkaqet e veta, që vazhdimisht i ndeshim në rubrikën "Forum" të gazetës suaj nga specialistë të mirëfilltë dhe dashamirës të kulturuar të futbollit.
Cilët nga futbollistët bazë nuk do të vijnë në Ulqin dhe përse?
Sulmuesit Muço dhe qendërmbrojtësit Lamaj, për shkak të dëmtimeve që kanë kaluar, u kemi dhënë plane individuale rikuperuese të detajuara. Krahas zbatimit të tij, ata do të mbajnë lidhje edhe me mjekun e tyre specialist. Ngarkesat në Ulqin janë të larta dhe ata nuk mund t'i përballojnë.
Si e ka kryer dhe a është mbështetës kryesor kapiteni për stafin teknik?
Neritan Novi jo vetëm e ka kryer detyrën teknike të tij shumë mirë në fushë, por me sugjerimet dhe eksperiencën e tij së bashku me Norën dhe Dibrën e ndonjë tjetër ka kontribuar maksimalisht në rezultatet e Luftëtarit. Gjithsesi, në fund të fazës përgatitore do të bëhet votëbesimi i kapitenit, apo zgjedhja e kapitenit të ri. Futbollistët së bashku me stafin do të votojnë në mënyrë demokratike. Kapiteni për detyrën ekstra dhe të vështirë që bën do të ketë edhe një pagë të konsiderueshme mujore. Le të fitojë më i miri, ai që i shërben dhe e do më shumë skuadra.
Megjithëse si herët, si e parashikoni të ardhmen tuaj me Luftëtarin?
Në këto momente mendoj së bashku me stafin dhe grupin e mrekullueshëm të futbollistëve të përgatitemi sa më mirë, për të lënë një Luftëtar të denjë në superligë. Në fund të kampionatit do të ulemi me donatorët dhe drejtuesit të analizojmë punën me kujdes dhe, nëse të dyja palët do të jenë të kënaqura pse jo, në rast të kundërt do të shtrëngojmë duart me mirënjohje dhe do të shikoj për një eksperiencë të re.
Jeni trajneri i parë i futbollistit të kombëtares Erjon Bogdani. Çfarë do t'i thoshit nëpërmjet gazetës "Sportit shqiptar"?
Erjonit i uroj suksese dhe të mos ndalet, por mbi këtë majë, me zgjuarësinë, modestinë dhe përkushtimin që ka, të dijë të arrijë në nivele edhe më të larta. Gjithashtu jam i gëzuar që shkoi te një maestro i vërtetë, si Del Neri, filozofinë e të cilit e studioj me kënaqësi edhe unë.

[wxz]

Dje dinamovitët janë mundur 1-2 nga laçianët në miqësoren e zhvilluar në kompleksin "Dinamo".

Daja: Kjo Dinamo, ndryshe nga e 2006-ës.


Para disa ditësh, dinamovitët kishin planifikuar që ditën e shtunë të kryenin një miqësore me Erzenin, por në çastet e fundit plani ka ndryshuar dhe kundërshtari i ndeshjes së djeshme ka qenë skuadra e Laçit. Gjatë këtij takimi dinamovitët kanë provuar dy skuadra, ku në pjesën e parë kanë luajtur senjorët, ndërsa në të dytën janë aktivizuar të rinjtë dhe një lojtar i ardhur nga kontinenti i zi. Takimin e kanë fituar laçianët me rezultatin 1-2, ku pjesa e parë ka përfunduar në barazim 1-1 dhe golin e vetëm për blutë e ka shënuar sulmuesi i sapoardhur nga Maqedonia, Ardian Nuhiu. Miqtë nga Laçi shënuan të parët dhe me fillimin e pjesës së dytë arritën të shënonin edhe golin e fitores, por në përfundim të takimit dinamovitët kanë mbetur të kënaqur nga kjo ndeshje testuese. Sipas drejtorit teknik të Dinamos, Ilir Daja, rezultati përfundimtar nuk jep shkak për t'u alarmuar, pasi trajnerët thjesht eksperimentuan në këtë përballje. Po sipas teknikut Daja, ekipi gjatë ditës së djeshme u mundua të shikojë punën e një jave përgatitjesh intensive dhe me fillimin e pjesës së dytë u pa e arsyeshme që të rinjtë të zëvendësonin skuadrën e parë, sepse 45 minuta ishin të mjaftueshme. "Rezultati i miqësores me Laçin nuk shfaq ndonjë problem, madje në fund kemi mbetur të kënaqur, sepse shumë gjëra janë në rrugën e duhur dhe duke ditur ngarkesën që lojtarët kanë marrë gjatë javës asnjëri nuk mund të jepte maksimumin. Megjithëse dje patë dy Dinamo, përsëri akoma nuk e keni parë ekipin e vërtetë, sepse merkatoja jonë nuk ka përfunduar dhe me kalimin e ditëve gjithçka do të shkojë në rrugën e duhur. Trajnerët po bëjnë një punë të madhe dhe shpresoj se Dinamo e këtij viti do të jetë komplet ndryshe nga ajo e 2006-ës,"- është shprehur për gazetën "Sporti shqiptar" drejtori teknik i bluve të kryeqytetit, Ilir Daja. Dinamo e mbylli pjesën e parë të kampionatit të 68-të me disa probleme, të cilat akoma nuk janë zgjidhur, por sipas drejtuesve dinamovitë, rifillimi i sezonit do ta gjejë skuadrën të plotë. "Gjatë këtyre ditëve kemi afruar dy-tre lojtarë të nevojshëm për repartin e sulmit, pasi dihet se në vijën ofensive kishim probleme dhe tashmë po punojmë me intensitet që të plotësojmë edhe mangësitë në repartin e mbrojtjes. Jemi në bisedime me disa lojtarë, por momentalisht nuk kemi emra konkretë për të publikuar. Përveç përforcimeve të reja, ekipi ka arritur të mbajë edhe ata lojtarë që lakmoheshin nga të tjerët, siç janë Vinçetiç dhe Diop. Momentalisht tek Dinamo nuk ka asgjë për t'u alarmuar dhe, duke filluar nga e hëna, ekipi do të jetë më i plotë dhe rezultatet e kësaj faze të shkurtër përgatitore do të shikohen që në javët e para,"- ka përfunduar drejtori teknik i Dinamos, Ilir Daja.

[wxz]

Dinamo:

Dinamovitët, ndeshje kontrolli dhe palestër
Ndaj skuadrës së Laçit dje dinamovitët kanë provuar pothuajse të gjithë arsenalin e lojtarëve që kanë. Pas përfundimit të pjesës së parë, trajneri-lojtar Redi Jupi së bashku me pjesën më të madhe të futbollistëve që luajtën 45 minutat e para është drejtuar drejt sallës së forcës. Ndërsa fati i Dinamos së pjesës së dytë ka mbetur në dorë të trajnerit Artan Mergjyshi dhe të rinjve të stolit blu. Gjithashtu, trajneri Jupi e ka parë të udhës që në pjesën e dytë të luajnë edhe dy-tre lojtarë që u aktivizuan në pjesën e parë, siç ishte rasti i Arbrit dhe i Merkoçit.

[wxz]

Dinamo:


Nga kampi dinamovit
- Ilir Qorri ka qenë i vetmi futbollist i Dinamos që nuk ka pasur mundësi të luajë dje në ndeshjen miqësore me skuadrën e Laçit. Sulmuesi dinamovit është akoma në fazën e rikuperimit të operacionit të kryer dhe, sipas stafit mjekësor të bluve, është akoma herët që të mendohet për një rikthim të tij në fushën e lojës.
- Enkel Alikaj, mesfushori 24-vjeçar i Dinamos, pas një mungese disajavore, dje ka pasur mundësi që të luajë ndaj një kundërshtari të vërtetë. Dinamoviti e ka lënë pas dëmtimin dhe brenda katër ditësh është aktivizuar në dy ndeshje kontrolli që ka kryer skuadra. Të mërkurën luajti ndeshjen që u zhvillua midis grupit blu, ndërsa dje atë ndaj miqve laçianë.
- Ardian Nuhiu ndodhet te blutë e kryeqytetit prej gjashtë ditësh dhe, megjithëse nuk është në kondicionin e tij më të mirë, përsëri po tregon se e njeh mirë portën e kundërshtarit. Në dy ndeshjet e kontrollit që dinamovitët kanë kryer gjatë kësaj jave, sulmuesi shqiptaro-maqedonas ka arritur të shënojë në të dyja përballjet. Goli i vetëm i Dinamos në takimin e djeshëm me Laçin mban autorësinë e Nuhiut.
- Ganez është kombësia e sulmuesit afrikan që u provua dje nga ekipi i Dinamos. Gjatë ndeshjes së djeshme dinamovitët kanë aktivizuar në radhët e tyre edhe një sulmues nga Gana, i cili ishte i panjohur edhe për vetë stafin trajnues të bluve. Sipas drejtorit teknik të Dinamos, Ilir Daja, ganezi ka ardhur për t'u provuar me blutë dhe pas disa seancave testuese do të jepet edhe përgjigjja përfundimtare për sulmuesin. Megjithëse Dinamo ka në gjirin e saj disa sulmues, përsëri drejtuesit dinamovitë kanë preferuar që ta shikojnë sulmuesin nga Gana dhe, pasi të binden për aftësitë e tij, do të vendosin.

[wxz]

Apolonia, "mbipopullim" në stërvitje.


Aneksi i stadiumit "Loni Papuçiu" dje ka pasur mbipopullim gjatë 120 minutave që është stërvitur ekipi i parë. Përveç stërvitjes tekniko fizike që ekipi i futbollit Apolonia ka zhvilluar në drejtimin e trajnerëve Marko Kurti Balla, në pjesën tjetër të fushës kanë vazhduar edhe futbollistët e rinj, të cilët kanë zhvilluar një lojë 2x30 minuta me ekipin e parë. Dje, krahas futbollistëve tashmë të afirmuar, ka rënë në sy rikthimi i futbollistit Emanuel, i cili një sezon më parë ka luajtur për ngjyrat bardhëjeshile. I pyetur nga "Sporti shqiptar", futbollisti pohon se ka nënshkruar me skuadrën fierake për pjesën e mbetur të ndeshjeve të superligës. Dje kanë marrë pjesë edhe dy futbollistë të tjerë afrikanë, të cilët janë aktivizuar më parë me Laçin e Burrelin. Bëhet fjalë për Udeken dhe Ambrozen, të cilët dje janë provuar nga trajneri Andrea Marko në ndeshjet që u improvizuan. Ajo që bëri më shumë përshtypje gjatë zhvillimit të kësaj minindeshjeje në formacionin e të dy ekipeve, ishte ajo e blerjes më të fundit të portierit Suad Zendeli. Mungesa e tij në ndeshje u justifikua me ngarkesën e lartë që portieri po zhvillon. Jo vetëm ai, por edhe portierët e tjerë, Hazizi e Duro, e kryejnë me mjaft korrektësi stërvitjen e tyre dhe trajnerët janë të kënaqur nga angazhimi i tyre. Sa për statistikë, ndeshja e kontrollit që u zhvillua dje në ambientet e stadiumit u fitua nga ekipi i të rriturve, ku sulmuesi Sebino Plaku shënoi 2 herë, ndërsa për të rinjtë i ri i talentuar 17 vjeçar Rezart Çobo ka shkurtuar diferencën e golave pas pasimit të saktë të Demirit nga krahu i majtë. Apolonia është nga të paktat ekipe që nuk e ka ndryshuar folenë e saj në këtë periudhë përgatitjesh aktive. Deri në këto momente grupi aktual po punon me shumë përkushtim për t'u përgatitur sa më mirë për fillimin e ndeshjeve të superligës. Janë në dispozicion edhe 48 pikë për ekipin bardhejeshil, prandaj edhe futbollistët dhe trajneri janë tepër të motivuar për të bërë më të mirën.

[Mariachi]

Bledar Dura, ai qe injekton besim

14 Janar “Shkeputja e perkohshme nga Besa sigurisht qe s’me ka bere mire. Por keto dite, deri ne rifillimin e kampionatit, jane te mjaftueshme per te kapur formen qe me duhet”

“Me therriti skuadra e qytetit te lindjes, Tomori, ndaj, ne mirkuptim te plote me presidentin e Beses, Nexhat Bizhdili, vendosa qe per kete sezon te luaja ne skuadren beratase. Por gjerat ne vere vjeshten e kaluar nuk kane shkuar ashtu sic duhet, por Besa dhe presidenti i saj ma kishin mbajtur deren hapur. Me ka gezuar e ngrohur respekti, qe tifozeria kavajase ka treguar per mua pak dite me pare, kur u riktheva te Besa”. Keto jane fjalet e para te “gardianit” beratas te portes se Beses, 27 vjecarit Bledar Dura, qe ka percjelle mesditen e djeshme nga Ulqini, permes linjes telefonike. “Ketu, ka pohuar Dura e ndiej sa me ka kushtuar shkeputja nga Besa, ndersa me duhet ta “vras” sa me shpejt nje mbipeshe te krijuar”. Megjithate, ai ka besim se koha ne dispozicion, deri ne rifillimin e kampionatit, eshte e mjaftushme per te arritur formen e duhur sportive.

Dura, dita e pare e stervitjes ne Ulqin; si po ju duket?

Se pari, moti ketu eshte si behar. Ben ngohte, kurse kushtet e akomodimit jane te shkelqyera. Po ashtu edhe fusha e ne teresi gjithe infrastruktura, ku do te zhvillojme kete faze pergatitore, jane shume te mira.

Po gjendja juaj?

Do te duhet te punoj me impenjim maksimal, sepse dua ta “vras” sa me shpejt ate pak “mbipeshe”, te krijuar gjate muajve qe u shkeputa te Tomori. Megjithate, duke shfrytezuar kohen qe kemi ne dispozicion, deri ne rifillimin e ndeshjeve te kampionatit, jam i sigurt se do te vihem shpejt ne gatishmeri per skuadren.

Kur u larguat nga Besa, s’kishit konkurrent, kurse tani eshte tjeter situate...

E di ku ku e keni fjalen. Koleget e mi portiere, me te cilet stervitemi te Besa se bashku, i njoh dhe i respektoj shume. Ne kemi nje qellim te perbashket, qe te mbrojme denjesisht porten e Beses. Shanset jane te hapura per secilin, ne porte le te rrije me i miri, ai qe e meriton.

Thuhet se ne Ulqin Besa do te luaje disa ndeshje miqesore...

Mezi pres te vendosem ne porte, ne mes te shtyllave te katerkendorit “magjik”, qe ma ka rrembyer zemren e pasionin tim me te madh. Dua te justifikoj besimin qe me eshte dhene dhe pikerisht ndeshjet miqesore jane nje shans i mire, per te pare nga afer gjendjen. Por, i kam vene vetes si qellim qe me fanellen e Beses te jem sa me i nderuar.

Teper optimist Dura, ne kete rrefim te pare...

Cilitdo futbollist, kjo fryme eshte e para, qe i kerkohet te percoje per veten dhe te tjeret.

Intervistoi: FATMIR EFICA

[Mariachi]

Disiplina: Abazaj, lojtar i lire

14 Janar Oriand Abazaj eshte nje lojtar i lire. Ka qene ky edhe vendimi i djeshem i Komisionit te Disiplines, i mbledhur vetem per kete ceshtje, ne Federaten Shqiptare te Futbollit. Pas shqyrtimit te dokumentacioneve perkates, te ardhura ne FSHF, duke marre parasysh edhe kerkesen e klubit te Kastriotit, KD ja ka vendosur te shpalle lojtar te lire, sulmuesin tiranas, duke e cliruar ate nga kontrata aktuale, me klubin krutan. “Lojtari ka pasur nje kontrate, sipas se ciles ai mund te largohej, nese trajneri i Kastriotit asokohe, Ramadan Ndreu, nuk do te ishte me ne krye te pankines. Fakti qe kjo ka ndodhur dhe trajner tashme eshte Haxhia, i jep lojtarit te drejten qe te prishe kontraten me klubin, pa asnje detyrim ndaj tij”, ka thene zedhenesi per shtyp i FSHF se, Lysien Nurishmi. Megjithate, pavaresisht vendimit te Disiplinorit, KS Kastrioti ka pohuar se do te kerkoje drejtesine per lojtarin ne Apel, i cili pritet te mblidhet pas pese ditesh.

Gj.C

[wxz]

Trajneri Faruk Sejdini, pavarësisht vështirësive, shprehet se do të tentohet për ta mbajtur ekipin në superligë.

Sejdini: Shkumbini s'dorëzohet deri në fund.


"Unë kam besim të plotë se do të arrijmë ta kalojmë këtë situatë të vështirë dhe do të arrijmë të rehabilitohemi. E them me sinqeritet se, nëse nuk do ta kisha këtë besim, nuk do ta kisha marrë përsipër drejtimin e ekipit, por do të isha larguar me kohë." Këto janë fjalët e trajnerit Sejdini, i cili prej 10 ditësh po zhvillon fazën përgatitore me ekipin e Shkumbinit. Për "Xhaxhin", kjo përgatitore po zhvillohet mjaft mirë dhe, sipas tij, kjo stërvitje nuk do të ketë asgjë mangët krahasuar me ekipet e tjera në marrjen e ngarkesave fizike. Ai u bën thirrje futbollistëve që në këtë periudhë të ngarkuar përgatitjeje të ndërgjegjësohen për të sakrifikuar diçka.
Pas 10 ditësh stërvitje me grupin e futbollistëve, cili është mendimi i Sejdinit?
Po ta analizojmë në tërësi, mendoj se puna e bërë këto ditë është normale dhe më bën optimist. E them këtë për faktin se gjithçka ka shkuar mirë këto ditë të ngarkuara, duke mos pasur dëmtime apo trauma. Pra, futbollistët po e kalojnë ashtu si duhet nga ana profesionale dhe po e përballojnë mirë stërvitjen. Kjo të jep njëfarë garancie për të vazhduar në këtë mënyrë dhe për të vënë një gur themeli të fortë, të paktën fizikisht. Mendoj se këtë do ta arrijmë. Sigurisht, ekipi ka nevojë për moral dhe presim të korrigjojmë diçka në ditët që kemi përpara.
Po stërvisni të njëjtët futbollistë që keni pasur. Ky do të jetë grupi me të cilin do të përballoni pjesën e mbetur të kampionatit?
Për mua, ky grup është baza e ekipit, por mendoj se do të vijnë edhe 2 3 lojtarë të tjerë. Jemi në bisedime me disa futbollistë që i mendojmë të vlefshëm për ekipin. Të shohim se sa do t'ia arrijmë për ta kompletuar ekipin nga ana fizike dhe profesionale. Duke i parë si punojnë e stërviten, unë si trajner kam besim se do të kemi një armë të fortë, anën fizike, dhe me 2 3 përforcime do të jemi në gjendje ta kalojmë këtë situatë të vështirë.
A nuk janë të vonuara këto përforcime?
Normale është që ata duhej të kishin ardhur, por mendoj se këtu ku jetojmë gjërat nuk shkojnë si në vaj dhe s'mund të shmangemi nga këto aspekte të jetës. Vështirësitë pra janë të shumta, por unë do të bëj çmos që kur t'i kemi në ekip, të përshtaten sa më shpejt. Mendoj se ata do të jenë të përgatitur, ngaqë nuk vijnë nga rruga dhe ne do të shfrytëzojmë kohën që kemi përpara për t'u bashkuar me pjesën tjetër.
Ndërkohë që të tjerët kanë "shtegtuar" jashtë shtetit për kushte më të mira, Shkumbini po e zhvillon përgatitoren në Peqin. A përbën kjo pengesë për objektivat?
E mira dihet që nuk ka fund, por unë përpiqem të shfrytëzoj kushtet që kam, duke marrë maksimumin e mundshëm. Eshtë logjike se një grumbullim në një qendër stërvitore për 10 15 ditë do të ishte shumë më mirë. Megjithatë, ne po punojmë që në kushtet tona të mos i lëmë asgjë mangët stërvitjes, duke e krahasuar me të tjerët. Po përpiqem me shumë "finesë" që futbollistët të arrijnë të marrin ngarkesën dhe kam besim të plotë se do ta arrijnë. Futbollistët duhet të jenë të kujdesshëm edhe në jetën e tyre private, me regjimin e tyre familjar. Kam folur me lojtarët, duke kërkuar prej tyre të "sakrifikojnë" në këtë periudhë me ngarkesa fizike nga jeta e tyre private e familjare për t'iu përkushtuar përgatitjes. Vetëm kështu mund t'i parandalojmë dëmtimet dhe traumat.
Sa të vështirë e ka Sejdini të realizojë këto gjëra, kur ekipi bën vetëm një seancë stërvitore në ditë?
Mendoj se çdo ekuacion ka zgjidhjen e vet dhe unë në këto kushte kam bërë zgjidhjen më të mirë. Askush të mos ketë dyshimin më të vogël për marrjen e ngarkesës së duhur nga futbollistët. Ata do të stërviten njëlloj si ekipet e tjera. Sigurisht, futbollistët do ta ndiejnë lodhjen në darkë, por të nesërmen, duke bërë më të mirën, do të jenë përsëri të gatshëm. Them se kështu do të marrin ngarkesën dhe nuk besoj se do të gabojmë në këtë drejtim.
Shkumbini ka një pozicion jo të mirë, në vendin e parafundit dhe 7 pikë i shkëputur nga Besa e vendit të dhjetë. Mendoni se do të arrihet të kalohet kjo situatë e vështirë?
Që të jem i sinqertë, unë kam besim të plotë se do ta kalojmë këtë situatë dhe do të arrijmë të rehabilitohemi. Shkumbini nuk e meriton në fakt vendin që ka. Mjafton të shohësh ndeshjet, lojërat, apo rezultatet në këto momente të vështira dhe do të konstatosh se këto janë rezultate të shtrënguara, kanë qenë rezultate e lojëra të baraspeshuara edhe me kundërshtarë të fortë. Kjo tregon se ekipi ka pasur nevojë për një lloj eksperience, për një lider që të arrijë të mbajë timonin. Them se në këtë fazë kjo gjë do të korrigjohet, sepse kemi ende kohë.

[wxz]

Shkumbini:


Shkumbini fiton 1 0 miqësoren me Sopotin
Shkumbini ka fituar me rezultatin e ngushtë 1 0 ndeshjen e parë e miqësore. Përballë tij dje pasdite ka qenë ekipi i Sopotit të Librazhdit, që luan në kategorinë e parë. Për ekipin e Sejdinit kjo ishte miqësorja e parë në ditët e fazës përgatitore që po e zhvillon në Peqin dhe që u fitua me vështirësi. Goli i vetëm i takimit u shënua në minutën e 22-të nga sulmuesi Rizvanolli, pas kombinimit me Bubeqin.

[wxz]

Trajneri i kombëtares Shpresa shprehet se duhen shfrytëzuar në maksimum këto dy takime miqësore.


U grumbullua dje rreth orës 13:00 ekipi kombëtar Shpresa. Ky grumbullim bëhet në kuadër të dy takimeve miqësore që do të zhvillojë përfaqësuesja jonë, me Turqinë më 17 janar dhe me Greqinë më 6 shkurt. Mernin pjesë 16 futbollistë, të cilët bashkë me stafin teknik u nisën drejt kompleksit të ekipeve kombëtare, në Kamëz, ku u zhvillua një stërvitje e lehtë. Pas mbarimit të procesit stërvitor, ekipi u nis drejt Durrësit, për t'u akomoduar në hotel "Leonardo", ku dhe u kalua nata e djeshme. Mungonin në këtë grumbullim futbollistët që aktivizohen në kampionatet e huaja, si Enea Koliqi, Henri Shiba dhe Mërgim Mavraj. Sipas trajnerit Artan Bushati, futbollistët Koliqi dhe Shiba do të udhëtojnë direkt për në Stamboll dhe janë të gatshëm për takimet miqësore, ndërsa mbrojtësi kosovar Mërgim Mavraj nuk u lejua nga klubi ku aktivizohet, pasi skuadra e tij ka aktivitet zyrtar gjatë këtyre ditëve. Ndërkohë, sot, në orën 15:00, bëhet edhe nisja për në Stamboll, ndërsa të martën, në orën 14:00, do të zhvillohet ndeshja me Turqinë, në stadiumin "Bahceliver". Në një prononcim për gazetën "Sporti shqiptar", trajneri i kombëtares Shpresa, Artan Bushati, shprehet se takimet miqësore do të jenë një test i rëndësishëm për futbollistët e thirrur. "Këto dy takime miqësore do t'i vlerësojmë si shumë të dobishme dhe duhet t'i shfrytëzojmë në maksimum. Objektivi ynë është që futbollistët të japin më të mirën e tyre dhe të zhvillojnë një lojë të bukur. Ky është një testim që do na vlejë shumë. Natyrisht, ne nuk shpresojmë për rezultate, por e rëndësishme është që të paraqesim vlerat tona më të mira dhe të shpresojmë për një lojë të bukur. Grupi pothuajse është i plotë, përveç mbrojtësit Mavraj, i cili nuk është i gatshëm, pasi nuk e la klubi. Megjithatë, ky futbollist do të grumbullohet në "zborin" që do të zhvillojë kombëtarja në Antalia. Ndërkohë mund të them se kisha dëshirë të thirrja sulmuesin Leutrim Neziraj, pasi është një lojtar i spikatur. Problemi është se ai nuk zotëron ende një pasaportë shqiptare, por edhe klubi nuk u tregua i gatshëm. Megjithatë, pasi të përfitojë pasaportën, Neziraj do t'i bëjë shumë punë, si ekipit Shpresa, gjithashtu edhe ekipit kombëtar,"- deklaroi Bushati. Ndërkohë, në këto takime janë thirrur disa lojtarë, të cilët debutojnë me kombëtaren Shpresa. Sipas Bushatit, lojtarë të tillë, si Malindi, Karabeci, Progri, Çaushaj, Tafili etj., po spikatin me lojën e tyre." Ne jemi duke menduar për perspektivën e këtyre lojtarëve dhe e jo për momentin,"- përfundoi fjalën e tij trajneri i përfaqësueses Shpresa, Artan Bushati.

[wxz]

Trajneri i Apolonisë nxit të gjithë për mundësitë që ka ekipi fierak për të mbijetuar.


E shtuna ka mbyllur javën e parë që trajneri tiranas Andrea Marko ka kaluar me ekipin e tij Apolonia. Edhe pse trajneri i fierakëve kishte udhëtuar gjatë gjithë natës nga Athina, në procesin stërvitor ishte tepër energjik dhe i motivuar për të dhënë maksimumin e tij në këtë stërvitje. Ecuria e ekipit, problemet dhe merkatoja ishte biseda që zhvilluam menjëherë pas përfundimit të stërvitjes.
Keni mbyllur javën e parë që jeni në drejtim të skuadrës bardhëjeshile. Ç'mund të na thoni tashmë që keni krijuar një tablo më të saktë?
Sot zhvilluam një stërvtije tekniko fizike, e cila u mbyll me një ndeshje 2x30 minuta, që u improvizua për të parë më afër lojtarë të caktuar dhe për t'iu afruar grupit që do të përzgjedhim për vazhdimin e superligës. Duke qenë i përbërë kryesisht prej futbollistësh të rinj, gabimet gjatë lojës ishin të shumta, por ne po prisnim edhe kontigjentin tjetër, sepse deri në këto momente po punojmë me grupe lojtarësh, të cilët mund të mos jenë pjesë përbërëse e skuadrës, apo planet tona. Kuptohet që synimet tona janë të qëndrojmë në superligë dhe në funksion të saj po ndërtojmë edhe grupin që do të përbëhet nga futbollistë cilësorë. Mendoj se këto dy javë që kanë mbetur do të rrisim intensitetin, pasi koha nuk premton. Na dëmtojnë shumë ardhjet me vonesë, pasi brazilianët që do të vijnë pas disa ditësh na krijojnë një disekuilibër. Rifillimi i ndeshjeve të superligës që do të shfaqin qysh në ndeshjen e parë ngarkesa psikologjike. Eshtë normale që një ekip i përgatitur sa më mirë është më i aftë për të kaluar me sukses këtë gjendje, prandaj them se çdo vonesë na krijon vështirësi në skuadër.
Krahas përgatitjeve tuaja, a keni menduar të zhvilloni ndeshje miqësore?
Kemi menduar për të zhvilluar takime të tilla, sepse dalëngadalë e kam krijuar idenë për lojtarët që do të stërviten dhe natyrisht që, duke filluar nga ndeshja e lehtë, tek ajo më e vështirë, do të kemi një informacion më të plotë për çdo futbollist. Mund të luajmë ndeshje edhe me skuadra një kategori më inferiorem se ne, për të krijuar një raport psikologjik të mirë dhe së fundi besoj se java e ardhshme do të jetë java e ndeshjeve miqësore. Besoj se do të zhvillojmë 3 4 të tilla për të parë edhe futbollistët që do të na vijnë. Nëse futbollistët që janë planifikuar do të jenë të gatshëm jo vetëm në aspektin fizik, por edhe atë teknik, besojmë se do t'i hapim rrugën e afrimit të tyre. Ne nuk kemi nevojë ta mbushim ekipin me lojtarë fallxhinj, që mund të na thonë jemi nga "x" shtet, apo "y" kontinent.
A është optimist Andrea Marko që Apolonia do të mbijetojë në superligë?
Nuk ka në botë asnjë futbollist apo trajner që nuk është optimist. Nuk kemi pse të jemi pesimistë ne që merremi me sport. Ne do të mundohemi që në skuadër të fusim mentalitetin e fituesit. Besoj se deri në momentin e fundit do të bëjmë maksimumin tonë. Unë kam besim të jashtëzakonshëm se skuadra do të japë maksimumin e saj dhe shpresojmë që këtë objektiv që kemi do ta realizojmë.

[wxz]

Haxhiaj: Kastrioti, për të tashmen dhe të ardhmen.


Trajneri Petrit Haxhia, pas një heshtjeje të gjatë për mediat, ka vendosur të flasë për ekipin krutan që ai po ndërton së bashku me presidentin Shkëlzen Zhilli. Në pjesën e parë të kampionatit ai ka marrë një ekip që ishte i kompletuar nga paraardhësi i tij, Ramadan Ndreu. Ndërsa tashmë i duhet atij të "arnojë" ato reparte të ekipit që kanë shfaqur probleme. Lidhur me prurjet që ka bërë presidenti Shkëlzen Zhilli, trajneri Haxhia shprehet: "Kemi operuar së bashku dhe unë jam dakord me futbollitët që presidenti është marrë vesh me ta. Po kështu, ne po shikojmë gjetjen edhe të futbollitëve të tjerë që i duhen ekipit për të ecur përpara. Ajo që mua më bën të jem optimist është fakti që ka një mjedis që të lë të punosh dhe mbi të gjitha i angazhuar për të ndërtuar një ekip sa më serioz dhe potent për të përballuar kampionatin me sukses. Vendi në klasifikim nuk është komod për ne, pasi synojmë ngjitjen në klasifikim. Nëse ekipi ka bërë ndonjë hap fals gjatë fillimit të kampionatit, tani nuk lejohen më. Së bashku me Zhillin po ndërtojmë një ekip që i përket së tashmes dhe së ardhmes. Me afrimin e lojtarëve cilësorë dhe njëkohësisht me vazhdimin e prurjeve të lojtarëve të tjerë, që presidenti ka në plan, them që po ndërtojmë një Kastriot që do të jetë një "kockë" që nuk do të kapërdihet nga ekipet e tjera. Unë deri tani jam mjaft i kënaqur me gjithçka që po ndodh me ekipin e Kastriotit dhe lojtarët që kanë ardhur deri në këto momente." Trajneri krutan nuk ka dashur të ndalojë në emrat e futbollistëve që kanë ardhur dhe do të vijnë te Kastrioti, duke mos dashur t'i bëjë publikë, por gjithsesi mendimi i tij është marrë nga ana e Zhillit dhe e stafit që drejton ekipin krutan.

[wxz]

Sot Luftëtari u nis për në Ulqin, ndërkohë që do të stacionohet rrugës në Tiranë.


Luftëtari të shtunën në Ballsh zhvilloi ndeshjen e parë për vitin 2007, një ndeshje miqësore me skuadrën vendëse Bylis, ku dhe humbi 2 1. Kuptohet që edhe pse ndeshja nuk është luajtur në kuadrin e ndonjë veprimtarie zyrtare, prapëseprapë ajo la shije të hidhur, ndërkaq vërteton në njëfarë mënyre se, duke përjashtuar formacionin bazë të Luftëtarit, që dhe ky jashtë fushe ka vetëm dy barazime në kampionat, lojtarët e tij të stolit nuk janë të aftë për të përballuar ndeshje në superligë derisa në ndeshjen në fjalë, që u përdorën me shumicë, me një skuadër jo të superligës, arritën vetëm të humbasin. I themi këto edhe pse kjo është një ndeshje e vetme, sepse duke u rikthyer në ndeshjet e Luftëtarit në kampionat, rezulton se ai jashtë fushe nuk ka mundur të fitojë ndonjë ndeshje dhe, si të thuash, edhe këtë ndeshje miqësore nuk u çlirua nga ajo hije e ftohtë që lëshon fusha e huaj. Këtyre mund t'u shtohet edhe fakti që ndeshjen Luftëtari e luajti pasi kreu rrugën e vështirë Gjirokastër Ballsh, por edhe faktin tjetër që lojtarët janë kujdesur që të mos dëmtohen dhe kësisoj të humbasin grumbullimin 11-ditor në Ulqin. Nisja u bë sot më 15 janar dhe kthimi do të bëhet më 27 janar. Sot Luftëtari u nis për në Ulqin, ndërkohë që do të stacionohet rrugës në Tiranë, ku në Kamëz do të luajë ndeshjen e dytë miqësore me kundërshtar Kastriotin dhe pastaj do të vazhdojë më tej udhëtimin relativisht të gjatë. Të shtunën, pas ndeshjes në Ballsh, futbollistët gjirokastritë dhe dy ndihmëstrajnerët u kthyen në Gjirokastër, kurse jogjirokastritët u shpërndanë në vendbanimet e tyre për t'u bashkuar sot në Kamëz, ku i pret edhe Spahiu. Ndihmëstrajneri Hysi, në lidhje me ndeshjen në Ballsh, u shpreh se ekipi luajti i paimpenjuar dhe u bënë shumë ndërrime, si dhe nuk ishte objektiv rezultati sesa studimi i disa lojtarëve. Po ashtu, Hysi shtoi se në Ulqin do të bëjmë një përgatitje serioze dhe të gjithanshme për të përballuar me sukses pjesën e dytë të kampionatit, me qëllim të mbyllim këtë sezon duke iu gëzuar superligës.

[wxz]

Kampionët, të ftuar në prefekturë.

Prefektja e qarkut të Elbasanit ka ftuar sot (dje) paradite të gjithë ekipin kampion në zyrën e saj. Hasekiu ka theksuar se kërkon që t'i urojë për vitin e ri futbollistik, ku theksoi se ka besim që Elbasani me Lazen në krye do të shpallet përsëri kampion.


Verdheblutë në Hercegnovi të Malit të Zi
Elbasani do të niset sot në mesditë drejt Malit të Zi në Hercegnovi, aty ku është akomoduar edhe Vllaznia. Verdheblutë do të qëndrojnë atje 10 ditë, ku do të zhvillojnë minifazën përgatitore nën drejtimin e Gëzdarit.

Elton Ceno firmos me Besëlidhjen
Sulmuesi Elton Cnero largohet përfundimsht nga Elbasani. Sulmuesi në fjalë ka nënshkruar një kontratë me ekipin e kategorisë së parë, Besëlidhjen, dhe sot ai do t'i bashkohet ekipit lezhjan. Dje në mesditë Ceno mori edhe lejekalimin nga Elbasani. Ndërkohë që sot pritet të largohen nga verdheblutë edhe gjashtë futbollistë të tjerë, emrat e të cilëve nuk bëhen të ditur.

[wxz]

Trajneri i portierëve të verdhebluve tregon lidhjen e pandashme që ka me ekipin.


Në një intervistë për "Sportin shqiptar", Bujar Gogunja, ish kampioni i '84 ës me Labinotin, ka rrëfyer emocionet e kthimit sërish me kampionët në postin e trajnerit të portierëve të Elbasanit. Gogunja thotë se ndihet i lumtur që është kthyer dhe kërkon revanshin e ekipit të tij, pavarësisht pozicionit jo të mirë aktualisht në renditje, kur në këtë kohë ekipi i tij udhëhiqte me sukses.
Gogunja, një kthim i shpejtë në ekipin që e shpallët vjet kampion...
Me këtë rast dua të falënderoj stafin drejtues të Elbasanit, si dhe presidentin Laze për besimin dhe mundësinë që më dha. Ndonëse duhet të shtoj se, kur u largova, isha tepër i dëshpëruar. Ekipin e të rinjve e kam në vendin e parë, kështu që mendoj se Gogunja e ka kryer më së miri punën e tij edhe si trajner i parë. Shpresoj që ky kthim të kthejë titullin sërish në Elbasan.
Elbasani ka lëshuar shumë terren dhe ka zbritur disa shkallë. E shikoni të arritur titullin?
Gjithçka është e realizueshme në këtë botë dhe mundësitë nuk janë të pakta. Unë nga eksperienca ime mund të them se gjithçka arrihet nëse punohet me shpirt e përkushtim. Na pret një vit i vështirë, që rrugës me siguri do të prodhojë surpriza të mëdha. Elbasani, me ndryshimet që ka bërë në merkato, mendoj se ka sjellë një frymë të re në grup që pa dyshim do të synojë më lart.
Atëherë Elbasani do të ketë si objektiv titullin?
Pa dyshim që ne do të luftojmë për titullin, por edhe vendi i dytë nuk besoj se është i keq, pasi na jep mundësi që të luajmë për të tretin vit radhazi në kupat e Europës. Unë mund të them se përforcimet e fundit na kanë dhënë një tjetër mentalitet dhe për këtë kemi kohë që të punojmë për të arritur rezultate.
E kishit menduar një kthim kaq të shpejtë tek Elbasani?
Unë punoj për të mirën e futbollit. Në qoftë se deri dje isha trajner i ekipit të të rinjve, këtë e bëra me pasion, sepse nuk më detyruan të tjerët. Kështu që dhe kthimin tim sërish si trajner i portierëve të Elbasanit do ta bëj me shumë dëshirë. Të them të drejtën, nuk e kisha menduar këtë kthim të shpejtë, por jam i lumtur që jam kthyer.
Në merkato së fundi ekipi është mbipopulluar, por sulmi çalon, apo jo?
Drejtuesit e merkatos së Elbasanit e dinë fare mirë këtë gjë. Pastaj është i pari Gëzdari, kështu që mendoj se ai e di më mirë për çfarë futbollistësh ka nevojë ekipi. Mendoj se edhe në sulm do të bëhet merkato.

[wxz]

Sulmuesi shqiptaro-maqedonas u premton tifozëve blu shumë gola.


Ish-futbollisti i Rabotniçkit, Ardian Nuhiu, ndihet i kënaqur te skuadra blu e Tiranës. Po kështu, me përforcimin e Ardian Nuhiut, sulmi i Dinamos ka shumë mundësi që të bëjë kthesën e duhur, i cili, sipas mediave në Shqipëri, është më i kritikuari në 17 javët e para të kampionatit të superligës. Nuhiu, prej së një jave, edhe zyrtarisht ka filluar stërvitjen me ekipin e tij të ri, Dinamo e Tiranës. Siç e dimë, me këtë klub, sulmuesi shqiptar, njëherësh edhe kohë pas kohe pjesëtar i kombëtares së Maqedonisë, nënshkroi në dhjetor të vitit 2006, ndërsa erdhi nga radhët e kampionit aktual maqedonas, Rabotniçki. Ardiani, siç përmendëm më lart, të hënën e javës që shkoi filloi stërvitjen me ekipin e tij të ri, ku po zhvillon dy seanca në ditë. Për impresionet e para, mënyrën se si është pranuar në mjedisin e ri dhe kushtet, të cilat i posedon klubi i Dinamos, zhvilluam një bisedë të shkurtër me futbollistin Ardian Nuhiu.
Ardian, na trego edhe një herë si ndodhi që të transferoheshe në ekipin e Dinamos së Tiranës?
- Në përfundim të pjesës së parë të kampionatit, vendosa që të ndryshoj ambient dhe me ndihmën e Artim Pollozhanit dhe Suat Zendelit, bisedova me presidentin e Dinamos, Besnik Sulaj. Me të rashë dakord për të firmosur një kontratë 6 mujore, me opsion shtyrje edhe për sezonin tjetër.
- Si u prite në mjedisin e ri?
- Duke filluar prej stafit të trajnerëve, edhe nga lojtarët, në mjedisin e ri jam pritur shumë mirë dhe ia kam kaluar tepër mirë. Shpresoj që kështu të vazhdojë deri në fund.
- Ke zhvilluar gjithsej 6 ditë stërvitje. Na trego diçka për to?
- Trajneri Redi Jupi, me thënë të drejtën, po zbaton stërvitje shumë interesante. Po stërvitemi nga dy herë në ditë në kompleksin e klubit. Unë po luaj në sulm. Mes stërvitjeve pushojmë te kompleksi i klubit, i cili posedon kushte të jashtëzakonshme, ndërsa temperatura këto ditë arrin deri më 15 gradë.
- The që je pranuar shumë mirë nga të gjithë në klub. Me cilin prej lojtarëve rri më tepër?
- Nuk i njoh ende mirë të gjithë. Me kroatin Goran Vinçetiç jam shok dhome, ndërsa, me portierin Lika jam më tepër i lidhur.
- Çfarë iu premton tifozëve të Dinamos?
- Jam i gatshëm të kontribuoj për Dinamon që nga ky moment. E di se do të kem një mision të vështirë te Dinamo, mirëpo jam mësuar me këto sfida. Tifozëve u premtoj paraqitje të mira dhe kuptohet shumë gola.
Nga Shkupi, Bujar KURTAJ

[wxz]

Presidenca blu është e kënaqur nga gjendja e ekipit të tanishëm, që drejtohet nga trajneri-lojtar.


Skuadra e Dinamos është e përfshirë nga ethet e merkatos, sepse presidenca blu ka premtuar që gjatë kësaj periudhe do të ndërtojë një ekip që të mos ketë të meta. Megjithëse sulmi duket i stabilizuar, përsëri dinamovitët vazhdojnë të testojnë lojtarë të këtij sektori. Ndërsa në ditët e mbetura drejtuesit dinamovitë presin që të blindojnë edhe vijën difensive. Sipas zv.presidentit të bluve, Avni Braçe, përgjegjësit e merkatos po bëjnë të pamundurën që të afrojnë edhe disa përforcime të tjera, ku theksi kryesor është në mbrojtje. Po sipas zotit Braçe, nuk përjashtohet mundësia që përforcime të ketë edhe në repartet e tjera, por strategjia e drejtuesve blu është që të mos përmendë emrat e të lakmuarve të tyre, sepse nuk duan të kenë interferime gjatë punës. Presidenca e Dinamos ka menduar të ndjekë këtë rrugë në merkato, sepse përvoja ka treguar se kur publikohet interesimi për një lojtar, artificialisht fillon të rritet pazari. Rasti më konkret është ai i sulmuesit Oriand Abazaj, me të cilin drejtuesit dinamovitë ishin pranë arritjes së akordit, por zërat pas kuintave e kanë lënë atë akoma pa skuadër. Dinamo e Redi Jupit ka fituar zemrat e drejtuesve dinamovitë dhe, po t'i pyesish, ata të përgjigjen me superlativat më të mëdha. "Dinamo e Jupit është në rrugë të mbarë dhe shpresojmë që në përfundim të sezonit ekipi do të realizojë pjesën më të madhe të objektivave të tij. Trajnerët aktualë të skuadrës kanë sjellë një frymë tjetër në skuadër dhe me punën e përkushtuar të tyre po ia ndryshojnë imazhin skuadrës. Dinamo nuk është ekip që mjaftohet me vendin e gjashtë, prandaj synimi ynë është që në pjesën e mbetur të sezonit të fillojë ngjitja drejt kreut, sepse vendi i vërtetë i bluve është podiumi,"- deklaroi për gazetën "Sporti shqiptar" zv.presidenti i Dinamos, Avni Braçe. Megjithëse blutë e kryeqytetit u ndëshkuan në miqësoren e së shtunës nga ekipi i Laçit, drejtuesit blu janë të kënaqur nga skuadra e tyre dhe falënderimet më të mëdha janë për kontributin që trajneri-lojtar, Redi Jupi, po jep për ndërtimin e Dinamos së vërtetë. Optimizmi i drejtuesve dinamovitë pritet të përligjet në pjesën e mbetur të sezonit dhe, sipas tyre, Dinamo do t'i shkundë 16 javët e mbetura të sezonit. Nëse në 17 javët e para Dinamo çaloi në disa aspekte e ardhmja e bluve, sipas kupolës drejtuese, është premtuese. Me sa duket, trajneri Jupi ka dorë të lirë për të vendosur në ekipin e tij dhe mbi të nuk ka ndonjë presion e trysni që ta shtyjë timonierin blu për të bërë sforcime në punën e tije.

[wxz]

Faza përgatitore e bluve të kryeqytet ka ngarkesë, por futbollistët e pranojnë strategjinë e trajnerit.


Viti 2007 e ka gjetur skuadrën e Dinamos me mëngë të përveshura, sepse paraqitja e skuadrës në gjysmën e parë të sezonit nuk ka qenë ajo që pritej dhe kërkohej. Stoli i vakët i 17 javëve të para të kampionatit të 68-të kombëtar i ka detyruar drejtuesit dinamovitë që të lëvizin dhe përforcimet e para tashmë janë të dukshme. Trajnerët Redi Jupi dhe Artan Mergjyshi shpresojnë që boshllëqet e ekipit të plotësohen, por njëkohësisht kanë ngritur një strategji të fortë për këtë fazë përgatitore. Në dy javët e para timonierët blu kanë vendosur që t'i "shtrydhin limonat" e tyre, sepse sipas analizave të para ka rezultuar se ata nuk janë aty ku duhet. Të gjithë dinamovitët janë të shtrënguar të përgatiten dy herë në ditë dhe të zbatojnë një disiplinë të hekurt në stërvitje. Sipas kapitenit dhe "gardianit" të ekipit të Dinamos, Ilion Lika, kjo metodë punë është e justifikueshme, sepse vetëm me punë mund të arrihen sukseset. "Dinamo në këtë sezon nuk ka pasur vazhdimësi të mirë dhe kjo rrugë duhej ndryshuar sa më parë. Gjatë kësaj periudhe kemi pasur edhe disa vështirësi, pasi na mungonin alternativat në stol, por merkatoja e këtyre ditëve do t'ia ndryshojë fytyrën ekipit. Tashmë për skuadrën kanë firmosur disa lojtarë si Mile, Merkoçi, si dhe sulmuesi tjetër, Ardian Nuhiu, prandaj mendoj se problemet e sulmit janë zgjidhur. Por përsëri kemi shumë për të bërë në këtë repart, sepse, sipas informacioneve që kam, sulmuesi shqiptaro-maqedonas vjen pas një dëmtimi dhe akoma nuk është në maksimumin e tij, gjithashtu kemi edhe të dëmtuar në këtë sektor. Tashmë prioriteti i merkatos sonë është përqendruar në përforcimin e mbrojtjes dhe nëse këtë e plotësojmë si vijën sulmuese, atëherë Dinamo është në rrugën e duhur. Fazën përgatitore e kemi nisur me një ngarkesë të rritur dhe mendoj se po veprohet drejt nga trajnerët, sepse pa u lodhur nuk arrihen sukseset dhe le të na shërbejë kjo periudhë për të na kompletuar në të gjitha aspektet,"- shprehet për gazetën "Sporti shqiptar" dinamoviti Ilion Lika.

[wxz]

Ditën e diel, në orën 14:00, skuadra e Flamurtarit është nisur drejt Ulqinit për të vijuar më tej stërvitjen përgatitore të dimrit. Rreth orës 18:00, pas një udhëtimi të gjatë, grupi prej 30 vetash, mbërrin përpara hotelit "Olimpik" në Ulqin, në të cilin do të akomodohen vlonjatët. Sipas trajnerit Vasil Ruci, janë marrë të gjitha masat tekniko organizative jo vetëm për akomodimin, por edhe për ambientet në të cilat do të stërvitet skuadra. Në Ulqin, Flamurtari do të kryejë një periudhë 10-ditore, duke organizuar një stërvitje intensive komplekse. Në përbërje të grupit bëjnë pjesë 25 futbollistë dhe 5 pjesëtarë të stafit teknik të skuadrës.

Përjashtohet Roxheri nga radhët e vlonjatëve
Sipas informacionit të dhënë nga sekretari i Flamurtarit, Ilir Metaj, bëhet e ditur se mesfushori Bokatola është kthyer në Vlorë ditën e diel, ndërsa është komunikuar me Delainin. "Në fundjavë është kthyer në Vlorë mesfushori Bokatola, i cili ka munguar nga stërvitja 5 ditë pa marrë leje nga klubi "Flamurtari". Gjithsesi, Bokatola është bashkuar me skuadrën për të udhëtuar më tej drejt Ulqinit për periudhën e dytë të stërvitjes përgatitore. Kemi komunikuar edhe me Sasha Delainin, i cili pretendon se po kryen një testim paraprak me një skuadër holandeze, të cilën e synon pas përfundimit të kontratës njëvjeçare me Flamurtarin. Delaini do të kthehet në stërvitje më 20 janar. Për Bokatolën dhe Delainin do të merren masa ndëshkimore të përcaktuara në kontratë në rastin e thyerjes së disiplinës, ndërsa për Roxherin vendosëm ta përjashtojmë," ka përfunduar sekretari Ilir Metaj.

[wxz]

Trajneri Vasil Ruci po bindet dita ditës se më mirë se kushdo tjetër ekipin e bëjnë vetë vlonjatët.


Vlonjatët nuk janë shkëputur për nga stërvitja edhe para nisjes për në Ulqin. Përkundrazi, edhe ditën e shtunë trajneri Vasil Ruci u ka zhvilluar atyre stërvitje me dy seanca. Me afrimin e sulmuesit kosovar Hashani, duket se shqetësimi për tre afrikanët ka kaluar në plan të dytë për trajnerin Ruci. Tani ai shfaqet më i qetë, ndonëse sipas tij duhet akoma një bindje të plotë për sulmuesin kosovar. Për më shumë ja çfarë thotë në intervistën e tij trajneri i Flamurtarit, Vasil Ruci:
Shpesh jeni shprehur se në merkato skuadrës i nevojitet një sulmues. Jeni i qetë tani që te Flamurtari është afruar sulmuesi 25 vjeçar Hashani?
Në përgjithësi, në superligën tonë është ndier mungesa e sulmuesve cilësorë. Kuptohet që edhe te Flamurtari statistika e golavarazhit është realizuar falë lëvizjeve taktike. Golashënuesi më i mirë i Flamurtarit është Nenaj, i cili është mesfushor, por shpesh është përdorur si sulmues. Në kushte të tilla, kur në repartin e sulmit skuadra jonë kishte vetëm Fjodor Xhafën, ishte e domosdoshme përforcimi me një sulmues të mirëfilltë. Për sa i përket afrimit të Hashanit, vlerësimi ynë për këtë lojtar është pozitiv, nisur nga shkalla e teknikës për cilësitë e tij. Na duhen pak ditë në stërvitje me grupin që të krijojmë bindjen përfundimtare për Hashanin.
Pasi nuk u realizua afrimi i shtatlartit korçar Tiko te Flamurtari, e kishit të vështirë të gjenit një sulmues tjetër në kampionatin shqiptar?
Eshtë e vështirë brenda kampionatit shqiptar të "rrëmbesh" 2 lojtarë cilësorë. Në periudhën e janarit është shumë e vështirë të gjesh lojtarë, sepse pothuajse të gjithë lojtarët kanë nënshkruar kontrata 1 vjeçare me skuadrat e tyre. Dëshira jonë ishte që të afronim sulmuesin korçar Ligoraq Tiko, por pavarësisht avancimit të bisedimeve, klubi i Skënderbeut nuk e lejoi. Për Hashanin ishte menduar e biseduar 2 3 muaj më parë.
Këto ditë është përfolur edhe për forcimin e repartit të mbrojtjes me ish mbrojtësin e Apolonisë, Mërtirin. Mendoni se këtu përfundon merkatoja e dimrit për Flamurtarin?
Unë edhe disa ditë më parë jam shprehur se nuk kam dijeni për një përforcim si në rastin konkret. Unë mendoj se nuk është shumë e nevojshme të përforcojmë radhët e mbrojtjes, pasi veç Beharit e Drizës, kemi të rinj të talentuar, si Bedini, Arifaj, Begaj, Guga etj.
Krahas Beharit e Drizës, nuk përmendët Delainin, i cili ka ditë që është larguar bashkë me Roxherin e Bokotolën. A keni informacion rreth largimit ose ardhjes së tyre në skuadër?
Të tre afrikanët kanë nënshkruar një kontratë me Flamurtarin deri në fund të sezonit. Kush shpërdoron kushtet e kontratës, detyrohet t'u nënshtrohet sanksioneve. Unë si trajner dëshiroj të luaj me lojtarë që janë të përkushtuar për fanellën dhe emrin e madh të Flamurtarit dhe jo me kalimtarë abuzues.
A jeni optimistë se me përbërjen aktuale Flamurtari do t'i realizojë objektivat e tij?
Patjetër. Jam i bindur se skuadra aktuale, e përbërë nga vlonjatë dhe 2 kosovarë, do të japë edhe shpirtin për Flamurtarin, me qëllimin e vetëm për t'u rreshtuar ndër 4 5 më të mirët. Përvoja na mësoi që sezonin tjetër të bëjmë një skuadër pothuajse me vlonjatë.

[wxz]

Tirana, udhëtim i lodhshëm deri në Kemer.


Mesditën e djeshme, bardheblutë i lanë shëndenë kryeqytetit për në drejtim të Turqisë. Në orën 15:00, avioni i linjës "Turkish Airlines" është ngritur nga aeroporti "Nënë Tereza", për të bërë ndalesën e parë në Stamboll. Këtu, delegacioni kryeqytetas ka qëndruar tranzit për disa orë dhe më pas ka marrë një tjetër avion për në drejtim të Antalias në orën 19.30, sipas orës tonë. Me të mbërritur në Anatalia, futbollistët dhe stafi drejtues janë pritur nga autobusi i hotelit, i cili më në fund i ka trasportuar deri në Kemer, zonë turistike e Turqisë. Duhet thënë se udhëtimi nga Tirana për në Kemer ka qenë i lodhshëm për kryeqytetasit, të cilët menjëherë janë sistemuar në hotel për të pushuar, ndërkohë në orën 22:00 kanë ngrënë darkën. Sot, trajneri Muça ka planifikuar zhvillimin e dy stërvitjeve, fillimisht në sallë force dhe mbasdite në fushën ngjitur me hotelin. Të mërkurën do të luhet edhe miqësorja e parë me skuadrën e Istambulsporit, që aktualisht bën pjesë në kategorinë e parë turke.

[wxz]

Ish-mbrojtësi i Teutës ka firmosur për bardheblutë, pjesë e të cilëve është edhe i vëllai.


"Pasaporta"
Datëlindja: 16.2.1978
Vendlindja: Elbasan
Skuadrat ku ka luajtur: Elbasani, Steaua e Bukureshtit, Nacional i Bukureshtit, Teuta dhe Tirana.
Trofetë e fituara: 2 tituj kampion dhe 1 kupë me Steaun, 1 kupë me Nacionalin, 1 titull me Dinamon dhe 1 titull me Tiranën.
Kombëtarja: 12 ndeshje

Albert Duro është goditja e radhës në merkato për Tiranën. Pas blerjeve të Turdiut dhe Çapjes, donatorët janë treguar të gatshëm për të veshur bardheblu edhe ish-mbrojtësin e Teutës. Duro stërvitej prej më shumë se një muaji te kryeqytetasit, por vetëm dje është arritur marrëveshja zyrtare mes palëve. Tashmë, në gjirin e 22 herë kampionëve do të shohim për herë të parë vëllezërit Klodian dhe Albert Duro, të cilët pasi kanë debutuar me ekipin e Elbasanit, gjatë karrierës së tyre janë aktivizuar në disa skuadra me emër brenda dhe jashtë Shqipërisë. Për "Sportin shqiptar", qendërmbrojtësi që ka provuar më parë të veshë edhe fanellën e ekipit kombëtar, tregon arsyet pse zgjodhi Tiranën për pjesën e mbetur të sezonit, si edhe objektivat që dëshiron të arrijë.
- Albert, që nga dita e djeshme jeni zyrtarisht lojtar i Tiranës. Si do ta komentonit këtë rikthim te bardheblutë?
- Mendoj se kam bërë zgjedhjen e duhur. Dëshira për t'u veshur bardheblu ka qenë si nga ana ime, por edhe e drejtuesve, të cilët u shprehën të gatshëm për të më plotësuar kërkesat. Sigurisht, në këtë mes dua të falënderoj donatorët, por edhe trajnerin Shkëlqim Muça.
- Jeni ndarë krejt papritmas nga Teuta, skuadër së cilës i dhatë shumë vitin e kaluar, ku me golin e realizuar ndaj Skënderbeut arritët ta mbanit në superligë. Çfarë mund të na thoni për këtë eksperiencë?
- Për aq kohë sa qëndrova në Durrës, u mundova të jepja më të mirën dhe besoj se edhe sot duhet të kujtohem nga ana e tifozerisë. Shkëputja ime nga ky ekip erdhi pas mosmarrëveshjeve me trajnerin Starova, kështu që e pashë të arsyeshme për t'u larguar dhe njëkohësisht për të qenë sa më pranë familjes.
- Keni qenë më parë edhe dy herë të tjera pjesë e Tiranës, por për arsye të ndryshme keni luajtur shumë pak. Si e parashikoni këtë sfidë të tretë?
- Tërheqëse, madje shpresoj ta fitoj. Nëse herën e parë nuk luajta në Europë për shkak se u transferova te Nacionali i Bukureshtit, në rikthimin tim kisha probleme shëndetësore, pasi vija pas thyerjes së këmbës që pësova në Rumani. Këtë herë të tretë si bardheblu, dua që ta fitoj titullin kampion duke qenë edhe vetë në fushë.
- Ç'do të thotë për ju që të luani në të njëjtin pozicion me vëllanë në të njëjtën skuadër?
- Nuk është hera e parë që një gjë e tillë na ndodh, sepse së bashku kemi qenë edhe tek Elbasani. Megjithatë, tani që jemi te Tirana, do të thotë se na është shtuar edhe më shumë përgjegjësia.
- Si për ironi të fatit, me rifillimin e sezonit, do të luani tri ndeshje radhazi, për kampionat dhe kupë me Teutën...
- Unë jam optimist se do t'i fitojmë të tri ndeshjet. Për fat të mirë, Teutën e njoh shumë mirë dhe mund të them se nuk mund të krahasohet me organikën që ka Tirana.

[wxz]

Eshtë kthyer në një ambasador në ekipin kavajas për patriotët e tij nga Kosova, por kurrsesi nuk i ngre në qiell.


Eshtë kthyer në një ambasador në ekipin kavajas për patriotët e tij nga Kosova, por kurrsesi nuk i ngre në qiell. Ky është mbrojtësi Alban Dragusha, i cili luan sezonin e dytë me ekipin e Besës dhe aktualisht po stërvitet me grupin në Ulqin. Jo me shumë fat këtë sezon, për shkak të disa dëmtimeve të njëpasnjëshme, Dragusha thotë se potencialet e Besës ishin dhe janë më të mëdha, duke lënë të nënkuptohet se ekipi kavajas pjesën e mbetur të kampionatit do të kërkojë të çojë emrin e vet atje ku i takon. "Besa ka shumë më tepër potenciale nga çfarë ka dhënë deri tani. Arsyet janë të shumta përse këto potenciale nuk u shfaqën realisht dhe nuk më takon mua të analizoj këtë. Di të them që në fundin e vitit që shkoi dhe në këtë periudhë secili futbollist është ndërgjegjësuar se duhet dhënë më shumë, sepse mundësitë janë. Duke filluar nga vetja, premtoj se do të luftoj me mish e me shpirt, sepse kam edhe një detyrim moral përballë patriotëve që kanë ardhur në ekip. Ata më kanë si idhull, prandaj nëse i zhgënjej, imagjinoni sesa poshtë bien ata psikologjikisht," shprehet qendërmbrojtësi kosovar Alban Dragusha, që për momentin është ndër më të mirët në rolin e tij. Në kampin kavajas dalëngandalë po inkuadrohen edhe disa lojtarë të tjerë të ardhur nga Kosova, që janë të vetmit që i janë afruar Besës në këtë merkato, pasi portieri Dura është një njohje e vjetër për kavajasit. Po si i vlerëson Dragusha të ardhurit e rinj nga vendi i tij? Ja dhe përgjigjja e tij: "Eshtë një thikë me dy presa. Ana pozitive është që, nëse rezultojnë të vlefshëm, edhe unë ndihem krenar. Në të kundërt, do të ndihesha si në faj, pavarësisht se nuk i kam sjellë unë këtu. Shpresojmë që në radhë të parë ata të nderojnë veten e tyre, Besën dhe Kosovën në tërësi. Vetëm një gjë po u them: duhet të djersijnë shumë nëse duan një vend titullari te Besa." Kavajasit po mbyllin javën e parë të fazës përgatitore të dimrit dhe i janë përveshur mirë punës për të arritur synimet e mbetura. "Gjithçka mund të bëjë vaki. Synimi ynë kryesor është të ngjitemi sa më lart në renditje, pastaj duke parë dhe duke bërë për të kërkuar një vend sa më të lartë të mundshëm, në mënyrë që emri i Besës të mos nëpërkëmbet. Ndërsa në kupë do të luajmë me maksimumin e mundësive, pasi është një trofe që mund ta fitojmë. Fundja, Besa i ka resurset për ta marrë kupën," - përfundon Alban Dragusha, mbrojtësi i Besës.

[wxz]

Ka ardhur nga Firence e Italisë për t'u provuar te Vllaznia me shpresë se do t'i bindte drejtuesit e saj për talentin që zotëron, por nuk duket se do të ndodhë kështu. Marenglen Prela, 20 vjeçari shkodran që nga e hëna e kaluar është duke u stërvitur me kuqeblutë, por burime pranë stafit drejtues të tyre bëjnë të ditur se djaloshi i ri nuk ka shfaqur ndonjë diferencë me lojtarët e tjerë të rinj, që janë duke u stërvitur në skuadër. Për këtë arsye, me shumë të ngjarë i riu Prela, që vjen nga futbolli amator italian, në ditët e ardhshme mund t'i japë lamtumirën Vllaznisë. Megjithatë, vendimin përfundimtar për të do ta japë trajneri Josa gjatë kësaj jave.

Katër shkodranë nën urdhrat e Bushatit.
Janë plot 4 futbollistë të Vllaznisë që dy ditë më parë kanë braktisur kampingun stërvitor të kësaj skuadre në Hercegnovi të Malit të Zi. Bëhet fjalë për lojtarët e thirrur nga trajneri i ekipit kombëtar Shpresa, Artan Bushati, për miqësoren e Turqisë. Lojtarët e grumbulluar janë portieri Olsi Bishani, mesfushorët Alsid Tafili e Gilman Lika, si dhe sulmuesi Xhevahir Sukaj. Ata dje janë nisur së bashku me pjesën tjetër të ekipit drejt Turqisë, ndërkohë që do të ribashkohen me kuqeblutë në Mal të Zi të enjten që vjen.

Kuqeblutë, sot miqësorja e parë.
Do të zhvillohet pikërisht sot pasdite miqësorja e parë e Vllaznisë në përgatitoren e saj në tokën malazeze. Përballë saj do të jetë një ekip nga Serbia, i cili është edhe ai i grumbulluar për fazën përgatitore në të njëjtin vend me shkodranët. Miqësorja do të zhvillohet në orën 13:00 dhe për këtë ndeshje trajneri Josa nuk do të ketë në dispozicion të tij katër futbollistët e grumbulluar në ekipin kombëtar Shpresa, pikërisht Bishanin, Tafilin, Likën dhe Sukajn.

[wxz]

Kuqeblutë kanë mbyllur javën e parë të stërvitjes dimërore me sukses, ku nuk është vërejtur asnjë anomali.


Përgatitjet e Vllaznisë në Hercegnovi të Malit të Zi po shkojnë në mënyrën më të mirë të mundshme. Çdo gjë është sipas planit të përcaktuar më parë nga ana stafit drejtues dhe për rrjedhojë edhe vetë futbollistët janë më se të kënaqur me mënyrën si kanë shkuar stërvitjet e tyre. Këtë e konfirmon një nga pjesëtarët e stafit, pikërisht mjeku i njohur Zyhdi Çoba, i cili është shkëputur disa ditë nga kampingu malazez i kuqebluve, për t'iu bashkuar ekipit Shpresa në grumbullimin e tij. Megjithatë, mjeku që ka vite pune me sportin dhe në veçanti me ekipet e futbollit, flet me shumë pasion për mënyrën si kanë shkuar stërvitjet në këtë javë të parë të përgatitjeve në Hercegnovi. "Çdo gjë kanë shkuar më së miri, duke filluar me kushtet e qëndrimit në hotel, që duhet thënë se ishin të shkëlqyera, për të vazhduar me fushat ku stërviteshin, që ishin plot 6 dhe në gjendje shumë të mirë, ndërkohë që vajtja dhe ardhja bëhej me autobus të vënë në dispozicion nga hoteli. Në një ambient të tillë nuk ke se si të mos punosh me dëshirë dhe kjo po ndodh aktualisht edhe me ekipin e Vllaznisë," ka shpjeguar Çoba. Ndërkohë, kjo javë e stërvitjes në tokën malazeze ka qenë kuptohet java e ngarkesave të mëdha fizike, megjithatë për stafin mjekësor nuk ka pasur as më të voglin problem, sepse në periudha të tilla vërehen edhe trauma të vogla, si pasojë e mospërballimit siç duhet të ngarkesave fizike. "Nuk kam pasur as më të voglin problem. Asnjëri prej futbollistëve nuk ka shfaqur problemeve traumash dhe kjo ndoshta është edhe meritë e trajnerit Josa, që ka arritur ta japë ngarkesën stërvitore në mënyrën e duhur. Paradite ka kryesisht vrapime dhe sallë force, ndërsa pasdite është punuar edhe me topin. Janë nga dy seanca çdo ditë, ndërkohë që Josa ka vënë në plan të parë edhe regjimin sportiv të futbollistëve," shton më tej mjeku i ekipit të Vllaznisë. I vetmi nga lojtarët i cili vinte me probleme në stërvitjet e Hercegnocit ka qenë malazezi Igor Radusinoviç. Mbrojtësi nga Podgorica, siç dihet, gjithë dhjetorin kishte qenë i pamundur jo vetëm për të luajtur, por edhe për t'u stërvitur. Sakaq, janari ka nisur mirë për të dhe ky është një lajm i mirë edhe për skuadrën shkodrane, sepse është një forcë më tepër për të. "Radusinoviçi është duke u stërvitur pa probleme, madje pa zbaton të njëjtin program stërvitor me lojtarët e tjerë. Tek ai nuk vërehet asnjë shenjë nga dëmtimi që ka pasur dhe kjo është pozitive," shpjegon Çoba. Në këtë mënyrë, gjërat janë duke shkuar në mënyrën më të mirë të mundshme sa u takon përgatitjeve të kuqebluve. Një fakt ky që pritet të reflektohet më së miri edhe me rezultatet që skuadra do të arrijë në pjesën e mbetur të sezonit.

[wxz]

Sulmuesi vlonjat i Teutës kërkon që grupi të ruajë qetësinë e nevojshme në këtë periudhë.


"Duhet të jemi me këmbë në tokë." Kështu është shprehur sulmuesi i Teutës, Daniel Xhafaj, sipas të cilit kampionati është në një pikë delikate, ku duhet treguar shumë kujdes për të sulmuar kreun e tabelës. Në një intervistë për "Sportin shqiptar", Daniel Xhafaj komenton ditët e para në Ulqin, atmosferën në kampin e "djemve të detit" dhe detaje të tjera nga faza përgatitore.
A mendoni se Ulqini ishte vendi më i përshtatshëm për fazën përgatitore?
Mendoj se nuk ka shumë rëndësi vendi ku zhvillohet faza përgatitore, por mënyra se si zhvillohet. Në fakt, në Ulqin jemi shumë komodë dhe faza përgatitorë po zhvillohet në mënyrën më të mirë të mundshme.
Ka filluar të ndihet ankthi i përballjes së parë me Tiranën?
Mendoj se është shumë herët për të menduar për këtë ndeshje. Jemi vetëm në fillim të minifazës përgatitore dhe do të duhet kohë që ekipi të përqendrohet te ndeshja me Tiranën.
Sa të rëndësishme e shikoni ju këtë përballje për pretendimet që ka ekipi?
Pa diskutim që është një ndeshje e rëndësishme, por unë nuk jam nga ata që mendoj se është kjo ndeshja përcaktuese. Për ne, ndeshje përcaktuese janë edhe takimet me Elbasanin, Vllazninë etj. Na presin përpara ndeshje të vështira, që mund t'i kalojmë vetëm me qetësi dhe besim në forcat tona.
Ka vërtet forca Teuta për të sulmuar titullin?
Sigurisht që ka, por e përsëris që nuk do të jetë e lehtë.
Mendoni se ardhja e Shkëmbit i jep më shumë oksigjen sulmit?
Sigurisht, është një futbollist që luan shpejt me topin dhe krijon hapësira. Kishim nevojë për një gjë të tillë dhe mendoj se kjo do të na i shtojë më shumë mundësitë para portës.
Si ju duket ngarkesa që po merrni në stërvitje?
Për mua është normale dhe, me sa shikoj, pak janë futbollistët që kanë probleme në përballimin e kësaj ngarkese.
A ju duket se pas largimit të Salihit ju janë hapur shanset për të kapur kreun e golashënuesve?
Për mua kjo nuk përbën asnjë problem. Ka edhe të tjerë futbollistë që mund të shpallen golashënues më të mirë, por qëllimi im do të jetë vetëm të arrijmë më së fundi titulli për Teutën. Më mungon një titull kampion me këtë ekip.

[wxz]

Hasanbelliu inspekton ekipin në Ulqin
Presidenti i Teutës, Edmond Hasanbelliu, është bashkuar përsëri me ekipin në Ulqin për të parë nga afër kushtet në të cilat janë akomoduar dhe po stërviten futbollistët, si dhe atmosferën aktuale në ekip. Në një qëndrim njëditor në Ulqin, presidenti i Teutës është njohur me kërkesat që ka ekipi, si dhe ka parë nga afër stërvitjen. Hasanbelliu është shprehur i kënaqur me gjendjen aktuale të ekipit. Në lidhje me merkaton, Hasanbelliu është shprehur se ajo nuk mund të quhet e mbyllur, por ka shumë vështirësi në gjetjen e futbollistëve që bëjnë diferencë. Gjithesi, nuk është përjashtuar afrimi i ndonjë futbollisti të perspektivës.

[wxz]

Reiter: Salihi, lojtar plot potencial



Eldorado Merkoçi, shkes për "martesën" e goleadorit me Riedin
Drejtori teknik i skuadrës SV Ried, Stefan Reiter, shpjegon gjendjen e skuadrës së tij në këto ditë të para stërvitjeje të vitit të ri, duke i përkushtuar shumë vemendje ardhjes më të fundit, goleadorit shqiptar Hamdi Salihi. "Eshtë një lojtar i ri dhe me shumë potencial, të cilin kishim kohë që e ndiqnim me vëmendje," - u shpreh trajneri rreth përforcimit më të fundit të skuadrës së tij. Gjithashtu, Reiter shpjegoi se ardhja e Salihit tek skuadra nuk ishte thjesht një rastësi, por një konsolidim i vëzhgimit të vazhdueshëm që i pati bërë lojtarit vetë personalisht, por edhe me ndihmën e një lojtari tjetër shqiptar, që padiskutim ndihmoi në konsolidimin e objektivit, pasi Rapidi i Vjenës ishte gjithashtu në interesim të plotë për sulmuesin shqiptar. "Trajneri dhe stafi e kishin ndjekur Hamdi Salihin vetë 2 herë nga afër. Unë e kam parë duke luajtur dhe më pëlqente. Tentativën e parë për afrimin e tij e bëmë në shtator, nëpërmjet futbollistit shqiptar Eldorado Merkoçi, i cili ishte shok skuadre i bomberit Salihi si dhe mik i trajnerit Helmut Kraft, për të cilin ka luajtur më parë tek Worgl. Duke parë se edhe Rapidi ishte në ndjekje të tij, por jo shumë agresiv, atëherë ne filluam sulmin për afrimin e tij dhe falë ndihmës së Merkoçit , bomberi shqiptar është i joni,"- përfundoi prononcimin e tij Reitter. Hamdi Salihi është i vetmi lojtar i ri që skuadra austriake ka afruar dhe i dyti shqiptar, pas Emin Sulejmanit. Gjatë stërvitjeve që po kryen në Belek të Turqisë Riedi, është vënë re se edhe përforcime të tjera paraqiten të nevojshme, sidomos në repartin e mbrojtjes së kësaj skuadre austriake.

[wxz]

Trajneri i përfaqësueses shqiptare, kroati Oto Bariç, do të vijë ditën e mërkurë në Tiranë. Axhenda e Bariçit është e ngjeshur, pasi për dy ditë me radhë do të japë leksione në kursin e trajnerëve. Më pas, më datën 19 shkurt, bashkë me lojtarët e kombëtares B, do të niset për në Antalia të Turqisë. Për nëntë ditë atje do të zhvillohet "zbori" i radhës me lojtarë të kampionatit shqiptar dhe disa prej kosovarëve të përzgjedhur nga vetë Bariçi. Deri më tani, përgjigje pozitive për pjesëmarrjen në grumbullimin e Antalias e kanë dhënë futbollistët, Shpëtim Hasani dhe Leutrim Neziraj. Ndërkohë, futbollistët e tjerë kosovarë e kanë të pamundur pjesëmarrjen e tyre, pasi në këto data janë në aktivitet zyrtar me skuadrat e tyre.

[wxz]

Ende nuk është federuar ndonjë lojtar i ri në përbërjet e ekipeve shqiptare të futbollit.


Që nga fillimi i muajit janar është hapur zyrtarisht merkatoja dimërore për futbollin shqiptar, afati i së cilës përfundon më 31 janar. Shumica e skuadrave shqiptare mezi e kanë pritur këtë periudhë, madje ende pa u hapur zyrtarisht drejtuesit e klubeve pohonin se kishin firmosur kontrata me lojtarë, të cilët do të federoheshin në muajin janar. Edhe gjatë kësaj kohe, në shtypin sportiv kanë qarkulluar shumë emra futbollistësh, të cilët thuhet se kanë lëvizur në ekipe të ndryshme. Gjithashtu, ka edhe nga ata lojtarë, që për një periudhë të shkurtër kohore janë stërvitur njëkohësisht me dy skuadra, ku është përfolur sikur kanë firmosur me të dyja. Lojtarë të tillë si Patushi, Abazaj, Çapja, Merkoçi janë bërë "gjah" për shumë skuadra. Për të parin u tha se firmosi me Partizanin, ndërkohë që fare papritmas firmosi për Elbasanin. Kjo lëvizje u quajt e papritur për vetë faktin se ky futbollist kishte kohë që stërvitej te Partizani. Mesfushori elbasanas Çapja bashkë me sulmuesin Abazaj kanë nënshkruar për Tiranën, ndërsa sulmuesi Merkoçi, pasi nuk ra dakord me Elbasanin, firmosi me Dinamon. Gjithsesi, këto lëvizje janë bërë të ditura vetëm nëpërmjet shtypit, sepse asnjë prej këtyre lëvizjeve, të ashtuquajtura të bujshme, nuk është zyrtarizuar ende. Fakti është se deri më tani merkatoja dimërore është zhvilluar në media. Në zyrën e shefit të sektorit të garave, përveç një kërkese të klubit "Apolonia", për të federuar portierin Suad Zendeli, nuk është paraqitur asnjë përfaqësues klubi për të bërë federimin e ndonjë lojtari. Këtë fakt e pohon vetë shefi i këtij sektori në FSHF, Hito Hitaj. Sipas tij, kjo periudhë 10-ditore e merkatos është zhvilluar në gazeta. "Mund të them se deri më tani, përveç një kërkese të klubit "Apolonia", asnjë përfaqësues klubi nuk është paraqitur në zyrat e federatës. Kjo periudhë më shumë po zhvillohet nëpër gazeta, sesa po bëhet zyrtarisht. Pra, nuk është bërë ende asnjë federim,"- u shpreh Hitaj. Duket qartë që drejtuesit e klubeve shqiptare gjithçka e lënë për ditën e fundit. Nuk është hera e parë që ndodh kështu, pasi tashmë kjo dukuri është bërë e përvitshme. Nuk duhet të habitemi aspak kur mësojmë se futbollistë të ndryshëm stërviten në skuadra të tjera dhe firmosin diku tjetër. Çudirat e merkatos shqiptare kanë për të na habitur edhe në ditët e ardhshme. Derisa në FSHF nuk është bërë asnjë federim, nuk është çudi që në ditët në vijim të kemi të tjera lëvizje të papritura, gjithnjë nëpër gazeta. Kur këto lëvizje nuk zyrtarizohen, çdo gjë mund të pritet. Duhet thënë se edhe aktorët e fushës së lojës ngurrojnë të firmosin që në ditët e para të janarit. Futbollistët janë mësuar të presin ditët e fundit të merkatos dhe pastaj të firmosin. Këta të fundit kanë shumë pasiguri dhe nuk u besojnë presidentëve. Të dyja palët i lënë për t'i firmosur kontratat në ditën e fundit, ndërsa nga ana tjetër lojtarët presin t'u rritet artificialisht çmimi, derisa më në fund të vendosin dhe të hedhin firmën. Edhe këtë të fundit nuk dihet se ku e hedhin, në të zezë apo në të bardhë. Gjithsesi, në këtë periudhë 15-ditore është folur shumë, por realisht nuk është bërë asgjë. Duhet të presim datën 31 janar që të marrim vesh se cili lojtar i ri është bërë pjesë e skuadrave shqiptare. Nuk është çudi që edhe afati i merkatos të mos respektohet nga klubet, pasi edhe në periudhat e kaluara ky afat nuk është respektuar. Kemi pasur disa precedentë, ku disa lojtarë janë federuar gjatë zhvillimit të kampionatit. Këto gjëra pa dyshim që kanë lënë një shije të keqe te shumica e skuadrave, por çdo gjë është kaluar, edhe pse me zhurmë. Aktualisht, vetëm po flitet nga drejtuesit e klubeve, por, siç thuhet, me vepra nuk është bërë ende asgjë. Të shpresojmë që ekipet t'i federojnë lojtarët e shumëpërfolur në media, pasi deri më tani merkatoja dimërore ka qenë mediatike, jozyrtare.

[wxz]

Përveç Bylykbashit dhe Ndrekës, edhe Malindi do të provohet te një skuadër greke.


Drejtuesit e Partizanit po e mbajnë fjalën e dhënë, se do të futen fuqishëm në merkaton e janarit. Ajo që po ndodh në klubin e kuq bën të mendosh se jo vetëm nuk do të ketë afrime cilësore, por pjesën e mbetur të sezonit Partizani do ta luajë me mungesa të tjera në formacion. Dy futbollistët e formacionit bazë, Dorian Bylybashi dhe Henri Ndreka, janë nisur dje drejt Turqisë për t'u provuar me një ekip ukrainas, emrin e të cilit dy protagonistët e kuq nuk kanë dashur ta zbulojnë. Ndreka dhe Bylykbashi kanë pritur vetëm dy ditë, pas nisjes së Partizanit për fazën, për të bërë realitet ëndrrën e tyre europiane, këtë radhë me një skuadër ukrainase. Ditën e djeshme ka qenë i pamundur kontaktimi me dy futbollistët në fjalë me anë të telefonave, çka tregon se ata janë nisur drejt destinacionit të ri. Por Bylykbashi dhe Ndreka nuk janë të vetmit që mund t'i thonë lamtumirë Partizanit në këtë periudhë merkatoje. Në janar, edhe skuadrat europiane kërkojnë të përforcohen, ose të shesin lojtarë, kështu që mundësia e bashkëpunimit është me e madhe. Enco Malindi, 18-vjeçari i talentuar i akademisë "Partizani", është futbollisti i tretë që mund të mos jetë më pjesë e të kuqve. Dje, teksa të gjithë futbollistët e ekipit të Shpresës po përgatiteshin për stërvitjen e radhës në Kamëz, i riu Malindi ka biseduar me trajnerët e kombëtares U-21, për t'u shpjeguar arsyen e mosgrumbullimit të tij. Enco Malindi po përgatit dokumentet për të udhëtuar drejt Greqisë, jo për grumbullimin e Shpresës apo të Partizanit, që ndodhet në Mal të Zi, por për t'u provuar me një ekip të kampionatit grek. Sipas burimeve të sigurta pranë lojtarit, në mes të tratativave me grekët është vetë presidenti Xhani, që me sa duket kërkon ta shesë të riun Malindi, sigurisht duke përfituar një shumë të konsiderueshme të ardhurash. Kjo është arsyeja pse i riu i skuadrës së kuqe nuk ka hasur asnjë pengesë nga trajneri Lika i Partizanit dhe Bushati i Shpresës. Partizani vazhdon të përgatitet në Ulqin në kuadër të fazës përgatitore, ndërsa disa nga futbollistët e Likës po shikojnë mundësinë e largimit nga Partizani. Presidenti Xhani nuk duket aspak i shqetësuar nga "rrjedhjet" në skuadrën e tij, madje vetë ai po bën ndërmejtësin që që futbollistët të arrijnë të nënshkruajnë me skuadrat e tjera. Nga ana tjetër, në kampin stërvitor të Ulqinit, ku është akomoduar Partizani, nuk ka asnjë të re në lidhje me afrimet e premtuara. Përveç kroatit Bjelokanoviç, që vazhdon të provohet nga trajneri Lika, asnjë futbollist i huaj nuk është bërë i gjallë. Afrikanët, që kanë sjellë prej më shumë se një jave fotokopjet e pasaportave, janë shpresa e vetme për përforcimin e skuadrës, që sa vjen e venitet me kalimin e ditëve. Gjithçka po ndodh në kampin e kuq, tregon qartë se për pjesën e mbetur të sezonit Partizani jo vetëm që nuk do të përforcohet, por duhet të llogarisë koston e largimit të disa futbollistëve.

[wxz]

Partizani në pritje të përforcimeve.
Deri dje, nën urdhrat e trajnerit Lika kanë qenë vetëm futbollistët aktualë të Partizanit (6 lojtarë nuk po stërviten nga Lika) dhe kroati Bjelokanoviç, ndërsa afrikanët e premtuar nuk duken në horizont. Prej më shumë se një jave, drejtuesit e kuq janë marrë posaçërisht me përgatitjen e dokumentacionit të tyre, pasi nuk dëshirojnë që futbollistët me ngjyrë të hasin probleme në Shqipëri e mbi të gjitha në Mal të Zi, ku po vazhdon stërvitjen skuadra. Edhe futbollistët nga Kosova, nënshkrimi më të cilët është i varur nga paraqitja e afrikanëve, nuk po bëhen të gjallë. Merkatoja e Partizanit deri tani është në vend-numëro, madje largimi i mundshëm i Ndrekës dhe i Bylykbashit do ta dobësonte më shumë formacionin e Likës.

[wxz]

3 të kuq te kombëtarja e Shpresës.
Të paktën për një javë organika e Partizanit do të jetë e reduktuar me 6 futbollistë. Siç është bërë e ditur, Ndreka dhe Bylykbashi do të provohen në Turqi, pranë një skuadre ukrainase, ndërsa Progri me Elis Bakajn janë thirrur nga Bushati për ndeshjen miqësore të 17 janarit me Turqinë. Progrit dhe Bakajt u është bashkuar edhe Karabeci, ndërsa Malindi do të shkojë në Greqi, për t'u provuar me ndërmjetësinë e presidentit Xhani.

[wxz]

Të kuqtë nuk impresionohen nga kushtet.
Vendimi për të udhëtuar drejt Malit të Zi u mor pas inspektimit që "triada" e kuqe, Xhani-Lika-Tomorri, bëri në kompleksin "Olimpik", pranë qytetit të Ulqinit. Kushtet e akomodimit dhe të stërvitjes natyrisht janë më të mira se në klubin "Partizani", por nuk është se futbollistët dhe stafi teknik janë impresionuar prej tyre. Të paktën futbollistët do të mund të zhvillojnë dy seanca stërvitore në ditë, duke mos e pasur frikën e mungesës së ujit të ngrohtë për t'u larë dhe të energjisë elektrike. Kur mendon se në Tiranë, në klubin "Partizani", mungonin kushtet më minimale të stërvitjes, futbollistët duhet të jenë të kënaqur, pavarësisht se në Turqi apo gjetkë kushtet janë shumë më të mira se në Ulqin.

[wxz]

S'ka pushim as të dielave.
Qëllimi kryesor i fazës përgatitore të Ulqinit është kapja e formës së duhur fizike, që Partizanit i ka munguar shumë gjatë pjesës së parë të kampionatit. Për këtë arsye, futbollistët kanë marrë ngarkesë të lartë fizike, duke u stërvitur dy herë në ditë. Dje paradite stërvitja është spostuar në sallën e forcës, ndërsa pasdite, si zakonisht, vëmendja e Likës është përqendruar në lojën me top. Me fillimin e fazës, nuk do të ketë pushim as të dielave, deri në momentin e afrimit të takimit të radhës në kampionat me Elbasanin në transfertë.

[wxz]

Teuta vijon me intensitet përgatitjet dimërore në Mal të Zi, nën drejtimin e trajnerit Starova.


Në njëfarë mënyre, sulmuesi i Teutës, Bekim Kuli, i ka hedhur dorashkën kryesueses së kampionatit Tiranës. Sipas sulmuesit kavajas të Teutës, ekipi po e merr forcën e duhur për të ngushtuar diferencën e pikëve me kryesuesit e kampionatit. Më tej Kuli do të komentonte...
- Si ndiheni tashmë që faza përgatitore ka hyrë në ritmin e duhur?
- Të them të drejtën, fazën përgatitore të verës e kisha filluar me vonesë dhe kjo ndikoi disi në takimet e para me Teutën. Tashmë jam në ritmin dhe kohën e duhur të përgatitjes fizike dhe e ndiej veten shumë mirë.
- A ju tremb Tirana që ju pret me mbarimin e fazës?
- Nuk na tremb as Tirana dhe askush tjetër. Jemi në formën e duhur për të shkurtuar diferencën me kryesuesit e kampionatit. Takimi i parë në kryeqytet do të jetë për jetë a vdekje për ne.
- A mendoni se ardhja e Bledi Shkëmbit ju jep mundësinë që të luani më i avancuar?
- Këtë e di më mirë trajneri, por sigurisht që loja e këtij futbollisti do të krijojë më shumë hapësira për sulmin.
- A mendoni se treshja Mancaku Kuli Daniel Xhafaj e ka dhënë maksimumin?
- Mendoj se mundësitë i kemi pasur për më tepër. Gjithsesi, sulmi ka qenë përcaktues në lojën e ekipit.
- Si e shpjegoni faktin që stafi po mendon edhe për afrimin e një sulmuesi tjetër?
- Për këtë pyesini më mirë stafin.
- A jeni i kënaqur me lojën që zhvilluat ndaj Besëlidhjes?
- Ishte një ndeshje testuese, ku nuk mund të arrish në një përfundim për lojën e ekipit. E rëndësishme është që ndihemi mirë dhe që ekipi ka rritje.
- Ku e shikoni rritjen e ekipin?
- E shikoj në anën morale, por dhe në gjendjen fizike të futbollistëve. Për fat, nuk kemi dëmtime apo probleme të tjera.
- Po ju a do t'ju pëlqente që të ishit më afër golit?
- Çdo futbollisti i pëlqen të jetë sa më afër golit, por interesat e skuadrës janë më të rëndësishme.
- Sa ju ka munguar goli në pjesën e mbyllur të kampionatit?
- Nuk është se nuk kam shënuar, por mundësitë i kam pasur për më tepër.
- Ç'do të thotë për ju fakti që vitin e mbyllët me një gol ndaj Besës?
- Ishte gjë e mirë që vitin e mbylla me gol, por sigurisht do të doja që ky gol të mos ishte kundër ekipit të qytetit tim. Futbolli profesionist i ka këto gjëra.
- Çfarë do të kërkoni më shumë në vitin 2007?
- Në radhë të parë, duhet të garantojmë zonën europiane dhe të synojmë titullin.

[wxz]

Sulmuesi boshnjak Omeroviç nuk e ka kaluar testin e provës te Teuta. Omeroviç, që shikohej si një mundësi për të përforcuar sulmin durrsak, nuk ka treguar në ndeshjen me Besëlidhjen ndonjë diferencë nga futbollistët e tjerë. Në këto kushte, pas konsultimit mes presidentit Hasanbelliu dhe trajnerit Starova, është vendosur që futbollisti të mos mbahet në ekip. Një variant tjetër për sulmin e Teutës është edhe futbollisti i Partizanit, Progri.

[wxz]

Sulmuesi i Teutës, Daniel Xhafaj, ka bërë rezonancën e gjurit, pas një dëmtimi që ka pasur në ndeshjen me Apoloninë. Nga kontrolli mjekësor ka rezultuar se futbollisti nuk ka probleme me gjurin, por i janë këshilluar disa terapi të lehta për të mos përsëritur ndonjë problem. Futbollisti la ekipin pasditen e së dielës për të bërë në kryeqytet rezonancën. Ishte stafi mjekësor i Teutës që ia këshilloi këtë, ndonëse futbollisti s'ka pasur problem. Pas kësaj, Xhafaj do të bashkohet me ekipin për të vazhduar stërvitjen.

[wxz]

Kampionët janë nisur dje në mesditë në drejtim të Malit të Zi, ku do të akomodohen në Hercegnovi, ku është edhe Vllaznia e Shkodrës. Elbasani do të qëndrojë për afro 10 ditë në fazën përgatitore dhe pritet që gjatë kësaj kohe të zhvillojë disa takime miqësore. Ndërkohë, me kampionët pritet të vihen në provë gjatë qëndrimit në Malin e Zi edhe disa futbollistë cilësorë, ndër ta edhe një sulmues francez, që në të kaluarën ka luajtur me Okserin.

[wxz]

Laze në Turqi, ndjek Shpresën
Arben Laze ka udhëtuar në drejtim të Turqisë për të ndjekur ekipin kombëtar Shpresa. Mësohet se presidenti nuk do të qëndrojë gjatë atje, pasi do të vizitojë ekipin e tij në fazën përgatitore në Malin e Zi.

[wxz]

Tre afrikanët verdheblu, asnjë sinjal
Ende nuk dihen se kur do të bashkohen me Elbasanin në fazën përgatitroe tre afrikanët Akamba, Abdulla, Asete. I pari thuhet se është larguar, Abdulla pritet të vijë, por ende s'është bërë i gjallë, ndërsa Asete mund të qëndrojë në Nigeri, sipas disa zërave.

[wxz]

Trajneri i Elbasanit kërkon edhe nga një përforcim në repartin difensiv dhe atë ofensive.


Elbasani është nisur në drejtim të Malit të Zi, ku do të zhvillojë fazën përgatitore afro 10-ditore. Kampionët në drejtimin e trajnerit Edmond Gëzdari kanë udhëtuar dje në mesditë në drejtim të shtetit fqinj. Ndërkohë, disa orë përpara nisjes, trajneri i Elbasanit, Edmond Gëzdari, në një prononcim për "Sportin shqiptar" është shprehur: "Po nisemi për fazën përgatitore, edhe pse nuk jemi plotësuar ende si grup, sipas idesë sime. Elbasani ka nevojë edhe për një sulmues dhe një mbrojtës. Jemi duke punuar në merkato dhe deri tani jam tepër i kënaqur nga ana e presidentit Arben Laze. Ky i fundit i ka mbajtur premtimet e dhëna në momentin që pranova të firmos për Elbasanin," - thekson Gëzdari.
Por për trajnerin e kampionëve, që ende në një ndeshje zyrtare apo miqësore nuk e ka shijuar drejtimin e verdhebluve, e rëndësishme është vazhdimësia e nisur deri tani nga ekipi i tij. "Mendoj se koha që kemi përpara do të na japë në fund të drejtë. E them këtë pasi deri tani nuk kemi zhvilluar ndonjë ndeshje, por me zhvillimin e fazës përgatitore do të kemi mundësi jo vetëm që të provojmë disa futbollisë, por edhe të zhvillojmë ndonjë ndeshje miqësore, çka do të na shërbejë shumë përpara rifillimit të kampionatit," - shton trajneri verdheblu.
Ndërkohë, trajneri Gëzdari nënvizon se përforcimet e fundit në mbrojtje dhe mesfushë janë cilësore, por nga ana tjetër nuk e fsheh dëshirën për një tjetër mbrojtës dhe sulmues. "Do të kërkojmë të kemi edhe një mbrojtës tjetër me eksperiencë, që të jetë një garanci më shumë për portën, por mund të them se na duhet medoemos edhe një sulmues, pasi vetëm me tre të tillë nuk mund ta mbyllim sezonin," - thekson Gëzdari.
Dihet që pika më e dobët e kampionëve të Shqipërisë këtë sezon ka qenë sulmi, pasi asnjë prej sulmesve të deklaruar nuk ka mundur të bëjë rolin e liderit të golit, por faktet flasin qartë se golashënuesi më i mirë i ekipit është Stojku, që luan në mbrojtje. Kjo tregon më së miri që një sulmues është tepër i dobishëm për Elbasanin. "Edhe një sulmues na duhet. Nuk mund të them ndonjë emër konkret, por di që klubi është në bisedime me disa sulmues. Më parë do t'i testojmë në fazën përgatitore dhe më pas do të vendosim nëse do të jenë pjesë e Elbasanit apo jo," - shton Gëzdari.
Në fund të prononcimit të tij, Edmond Gëzdari shprehet se objektivi i Elbasanit do të jetë Kupa UEFA, pra vendi i dytë, por sigurisht që titulli nuk mund të quhet mision i pamundur nga kampionët, të cilët, me përforcimet që po bëjnë, me siguri që nuk do t'i shqiten kollaj Tiranës së vendit të parë.

[wxz]

Dje, në kompleksin e ekipeve kombëtare në Kamëz u zhvillua një takim miqësor midis Kastriotit dhe Luftëtarit. Kjo miqësore më shumë u shërbeu trajnerëve Haxhiu dhe Spahiu për të provuar disa lojtarë, të cilët dëshirojnë të jenë pjesë e ekipeve të Kastriotit dhe Luftëtarit. Në përbërjen e Luftëtarit ra në sy aktivizimi i një futbollisti nigerian, ndërkohë që te skuadra krutane u aktivizua ish-futbollisti i Dinamos, Klodian Asllani. Sipas drejtuesve krutanë, Asllani është blerja më e fundit e Kastriotit. Loja në përgjithësi ishte e barabartë, por gjirokastritët goditën tri herë traun e portës së mbrojtur nga Koçi. Golat u shënuan në pjesën e dytë, ku në fillim kaloi në avantazh Kastrioti me anë të sulmuesit Tanushi, ndërsa pak minuta më vonë barazoi Bejollari për gjirokastritët. Menjëherë pas përfundimit të takimit, ekipi i Luftëtarit u nis për në Ulqin të Malit të Zi, ku për dhjetë ditë do të zhvillojë fazën përgatitore. Sipas trajnerit Ilir Spahiu, kontigjenti që do të udhëtojë në Ulqin është i plotë, ndërkohë që gjatë qëndrimit në Ulqin Luftëtari pret t'i vijnë dy futbollistë të kampionatit belg.

[wxz]

Data 15 janar ishte përcaktuar si afati përfundimtar nga ku dy senegalezët blu, Papa Diop dhe El Haxhi Gudjabi, do të bëheshin të gjallë në ambientet e klubit "Dinamo". Por edhe gjatë ditës së djeshme dy afrikanët blu kanë marrë mungesë në regjistrin e profesorëve të skuadrës. Ardhjet e të huajve tek Dinamo gjithmonë i kanë ngjarë një telenovele me shumë seri, së cilës nuk ka njeri që t'ia parashikojë fundin. Nëse përpara disa kohësh dinamovitët janë mësuar që të përjetojnë histori me tematikë nga Amerika Latine, tashmë personazhet e telenovelave të Dinamos janë "jabanxhinjtë" nga kontinenti i zi. Të dy senegalezët, sipas drejtuesve dinamovitë, kanë kontratë me Dinamon, ku Diop para disa javësh ka firmosur edhe për tri vite të tjera dhe Gudjabi është dinamovit deri në fund të sezonit, por asnjëherë blutë e kryeqytetit nuk kanë vepruar me dorë të hekurt ndaj këtyre futbollistëve të padisiplinuar. Nëse trajneri Jupi përdor tone të ashpra për të krijuar një disiplinë të hekurt në skuadër, puna e tij nuk mund të ketë rezultat, kur disa nga "profesionistët" e tij e përdorin skuadrën si vend nga ku mund të zhvillojnë turizmin e tyre. Normalisht, Dinamo po e kalon gjysmën e fazës përgatitore dhe dy nga lojtarët që mendohet se do të jenë pjesë përbërëse e ekipit, akoma nuk janë paraqitur në klub e jo më të flitet për fillim të përgatitjeve.

[wxz]

Të rinjtë e Dinamos janë të shumtë dhe detyrimisht në radhët e tyre do të ketë të pakënaqur, disi të kënaqur dhe të kënaqur.
Nëse radhët e të paduruarve kërkojnë që të çlirohen nga "prangat" e stolit blu, disa të tjerë mendojnë që ta përfundojnë edhe këtë sezon, sepse deri diku kanë pasur ndonjë hapësirë aktivizimi. Dy nga këta të rinj të Dinamos, falë punës dhe përkushtimit të tyre me skuadrën kryeqytetase dhe reputacionit dhe privilegjit që të jep të mbashë veshur fanellën blu, tashmë e shikojnë veten pjesë të ekipit kombëtar Shpresa. Në këtë rast bëhet fajlë për dy mesfushorët 19-vjeçarë të Dinamos, Ilirian Çaushaj dhe Nertil Ferraj. Këta të rinj dinamovitë kanë veshur fanellën kuqezi të ekipit U-21 dhe nën drejtimin e trajnerit Artan Bushati do të kenë mundësi që ditën e mërkurë të shfaqin vlerat e tyre përballë moshtarëve turq. Dinamovitët Ferraj dhe Çaushaj me qenien pjesë në ekipin kombëtar Shpresa, e shikojnë veten të respektuar dhe të motivuar që të perfeksionohen më shumë në të ardhmen. Mesfushori Ilirian Çaushaj ka pasur më shumë mundësi se shoku i tij i skuadrës, Nertil Ferraj që të kontribuojë për fanellën dinamovite dhe në pjesën e mbetur të sezonit aktual ata dëshirojnë që me punën e tyre stërvitore të fitojnë një besim më të madh te trajnerët, në mënyrë që prezenca e tyre me Dinamon të jetë më e shpeshtë dhe mbresëlënëse. Këta dy të rinj të Dinamos janë shembulli më konkret se tek të rinjtë duhet të besohet më shumë, sepse falë moshës së tyre ata janë më ambiciozë dhe kërkues.

[wxz]

Nga kampi dinamovit, përveç përforcimeve, pritet që të ketë edhe rrjedhje lojtarësh.


Ekipi i Dinamos po propagandon këto ditët e fundit një merkato të fortë, ku përveç të ardhurve aktualë, pritet të vijnë edhe të tjerë. Por sinoptika e bluve të kryeqytetit parashikon se gjatë këtyre ditëve të merkatos mund të ketë edhe "reshje", të cilat mund të sjellin vërshime të lojtarëve nga ekipi dinamovit në drejtim të skuadrave të tjera. Pjesë e këtyre largimeve mund të jenë edhe disa nga të rinjtë e Dinamos, të cilët janë të shumtë, por nuk kanë gjetur hapësirën e mjaftueshme për t'u aktivizuar. Politika e prurjeve të reja që po ndjek presidenca dinamovite po ua shton edhe më shumë frikën të rinjve blu se në pjesën e mbetur të sezonit stoli do të jetë një bashkudhëtar besnik. Sipas disa prej tyre, në këto kohë moderne të futbollit të rinjtë janë në modë dhe më të lakmuarit, sepse mbi shpatullat e tyre mund të hidhen themelet e një skuadre me objektiva disavjeçarë. Megjithëse në 17 javët e para të kampionatit të 68-të kombëtar Dinamo vuajti për lojtarë alternativë, trajnerët blu pak besuan te stoli i tyre që ka një moshë mesatare rreth të nëntëmbëdhjetave. Duket se të rinjtë dinamovitë po e humbasin durimin dhe po kërkojnë një fat, i cili mund t'u japë shpresë për të luajtur. Sipas tyre, ata nuk kërkojnë pasuri, por shanse për të luajtur, prandaj në ditët në vijim do të marrin parasysh ofertat që do t'u paraqiten nga klube të ndryshme. Po sipas këtyre dinamovitëve, prania në stolin blu mund t'u sjellë përfitime më të mëdha nga ana financiare, por momenatlisht ata thonë se kanë nevojë për fushën e blertë dhe topin e rrumbullaktë. Tek disa nga këta të rinj kanë filluar që të vijnë interesimet e para dhe fati i tyre është i ngjashëm me atë shprehjen e famshme shekspiriane: "To be or not to be, this is the question" (të jesh apo të mos jesh, kjo është çështja). Një nga këta është edhe i riu Indrit Taçi, i cili në sezonin e kaluar ka qenë pjesë stabël e ekipit të Shkumbinit dhe ka mundësi që nëse nuk ndryshon klima tek blutë të marrë përsëri rrugën e Peqinit. Në fillim të sezonit aktual mbrojtësi Taçi erdhi tek Dinamo së bashku me trajnerin Faruk Sejdini, por në 17 javë ka luajtur vetëm tri minuta. Prandaj "Xhaxhi" kërkon që ta marrë përsëri benjaminin e tij, i cili është i etur për të luajtur. Por, përpara se të vendosë për t'u rikthyer në Peqin, mbrojtësi dinamovit do të bisedojë me stafin blu për të parë pozicionin e tij në Dinamon e 2007-ës. Zërat e largimeve të të rinjve vërtiten edhe te disa futbollistë të tjerë, por rasti që pret të zgjidhet më shpejt është ai i Indrit Taçit. Nuk dihet se çfarë do të vendosin drejtuesit dinamovitë për rastet e futbollistëve në fjalë, sepse trajnerët përpara fillimit të merkatos janë shprehur se kërkojmë përforcime të grupit, por pa prekuar organikën. Me sa duket, dëshirat e stafit teknik nuk do të plotësohen, sepse disa dinamovitë të 2006-ës e shikojnë veten larg bluve të kryeqytetit, siç janë rastet e mbrojtësit kroat Zoran Kastel, sulmuesit senegalez El Haxhi Gudjabi dhe ndonjë të riu që ngroh stolin e rezervave.

[wxz]

Fatjon Sefa e mbrojtësi Erion Xhafa janë të ikurit e fundit nga ekipi bardhekaltër.


Ka shkuar në 6 numri i futbollistëve të larguar nga ekipi i Shkumbinit. Pas largimit më parë të shkodranëve Denis Zmijani e Nevion Cani, të korçarit Vasjan Ballço e të afrikanit Abdurahman, janë lushnjarët sulmues, Fatjon Sefa e mbrojtësi Erion Xhafa, të ikurit e fundit nga ekipi bardhekaltër. Të dy kanë rënë dakort të ndërpresin kontratën me këtë ekip, në kërkim të një tjetri. Ndërsa mbrojtësi 21-vjeçar e ka vendosur për t'u rikthyer tek ish-ekipi i tij, Lushnja, sulmuesi shtatlartë Sefa është akoma i pavendosur për ekipin me të cilin do të luajë në vazhdim. Divorci me klubin që i kishte në kontratë është bërë në mirëkuptim të plotë nga të dy palët, dhe të dy futbollistët janë lënë të lirë nga Shkumbini. Edhe pse nuk ka asnjë shkak për t'u larguar nga Shkumbini, lushnjarët kanë vendosur të luajnë me ekipe të tjera, duke parë edhe mungesën e hapësirave tek ekipi peqinas kohët e fundit. Në javët e fundit, të dy futbollistët janë aktivizuar pak në formacionin e Shkumbinit. Nga ana e trajnerit Sejdini, Sefa ka kryer rolin e zëvendësuesit në 5 6 takimet e fundit, ndërsa mbrojtësi Xhafa, që nga java e 13-të nuk është aktivizuar për asnjë minutë, ndërsa në 12 javët e para, në 10 takime ka luajtur si titullar, për 90 minuta. "Eshtë ana financiare, ajo që më detyron të largohem nga Shkumbini. Pikërisht ky shkak më bëri ta ndërpres kontratën me ekipin peqinas. Periudha që kam qenë pjesë e këtij ekipi më ka vlejtur shumë. Unë do të kisha dëshirë të qëndroja deri në fund me Shkumbinin, por kushtet e kontratës nuk na e japin këtë mundësi," - shprehet përpara largimit nga Peqini mbrojtësi 21-vjeçar Erion Xhafa, me përshtypjet më të mira. Largimi i këtyre futbollistëve tanë është folur e pohohet edhe nga drejtuesit e klubit. Këta të fundit po mendohen për t'i zëvendësuar me futbollistë të tjerë. Por, ditët po kalojnë dhe veç G.Bylykbashit e Sh.Idrizit, që janë ende në provë, nuk po shohim të vijnë futbollistë të tjerë për të zëvendësuar 6 të larguarit nga Shkumbini.

[wxz]

Gjashtë, pesë, katër... numërimit mbrapsht po i vjen fundi, çka do të thotë se koha që trajneri Lika u ka vënë në dispozicion Ndrekës dhe Bylykbashit për t'u provuar në Turqi me një skuadër ukrainase, po skadon. Pasi kanë qëndruar vetëm dy ditë në Shqipëri, pas nisjes së skuadrës drejt Malit të Zi, dy futbollistët e formacionit bazë kanë nisur aventurën me skuadrën ukrainase, ku do të provohen për disa ditë. Largimi i mundshëm i Bylykbashit dhe i Ndrekës nga radhët e Partizanit është lajmi më intrigues për tifozërinë e kuqe, që, në vend të përforcimeve, po i serviret dobësimi i ekipit. Tashmë diskutimi i ditës nuk përqendrohet tek ardhja e afrikanëve, por te largimi i futbollistëve aktualë më cilësorë. Sikur të mos mjaftonte ikja e lojtarëve për provë, në kampin e kuq askush nuk të jep një përgjigje të saktë se çfarë po bën Ndreka dhe Bylykbashi në Turqi, si po shkon prova te skuadra ukrainase dhe si është menduar të bëhet zëvendësimi i tyre në rast se ata nënshkruajnë. Në Ulqin drejtuesit e stafit teknik e kanë përqendruar vëmendjen te stërvitja e futbollistëve dhe tek ata lojtarë që po provohen dhe do të vijnë për provë (përveç kroatit Bjelokanoviç, askush tjetër i huaj nuk po provohet nga Lika) dhe nuk japin asnjë lajm (pasi nuk dinë asgjë) për mbarëvajtjen e tratativave të Bylykbashit dhe Ndrekës. "Ne nuk i pengojmë futbollistët tanë të largohen jashtë Shqipërisë". Eshtë batutua që del nga goja e presidentit Xhani e detyrimisht edhe nga trajneri Lika. Në po të njëjtën linjë përgjigjet edhe drejtori i akademisë, Genc Tomorri, i cili nga klubi "Partizani" e ka të pamundur të japë shpjegime të mëtejshme për provën që po kalojnë Ndreka dhe Bylykbashi në Antalia. Lidhja e drejtpërdrejtë me lojtarët në fjalë direkt nga Turqia është e pamundur. Numrat telefonikë shqiptarë sigurisht janë të mbyllur, sikurse është e pamundur lidhja me presidentin Xhani, i cili ndodhet në Greqi. Lika nga ana e tij u ka dhënë një afat të caktuar për provën e Turqisë, që skadon nga fundi i kësaj jave. Përderisa Bylykbashi dhe Ndreka zyrtarisht janë futbollistë të Partizanit, drejtuesit e skuadrës duhet të jenë në dijeni për provën që po kalojnë në Turqi, por në kampin e kuq askush nuk jep detajin më të vogël për aventurën e dy futbollistëve në fjalë. Me ç'shihet, mënyra më e mirë për të marrë vesh diçka për dy protagonistët e kuq është ndërhyrja e emisonit "Njerëz të humbur", që në shumë raste ka bërë të mundur lidhjen e personave të zhdukur me familjarët e tyre. Në rastin konkret, familja e madhe e Partizanit është e shqetësuar për dy "bijtë" e saj, Ndreka dhe Bylykbashi, që kanë shkuar në Turqi në kërkim të një "jete" më të mirë, duke humbur kontaktet prej disa ditësh.

[wxz]

Bjelokanoviç, vendosin miqësoret Përveç zhvillimit të një faze krejtësisht normale, për të arritur atë gjendje fizike që futbollistëve të kuq u ka munguar gjatë pjesës së parë të sezonit, trajneri Lika është përqendruar edhe tek paraqitja e mbrojtësit kroat, Ante Bjelokanoviç, i cili po kalon një periudhë prove. Ditët e para të fazës nuk është se kanë ndikuar shumë te trajneri i Partizanit, madje kroati është menduar edhe si i larguar, por provat e vërteta për të janë miqësoret që do të zhvillohen gjatë javës. Të mërkurën Partizani do të ndeshet me Besën, ndërsa të shunën thuajse janë mbyllur bisedimet për një tjetër takim miqësor me Teutën. Para se trajneri i Partizanit të japë pëlqimin apo të thotë "jo" për nënshkrimin me kroatin, ai do ta shikojë performancën e tij në dy miqësoret e programuara në mes dhe në fund të kësaj jave.

[wxz]

Trajneri i të kuqve shprehet se kjo fazë ka shumë rëndësi në përgatitjen fizike të skuadrës.


Kanë kaluar disa ditë nga fillimi i përgatitjeve në kuadër të fazës përgatitore, por përveç ritmit të lartë të stërvitjes, nuk ka asnjë ndryshim tjetër. Të kuqtë po vazhdojnë punën e lënë përgjysmë në Tiranë, ku ndryshimi i vetëm është rritja e ngarkesës fizike. Në këto ditë të para të fazës, organika e Partizanit është reduktuar për shkak të grumbullimit të të rinjve në ekipin e Shpresës dhe udhëtimit drejt Turqisë të Ndrekës dhe Bylykbashit. Trajneri i Partizanit, Hasan Lika, shprehet në linjë telefonike se do të ishte më mirë sikur skuadra të ishte e plotë, por megjithatë përgatitjet po shkojnë sipas parashikimeve. "Jam i kënaqur me punën e futbollistëve, që janë ata që u nisën nga Tirana. Atë që po bëjmë në Ulqin e kemi nisur në Tiranë dhe dëshirojmë ta çojmë deri në fund. Lojtarët nuk kanë asnjë problem shëndetësor, kështu që janë të gjithë në dispozicionin e trajnerit,"- është shprehur Lika. Qëllimi kryesor i kësaj faze është pa dyshim kapja e formës fizike, e mëshuar fort gjatë pjesës së parë të kampionatit. Lika shprehet se ky është qëllimi kryesor i kësaj faze, pa harruar dhe përgatitjen tekniko-taktike. "Kjo është një periudhë e ngjeshur, ku më shumë rëndësi ka aspekti fizik. Nuk duhet të harrojmë edhe përgatitjen tekniko-taktike të skuadrës, ndaj jo më kot kemi planifikuar zhvillimin e disa ndeshjeve miqësore. Për nesër kemi planifikuar një miqësore me Besën, ndërsa të shtunën mund të ndeshemi me Teutën. Për sa i përket largimit të mundshëm të Bylykbashit dhe Ndrekës, trajneri i Partizanit deklaron se kjo është një zgjedhje e tyre, madje u uron suksese nëse nënshkruajnë me skuadrën ukrainase. "Kam biseduar me ta një ditë para nisjes, ku kam marrë vesh dëshirën e tyre për të luajtur në Ukrainë. Unë u uroj fat në aventurën e tyre, sigurisht duke menduar rritjen e tyre profesionale. Përveç Bylykbashit dhe Ndrekës mungojnë edhe katër futbollistë të rinj, të cilët janë grumbulluar me Shpresën. Do të doja t'i kisha të gjithë në Ulqin, por prapëseprapë nuk jam shumë i shqetësuar, pasi edhe me Bushatin do të stërviten rregullisht. Këta janë futbollistët që mungojnë, por shpresoj të vijnë sa më shpejt futbollistët afrikanë dhe ata kosovarë, me të cilët kemi kontaktuar prej javësh,"- ka përfunduar Hasan Lika, trajneri i Partizanit.

[wxz]

Trajneri vlerëson të gjithë kosovarët e ardhur së fundi dhe nuk është çudi të qëndrojnë të pestë.


Në këto ditë të para të janarit në Ulqin mund të shohësh aq shumë futbollistë, sa që të duket sikur do të organizohet ndonjë kompeticion i përmasave të mëdha. Dhe ç'është më kryesorja, shumica janë futbollistë të ekipeve nga Shqipëria, madje edhe nga kategoria e parë. Edhe Besa e Kavajës është stacionuar pikërisht në Ulqin dhe tashmë ka mbyllur edhe javën e parë të stërvitjes atje. Ekipi kavajas ka qenë i përkushtuar maksimalisht atje, duke dashur të futet në gjysmën e dytë të sezonit me pretendime shumë serioze, ku primare mbetet Kupa e Shqipërisë, e vetmja që mund të realizonte objektivin që presidenti Bizhdili kishte vënë në fillim të sezonit, ku thuhej që minimumi duhej të kapin një vend në Kupën UEFA, pa harruar edhe titullin. Por të lëmë pas çfarë u tha, por çfarë bëhet konkretisht me Besën. Siç dihet, tek ekipi kavajas janë duke u stërvitur edhe pesë futbollistë kosovarë, që erdhën pikërisht këtë vit të ri, tre prej të cilëve e kanë marrë viston për të qëndruar, por nuk është çudi që të gjithë të qëndrojnë, pasi po bindin për vlerat e tyre. "Në fillim mendonim të zgjidhnim të paktën dy prej tyre, më vonë e kaluan testin tre, ndërsa tani mund të them se të gjithë lojtarët që kanë ardhur ia vlejnë dhe nuk është çudi të qëndrojnë të pestë. Unë jam i kënaqur prej tyre, tani varet se ç'do të bëjë presidenti me ta. Përveç vlerave që kanë, më ka pëlqyer edhe përkushtimi që tregojnë në stërvitje, duke treguar se kanë ego dhe dëshirë për të zënë një vend në këtë skuadër," shprehet trajneri Vasil Bici, i cili po mundohet t'i japë hakun secilit në këtë seleksionim. Nga sa vërehet, Bici është më i kënaqur nga gjendja e grupit në përgjithësi, pasi sheh një vlerësim maksimal nga të gjithë për të bërë më të mirën dhe për të marrë ngarkesën e duhur stërvitore. Këto ditë Besa do të zhvillojë edhe ndeshjet miqësore, ku do të vendoset përfundimisht për të ardhurit, por njëkohësisht edhe përshtatjet, skemat e reja që trajneri Bici ka në kokën e tij. "Jemi në mesin e përgatitjeve, tani e kanë radhën miqësoret, ku do të krijoj një mendim të qartë për grupin dhe lojtarët e veçantë. Na kanë vlejtur shumë këto ditë dhe pjesën e mbetur do të mundohemi ta shfrytëzojmë në maksimum. Për këtë falënderoj presidentin Bizhdili për mundësinë e zhvillimit të një stërvitjeje më se normale në kushte bashkëkohore. Së bashku me ekipin do të mundohemi të mos e zhgënjejmë, duke synuar të ngjitemi sa më lart," përfundon trajneri i Besës, Vasil Bici. Ndërkohë, me grupin akoma nuk janë bashkuar Elokan dhe Nana, të cilët janë larguar që në fundin e vitit të shkuar. Në fakt, ata duhet të ishin bashkuar ditë më parë, por nuk merret vesh për momentin arsyeja e vonesës së tyre. As drejtuesit nuk janë prononcuar në lidhje me këta dy lojtarë.

[wxz]

Pasditen e djeshme kuqeblutë e Vllaznisë kanë zhvilluar të parin takim miqësor në kuadrin e përgatitjeve që po zhvillojnë për rinisjen e sezonit futbollistik. Përballë tyre ka qenë ekipi Banat, që luan në ligën e parë të Serbisë, ekip ky që është duke zhvilluar fazën përgatitore në të njëjtin vend me shkodranët. Për këtë miqësore, trajneri Josa ka hedhur në fushë formacionin më të mirë që ka pasur në dispozicion, duke filluar me Grimën në portë për të vazhduar me treshen e mbrojtjes të përbërë nga Teli, Dabulla e Vukçeviç. Në mesfushë kanë qenë në krahë Ahi nga e djathta e Lici në të majtin, ndërsa në qendër kanë qenë Kotrri dhe Osja. Para tyre Bejzade, ndërsa në shpinë në sulmuesit të vetëm Cani ka qenë Doçi. Pjesa e parë e miqësores ka përfunduar me rezultatin 1 0 për Vllazninë me golin e kapitenit Osja në minutën e 28 të. Edhe pjesa e dytë ka nisur më mirë për kuqeblutë që kanë zhvilluar një ndeshje shumë të mirë. Sulmuesi i rikthyer nga huazimi me Shkumbinin, Nevian Cani ka shënuar golin e dytë të ndeshjes për kuqeblutë, ndërkohë që në minutat e fundit të takimit serbët kanë shënuar golin e tyre të vetëm me 11 metërsh. Në pjesën e dytë janë aktivizuar edhe Semina, Hoti e kosovari i sapoardhur Miroçi, ndërkohë që Dalipi nuk ka luajtur në këtë ndeshje si pasojë e një dëmtimi të pësuar në stërvitje. Burime nga Hercegnovi bëjnë të ditur se miqësorja e djeshme nuk ka shkuar krejt e qetë. Kjo pasi në radhët e ekipit serb kanë qenë edhe 2 3 lojtarë, të cilët me ndërhyrjet e tyre të rënda kanë sjellë shqetësim te shkodranët, duke krijuar tensione të herëpashershme në fushë. Përfundimisht, Vllaznia e ka nisur me fitore serinë e miqësoreve në përgatitoren e Malit të Zi.

[wxz]

Merkatoja kuqeblu ka filluar të lëvizë diçka pas atij vend numëro që kaloi së fundmi.


Merkatoja e Vllaznisë ka filluar të lëvizë diçka pas atij vend numëro që kaloi së fundmi. Një gjë e tillë konstatohet nga fakti se me skuadrën të dielën pasdite është bashkuar edhe kosovari Miroçi. Sakaq sot pritet që të mbërrijë në Shqipëri e më pas të niset direkt për në Mal të Zi edhe afrikani Gudjabi. Këta të dy pritet të jenë përforcimet e vetme për momentin për të pritur pastaj edhe nëse do dalë gjë nga shkëmbimi i Miliçit me ndonjë nga futbollistët e Buduçnostit. Mbi të gjitha, rëndësi ka fakti që kuqeblutë kanë filluar të përforcohen në merkato. Kosovari 24-vjeçar Xhelal Miroçi pasi u kthye mbrapsht nga policia malazeze ditën e premte, ngaqë nuk ishte i pajisur me pasaportën përkatëse, të dielën më në fund është bashkuar me Vllazninë. Për rrjedhojë ai nga Gjermani ka zbritur me avion në Rinas, ku është pritur nga përfaqësuesit e klubit shkodran që më pas e kanë shoqëruar deri në Hercegnovi, ku është bashkuar me skuadrën kuqeblu mbrëmjen e kësaj dite. Këtë e bën të ditur për gazetën vetë presidenti Fushaj, i cili shpreson shumë që kosovari i sapoardhur të rezultojë efikas. Megjithëse i lodhur nga udhëtimet e gjata, Miroçi ka luajtur disa minuta në takimin e djeshëm. Vetia kryesore e shfaqur në fushë prej tij ka pasur të bëjë me faktin se dallohej për lëvizshmëri të madhe në fushë. Në këtë mënyrë, që nga dita e djeshme, kosovari që vjen nga ekipi SG Dornheim është vënë nën urdhrat e trajnerit Mirel Josa. Ai luan si mesfushor qendre dhe pritet të zëvendësojë kosovarin tjetër, Popova, i cili nuk u lejua nga klubi Allemania Aachen për të firmosur me Vllazninë. Ndërkohë, në kampin shkodran të gjithë presin ardhjen e senegalezit El Haxhi Gudjabi. Vetë ai para disa ditësh pati njoftuar se do të vinte në Shqipëri për t'u bashkuar menjëherë me skuadrën kuqeblu pikërisht më datë 16 janar. Pra sot dhe tashmë sytë e të gjithëve janë drejtuar nga ai. Me ardhjen edhe të afrikanit, mendohet të plotësohet një boshllëk i madh në radhët e Vllaznisë, sepse ai kërkohet me ngulm nga trajneri Josa. Po ashtu pritet që edhe Miroçi, të paktën nga çfarë është thënë për të, të bindë drejtuesit shkodranë për të firmosur një kontratë me ta. Në këtë mënyrë, gjërat duket se kanë filluar të përmirësohen për skuadrën që e ka mbyllur vitin 2006 në vendin e tretë të renditjes. Pavarësisht nga këto, pritet që përforcimet të bëhen realitet e më pas të flitet për të ardhmen.

[wxz]

Kur të gjithë prisnin kalimin e tij te lombardët, portieri bardheblu është pranë një marrëveshjeje në Serinë A


Isli Hidi, pasuesi i Tares te Breshia? Afërsisht një muaj më parë ka qenë pikërisht ky lajmi kryesor i gazetës. Por duhet thënë se në botën e futbollit gjërat ndryshojnë shumë shpejt dhe kur një lojtar e sheh të sigurt te një klub, pas disa orësh ai mund të firmosë për një tjetër. E njëjta gjë mund të thuhet edhe për portierin e Tiranës, Isli Hidin, i cili të shtunën ka marrë një ftesë zyrtare nga ana e klubit të Serisë A, Empolit, për t'u provuar për gjashtë ditë në Itali. Me një seriozitet të plotë, skuadra italiane, përveçse e ka dërguar faksin te bardheblutë, një kopje të saj e ka nisur edhe në Federatën Shqiptare të Futbollit, ku thuhej qartë se portieri i Tiranës, që është njëkohësisht edhe anëtar i ekipit kombëtar, duhet të udhëtojë sa më shpejt drejt vendit fqinj. Me të marrë këtë lajm të gëzueshëm, paraditen e djeshme Isli Hidi ka qenë në ambientet e Ambasadës Italiane, ku ka dhënë intervistën përkatëse. E vërteta është se 25-vjeçari kërkonte ta mbante të fshehtë këtë kërkesë të Empolit, duke u justifikuar me faktin se nuk udhëtoi në Turqi për shkak të disa problemeve private. Megjithatë, çdo gjë është bërë e qartë dje dhe në ditët në vazhdim pritet të mësohet e ardhmja e "gardianit" të talentuar të kampionatit shqiptar. Nëse do të hapësh sitin zyrtar në internet të klubit të Empolit, vë re se në përbërje të skuadrës janë portieri Daniele Bali 40 vjeç dhe Davide Basi 22 vjeç. Kaq mjafton për të kuptuar se trajneri Luixhi Kanji ka shprehur interesimin për një portier të ri, i cili gjithashtu të ketë një eksperiencë të mjaftueshme, por gjithashtu të jetë i pranueshëm në kuotat financiare që mund të kërkojë. Në këtë pikë, Isli Hidi duket shumë i favorshëm dhe menaxherët italianë, të cilët e kanë vëzhguar në stërvitjet e zhvilluara në San Marino me përfaqësuesen, u kanë garantuar drejtuesve italianë për një portier me vlera. Pas javës së 19-të të Serisë A, Empoli ndodhet në vendin e gjashtë në renditje, me 25 pikë. Ky është një sukses i madh për blutë, të cilët vitet e fundit kanë qenë disa herë në Serinë B, teksa për vitin 2007 pretendojnë një vend në Kupën UEFA.

[wxz]

E diela ka qenë thuajse rraskapitëse për bardheblutë, të cilëve u është dashur të udhëtojnë për afro gjashtë orë derisa mbërritën në Kemer. Gjatë qëndrimit të tyre tranzit në Stamboll, mësohet se kanë mbetur në aeroport bagazhet e vëllezërve Duro, Arian Pishës, si edhe Blendi Nallbanit. Kur mbërritën në Antalia, të katër futbollistët janë befasuar kur nuk kanë parë valixhet e tyre, çka i ka alarmuar menjëherë drejtuesit e skuadrës. Në stërvitjen e djeshme, ata janë stërvitur me uniformat e marrë borxh nga shokët, ndërkohë që sot pritet që bagazhet të mbërrijnë në Antalia. Ja që ndodh edhe kështu.

[wxz]

Abazaj drejt Turqisë, firma formalitet
Tiranën dhe Oriand Abazajn e ndajnë vetëm firma. Sulmuesi që mbylli fazën e parë në radhët e Kastriotit, që sot do të vishet bardheblu, kur do të udhëtojë drejt Turqisë. Së bashku me drejtorin teknik, Alban Tafajn, 22-vjeçari do të shkojë në Kemer, ku menjëherë do të vihet nën urdhrat e trajnerit Shkëlqim Muça. Sipas menaxherit dhe babait të futbollistit, Maksi Abazajt, donatorëve u është bërë një draft-kërkesë, ku kërkohet plotësimi i disa pikave në kontratë. "Parimisht, donatorët kanë rënë dakord me plotësimin e kushteve të kontratës për Oriandin. Edhe pse nuk është hedhur firma, një gjë e tillë tashmë është vetëm formalitet. Sot ai do të niset në drejtim të Antalias, për t'u bashkuar në stërvitje me Tiranën. Për sa i takon vendimit të Apelit, unë si menaxher e pres i qetë, pasi mendoj se do të jetë sërish në favorin tonë, duke parë pikën kryesore të kontratës, se në rast të largimit të trajnerit Ramadan Ndreu, edhe Oriand Abazaj është i lirë të largohet gjithashtu,"- bën të ditur për gazetën Maksi Abazaj.

[wxz]

Hamdi Salihi takohet me ish-shokët
Ashtu siç e kishim thënë dy ditë më parë, Hamdi Salihi është takuar ditën e djeshme me ish-shokët e Tiranës. Në ambientet e hotel "Limra International Resort", shkodrani është takuar me të gjithë shokët një nga një, por edhe me stafin drejtues. Për rreth një orë ata kanë diskutuar së bashku muhabetet e vjetra, por edhe të reja, kur kujtojmë se prej 15 ditësh Salihi është bërë pjesë e Riedit. Skuadra e jeshilëve e ka mbyllur dje fazën përgatitore të zhvilluar në Kemer dhe është nisur menjëherë drejt Austrisë. Urimi i vetëm që i dhanë bardheblutë Salihit ishte: Sa më shumë fat dhe gola".

[wxz]

Kampionët e dimrit zhvilluan dje testet e prapambetura fizike në fushën ngjitur me hotel "Limra International".


Pas udhëtimit të lodhshëm nga Tirana për në Kemer, dita e djeshme ka qenë shumë e ngjeshur për bardheblutë. Trajneri Shkëlqim Muça, së bashku me përgatitësin atletik, Rauf Dimrajn, zhvilluan testet e prapambetura fizike, të cilat i kishin në plan për t'u realizuar që në kryeqytet. Për fat të mirë, e gjithë skuadra i kaloi pa dëmtime, ndërkohë që rezultatet pritet të shqyrtohen sot nga ana e drejtuesve, për të nxjerrë më pas pikat ku duhet punuar në ditët në vazhdim. Për momentin, skuadra është sistemuar në hotel "Limra International Resort", ku nga ana e turqve janë ofruar të gjitha kushtet e nevojshme si në aspektin e trajtimit ushqimor, fjetjes etj., por edhe stërvitjes. Mësohet se fusha stërvitore është ngjitur me hotelin, teksa seancat zhvillohen në orën 9:00 dhe 15:00, ndërkohë që në mes të këtij intervali skuadra pushon, madje mund të bëjë edhe pishinë. Edhe sot janë planifikuar të zhvillohen dy seanca stërvitore, ndërkohë që nesër vetëm një e tillë. Ditën e enjte është zyrtarizuar edhe miqësorja e parë me turqit e Istambulsporit, ndeshje e cila do të luhet në stadiumin e këtyre të fundit, në orën 16:00. Deri atë ditë, trajneri Muça do të ketë mundësi të punojë më mirë me grupin, si dhe në veçanti për ardhjet e fundit, duke filluar me Hetlem Çapjen, Erald Turdiun apo Florenc Rrapin. Skuadrës gjithashtu i është bashkangjitur edhe mbrojtësi Abraham Alechenu, i cili ndodhej në vendlindje për 20 ditë, por tashmë është rikthyer dhe mësohet se gëzon formë të mirë fizike. Me grupin nesër pritet të bashkohen edhe kamerunasi Fish, që do të niset sot nga Tirana, por edhe sulmuesi Oriand Abazaj, blerja më e fundit e kampionëve të dimrit. Së bashku me drejtorin teknik, Alban Tafajn, të dy këta futbollistë do të jenë pjesë e grupit në vazhdim, në pritje edhe të vendimit të Isli Hidit, portierit që kërkohet nga skuadra e Empolit.

[wxz]

Lista e Bariçit ende nuk është shpallur pasi disa futbollistë nuk kanë kthyer përgjigje për pjesëmarrjen e tyre.


Pasi përfunduan me sukses të gjitha grumbullimet e ekipeve kombëtare të moshave, më 20 janar fillon "zbori" i kombëtares B. Ky "zbor" do të zhvillohet në Antalia të Turqisë dhe do të zgjasë nëntë ditë. Trajneri i përfaqësueses sonë, Oto Bariç, do të shikojë elementët e përzgjedhur nga kampionati shqiptar dhe disa lojtarë kosovarë që luajnë në kampionate të huaja. Duhet thënë se në periudhën 20-29 janar, disa kampionate të huaja janë në aktivitet zyrtar, ndërkohë që shumë ekipe janë duke kryer fazën përgatitore. Në grumbullimin e fundit që kreu kombëtarja gjatë muajit dhjetor, trajneri Bariç përzgjodhi pesë lojtarë kosovarë, të cilët janë kandidatë për të veshur fanellën kuqezi. Dy prej tyre pritet të marrin pasaporta shqiptare, ku natyrisht mundësinë për t'u pajisur me të e kanë lojtarët e repartit mbrojtës, ku ka edhe më shumë nevojë përfaqësuesja jonë. Ndërkohë, problemi më i madh për grumbullimin e Antalias ka të bëjë me lojtarët që aktivizohen jashtë, sepse disa prej tyre, gjatë kësaj periudhe, janë të angazhuar. Deri më tani vetëm tre lojtarë kanë kthyer përgjigje pozitive për të marrë pjesë në këtë grumbullim. Shpëtim Hasani, Leutrim Neziraj dhe Mërgim Mavraj janë lënë të lirë nga klubet, ndërsa të tjerët ende nuk kanë kthyer përgjigje. Kjo gjë po mban peng edhe shpalljen e listës të lojtarëve që do të marrin pjesë në Antalia. Bariçi kërkon që ata të cilët nuk lejohen nga klubet, t'i zëvendësojë me të tjerë lojtarë, nga kampionati shqiptar. Kroati ka shfaqur shqetësimin e tij për këtë problem, por në përgjigjen negative të klubeve normalisht ndikon edhe periudha e gjatë e grumbullimit. Skuadrat janë në kulmin e fazës përgatitore dhe nuk mund t'i lëshojnë lehtë futbollistët. Këtë grumbullim e kundërshtoi edhe klubi i Tiranës, por, sipas shefit të ekipeve kombëtare, Besnik Çela, lojtarët e Tiranës, duke qenë se e zhvillojnë fazën përgatitore në Turqi, do të marrin pjesë në takimet miqësore që do të zhvillojë kombëtarja. Një problem del edhe me ish-sulmuesin e Tiranës, Hamdi Salihi. Për këtë të fundit kanë ndryshuar gjërat, pasi gjithçka rreth pjesëmarrjes së tij në Antalia e ka në dorë klubi i tij i ri, Ried. Gjithsesi, të fituar nga ky grumbullim duket se do të jenë futbollistët e kampionatit shqiptar. Kjo është një mundësi e artë për ta, pasi për nëntë ditë me radhë do të jenë nën vëzhgimin e Bariçit. Gjatë qëndrimit në Antalia, futbollistët do të stërviten në kushte mjaft komode, madje do të zhvillohen edhe disa takime miqësore, të cilat do të jenë një test i vërtetë për të gjithë lojtarët. Skuadrat me të cilat do të përballet në miqësore kombëtarja nuk janë konfirmuar. Një mundësi është zhvillimi i një miqësoreje me Karlsruhen e Edmond Kapllanit, e cila po e zhvillon fazën përgatitore në Antalia. Kapllani bashkë me sulmuesin e Branit, Migen Memelli, do të jenë dy figurat e reja të këtij grumbullimi. Ata kanë shkëlqyer gjatë kësaj periudhe dhe normalisht janë kandidatë për t'u thirrur në kombëtare për takimin eliminator të 24 marsit me Slloveninë. Shefi i sektorit të ekipeve kombëtare, Besnik Çela, pohon për gazetën "Sporti shqiptar" se po merren të gjitha masat që grumbullimi i Antalias të realizohet sipas parashikimeve. "Ne si sektor i ekipeve kombëtare kemi filluar punën për të organizuar grumbullimin e kombëtares në Antalia. Po punohet që çdo gjë të shkojë sipas parashikimeve. Kemi kontaktuar me lojtarët dhe presim përgjigje nga klubet ku ata aktivizohen. Gjithashtu po punojmë për të akomoduar ekipin në një hotel, ku të ketë edhe skuadra të tjera, në mënyrë që të zhvillojmë disa takime miqësore. Këto takime do të zhvillohen më datat 22, 25, 28 janar, por kundërshtarët me të cilët do të përballemi ende nuk janë zyrtarizuar. Nga futbollistët me të cilët kemi kontaktuar, një përgjigje pozitive për pjesëmarrjen në këtë grumbullim kemi marrë nga Shpëtim Hasani, Leutrim Neziraj dhe Mërgim Mavraj. Lojtarët e tjerë ende nuk kanë kthyer përgjigje. Duhet thënë se klubet e kanë të vështirë t'i lëshojnë lojtarët për një peridhë nëntëditore. I kemi bërë ftesë edhe Labinot Halitit, që aktivizohet në Australi, por ende nuk kemi marrë një konfirmim nga klubi i tij. Bariçi ia ka bërë të qartë Halitit se, në qoftë se pretendon një vend në kombëtare, duhet të aktivizohet në një ekip brenda Europës. Për të ardhur në grumbullim, atij i duhet të bëjë tri ditë udhëtim. Natyrisht, kjo nuk është në të mirën e vetë lojtarit, ashtu edhe tonën. Shpresojmë që gjatë këtyre ditëve të na kthejnë përgjigje disa lojtarë dhe më pas trajneri të shpallë listën e tyre,"- u shpreh Çela.

[wxz]

"Skaner" i kampionatit: Bardheblutë e nisin me barazim dhe i mbyllin me fitore 17 javët e kampionatit.


Çudia Muka, më i ndëshkuari me të verdha
Devi Muka, në 17 javët e para të kampionatit është shfaqur lojtari më i ndëshkuar me kartonë të verdhë. Edhe pse në rolin e një mesfushori të avancuar, kapiteni ka koleksionuar katër kartonë të verdhë, më shumë se edhe mbrojtësit Pisha, Dede, Hajdari apo Penja. Pas tij vjen nigeriani Alechenu Abraham, me tre kartonë të verdhë dhe një kuq, të marrë në derbin me Dinamon.

[wxz]

Eleandro Pema, rekordi i zëvendësimeve
Eleandro Pema ka shënuar një rekord të ri në përfaqësimin e tij të dytë me fanellën e Tiranës. Sulmuesi që realizoi vetëm një gol në 17 javët e para, ka shënuar rekordin e zëvendësimeve. Në tri ndeshje si titullar, ai është zëvendësuar në pjesën e dytë nga Sefa, Merkoçi dhe Sinani. Ndërsa si zëvendësues ai ka provuar të hyjë në fushën e lojës 12 herë. Zëvendësimet më të shpeshta 22-vjeçari i ka pasur me sulmuesin tjetër, Vioresin Sinanin. Në dy takime, Pema nuk ka mundur të luajë qoftë edhe një minutë.

[wxz]

Hamdi Salihi, me më shumë minuta të luajtura
Hamdi Salihi, përveçse është golashënuesi më i mirë për Tiranën, me 13 gola, ka thyer rekord për sa u takon aktivizimeve të tij në fushën e lojës. Në 17 takime, shkodrani ka qenë titullar i padiskutuar, teksa ka provuar tri herë të zëvendësohet pas minutës së 70-të, me Pemën, Hajdarin dhe Merkoçin. Pas Salihit, me më shumë minuta të luajtura është Ervin Bulku, që ka munguar në një takim për shkak skualifikimi, ndërkohë në dy të tjerë është zëvendësuar nga Penja, por edhe ka marrë kartonë të kuq në javën e tretë përballë Vllaznisë.

[wxz]

Nevil Dede, mbrojtësi golashënues
Pas Salihit dhe Sinanit me nga 13 gola secili, është Nevil Dede ndjekësi më i afërt i tyre, me katër të tillë. Mbrojtësi bardheblu është shfaqur edhe si golashënues, duke qenë vendimtar në tre nga katër takimet e luajtura. Për fat të keq, golat e tij janë shënuar në tri ndeshje që janë mbyllur në barazim (Elbasanin 2-2, Teutën 1-1 dhe Shkumbinin 2-2), ndërkohë që goli i katërt ndaj Flamurtarit ka qenë vetëm për statistikë, sepse Tirana humbi 3-2. Golat e tjerë për Tiranën janë shënuar nga Duro (2), Bulku, Pema, Muka dhe Patushi nga një.

[wxz]

Viti 2006 do të mbahet mend gjatë nga ana e lojtarëve, drejtuesve dhe tifozerisë bardheblu. Me përjashtim të titullit kampion, u arritën thuajse të gjithë objektivat, duke filluar me fitimin e Kupës së Shqipërisë, kalimin e një turi në Europë, fitimin e Superkupës, "Këpucës së artë" nga Hamdi Salihi dhe së fundmi shpalljes kampionë të dimrit. Një seri rezultatesh pozitive nga ana e Tiranës, që pa dyshim mbetet skuadra më e mirë e kampionatit shqiptar në këtë dekadën e fundit. Edhe pse te bardheblutë ndërrohen presidentë, trajnerë dhe futbollistë, mentaliteti i këtij klubi mbetet gjithmonë fitues.
Merkatoja e verës te Tirana do të sillte blerje të bujshme, duke filluar me Vioresin Sinanin nga Vllaznia, Igli Allmuçën nga Partizani, Nevil Deden dhe Abraham Alechenun nga Elbasani kampion, pa harruar Penjën dhe Fishin, dy futbollistë me kualitete. Edhe pse u larguan dy emra të njohur që i kishin dhënë shumë fanellës bardheblu, si Sina apo Dabulla, skuadra ndryshoi komplet fytyrë në vendosjen e saj në fushë. Java e parë e kampionatit nuk nis mbarë për kryeqytetasit, të cilët të lodhur nga Kupa UEFA, ku vinin pas dështimit në Turqi me Kajserisporin, për pak nuk e panë veten të humbisnin përballë rivalëve të Elbasanit. Janë dashur minutat e fundit të lojës, që Dede dhe Salihi t'i jepnin një pikë Tiranës, duke larguar makthin që i kishte kapur nga përballja direkte me këtë kundërshtar. Kaq kanë dashur bardheblutë, që në drejtimin e Mirel Josës të fillojnë shkëputjen në renditje, ku fitoret me Kastriotin, Partizanin, Dinamon, Apoloninë, Luftëtarin dhe Besën, janë vendimtare. Java e 10-të dhe e 11-të do të rezultojë fatale për fatet e trajnerit Josa, që edhe pse e mbyll fazën në vendin e parë, do të shkarkohet nga ana e donatorëve. Humbja 3-2 me Flamurtarin, por edhe barazimi 1-1 me Shkumbinin, bëjnë atë që te Tirana të nisë "fshesa e hekurt". Përveç Josës, pezullohen Patushi së bashku me Merkoçin, me arsyetimin: thyerje të disiplinës.
Të ndodhur në këto kushte dhe duke mos pasur shumë kohë në dispozicion, kryesia e klubit vendos që deri në fund të vitit drejtimin e ekipit ta marrë Shkëlqim Muça. Në rolin edhe të sekretarit të klubit, ish-futbollisti i dalluar i Tiranës e nis me këmbën e mbarë punën në skuadër, duke marrë një fitore të me vlera 2-0 përballë Elbasanit, kampion në fuqi. Një javë më pas vjen humbja në Krujë, por që sërish nuk i trondit kryeqytetasit, që deri në fund të dhjetorit koleksionojnë fitore dramatike me Dinamon, Partizanin dhe Vllazninë. Ëmbëlsira mbetet në fund, kur në transfertën ndaj Apolonisë, përveçse tri pikëve të marra, shënoi për herë të parë kapiteni Devi Muka dhe për herë të fundit Hamdi Salihi.
Duhet thënë se reparti i sulmit ishte vendimtar për fatet e Tiranës në 17 javët e para të kampionatit. 36 golat e shënuar, prej të cilëve 26 nga dyshja Sinani-Salihi, bënë atë që kjo skuadër të mos ndalej sidomos në përballjet me rivalët direkt. Mbrojtja dhe mesfusha ishin dy repartet e tjera, që patën problemet e tyre, kjo edhe si rrjedhojë e dëmtimeve apo skualifikimeve të shumë futbollistëve. Por, duke pasur në stol dy strategë, si Josa dhe Muça, bardheblutë gjetën forca për të dalë nga momentet e vështira dhe në fund u shpallën "kampionë të dimrit", me një diferencë prej gjashtë pikësh nga ndjekësja më e afërt, Teuta.

[wxz]

Muça: Përgëzoj djemtë për karakterin e shfaqur
Në këto 4 vitet e fundit si sekretar i klubit "Tirana", Shkëlqim Muça është cilësuar shpeshherë trajneri i krizave në skuadër. Pas largimeve të trajnerëve, Muça është shfaqur si drejtues i skuadrës për pak kohë, ndërsa këtë herë ai duket se ka vendosur ta drejtojë Tiranën deri në fund të kampionatit. Në gjashtë ndeshje të luajtura në kampionat, ai koleksionon pesë fitore dhe një humbje, duke bërë që bardheblutë të shkëputen plot 6 pikë nga ndjekësja më e afërt, Teuta. Në lidhje me këtë ecuri të shkëlqyer, Muça do të shprehej: "Përgëzoj të gjithë djemtë për karakterin e shfaqur në fushë. Edhe pse me mungesa të shumta, kemi ditur të fitojmë ndeshje të rëndësishme, si ato me Elbasanin, Vllazninë, Dinamon dhe Partizanin. Nëse Tirana do të shfaqë përherë këtë karakter që e ka në traditën e saj, vështirë se ndonjë skuadër do të mund të na ndalë. Gjithsesi, deri tani kemi bërë afro gjysmën e punës, teksa vështirësia do të vijë më pas, ku edhe do të luhen ndeshjet direkte,"- thotë për gazetën trajneri-sekretar, Shkëlqim Muça.

[wxz]

Donatorët: Presim më shumë nga kjo Tiranë
Pavarësisht rezultateve pozitive, katërshja e donatorëve bardheblu është gjysmë e kënaqur me ecurinë e skuadrës që financon. Për Shefikat Ngjelën, Tirana është e ndërtuar për të fituar dhe kënaqur tifozët që e ndjekin në shkallët e stadiumit. "E vërteta është se ne si donatorë presim më shumë nga kjo skuadër. Edhe pse jemi të parët në klasifikim pas këtyre 17 javëve kampionat, vazhdojmë të na dhembin humbjet e pësuara në Vlorë dhe Krujë, ku djemtë nuk ditën të ruanin epërsinë. Nëse do t'i kishim fituar edhe këto dy takime, apo do të kishim luajtur më mirë përballë Teutës dhe Vllaznisë, sot do të shihnit një Tiranë tejet të shkëputur në renditje."
Në të njëjtën linjë është edhe Refik Halili, për të cilin skuadra ka ende për të dhënë: "Ne gjithmonë presim që Tirana, përveç rezultatit, të bindë edhe me lojë, sepse dihet që tifozët bardheblu janë fanatikë në këtë aspekt. Megjithatë, në vitin 2007, personalisht pres të fitojmë titullin kampion, por edhe të kalojmë turin e dytë në Ligën e Kampioneve." Dy donatorët e tjerë, që duket sikur i rrinë larg skuadrës në stadium, por që në të vërtetë janë një mbështetje të fuqishme si financiare, por edhe shpirtërore, Avni Nuri dhe Agron Papuli, thonë njëzëri: "Kemi besim të verbër te kjo skuadër që kemi ndërtuar sivjet. Titulli kampion që humbëm një vit më parë, na shërbeu si një mësim i mirë. Fakti që kemi fituar të gjitha përballjet me rivalët direkt, do të thotë se ky grup mund të pretendojë shumë më lart sa kaq,"- bëjnë të ditur Nuri dhe Papuli.

[wxz]

Përgatitjet e Besës në Ulqin të Malit të Zi kënaqin stafin drejtues dhe futbollistët.


Nëse i drejtohesh qytetit të Ulqinit, papritur nga çfarë sheh atje mund të të duket se je në "kryeqytetin" e futbollit shqiptar. Në morinë e ekipeve shqiptare bën pjesë edhe Besa, një mysafire e rregullt e këtij qyteti. Në stërvitjen kavajase, krahas emrave tashmë të njohur, bie në sy djersitja deri në palcë e portierit beratas, të ardhur vetëm para një jave te Besa, Bledar Dura.Atij i duhet të pranojë konkurrencën e shkodranit Mustafa dhe të të riut kavajas Taulant Guma. Po si i vlerëson beratasi këto ditë ulqinake? Sa beson se mundet të zërë vendin e "gardianit" tek Besa përballë përvojës së Mustafës dhe talentit të Gumës? Ne, ndërsa ekipi startonte stërvitjen e djeshme, i morëm këtë intervistë Durës.
- Keni munguar një gjysëm sezoni në fushat e futbollit...
- Vërtet që kam munguar në superligë, por kam vazhduar stërvitjen në ekipin tim të lindjes, Tomorin. Ashtu si erdhën punët, nuk preferoja më të rrija atje dhe prisja çdo moment një shans për një nga ekipet e superligës. Besa, ashtu siç besoja e shpresoja, më ftoi dhe ja ku jam me të.
- Por, ndryshe nga një sezon më parë, tani duhet të sfidoni kolegun tuaj, Mustafa...
- Nuk besoj se është tamam kështu. Në mjaft ekipe të forta, të dy portierët, për të mos thënë tre, janë gjithnjë konkurrentë dhe njëkohësisht shokë. Ka vend për të luajtur herë njëri e herë tjetri. Shihni Tiranën, bie fjala, apo Teutën e Vllazninë me nga dy portierë mjaft të mirë. Në këtë sens besoj se konkurrenca në ekip, në të gjitha postet në fushë, vetëm sa sjell progres për secilin prej nesh.
- Ju shohim të djersini si asnjëherë...
- Epo ligji i futbollit duhet pranuar, kur thotë se po nuk luajte dy muaj, ke nevojë për gjashtë të tilla që të kthehesh aty ku ishe. Në këtë sens po djersij sa dyfishi i shokëve, për të rikuperuar kohën e humbur. Shpresoj vetëm tek djersa ime dhe tek askush tjetër. Presidentin Bizhdili e falënderoj që më dha përsëri shansin të tregoj veten dhe vlerat e mia.
- Po në tërësi për Besën, si i vlerësoni këto ditë ulqinake?
- Eshtë një minifazë që, me sa konstatoj te shokët, ishte e domosdoshme. Mjaft nga titullarët e ekipit nuk i gjeta ashtu siç i kisha lënë, kështu që Bici, me të drejtë shprehet se Besa, nisur nga investimet e kryera, duhet e mund të ishte në tjetër vend në klasifikim. Më gëzon fakti se të gjithë, pa përjashtim, po angazhohen me të gjitha forcat për të përfituar maksimumin nga kjo fazë. Një tregues ky që Besa do të jetë ajo që presin të gjithë tifozët kavajas, që nga takimi me Luftëtarin.
- Meqë përmendët Luftëtarin, që e keni në një hotel, çfarë mund të na thoni për sfidën me të?
- Do t'i trembim qysh këtu, që kur të vijnë në Kavajë, të jenë dorëzuar pa filluar takimi (qesh). Normale kjo, pasi jashtë fushe jemi shokë e miq, ndërsa brenda saj secili mbron interesat e tij, të fanellës, por edhe ato personale financiare. Vjet Besa u shemb me para nga premiot e fitoreve. Përse të mos veprojmë kështu përsëri?
- Së fundi, mesazhi për fansët tuaj në Kavajë, që nuk janë të paktë...
- Më kanë dashur, përkrahur e mbështetur gjithnjë. Mezi pres t'i takoj e njëkohësisht t'u them se përsëri do të jem ai që kanë duartrokitur një vit më parë.

[wxz]

Besa, sot miqësore me Partizanin
Besa do të kryejë sot testin e parë të gjendjes së saj, ku përballë do të ketë ekipin e Partizanit. Trajneri Bici do të shohë e vlerësojë para së gjithash futbollistët e ardhur në merkato, si kosovarët Krasniqi, Hyseni, Jonuzi, Duraku e Ahmeti. Njëkohësisht vëmendje do t'i kushtohet edhe portierit Dura e të ardhurit Kalemi.

[wxz]

Binagol-Elokan, sërish larg grupit
Ndërsa ishte shpresuar që dy futbollistët e huaj, Binagol e Elokan, të vinin e t'i bashkoheshin grupit të futbollistëve kavajas në Ulqin, kjo nuk ka ndodhur as dje, pas një jave të fillimit të fazës stërvitore. Trajneri Vasil Bici shprehet i qartë e i prerë në këtë pikë, se, edhe nëse vijnë, ata nuk do të jenë më të privilegjuar për të qenë menjëherë në formacion. "Do të luajë ai që djersin më shumë dhe jo kontratat apo emrat e futbollistëve. Vazhdoj t'i pres dhe besoj se nuk mund të tolerohet më vonesa e tyre."
Kaq thotë Bici dhe gjithçka kuptohet qartë.

[wxz]

Kampionët verdheblu, në drejtimin e trajnerit Edmond Gëzdari, kanë zhvilluar dje pasdite stërvitjen e parë në Malin e Zi. Verdheblutë, duke filluar që nga dita e sotme, do të zhvillojnë dy seanca në ditë, paradite dhe pasdite, dhe me kalimin e ditëve pritet që të zhvillojnë dhe disa takime miqësore me ekipe të ndryshme.


Tiko dhe Periç i bashkohen grupit
Sulmuesi Ligoraq Tiko dhe Darko Periç i janë bashkuar Elbasanit në fazën përgatitore. Të dy futbollistët kanë zhvilluar stërvitjen e parë me fanellën e Elbasanit dje. Ndërkohë pritet nga dita në ditë ardhja e Abdullait dhe e një sulmuesi francez.

Akomodimi i kampionëve në hotel "Plazha"
Kampionët e Shqipërisë janë akomoduar në një nga hotelet më luksoze në Hercegnovit, "Plazha". Duhet theksuar se ambienti ku janë sistemuar kampionët verdheblu është tepër i këndshëm, ndërkohë që janë shumë pranë ekipit shkodran të Vllaznisë, në një nga pikat më turistike të Malit të Zi.

[wxz]

Bashkë me ekipin kampion është bashkuar dje edhe kroati Periç si dhe sulmuesi Ligoraq Tiko.


Në një prononcim telefonik nga Mali i Zi, ku Elbasani është akomoduar që nga dita e pardjeshme, kapiteni i kampionëve, Elvis Kotorri, është shprehur për "Sportin shqiptar" se faza përgatitore që ekipi i tij po zhvillon në Malin e Zi do t'i motivojë më shumë verdheblutë në luftën për titullin. "Koha që kemi përpara besoj se do të na mjaftojë për të arritur ato synime që i kemi vënë vetes. Ambienti këtu është ndryshe dhe kushtet janë tepër të mira. Na duhet të punojmë shumë dhe të shfrytëzojmë çdo orë për t'u përgatitur maksimalisht," - thekson portieri i verdhebluve. Ndërkohë, bashkë me ekipin kampion është bashkuar dje edhe kroati Periç si dhe sulmuesi Ligoraq Tiko, i ardhur nga ekipi korçar i Skënderbeut. Kotorri vlerëson në maksimun dy blerjet e reja, duke shtuar se këto dy përforcime e blindojnë edhe më shumë organikën e Elbasanit. "Tiko është një sulmues goli dhe ka eksperiencë. Po kështu, edhe Periç është një mesfushor, që në fillim më la përshtypje pozitive. Shpresoj që t'i shërbejnë sadopak Elbasanit," - shton kapiteni verdheblu. Më tej, në vijim të prononcimit të tij, Kotorri nuk e fsheh ambicien për fitimin e titullit kampion edhe këtë sezon me Elbasanin. "Edhe pse jemi shumë larg nga kreu, kjo nuk do të thotë se Elbasani i ka humbur shpresat, përkundrazi, duke mos u nisur si favoritë mund të bëjmë diçka shumë të mirë me rifillimin e sezonit," - nënvizon Elvis Kotorri. Në ambientin e kampionëve të Shqipërisë është krijuar së fundi një atmosferë tepër pozitive, për vetë faktin se në ekip janë bashkuar disa futbollistë cilësorë, falë një merkatoje të studiuar nga ana e presidentin Laze. Vetë Kotorri shton se faza përgatitore e Malit të Zi do t'i japë mundësi Elbasanit që të përforcohet më shumë fizikisht dhe moralisht. "Kjo fazë mendoj se do të sjellë një ndryshim tepër të madh në ekipin tonë. Me siguri që kjo ndalesë e kampionatit do të na shërbejë për të korrigjuar ato që s'i kemi bërë mirë deri tani, por edhe për të parë më mirë ardhjet e reja dhe gërshetimin e tyre me lojën e grupit," - shton kapiteni i Elbasanit. Në fund të prononcimit të tij, Elvis Kotorri shprehet se me blerjet e fundit, Elbasani pothuajse është i kompletuar, por shton se sa më shumë futbollistë të vijnë dhe t'i bashkohen ekipit të tij, aq më shumë do të rriten mundësitë për të arritur te fitoret. "Unë mendoj se merkatoja na ka gjallëruar dhe pa dyshim na ka dhënë një tjetër mentalitet. Tani na mbetet neve, futbollistëve, në dorë të luajmë ashtu si duhet, pa nënvlerësuar kundërshtarin më të dobët dhe duke besuar deri në fund se gjithçka është e rikuperueshme, pavarësisht pozicionit që Elbasani ka aktualisht në tabelën e klasifikimit," - përfundon Kotorri.

[wxz]

Me peqinasit janë bashkuar edhe afrikani i Elbasanit, Akamba, dhe i riu dinamovit, Taçi.


Sejdini, i ndihmuar nga trajneri i portierëve A.Ballhysa po vazhdon fazën përgatitore në Peqin, duke e alternuar edhe me takime miqësore. Pas takimit miqësor, të shtunën me Sopotin, sot Shkumbini do të ndeshet në Tiranë me Dinamon. Ajo që bie në sy dhe pranohet nga të gjithë është ngarkesa e lartë. Për "Xhaxhin", më e rëndësishmja për këtë periudhë përgatitore është fakti se po zhvillohet normalisht dhe se të gjithë futbollistët po arrijnë të përballojnë mjaft mirë ngarkesën fizike që po jepet. Si dëshmi të kësaj, Sejdini përmend faktin se deri më sot nuk ka patur dëmtime apo trauma të ndryshme, që për këtë periudhë janë të zakonshme. Këtu ndoshta për mirë ka ndikuar përvoja profesionale e trajnerit. Kjo formë pune, sipas sulmuesit 29-vjeçar Dorian Bubeqi, ka bërë që të mos ndihet lodhja e një dite më parë dhe futbollistët të marrin gradualisht ngarkesën e duhur. "Lodhemi shumë në stërvitje këto ditë, por pas një dite, më pas kjo lodhje nuk ndihet më dhe jemi gati ta fillojmë gjithçka nga e para," - pohon sulmuesi i Shkumbinit, Bubeqi. Ky i fundit, me një përvojë të madhe në shumë ekipe të Shqipërisë është optimist për vete dhe për ekipin, se kjo punë e mirë që po bëhet do t'i japë frytet në pjesën e mbetur të kampionatit, kur Shkumbini do të arrijë që ta kalojë situatën e vështirë ku ndodhet. "Po zhvillojmë një fazë përgatitore mjaft të mirë, duke shfrytëzuar kushtet e mira të Peqinit, duke përfituar edhe nga moti i ngrohtë që po mban. Kjo punë e mirë na bën shumë optimistë se rezultatet e saj do t'i shohim së shpejti, me rifillimin e kampionatit," - shpreh optimizmin e tij Bubeqi.
Edhe pse ekipi i tij për momentin ndodhet në vendin e parafundit dhe i shkëputur 7 pikë nga ekipi më i afërt, Besa e vendit të 10 të, Bubeqi beson se Shkumbini do ta gjejë veten dhe do të dijë të ngjitet më lart në renditje. Ai i qëndron mendimit se ekipi ku luan nuk e meriton vendin që ka në renditje. Shkumbini, për sulmuesin kavajas, ka vuajtur më shumë se duhet nga ana psikologjike, si rezultat i dënimit të dhënë, që për të ka qenë tendencioz. "Nuk e meriton Shkumbini vendin e parafundit dhe shumë shpejt do të arrijmë të ngjitemi më lart. Vuajmë pasojat e një dënimi tendencioz, më shumë se sa na takon, dhe kjo ndikoi në anën psikologjike. Gjithsesi, Shkumbini, edhe pse arriti ato rezultate e mori aq pikë sa ka, po të shohësh me vëmendje, pothuaj në çdo ndeshje kemi luajtur si të barabartë dhe nuk kemi patur diferenca të mëdha në lojë, pavarësisht kundërshtarëve. Kemi humbur me rezultate të ngushta, ose jemi ndëshkuar në fund, por jo gjithmonë për fajin tonë," - përfundon sulmuesi kavajas. Ndërkohë, Akamba e Taçi po stërviten me Shkumbinin. Afrikani 22-vjeçar Akamba Hyacitha vjen nga ekipi kampion i Elbasanit. I ardhuri tjetër është Indrit Taçi, nga Dinamo. I preferuari i "Xhaxhit" rikthehet përsëri në Peqin.

[wxz]

Gjatë ditës së sotme ekipi i Dinamos do të ketë mundësi që të zhvillojë një ndeshje miqësore dhe kundërshtari i bluve do të jetë skuadra e Shkumbinit. Ky takim do të zhvillohet në fushën e kompleksit "Dinamo" dhe përballë do të ndeshen dy pankina me "gjak" blu, sepse dihet se trajneri i peqinasve është një nga ikonat dinamovite, Faruk Sejdini. Pra, miqësorja e sotme do të vendosë përballë njëri-tjetrit profesorin dhe nxënësin dhe kjo sfidë nuk është e para, sepse në javën e 16 Redi Jupi arriti të mposhtë mësuesin e tij me rezultatin 1-0. Kjo fitore shënoi edhe kthesën e Dinamos, sepse ishte suksesi i parë në transfertë. Ndeshja e sotme do të jetë e dyta brenda pesë ditësh si për Dinamon dhe Shkumbinin. Të shtunën dinamovitët janë mposhtur nga laçianët, ndërsa peqinasit kanë fituar me Sopotin e Librazhdit. Sipas stafit dinamovit edhe në takimin e sotëm blutë do të kenë mundësi që të vazhdojnë eksperimentet e nisura me Laçin, pasi trajneri Redi Jupi akoma është në kërkim të një skuadre të kompletuar. Gjatë kësaj faze timonierët blu po punojnë që të krijojnë një skuadër me lojtarë polivalentë, të cilët mund t'i përshtatë në funksion të ekipit. Në dy ndeshjet e kontrollit është parë që e ardhmja e lojës së Dinamos do të ketë një theks më sulmues, pasi është provuar të luhet me një "tredhëmbësh" në këtë repart. Klodian Arbri është aktivizuar si torrë dhe pas tij vinin dy sulmues më të shkurtër, si Vanxhel Mile dhe Ardian Nuhiu. Ndërsa ish-lojtari i Tiranës, Eldorado Merkoçi, është spostuar si mesfushor i djathtë dhe ndërkohë Goran Vinçetiç është aktivizuar si mbrojtës i këtij krahu. Gjithashtu janë provuar edhe mesfushorët Erald Deliallisi dhe Redi Jupi në repartin e mbrojtjes.

[wxz]

Vinçetiç: Tek Dinamo më solli Bonaçiçi
Goran Vinçetiç, mesfushori kroat i Dinamos, dje ka shfaqur pakënaqësitë e tij rreth menaxherit Idriz Sulejmani, i cili ka deklaruar se ka sjellë kroatin tek blutë e kryeqytetit. Sipas mesfushorit dinamovit, Idriz Sulejmani nuk është menaxheri i tij dhe atë e ka njohur vetëm kur ka ardhur në Tiranë dhe në momentin e prezantimit me Dinamon ka shërbyer në rolin e përkthyesit. "Ky person nuk ka të bëjë me mua, pasi tek Dinamo më ka sjellë trajneri Luka Bonaçiç dhe jo Idriz Sulejmani. Ai me propagandën e tij dëshiron që t'i shtojë kredibilitet vetes, duke thënë se unë sjell lojtar cilësorë si puna e Vinçetiçit. Zoti Sulejmani gabon në deklaratat e tij, sepse tek Dinamo ka sjellë Zoran Kastelin dhe jo mua,"- është shprehur dje mesfushori kroat i bluve, Goran Vinçetiç.

[wxz]

Mbrojtja dinamovite në këto momente ka mbetur vetëm në dorë të Erion Xhafës.


Ekipi i Dinamos është në mesin e përgatitjeve të kësaj faze përgatitore dhe stafi teknik po mundohet që t'i karikojë dinamovitët në maksimum. Përgatitja e dhjetë ditëve të fundit ka qenë më shumë e karakterit fizik sesa tekniko-taktik. Edhe në ditët e mbetura të kësaj jave blutë e kryeqytetit do të vazhdojnë të përgatiten dy herë në ditë dhe pas kësaj trajnerët do të fillojnë të mendojnë për strategjitë e ndërtimit të skuadrës. Gjatë dy ndeshjeve të kontrollit trajneri Redi Jupi ka kryer disa eksperimente, sepse dëshiron që të kryejë të gjitha përkëmbimet e mundshme, në mënyrë që 3 shkurti ta gjejë Dinamon të gatshme të përballojë gjysmën e mbetur të kampionatit. Sipas lojtarëve, stërvitja që po aplikohet gjatë këtyre ditëve të fundit është e pranueshme, sepse kjo përgatitje do t'u vlejë për vazhdimësinë. I këtij mendimi është edhe mbrojtësi i Dinamos dhe i ekipit kombëtar Erion Xhafa, i cili për gazetën "Sporti shqiptar" sqaroi: "Ndërprerja e kampionatit na ka krijuar një hapësirë goxha të madhe, nga ku do të kemi mundësi që të plotësojmë boshllëqet e shfaqura në gjysmën e parë të sezonit si dhe të perfeksionohemi më shumë, kryesisht në aspektin fizik. Gjatë këtyre ditëve ekipi po merr një ngarkesë në përgatitje, por me kalimin e ditëve do të vijë duke u reduktuar. Nuk kemi pse të ankohemi nga kjo fazë, sepse kjo përgatitje do t'i japë frytet e saj kur të nisë kampionati. Megjithëse kryejmë dy seanca në ditë dhe plani përgatitor është kompleks, përsëri ne jemi mirë nga ana shëndetësore." Dinamo gjatë kësaj merkatoje dimërore është munduar të plotësojë repartet e dobëta, por akoma nuk e ka realizuar planin e saj. Sulmi blu duket se është kompletuar, ndërsa mbrojtja është në alarm të plotë, sepse momentalisht tek Dinamo ekziston vetëm një mbrojtës i deklaruar dhe ky është Erion Xhafa. Dinamoviti e ndien që reparti ku ai bën pjesë ka mangësi, por beson se në ditët e mbetura të merkatos vija difensive e bluve do të marrë formën e kërkuar. "Merkatoja dimërore e Dinamos po i jep frytet e saj, sepse përforcimet kanë filluar të vijnë dhe një nga repartet tona më problematikë, sulmi, tashmë duhet konsideruar i plotë. Shpresoj se edhe mbrojtja në fund të janarit do të ketë në gjirin e saj më shumë alternativa dhe, nëse kjo bëhet realitet, Dinamo është për t'u pasur zili. Dihet se mbrojtësi senegalez, Papa Diop, e ka zgjatur bashkëpunimin e tij me ekipin dhe pritet që të vijë nga pushimet edhe të bashkohet me grupin. Gjithashtu drejtuesit kanë premtuar se do të sjellin edhe dy mbrojtës të tjerë, prandaj me përforcimet dhe punën e mirë që po bëhet, Dinamo nuk do të shfaqë gabimet e fillimsezonit,"- ka përfunduar mbrojtësi i bluve dhe i kuqezinjve, Erion Xhafa.

[wxz]

Edhe dita e djeshme ka qenë e mbushur plot me ngjarje të reja në kampin bardhëjeshil. Pas blerjes së portierit shqiptaro maqedonas Suad Zendel, dje ka qenë radha e provës për dy futbollistë të tjerë, të cilët janë paraqitur në fushën e blertë të aneksit të stadiumit "Loni Papuçiu". Ata janë Aleksandër Jakimovski dhe Marjan Mickov. Futbollisti Jakimovski, në kampionatin maqedonas është aktivizuar me ekipin e Ohrit, luan në repartin e sulmit, ndërsa bashkëpatrioti tjetër Mickov vjen nga Sileks i Kratovës dhe luan mbrojtës i djathtë. Sot pritet të vijë edhe një tjetër futbollist, i cili aktivizohet edhe me përfaqësuesen e Maqedonisë, por që kërkohet edhe nga disa klube të tjera në Shqipëri. Ai është Ardian Çuçuli, që do të mbërrijë në Fier për të kryer provën përballë teknikëve të skuadrës. Gjithashtu, po sot është lajmëruar edhe rikthimi i futbollistëve nga vendi i sambës, të cilët një pjesë e mirë do të vazhdojë testimin, ashtu si edhe futbollistët e tjerë. Pra, nga sa shikohet, presidenti Kokëdhima po kërkon të ndërtojë një skuadër konkurruese, e cila të jetë e aftë të qëndrojë në superligë. Tashmë sytë e drejtuesve bardhëjeshilë janë drejtuar përtej kufijve. Gjithashtu, nga drejtuesit e skuadrës fierake është dhënë "ok"-i edhe për tre futbollistët e provuar pak ditë më parë, ku, përveç ish-futbollistit të Apolonisë Emanuel, klasën e kanë kaluar edhe Udeke edhe Ambruzo, të cilët me të marrë lejekalimet nga klubet ku janë aktivizuar së fundi, mund të jenë pjesë e planeve skuadrës fierake për periudhën e mbetur të superligës. Gjithsesi, do të jetë lupa e trajnerit Andrea Marko, ajo që do të vendosë për plotësimin e vendeve vakante, që kanë lënë ish-të larguarit. Edhe dje stërvitja e fierakëve është ndjekur nga një numër i konsiderueshëm sportdashësish. Duhet thënë se të gjithë futbollistët maqedonas që janë në provë tek Apolonia janë zgjedhje të trajnerit U 21 të Maqedonisë, Zllastiko Cetanovski, i cili është shkes për këta futbollistë, që, nëse pëlqehen, do të jenë pasuesit e futbollistit Artim Pollozhani. Ky i fundit, disa sezone më parë, është aktivizuar në radhët e Apolonisë. Ardhjet e shumta të futbollistëve tek Apolonia janë një shenjë e mirë, që tashmë për këtë ekip gjërat sa vijnë e po bëhen më të thjeshta. Ndoshta edhe me pak dhimbje koke për teknikun Andrea Marko, që me optimizmin e tij po kërkon të injektojë tek futbollistët e tij ambicie dhe sedër fituesi.

[wxz]

Drejtuesit e skuadrës së kastriotit kanë depozituar dje në gjykatën civile të Krujës dosjen "Abazaj", ku i kërkojnë këtij organi të drejtësisë të vendosë se kush ka të drejtë. Me këtë rast ata u kanë bërë thirrje donatorëve të Tiranës që të mos nënshkruajnë me këtë futbollist, pa u thënë fjala përfundimtare e gjykatës. Sikurse dihet, Oriand Abazaj është larguar nga Kastrioti pas dhënies së të drejtës nga komisioni i disiplinës, sipas të cilit, futbollisti në fjalë kishte të drejtë të largohej nga Kruja. Largimi i Abzajt në këtë moment ka bërë që drejtuesit e Kastriotit të kërkojnë nga gjykata civile e Krujës, që të shprehet mbi kontratën që kanë të dy palët, me qëllim që ajo ta thotë fjalën përfundimtare. Me këtë veprim, klubi i Krujës kundërshton vendimin e komisionit të disiplinës, duke mos pasur besim tek organet juridike të FSHF-së. Lidhur me këtë, presidenti i Kastriotit, Shkëlzen Zhilli, shprehet: "Jo vetëm do të kërkoj rikithimin e Abazajt te Kastrioti, nëse do të vazhdojë të luaj futboll, por edhe do t'i vendos gjobë për mosparaqitje në stërvitje, me preteksin se ka kaluar te Tirana. Nëse kam toleruar deri tani për sulmuesin Abazaj, duke kërkuar që të mirëkuptohesha me të, tani e tutje nuk ka më asnjë privilegj, por vetëm zbatimin e ligjit, që është i shenjtë për mua. E kam fjalën për Gjykatën e Krujës, së cilës i jam drejtuar, dhe jo për organet juridike të federatës, të cilat udhëhiqen nga drejtues të saj, që kanë konflikt interesi të hapur me ndonjë skuadër, ku dëshiron të shkojë Abazaj. Nuk ka vend më te Kastrioti për të llastuar askënd, por për futbollistë që ulin kokën dhe punonjnë. Paratë e marra nga unë duhet t'i justifikojnë të gjithë," - ka përfunuar presidenti krutan Zhilli. Ndërkohë, pritet që shumë shpejt Gjykata e Krujës të thërrasë fillimisht të dyja palët në ballafaqimin paraprak, për të dhënë vendimin e saj, i cili ose i vë "kapakun" kësaj çështjeje, ose hap "maratonën" e gjyqeve civile mes Abazajt dhe presidentit Zhilli. Kjo nuk do t'i shërbente asnjërës palë.

[wxz]

Oriand Abazaj dhe Abada Fish udhëtuan dje së bashku me drejtorin teknik, Alban Tafaj, në drejtim të Turqisë. Mesditën e djeshme, ata udhëtuan në drejtim të Antalias dhe mësohet se kanë mbërritur në hotel vetëm në mbrëmje. Trajneri Shkëlqim Muça do të ketë mundësi t'i stërvitë të dy futbollistë vetëm sot, për të parë më mirë se në çfarë gjendje fizike janë. Për sulmuesin, duhet thënë se është stërvitur me ekipin e Kastriotit deri disa ditë përpara se të largohej përfundimisht, ndërkohë që kamerunasi ka pasur një plan stërvitor në vendlindje. Në miqësoren e nesërme me Istambulsporin, pritet që Abazaj dhe Fish të aktivizohen disa minuta.

[wxz]

Dita e djeshme, sërish me dy seanca
Për bardheblutë, dje ishte dita e dytë e stërvitjes në Antalia. Trajneri Shkëlqim Muça aplikoi sërish dy seanca me nga 90 minuta, fillimisht në sallën e forcës dhe mbasdite në fushën ngjitur me hotel "Limra International Resort". Duhet thënë, se zhvillimi i testeve fizike një ditë më parë, i ka rënduar disi këmbët e lojtarëve, teksa sot ngarkesa pritet të ulet. Nesër, sipas planit, duhet të zhvillohet miqësorja me ekipin turk, Istambulspor.

[wxz]

Sekretari dhe trajneri i Tiranës flet për përgatitjet e skuadrës në Antalia dhe merkaton e realizuar.


Që nga dita e diel, bardheblutë janë sistemuar në një prej hoteleve luksoze të Kemerit. Dita e hënë ishte stërvitja e parë e bardhebluve në tokën turke, ndërkohë që dje ngarkesa fizike ka qenë po me ritme të larta. Për trajnerin Shkëlqim Muça, pas ardhjeve të fundit në merkato, skuadra është e kompletuar në çdo repart dhe kjo bën atë që pretendimet të rriten për fitimin e të dy trofeve. Në intervistën e tij telefonike për "Sportin shqiptar", ai shprehet:
Muça, si kanë shkuar dy ditë e para stërvitje në Antalia të Turqisë?
Shumë mirë. Të hënën zhvilluam testet fizike që kishim planifikuar së bashku me përgatitësin atletik, Rauf Dimrajn, ndërkohë që dje punuam në sallë force dhe me vrapime. Këtu në Turqi është vendi më i mirë për t'i realizuar të gjitha planet. Për fat të mirë, federata u ka krijuar mundësinë klubeve të kryejnë një fazë të plotë përgatitore dimërore, për një periudhë më shumë se sa njëmujore, kështu që jemi brenda kohës. Në Kemer të Antalias duhet thënë se jemi sistemuar në një prej hoteleve më të mira të zonës.
Përveç stërvitjes, a keni planifikuar ndonjë ndeshje miqësore?
Sigurisht. Kemi planifikuar 3 ose 4 takime miqësore. Më datën 18 janar do të përballemi me Istambulsporin. Skuadra turke luan këtë sezon në Ligën A (kategoria e dytë turke) dhe ndodhet në vendin e gjashtë. Më datë 22, kundërshtar kemi një ekip rus dhe më 24 një ekip kazakistanas ose azerbajxhanas. Kjo e fundit mbetet për t'u konfirmuar. Normalisht, do të përpiqemi të gjejmë edhe një skuadër tjetër përpara se të kthehemi në Tiranë.
Me rifillimin e kampionatit, Tirana do të presë Teutën, rivalin më të afërt në renditje...
Deri atëhere ka kohë. Ne sigurisht do ta vlerësojmë si një takim të rëndësishëm, pavarësisht se nuk mund të vendosë fatet e kampionatit. Një fitore me Teutën do të thotë një shkëputje prej 9 pikësh, por jo gjithçka.
Si për koincidencë, me Teutën do të përballeni edhe për Kupën e Shqipërisë. A mendoni se ju ka rënë shorti më i vështirë?
Absolutisht jo. Herët ose vonë ne do të ndeshemi me rivalët direkt. Në këtë kontekst, nuk shoh ndonjë gjë për t'u frikësuar, sepse me grupin e lojtarëve që kam në dispozicion mund të marrim më të mirën në tri përballjet radhazi me durrsakët. Synimi ynë është të shkojmë deri në fund për të dy trofetë sezonale.
Ne merkaton e dimrit jeni shfaqur fuqishëm, teksa keni afruar pesë lojtarë të rëndësishëm, si A.Duro, Çapja, Turdiu, Abazaj dhe Rrapi. Si ju duket gjendja e tyre?
Normalisht, edhe ata po ingranohen me grupin. Duhet thënë se synimi im ishte që të afroja pesë lojtarë të rinj, të cilët do të plotësonin boshllëqet e lëna pas largimit Salihit, apo edhe ndonjë tjetrit më parë. Vlerat e Duros njihen, ndërkohë që për Çapjen, Turdiun, Abazajn dhe Rrapi, duhet thënë se janë futbollistë të datëlindjes 1985, të cilët garantojnë edhe një freski për skuadrën, po të kujtojmë se janë rritur në ekipet ku kanë qenë më parë. Të gjithë këta kanë të dhëna të mira, por do të shihen me shumë kujdes gjatë ecurisë në vazhdim. Ajo që do të thoja, ka të bëjë me faktin se merkatoja jonë tani mund të quhet e mbyllur me afrimin e këtyre pesë futbollistëve.

[wxz]

Flet një nga ikonat e futbollit gjirokastrit të të gjitha kohërave.


Luftëtari, që herët, të hënën, u largua nga Gjirokastra me destinacion Ulqinin, ku do të kryejë një stërvitje 11-ditore, për t'u kthyer kështu më 27 janar e pas ca ditësh të jetë gati për ndeshjen e parë të pjesës së dytë të kampionatit, që do ta luajë në Kavajë me Besën. Për ecurinë e Luftëtarit gjatë pjesë së parë dhe për disa çështje të tjera të tij zhvilluam një bisedë me njërin nga futbollistët e "kuartetit magjik" të futbollit gjirokastrit, Astrit Bonin, që së bashku me Brahon, Kallucin, Seitin e të tjerë i dhanë emrin Luftëtarit, me të cilin krenohet dhe sot e kësaj dite. Ja si shprehet ish-"truri" i Luftëtarit, që arriti zenitin më 1977 1978, duke u shpallur nënkampion kombëtar.
- Si e vlerësoni lojën dhe rezultatet e Luftëtarit të pjesës së parë të këtij kampionati?
- Luftëtari, për sa u përket rezultateve, u paraqit me dy fytyra, me ngjyra të kundërta në ndeshjet në Gjirokastër dhe ato jashtë saj. Brenda fushe pati ngjyra të ndezura, kurse jashtë saj shumë të zbehta, gjë që tregon se nuk është i kompletuar për çdo lloj beteje. Për sa i përket nivelit të lojës, unë e kam parë vetëm në ndeshjet që ka luajtur këtu, ku me gjithë punën dhe përpjekjet që bënë lojtarët dhe kryesisht sulmuesit apo dhe të tjerët, që dolën në këtë rol, me shumë vështirësi e kanë nxjerrë golin, ndërkohë që realizimi i tij është objektivi themelor i vetë kësaj loje. Golashënuesi më i mirë i Luftëtarit ka shënuar vetëm 4 gola, sasi që në ndonjë rast të rrallë ndonjë futbolist e ka shënuar në një ndeshje, dhe jo 17 të tilla. Ndërkaq, i gjithë Luftëtari ka shënuar më pak se një golashënues i vetëm, fjala vjen, i Tiranës. Pra, duhet zgjidhur ky problem. Me sa kam dëgjuar, donatorët e tij do ta sjellin ustain për këtë rol në pjesën e dytë të kampionatit.
- Ndonjëri, madje dhe drejtues të Luftëtarit, janë shprehur se ky ekip po i afrohet atij të viteve tuaja. Ju si mendoni?
- Sinqerisht do të gëzohesha nëse vërtet do të kishim një gjë të tillë. Por, për mendimin tim, kjo nuk qendron. Luftëtari i atyre viteve ishte i rrezikshëm për çdo ekip, jo vetëm në Gjirokastër, por kudo, madje dhe në Tiranë, dhe ndaj ekipeve të saj të mëdha, superekipe si Partizani dhe Dinamo, asokohe. Ai Luftëtar, në ndonjë rast luftonte për majat, kurse ky i sotmi, që vetëm në Gjirokastër u tregua i rrezikshëm, lufton për të qëndruar në superligë. Dhe me aq sa thashë, kuptohet që krahasimi nuk qëndron, sipas meje.
- Sipas jush, pse nuk kemi një Luftëtar për elitën?
- Arsyet janë të shumta dhe duhet nisur nga fakti se sa futbollistë vendës, në mos të talentuar, por qoftë dhe me dhuntitë e duhura, ka ekipi i viteve të fundit. Siç dihet, fare pak, dhe kjo bëri të domosdoshëm importimin e disa futbollistëve në fillim të sezonit, që u bë dhe formimi i grupit ekzistues, që arriti ta rendisë Luftëtarin në vend të 7 të, për pjesën e parë të kampionatit. Por, me mbarimin e këtij kampionati, vështirë se këta futbollistë do të qëndrojnë te Luftëtari, të paktën kështu ka ndodhur sezone më parë. Pra, edhe nëse Luftëtari qëndron në superligë, përsëri me fillimin e sezonit 2007 2008 do të duhet të riformohet, siç ndodhi në fillim të këtij sezoni. Pra, prapë do të thuhet se mungon harmonia, përvoja e të tjera justifikime. Për të mos u zgjatur, shkurt, do të thoja se Luftëtari nuk mund të bëhet me futbollistë sezonalë. Luftëtar elite mund të bëhet me futbollistë cilësorë vendës. Për këtë duhet punuar si duhet me ekipet e fëmijëve dhe duke bërë kontrata afatgjata me lojtarë të blerë, që kanë vlera. Te vetë Luftëtari mund të sjellim si shembull portierin Irakli Toçi, që erdhi nga Elbasani me vlerat e veta dhe po i përmirëson dukshëm, duke qenë këtu për disa sezone në vazhdim. Ai luajti një rol mjaft përcaktues në ato rezultate që u arritën në Gjirokastër.
- Ju çfarë rekomandoni për pjesën e dytë të kampionatit dhe të ardhmen e Luftëtarit?
- Tani futbollin e kuptojnë fare mirë të gjithë dhe nuk është sekret specialistësh që Luftëtarit në radhë të parë i duhen lojtarë që të përgatisin golin dhe ca më shumë të realizojnë atë. Gjersa do të bëhen blerje të reja, këtu duhet synuar. Për sa i përket të ardhmes, duhet që të krijohet një bërthamë me futbollistë që të mos e kenë mendjen për të ikur. Në kohën time, Luftëtari pati një bërthamë me 7 8 futbollistë, që luajtën për mbi një dekadë së bashku.
- Së fundi, si e parashikoni fundin e këtij kampionati për Luftëtarin?
- Luftëtari është mbi tri fitore avantazh me dy ekipet e fundit, që rrezikohen, por duke pasur parasysh që gjer në fund janë dhe 16 ndeshje, nga një anë shpreh besimin se do të qëndrojë në super ligë, por, nga ana tjetër them se duhet përqendrim i madh në çdo ndeshje, gjersa të arrihet matematikisht sigurimi në superligë, gjë që mund të zgjasë deri në javën e fundit. E them këtë pasi ekipet në pjesën e dytë, për shkak të merkatos, mund të kenë ndryshime në përbërjet e tyre, pra dhe në rezultate.

[wxz]

Sipas veteranit shkodran, Armir Grima, gjithçka po shkon mirë deri tani në përgatitoren malazeze.


Fitorja në ndeshjen me serbët e Banatit, skuadër kjo me vlera në futbollin jugosllav, e ka rritur entuziazmin në kampin shkodran. Jo sepse u fitua një miqësore, por sepse Vllaznia në këtë takim tregoi vlerat e saj të vërteta. Ajo ka zhvilluar një ndeshje para së gjithash me karakter, edhe pse loja u kthye në një sfidë të vërtetë mes shqiptarëve dhe serbëve. E gjitha kjo erdhi ngaqë 2 3 prej lojtarëve të Banatit bënë një lojë të ashpër dhe kjo dukej se ishte me dashje. Kuqeblutë nuk kanë hezituar t'u përgjigjen me të njëjtën monedhë, prandaj dhe miqësorja ka marrë pamjen e një sfide të vërtetë. Megjithatë, Vllaznia tregoi nivel të lartë loje dhe dominoi në të gjitha drejtimet, duke fituar në fund me rezultatin 2 1. Duke folur në lidhje me këtë miqësore, portieri i kësaj skuadre, Armir Grima, do të shprehej: "Kemi bërë një ndeshje të mirë. I gjithë ekipi luajti ashtu siç duhet dhe për rrjedhojë arritëm të fitonim. Në të vërtetë, fitorja nuk ka shumë rëndësi në ndeshje miqësore, por ajo ndaj ekipit serb të Banatit nuk ishte thjesht miqësore. Kundërshtari bëri çfarë ishte e mundur për të fituar, madje edhe duke luajtur ashpër, por nuk ia arriti. Ekipi ynë luajti plot grintë e karakter, prandaj dhe fituam." Në këtë ndeshje, për shkodranët ka luajtur për herë të parë edhe kosovari Miroçi, i cili është aktivizuar në pjesën e dytë në vend të Bejzades. Vlerësimet e para për të kanë qenë shumë pozitive dhe kësisoj gjasat janë që ai të vishet kuqeblu për pjesën e mbetur të sezonit. Duke e parë me syrin e një veterani, për Miroçin ka folur fjalë të mira edhe portieri 32-vjeçar i Vllaznisë, duke thënë: "Personalisht, do të jepja një vlerësim shumë pozitiv për të. Trajneri Josa e aktivizoi në pjesën e dytë të miqësores, në krahun e djathtë të mesfushës. Ai i dha gjallëri lojës në krah, sepse ishte shumë i lëvizshëm. Shpresoj shumë që ai të mbetet në skuadër apo të vijë edhe ndonjë lojtar tjetër, sepse kemi nevojë edhe për 2 3 përforcime." Sakaq, shkodranët vazhdojnë stërvitjen intensive në Hercegnovi të Malit të ZI. Portieri Grima, përmes telefonit, vlerëson së tepërmi kushtet e krijuara nga ana e presidentit, që ndihmojnë për një përgatitje intensive. Trajneri Josa është duke aplikuar një stërvitje me nga dy seanca në ditë, ndërkohë që stërvitja e kuqebluve dallohet edhe për larminë dhe gjallërinë e saj. Kjo gjë ka bërë që futbollistët të mos jenë të mërzitur me këtë periudhë, që është nga më të vështirat për ta. E gjitha kjo krijon besimin se Vllaznia në vijim të sezonit ka për t'u paraqitur si në fund të vitit 2006. Këtë gjë mendon edhe portieri Grima, i cili në fund u shpreh: "Jemi duke u stërvitur me intensitet. Stërvitja është shumë e fortë dhe njëkohësisht e larmishme, prandaj shpresojmë që ajo t'i japë frytet e veta kur të fillojnë ndeshjet. Nuk ka pse të mos jemi pretendentë për fitimin e të dy trofeve."

[wxz]

Vllaznia


Vllaznia "gdhendet" në pritje të Gudjabit
I kthyer në një çështje mes dy klubeve, Dinamos dhe Vllaznisë, sulmuesi senegalez, El Haxhi Gudjabi, pritej të vinte dje në Shqipëri. Drejtuesit shkodranë kanë bërë të ditur se afrikani kishte lajmëruar për mbërritjen e tij në Rinas afër mesnatës së mbrëmshme, prandaj dhe ata kanë nisur makinën për ta pritur e më pas për ta sjellë në Shkodër. Nga ana tjetër, edhe në kampingun e Vllaznisë në Hercegnovi, Gudjabi është i mirëpritur. Ai ka tashmë gati dhomën e tij në hotel dhe njëkohësisht edhe çantën me materialet e duhura sportive. Ardhja e tij në kampin shkodran bëhet fakt i kryer, megjithatë, çdo gjë pritet të marrë zgjidhje pikërisht sot, teksa do zbardhet e vërteta e kësaj çështjeje.

[wxz]

Vllaznia


Prela dhe Rrashketa largohen nga kuqeblutë
Dy prej futbollistëve që kishin shkuar bashkë me ekipin e Vllaznisë në përgatitoren malazeze, dje kanë lënë Hercegnovin dhe janë kthyer në Shkodër. Bëhet fjalë për 20-vjeçarin e ardhur nga Firence e Italisë, Marenglen Prelën, si dhe për shkodranin
18-vjeçar Rrashketa. Ata kishin shkuar bashkë me ekipin edhe për t'u testuar nga ana e trajnerit Josa. Vëmendja më e madhe ka qenë e përqendruar te shkodrani i ardhur nga futbolli amator italian, Prela. Ai është stërvitur vetëm një javë me kuqeblutë, por pa arritur dot ta kalojë testin e trajnerit Josa. Si rrjedhojë, dje paradite ai është paraqitur në zyrën e presidentit Fushaj, të cilin gjithsesi e ka falënderuar për mundësinë që i dha për të matur forcat te Vllaznia.

[wxz]

Durrsakët janë të bindur se vetëm me impenjim maksimal mund të arrijnë të kapin kreun e klasifikimit.


Ditët ulqinake po kalojnë një e nga një edhe për ekipin e Teutës. Po ndërsa ditët i kanë ngjarë njëra tjetrës, durrsakët dita ditës po ndryshojnë për sa i përket asimilimit të ngarkesës fizike, një ngarkesë që nuk ka lënduar, apo dëmtuar askënd. Jo se ekipet e tjera nuk kanë impenjim dhe regjim, por te Teuta vihet re një disiplinë më e fortë. Trajneri Starova kërkon që të gjithë të futen në dhomat e tyre dhe mundësisht të flenë menjëherë, që të rikuperojnë forcat. Nuk ka asnjë ankesë dhe të gjithë lojtarët nuk e vënë në dyshim fjalën e Starovës. I pyetur nga "Sporti shqiptar" në lidhje me formën që ka ekipi, Starova shprehet: "Kemi ardhur për t'u stërvitur fort dhe atë po bëjmë. Djemtë e kanë kuptuar këtë dhe kanë ulur kokat dhe po punojnë. Objektivi ynë na vë përballë një regjimi të fortë dhe një stërvitjeje sa më shembullore. Nëse një pjesë e ekipeve më shumë mendojnë për të ardhmen, ne e kemi mendjen tek e tashmja, për të kapur objektivin tonë." Në ditët e fundit tek skuadra durrsake ka qenë në provë edhe një boshnjak, i cili akoma pa u qetësuar mirë, ka marrë bagazhet dhe është kthyer nga kishte ardhur, pasi Starova tha që ishte i një niveli më poshtë se futbollistët aktualë të Teutës. Merkatoja e Teutës mund të quhet e mbyllur me largimin e boshnjakut. Ndonjë lëvizje e papritur mund të nodhë vetëm nëse Starovës mund t'i bënte përshtypje ndonjë lojtar i ri. Ndërkohë, "djemtë e detit" e kanë zhvilluar edhe miqësoren e parë, madje të gjithë janë aktivizuar në kohë të plotë. Titullarët janë ndeshur me ekipin e parë të Besëlidhjes dhe kanë fituar 3 1, ndërsa rezervat kanë fituar 2 1 me formacionin e dytë lezhjan. Ka rënë në sy loja e mirë e Kulit dhe e Shkëmbit, duke pasur një mesfushë shumë posesive, që nxit sulmin në çdo moment. I vetmi futbollist që stërvitet veçmas grupit është laçiani Julian Brahja, i cili vetëm pas një muaji mund të fillojë kontaktet me topin. Ndonëse ishte folur për fillimin e kontakteve me topin që në këtë përgatitore, është menduar që të mos rrezikohet, qoftë edhe për karrierën e këtij djaloshi me talent. Teuta do të zhvillojë stërvitje edhe këtë javë dhe pjesën e mbetur do ta kryejë në Durrës, pas kthimit nga Ulqini, sërish në një regjim të rreptë sportiv. Të gjithë durrsakët e kanë të përqendruar vëmendjen në ndeshjen e parë me Tiranën, që për ta do të thotë shumë, për të mos thënë që te kjo ndeshje varen edhe shpresat për titullin. Fjala humbje as që ekziston në mendjen e durrsakëve. Teuta mund ta hapë seriozisht kampionatin në përballjen direkte me bardheblutë kryesues. Të shohim se çfarë janë në gjendje të bëjnë djemtë e Starovës pas kësaj faze përgatitore model.

[wxz]

Trajneri Hasan Lika është optimist, edhe pse grupit të kuq i mungojnë dy titullarë dhe disa të rinje.


Partizani mbetet një emër i madh i futbollit shqiptar dhe këtë e vë re fare mirë kur ekipi i të kuqve kalon kufijtë e Shqipërisë, pasi nën zë edhe malazezët flasin që ky është ekipi më me famë në Shqipëri. Emri ka mbetur nga kohët e arta të Panos, Muratit, Fagut, Berishës, Mustës, Shehut etj. Këtë e di mirë edhe Hasan Lika, ish-futbollist i të kuqve gjatë viteve '80. Trajneri i Partizanit e bën shumë shpejt diferencën e skuadrës që drejton me të shkuarën legjendare, por përsëri kërkon të arrijë maksimumin, madje duke qenë optimist në realizimin e ambicieve që vetë ky emër i futbollit shqiptar të imponon. "Ky grup është kompakt dhe po konsolidohet dita ditës. Nuk e mbajmë shumë mendjen se kush do të na vijë, apo kush do të na ikë. Po stërvitemi me intensitet dhe me qetësinë e duhur. Djemtë janë të përkushtuar dhe kjo është primare për momentin. Partizani ka qenë dhe mbetet ambicioz në pretendimet e tij, kështu që ne jemi sërish të motivuar në objektivat tona, pavarësisht se nga kush grup do të përbëhet ekipi," - shprehet trajneri Lika, i cili është i kënaqur, pasi i ka pasur të gjithë në dispozicion dhe nuk ka asnjë të dëmtuar, apo që ka probleme të tjera. Stërvitja e Partizanit zhvillohet dy herë në ditë, paradite dhe pasdite. I pyetur nëse ndihet mungesa e Bylykbashit dhe e Ndrekës në stërvitje, trajneri Lika thotë: "Natyrisht që mua si trajner më prish punë, pa harruar që ata janë dy lojtarë të rëndësishëm të formacionit. Nuk është se gjatë punës me futbollistët e tjerë mendoj shumë për Ndrekën dhe Bylykbashin. Nëse do të jenë pjesë e ekipit, natyrisht që do të ishte më mirë. Unë si trajner kam për detyrë të mendoj dhe të punoj me përkushtim, pavarësisht grupit të lojtarëve që kam në dispozicion. Partizani gjithmonë i ka lejuar lojtarët kur kanë pasur oferta më të mira, kështu që edhe Bylykbashit dhe Ndrekës u uroj suksese kudo që të shkojnë." Numri një i stolit të kuq shpreson që ky grup të pasurohet edhe më shumë, pasi kontaktet janë me disa futbollistë dhe presidenti Xhani po bën të gjitha përpjekjet për të afruar lojtarë cilësorë. "Të them të drejtën, ne presim minimumi edhe tre lojtarë të tjerë, të cilët mund t'i bashkohen ekipit këtë javë. Në këtë periudhë ne trajnerët duhet të jemi shumë të kujdesshëm, pasi vijnë lloj lloj "kallëpesh". Në këtë detyrë unë nuk duhet të nxitohem, pasi do të ishte në dëm të ekipit dhe të presidentit. Partizani kërkon lojtarë me vlera," - përfundon trajneri i Partizanit, Hasan Lika. Ndërsa në lidhje me "rrëmujën" që bëhet këto ditë në hotel, ku janë akomoduar shumë ekipe nga vendi ynë, Lika sqaron se futbollistët nuk kanë kohë të merren shumë me gjëra të tjera, pasi kërkojnë të rikuperojnë forcat për stërvitjen e radhës. Në fakt, të gjithë drejtuesit janë të kënaqur që qyteti është disi larg dhe futbollistët nuk humbasin kohë të dalin. Partizani do të qëndrojë në Ulqin edhe për të paktën 10 ditë, kuptohet, duke zhvilluar edhe disa ndeshje miqësore.

[wxz]

Sot kombëtarja e minifutbollit shqiptar niset drejt Helsinkit të Finlandës, për të zhvilluar të mërkurën takimin e parë paraeleminator me Turqinë. Duhet thënë se për dhjetë ditë me radhë, në drejtimin e trajnerit Edi Martini, ekipi ka zhvilluar një minifazë përgatitore në Ulqin. Atje janë zhvilluar disa takime miqësore, ku Martini ka parë gjendjen e 18 lojtarëve të grumbulluar. Ndërkohë, vetëm 14 lojtarë do të nisen sot për Finlandë. Sipas trajnerit Martini, gjendja është optimiste dhe shpresohet në një kualifikim të mundshëm. "Kemi bërë për 10 ditë një stërvitje intensive në Ulqin, ku kushtet ishin mjaft komode. Gjatë qëndrimit atje kemi zhvilluar edhe dy takime miqësore, gjithashtu edhe takime kontrolli brenda grupit. Edhe pse kemi humbur në të dy takimet miqësore, mund të them se jemi paraqitur mirë, madje kemi lujtur më mirë se kundërshtarët. Gabimet e shfaqura gjatë miqësoreve shpresojmë që i kemi rregulluar. Më shqetëson dëmtimi i Manastërliut, Nikollit dhe Qopekut, por shpresoj se deri në datën e takimit të parë me Turqinë këta lojtarë do të jenë të gatshëm. Mund të them se gjendja në përgjithësi është optimiste. Shpresojmë për rezultate pozitive, por megjithatë fusha do ta tregojë se në çfarë gjendjeje jemi në raport me ekipet e tjera. Eshtë fat për ne që takimin e parë e kemi përballë Turqisë. Këtë ekip e njoh mirë dhe kam besim se do ta nisim me këmbë të mbarë dhe të shpresojmë pastaj për një kualifikim,"- deklaroi për "Sportin shqiptar" trajneri i kombëtares së minifutbollit, Edi Martini.

[wxz]

Shkurt nga FSHF-ja- MBERRIN sot në Tiranë trajneri i kombëtares shqiptare, Oto Bariç. Kroati pritet të japë disa leksione në kursin e trajnerëve shqiptarë. Ndërkohë, gjatë këtyre ditëve ai do të shpallë edhe listën e lojtarëve të cilët do të marrin pjesë në grumbullimin që do të zhvillohet në Antalia, më datën 20 janar.
- SOT, në orën 14:00 (ora lokale e Turqisë) në stadiumin "Bahceliver" të Stambollit do të zhvillohet takimi miqësor midis përfaqësueses jonë Shpresa dhe asaj të Turqisë. Pas këtij takimi, ekipi që drejtohet nga trajneri Artan Bushati do të zhvillojë një tjetër takim miqësor, kësaj here me Greqinë në Athinë, më datën 6 shkurt.

[wxz]

Sipas sekretarit të përgjithshëm në FSHF, mundësia më e madhe është që të dy takimet të zhvillohen në Shkodër.


Caktimi i stadiumit për takimin miqësor me Maqedoninë dhe atë eliminator me Slloveninë, tashmë është bërë një rebus i vërtetë, pasi ende FSHF-ja nuk po zyrtarizon asgjë. Gjatë kësaj kohe është folur shumë për këtë temë, por e vërteta është se çdo gjë ka mbetur si më parë dhe nuk po thuhet asnjë gjë nga zyrtarët më të lartë të federatës. E reja më e fundit, sipas sekretarit të FSHF-së, Roland Mici, është që erdhën për të inspektuar stadiumin "Loro Boriçi" zyrtarë të UEFA-s. "Gjatë këtyre ditëve erdhën për të parë kushtet e stadiumit "Loro Boriçi" disa inspektorë të UEFA-s. Ata pasi e panë gjendjen e stadiumit, u shprehën se mund të zhvillohet takimi eliminator me Slloveninë, por duhet të plotësohen edhe disa mangësi që ka stadiumi. Ne si FSHF i morëm parasysh detyrat që na lanë inspektorët e UEFA-s dhe mund të them se menjëherë ka filluar puna në stadium për të plotësuar të gjitha mangësitë. Kanë filluar punimet për të shtruar rrugën në hyrjen kryesore të stadiumit dhe po bëhen disa riparime brenda tij. Besoj se çdo gjë do të jetë gati pak ditë përpara takimit me Slloveninë,"- u shpreh sekretari i përgjithshëm i FSHF-së, Roland Mici. Duket qartë që federata kërkon ta zhvillojë takimin në "Loro Boriçi", por, sipas Micit, kjo bëhet që takimet e kombëtares të shpërndahen në të gjithë vendin. "Politika e FSHF-së është që të luajmë në sa më shumë fusha, jo vetëm në stadiumin kombëtar "Qemal Stafa". Ky është gjithashtu edhe një orientim i FIFA-s dhe UEFA-s. Kjo është një praktikë e njohur mbarë botërore, që jo të gjitha ndeshjet e kombëtares zhvillohen në kryeqytetet ose në stadiumet kryesore të vendeve. Gjithsesi, mund t'ju them se nuk është vendosur përfundimisht se ku do të luhet takimi me Slloveninë. Kemi edhe një kërkesë nga trajneri Bariç, i cili kërkon që takimi miqësor të zhvillohet në atë stadium ku do të luhet edhe takimi zyrtar. Do të mundohemi që t'ia plotësojmë këtë dëshirë trajnerit,"- përfundoi fjalën e tij Mici. Tashmë është realitet që FSHF-ja po përpiqet ta zhvillojë medomos takimin me Slloveninë në Shkodër, por nuk dihet ende se cila është pengesë e moszyrtarizimit të stadiumit. Deklaratat e drejtuesve më të lartë të FSHF-së kanë kohë që janë të njëjta, por e vërteta është që duhet të presim punimet që zhvillohen në "Loro Boriçi" dhe më pas të zyrtarizohet gjithçka nga ana e tyre.

[wxz]

Vazhdojnë ende kontaktet me futbollistët, që u është bërë një ftesë për të marrë pjesë në grumbullimin që do të zhvillojë kombëtarja në Antalia të Turqisë. Deri më tani, ftesës së trajnerit Bariç i janë përgjigjur pozitivisht vetëm 14 lojtarë. Skuadra të ndryshme të Europës, ku dhe bëjnë pjesë disa nga futbollistët shqiptarë, nuk janë të detyruara t'i lëshojnë këta të fundit për t'u grumbulluar me kombëtaren. Duhet thënë se datat që zhvillohet ky grumbullim, nuk janë të lira nga UEFA. Në periudhën që zhvillohet "zbori" i kombëtares ka aktivitet zyrtar në kampionate të ndryshme të Europës. Pra, çdo gjë është në dorën e klubeve, nëse lojtarët që luajnë jashtë, të marrin pjesë në "zborin" që do të zhvillojë kombëtarja në Antalia. Kontigjenti, që do të marrë pjesë në këtë grumbullim, do të përbëhet nga 20 futbollistë. Lojtarët që janë lënë të lirë për të marrë pjesë në këtë "zbor", normalisht kanë gjetur mirëkuptimin e klubeve, si p.sh., mbrojtësi Armend Dallku dhe mesfushori Debatik Curri, të cilët do të marrin pjesë në grumbullim. Mbërritja e tyre në Antalia do të jetë më datën 25 janar, ku në këtë datë do të luhet edhe një miqësore me skuadrat e huaja që zhvillojnë fazën përgatitore në Antalia. Gjithashtu, në këtë "zbor" do të marrë pjesë edhe Adrian Aliaj, i cili aktivizohet me Lokerenin. Për këtë grumbullim i është bërë ftesë edhe talentit Jahmir Hyka, por është në dorë të lojtarit, pasi në këtë periudhë Hyka do të provohet tek Olimpiakosi. Ndërkohë, ajo që është për t'u evidentuar nga të thirrurit e Bariçit, ka të bëjë me sulmuesin pogradecar Migen Memelli, i cili është lënë i lirë nga klubi për të marrë pjesë në këtë grumbullim. Pas paraqitjes mjaft të mirë me skuadrën e tij Bran Bergen, Memelli i ka mbushur mendjen Bariçit që më në fund të thirret në kombëtare. Një mungesë e madhe në këtë grumbullim është ajo e sulmuesit Edmond Kapllani. Ky i fundit nuk është lënë i lirë nga klubi, pasi në këto data ai është i angazhuar me Karlsruhen në takimet e kampionatit. Gjithsesi, është e sigurt prania e tij në takimin miqësor me Maqedoninë. Këtë fakt e ka pohuar edhe vetë trajneri Bariç. Sipas shefit të ekipeve kombëtare në FSHF, Besnik Çela, pritet të vijë Bariçi dhe më pas të shpallet lista përfundimtare e futbollistëve. Nuk dihet ende se cili lojtar i kampionatit shqiptar do të thiret nga Bariçi, por flitet se në këtë listë do të ketë edhe surpriza. Një mundësi e mirë kjo për lojtarët e kampionatit shqiptar, të cilët do të provohen në disa takime miqësore që do të zhvillohen. Vonesa e shpalljes së listës është bërë për shkak se disa lojtarë ende nuk kanë kthyer një përgjigje rreth pjesëmarrjes së tyre në grumbullim. Deri më tani me 14 lojtarë të konfirmuar, kombëtarja duket se është "gjysmagjel", por sipas informacioneve nga sektori i ekipeve kombëtare, në listën e Bariçit ka shumë emra rezervë, të cilët do të zëvendësojnë të munguarit.

[wxz]

Reportazh nga Ulqini: 8 ekipe në një hotel. Amulli, sa kur të drekosh, duhet të mbash gjatë radhën.


Të flasësh për Ulqinin, natyrisht që vetëm fjalë të mira mund të thuash. Buzë detit, i pastër, me një kala dhe histori shekullore, Ulqini mbetet një qytet për t'u adhuruar nga turistët. Po do të flasim për një problem tjetër, atë të akomodimit të ekipeve shqiptare për fazën përgatitore të dimrit. Aktualisht në Ulqin po stërviten Partizani, Teuta, Besa, Luftëtari, Flamurtari, këto skuadra të superligës, por edhe Besëlidhja me Lushnjën të kategorisë së parë. Pra, plot shtatë skuadra, pa harruar që më tutje, në skajin verior të rivierës malazeze, në Hercegnov, stërviten Vllaznia dhe Elbasani. E mira është se kushtet e stërvitjes (gjithmonë krahasur me tonat) janë optimale dhe klima në përgjithësi është e mirë. Diçka tjetër pozitive është mbajtja e lojtarëve në një regjim të rreptë dhe çmimet janë më të lira. Ndoshta nga këto kushte janë nisur edhe presidentët për akomodimin e skuadrave të tyre në Ulqin. Po e keqja ku qëndron? Përveç këtyre ekipeve, në hotel "Olimpik" janë të grumbulluar edhe dy skuadra të tjera, Hajduk Kula dhe Zeta të Serbisë, shto këtu edhe një ekip malazez të rinjsh. Eshtë krijuar një amulli, sa kur të drekosh duhet të mbash gjatë radhën. Për sa i përket menusë së ushqimit, djemtë janë të pakënaqur. Ndoshta ata janë mësuar me kuzhinën tradicionale shqiptare, por nuk duhet harruar se kur gatuhet për 400 veta, natyrisht që cilësia bie. Kur kujtojmë që hoteli është akoma shtetëror dhe pak rikonstruksion ka që nga koha e Titos, kjo është më se normale. Batutat mes shqiptarëve nuk mungojnë. Ndonjë drejtues i ekipeve tona thotë se përse të mos e fillojnë superligën në Ulqin, duke u bërë një ftesë edhe ekipeve të mbetura në Shqipëri. Trajneri Ruci tregohet më finok në gjetjen e kundërshtarëve për miqësore, duke zgjedhur ekipe te huaja, me idenë që me ekipet tona do të konkurrojë sërish pas 2 shkurtit. Pastaj është edhe një problem tjetër: ka një dyndje menaxherësh, që sjellin dhe piketojnë futbollistë, por që më shumë bezdisin trajnerët sesa punojnë. Të paktën hoteli është larg qytetit dhe futbollistët tanë nuk "eksitohen" nga pub-et dhe lokalet e natës, që në vendin e tyre nuk se është se nuk i provojnë shpesh. Gjatë bisedave me trajnerët lindin ide se si mund eliminohet, ose të paktën të minimizohet, fluksi për në Ulqin. Pa dashur ta bëjmë emrin publik, njëri thotë se një presidenti më të mirë i bie që një vit ta lërë ekipin në kategorinë e parë dhe të ndërtojë një rezidencë për akomodim, sesa të bredhësh sa herë ke nevojë për një periudhë përgatitore, pa harruar që kjo rezidencë mund t'i shtojë të ardhurat, pasi të tjerë mund të shkonin aty. Ndoshta ky është një problem tjetër, por shpresojmë të ndikojë tek presidentët.

[wxz]

Eduart Tanushi, sulmuesi laçian i Kastriotit, shprehet optimist rreth gjendjes së ekipit të tij dhe premton maksimumin për të. Sipas Tanushit, këtë vit ekipi ku luan do të tregojë mundësitë reale, duke u ngjitur në klasifikimin e përgjithshëm dhe duke mos qenë rastësisht në superligë. Për të, Kastrioti ka një ekip solid, të denjë për rivalitet me çdo kundërshtar. "Investimet e presidentit Shkëlzen Zhilli kanë qenë efikase. Ato vihen re dukshëm edhe në ecurinë e ekipit, i cili ka një rritje të ndjeshme në lojë. Lojtarët janë të dubluar në çdo repart, duke rritur konkurrencën. Personalisht mund të them se ndihem mjaft mirë te Kastrioti, për të cilin do të jap gjithçka nga bagazhi im si futbollist. Fatmirësisht, gjendja ime sportive në këto momente është e mirë dhe jam i gatshëm për të startuar si titullar në fushë në kampionat, sigurisht, nëse do të kem edhe bekimin e trajnerit Petrit Haxhia," - shprehet sulmuesi laçian. Sipas Tanushit, Kastrioti ka rritje në lojën e tij dhe njëkohësisht është bërë më i fortë. "Ne do ta tregojmë veten edhe në pjesën e mbetur të kampionatit. Kuptohet, gjërat vështirësohen, pasi gara sa vjen e bëhet më e ashpër, pasi ekipet që rrezikojnë mbijetesën do të luftojnë për "jetë a vdekje". Po kështu, edhe pretendentët do të kërkojnë të fitoijnë në çdo takim, kështu që pikët do të kërkojnë shumë mund. Për ne, çdo ndeshje në vazhdim të kampionatit do të vlerësohet si finale. Në shtëpi duhet të kërkojmë pikët e plota, ndërsa jashtë të marrin sa më shumë të jetë e mundur," - përfundon sulmuesi Eduart Tanushi.

[wxz]

Përforcimet ende mbeten tek vizat.
Partizani vazhdon të përbëhet vetëm nga ata lojtarë që janë nisur gati një javë më parë nga Tirana. Bjelokanoviç është i huaji i vetëm që po provohet nga trajneri Lika, i cili pret të mbërrijnë në Ulqin edhe futbollistët afrikanë nga Nigeria dhe Kameruni. "Akoma po merremi me përgatitjen e dokumentacionit të tyre, që të mos hasin asnjë problem gjatë udhëtimit. Shpresoj të mbërrijnë sa më shpejt dhe mbi të gjitha të jenë cilësorë për Partizanin,"- ka sqaruar trajneri i të kuqve.

[wxz]

Partizani e ka nisur me këmbë të mbarë sezonin, duke fituar në takimin e parë jozyrtar.


Dje është luajtur takimi i parë miqësor i Partizanit në kuadër të përgatitjeve për fazën përgatitore të janarit. Kundërshtari i parë i vitit për të kuqtë, siç është bërë i ditur ditë më parë, ka qenë Besa e Kavajës, e drejtuar nga i mirënjohuri Vasil Bici. Në fund të 90-minutëshit të djeshëm miqësor, e fituar ka dalë skuadra e Likës, futbollistët e së cilës kanë arritur të shënojnë një gol më shumë se kundërshtarët. Rezultati përfundimtar i takimit, që është mbërthyer në shifrat 3-2, i ka kënaqur të dy trajnerët respektivë, pavarësisht se djemtë e trajnerit Lika kanë arritur të shënojnë tri herë, ndërsa ata të Vasil Bicit vetëm dy herë. Golat për skuadrën e Partizanit janë shënuar nga Beqiri dhe Muzaka. 22-vjeçari i mesfushës së kuqe, që dje është aktivizuar në sulm, ka arritur të shënojë një dopietë. Trajnerët e të dyja skadrave kanë menduar për lojën e futbollistëve të tyre dhe nuk u kanë dhënë shumë rëndësi golave. Në fillim, Lika e Bici kanë hedhur në fushë formacionet më të mira, ndërsa në minutat në vazhdim janë aktivizuar thuajse të gjithë lojtarët e stolit. Dy herë kavajasit kanë kaluar në avantazh, për t'u barazuar e më pas kaluar nga futbollistët e kuq. Trajneri Lika e vlerëson si mjaft pozitiv këtë takim dhe shpreson që në ditët në vazhdim të korrigjohet diçka në lojën e skuadrës. "Kjo ishte një ndeshje miqësore, që na ka shërbyer shumë neve trajnerëve. Si Besa dhe Partizani zhvilluan një takim të mirë, ku rezultati përfundimtar nuk ishte primar në mendjen tonë. Duhet theksuar se edhe terreni nuk na lejoi të zhvillonin një lojë teknike, por megjithatë djemtë u munduan të japin më të mirën. Të shtunën kemi caktuar një tjetër takim miqësor me Teutën, ku do të kërkojmë të korrigjojmë diçka më shumë në lojë. I kam aktivizuar të gjithë lojtarët që kam në dispozicion si titullarët dhe ata të stolit. Ramë dakord me trajnerin Bici që në fillim të hedhim në fushë lojtarët titullarë, për t'i zëvendësuar më pas me lojtarët e stolit. Në fillim janë aktivizuar Shehi, Pinari Tafaj, Grizha, Bulku, Babamusta, Dhëmbi, Hallaçi, Beqiri, Abilaliaj e Muzaka. Janë futur në lojë edhe lojtarët e rinj si Capa, Aliu, Doda Miska etj," - është shprehur trajneri Lika. Në lidhje me aventurën e dy futbollistëve të formacionit bazë, Bylykbashi e Ndreka, Lika përsëri ngre supet, duke mos qenë i informuar, të paktën kështu deklaron ai, për provën që po kalojnë në Turqi. "Nuk kam asnjë informacion për ta. E di që po provohen në Turqi me skuadra ukrainase. Ne po përgatitemi sikur ata nuk do të jenë pjesë e Partizanit në vazhdim. Natyrisht, kam kontaktuar me presidentin Xhani, duke e informuar për mbarëvajtjen përgatitjeve në Ulqin,"- ka përfunduar trajneri Lika. Afati kohor i përcaktuar nga njëshi i stolit të Partizanit për Bylykbashin e Ndrekën po skadon, por do të jetë shumë e vështirë që ky afat të respektohet. Prova e dy futbollistëve të kuq mund të zgjasë edhe disa ditë të tjera, pasi përveç Kribasit, në Kemer ndodhen edhe disa skuadra të tjera ukrainase.

[wxz]

Dy futbollistët e Partizanit po provohen tek ish-skuadra e Blendi Shkëmbit, Kribas.


Eshtë shumë e vështirë që në këtë botë, me këtë teknologji të përparuar, të mbash sekret qoftë një detaj, jo më emrin e skuadrës ku aspiron të luash në të ardhmen. Në kampin e kuq askush nuk të jep informacion për aventurën e dy futbollistëve të formacionit bazë, Dorian Bylykbashi dhe Henri Ndreka, në Antalia të Turqisë. Madje dy lojtarët në fjalë kanë dashur ta mbajnë sekret deri në momentin e fundit të nënshkrimit, gjithmonë nëse drejtuesit ukrainas do të bindeshin me paraqitjen e tyre, emrin e skuadrës. Ekipi ukrainas, ku po provohen dy të kuqtë, quhet Kribas, dhe ndodhet në vendin e 10-të në kampionat, me 20 pikë të grumbulluara. Për futbolldashësit shqiptarë ky emër është i dëgjuar, pasi me këtë skuadër është aktivizuar së fundi edhe futbollisti i kombëtares, Blendi Shkëmbi, që para pak javësh ka nënshkruar me Teutën e Durrësit. Kribasi ndodhet në Antalia për fazën përgatitore bashkë me disa skuadra të tjera ukrainase dhe të vendeve të tjera të Lindjes, kështu që është parë mundësia më e mirë e provimit të Ndrekës dhe Bylykbashit te kjo skuadër. Mësohet se menaxheri i dy futbollistëve të kuq është Nexhmedin Haxhiu, mjaft i njohur në Shqipëri. Ndreka dhe Bylykbashi kanë udhëtuar drejt Antalias të dielën, në një kohë me ekipin e Tiranës. Madje nga burime të sigurta pranë bardhebluve, mësohet se ata kanë shfrytëzuar të njëjtën linjë avioni. Disa kilometra larg Antalias ndodhet qyteti turistik i Kemerit, ku mësohet se është akomoduar skuadra ukrainase e Kribasit. Pas enigmave disaditore, më në fund është zbuluar destinacioni i mundshëm i kapitenit Bylykbashi dhe i qendërmbrojtësit Ndreka, të cilët nuk kanë dhënë asnjë informacion në momentin e nisjes drejt Turqisë për provë. Kjo u jep mundësi drejtuesve të Partizanit (nuk mund të besosh se Xhani apo Lika nuk janë në dijeni të skuadrës ku po provohen dy lojtarët e kuq) të marrin vesh se ku ndodhen futbollistët e tyre, që të kenë mundësi të japin një përgjigje më të saktë. Duke mësuar emrin e skuadrës ukrainase, tifozët e kuq do të jenë disi më të qetë për benjaminët e tyre, që e kanë mbajtur sekret që në fillim emrin e skuadrës së re të mundshme. Me ç'kuptohet, Ndreka dhe Bylykbashi janë supersticiozë, ndaj për mbarëvajtjen e periudhës së provës me Kribasin nuk kanë dashur ta bëjnë publik emrin e skuadrës.

[wxz]

Presidenca dinamovite akoma po e mban të hapur derën e merkatos për ekipin e saj dhe kjo u pa edhe dje gjatë takimit miqësor me Shkumbinin. Dje, për disa minuta, në radhët e ekipit të drejtuar nga Redi Jupi janë provuar edhe dy futbollistë afrikanë, ku sipas menaxherit të tyre, njëri vinte nga Nigeria dhe tjetri nga Gana. Ganezi nuk e kishte për herë të parë që vishte fanellën e Dinamos, pasi edhe ditën e shtunë në ndeshjen me Laçin luajti në pjesën e dytë. Por pas këtij testi ai u deklarua jo i nevojshëm, ndërsa sulmuesi ganez pati mundësi që të shfaqë përsëri diçka nga repertori i tij. Ndërsa nigeriani u rreshtua në vijën mbrojtëse dhe u pozicionua në krahun e djathtë, ndryshe nga afrikani tjetër dita e djeshme ishte prova e parë për mbrojtësin nigerian. Fjalën e fundit për afrikanët do ta thotë stafi teknik i bluve, megjithëse me sa u pa, ata nuk i kishin me sy të mirë, pasi nuk i prisnin të vinin në provë. Mbase dinamovitët i kanë rregulluar punët gjetkë, sepse shumë po flitet këto ditët e fundit se te blutë mund të vijnë përforcime nga Kroacia.

[wxz]

"Xhaxhi" u uron suksese Dinamovitëve.
Ekipi i Dinamos e nisi sezonin futbollistik 2006-2007 me Faruk Sejdinin në krye të pankinës, por bashkëjetesa e "Xhaxhit" me blutë zgjati vetëm tetë ndeshje, sepse pas humbjes 3-0 në Shkodër, trajneri Sejdini u largua nga stoli dinamovit dhe që nga ai moment fati i Dinamos është në dorë të Redi Jupit. Nxënësi edhe dje ka dalë më i fortë se profesori, pasi e ka mundur thellë me rezultatin 5-0. Në përfundim të takimit të djeshëm ish-trajneri i Dinamos është përshëndetur me ish-lojtarët e tij dhe miqësisht u ka uruar atyre gjithë të mirat dhe suksese në punën e tyre. Në fund të takimit stafet dinamovite dhe peqinase kanë pirë nga një kafe së bashku. Nga bisedat midis "Xhaxhit" dhe drejtuesve blu kishte një komunikim normal dhe nuk dukej se kishte ndodhur gjë në të shkuarën.

[wxz]

- Indrit Taçi dje ka bërë zyrtarisht divorcin me blutë, pasi në takimin e djeshëm mbrojtësi i ri ka bërë prezantimin me skuadrën e Shkumbinit.
- Ilir Qorri ka luajtur dje takimin e parë pas disa javë ndërprerjeje dhe rikthimi i sulmuesit elbasanas është një plus më shumë për Dinamon, pasi dinamoviti e nisi aty ku e kishte lënë. Në dy ndeshjet e fundit, Qorri kishte arritur të shënonte dhe këtë gjë e bëri edhe në takimin me Shkumbinin.
- Ilion Lika ishte i vetmi titullar blu, që nuk e preku dje fushën e lojës dhe shkak për këtë është bërë dëmtimi që ka marrë në ndeshjen me Laçin. Trajnerët nuk kanë dashur të rrezikojnë me portierin, pasi ai është drejt rikuperimit dhe në vend të tij janë aktivizuar Llazi Gjika dhe Alban Hoxha, i cili është i huazuar tek Turbina.
- Përpara nisjes së takimit të djeshëm trajneri Jupi dhe pjesa e titullarëve kanë kaluar disa çaste në sallën e forcës, nga ku kanë marrë një ngarkesë të lehtë fizike. Më pas kanë bërë një nxehje në fushë për të vazhduar normalisht takimin.
- Ditmar Bicaj, mbrojtësi i ri dinamovit, dje është aktivizuar titullar në qendër të mbrojtjes dhe në pjesën e dytë është zëvendësuar, por më pas Jupi e ka parë të udhës që ta rifusë përsëri të riun në fushë, sepse i duhej të zëvendësonte Erion Xhafën, i cili dje ishte dinamoviti që u aktivizua më gjatë.

[wxz]

Më në fund mbrojtësi Papa Diop është parë që të stërvitet me uniformën e Dinamos.


Telenovela e njërit senegalez blu, dje ka përfunduar dhe më në fund mbrojtësi Papa Diop është parë që të stërvitet me uniformën e Dinamos. Mbrojtësi dinamovit dje ka nisur seancën e parë për këtë fazë përgatitore dhe, meqenëse shokët po zhvillonin një ndeshje kontrolli, ai ka ndjekur një program stërvitor individual, i cili iu bë i qartë nga trajnerët. Sipas dinamovitit, ky program i diferencuar do të ndiqet për tri ditë, dhe më pas do t'i bashkohet skuadrës, sepse gjatë kohëve që Diop nuk ka qenë prezent në Shqipëri është përgatitur në Senegal. Vuajtjet e ardhjes së mbrojtësit kanë qenë nga të dyja palët, pasi trajnerët e kërkojnë lojtarin më përpara, sepse donin të ngrinin një strategji me lojtarë stabël. Ndërsa sipas senegalezit ardhja e tij në Shqipëri është shoqëruar me shumë peripeci. "Për të ardhur nga Senegali deri në Shqipëri duhet të ndjekësh disa procedura, sepse në Tiranë nuk ka ambasadë të vendit tim dhe për të marrë hyrjen në Shqipëri duhet të aplikosh në Itali. Tjetër pengesë është se në momentet e para shteti shqiptar të jep leje qëndrimi triditore dhe që të jesh i besueshëm duhet të presesh fakset që vijnë nga pritësi, që në këtë rast është Dinamo. Unë jam lojtar i Dinamos edhe për tri sezone të tjera dhe nuk kishte pse të krijohej ndonjë alibi largimi. Pra, mungesa ime justifikohet vetëm me procedurën e gjatë që më është dashur për t'u pajisur me dokumentet e nevojshme të udhëtimit. Ndërsa për sa i përket Gudjabit, nuk kam ndonjë informacion, sepse ai jeton në një vend tjetër. Di që përpara se të vinte në Senegal, El Haxhi Gudjabi ka biseduar me presidentin e Vllaznisë dhe ka rënë dakort që të bëjë pjesë në planet e shkodranëve për sa i përket pjesës së mbetur të sezonit. Me sa di unë, ai nuk ka kontratë me Dinamon, pasi ajo i ka skaduar që më 15 dhjetor të vitit të kaluar, prandaj ka biseduar me drejtuesit e Vllaznisë,"- është shprehur mbrojtësi senegalez i bluve, Papa Diop.

[wxz]

Dinamovitët e kanë zotëruar miqësoren e djeshme me Shkumbinin dhe kanë arritur të fitojnë 5-0


Gjatë pasdites së djeshme, në kompleksin sportiv "Dinamo" është zhvilluar një ndeshje kontrolli midis ekipit të Dinamos dhe Shkumbinit të Peqinit. Ky takim ishte planifikuar në mënyrë që të dy skuadrat të shikonin se ku ishin me përgatitjet e kësaj faze. Dinamovitët në përfundim të sfidës arritën që të fitonin me rezultatin e pastër 5-0. Paraqitja dhe rezultati i bluve të kryeqytetit ishte në antitezë me ndeshjen e ditës së shtunë, ku u mundën në shtëpinë e tyre nga ekipi i Laçit. Dje, fusha sportive e kompleksit "Dinamo" ngjante si një laborator kimie, sepse gjatë gjithë takimit u kryen shumë eksperimente nga ana e profesorëve. Profesori i ri, Redi Jupi, pati më shumë mundësi eksperimentale sesa mësuesi i tij i jetës, Faruk Sejdini. Pjesa e parë ishte më e qëndrueshme, pasi të dy ekipet ruajtën të njëjtën strukturë dhe rrjedhë loje, ndërsa në pjesën e dytë profesorët, kryesisht Jupi, përdorën fantazinë e tyre dhe u munduan që të gjejnë të gjitha përzieriet e mundshme, duke u bazuar tek "substancat" që posedojnë. Banka laboratorike e bluve të kryeqytetit ishte më impulsive se ajo e miqve, pasi lënda e parë e "çirakut" të Dinamos është më cilësore se ajo e "ustait". Dinamo e nisi ndeshjen me këtë njëmbëdhjetësh: Gjika, Ahmataj, Xhafa, Bicaj, Ishka, Jupi, Poçi, Vinçetiç, Mile, Arbri, Nuhiu. Përsëri trajnerët dinamovitë e nisën takimin me risi, pasi i riu Bicaj u preferua që ta niste nga minuta e parë në qendër të mbrojtjes, Ishka luajti si mbrojtës i djathtë, ndërsa Ahmataj po natyralizohet si mbrojtës i majtë. Sulmi dinamovit herë shfaqej me dy dhe herë me tre, pasi Mile për disa momente luante si mesfushor i majtë dhe disa herë zhvendosej më parë dhe bashkohej me dyshen Arbri-Nuhiu. Në pjesën e dytë Dinamo ndryshte formën e saj nga momenti në moment, sepse çdo gjë shkonte në varësi të lojtarëve që hynin dhe dilnin. Sulmi blu në këtë pjesë ishte i pandalshëm dhe beratasi Vangjel Mile me avancimin drejt vijës së parë e kishte më të lehtë që të shfaqte vlerat e tij. Gjithashtu ra në sy edhe loja e mirë e Eldorado Merkoçit, si dhe kthimi me gol i elbasanasit Ilir Qorri. Pjesa e parë përfundoi 1-0 dhe golin e shënoi Ahmataj nga një goditje standarde, ndërsa golat e pjesës së dytë u realizuan nga Vinçetiç, Qorri dhe dy nga Mile. Në këtë sfidë u pa që ekipi i Dinamos është në rrugën e duhur, megjithëse akoma nuk mund të flitet për një njëmbëdhjetësh të stabilizuar. Eksperimentet e trajnerit Jupi janë jo vetëm në funksion të gjetjes së ekipit të parë, por edhe për të krijuar një strategji të qartë për ngritjen e një ansambli që mund t'i përshtatet çdo kundërshtari. Edhe gjatë sfidës së djeshme u kuptua që dinamovitët e kanë të nevojshme të gjejnë të paktën një mbrojtës të djathtë, nëse duhet marrë e mirëqenë lëvizja permanente e Ahmatajt në krahun e majtë.

[wxz]

Sot gjirokastritët kanë miqësore me Hajdukun e Tulës, ndërsa të shtunën me Lushnjën


Ekipi gjirokastrit që prej ditës së hënë ndodhet në Ulqin të Malit të Zi, ku po zhvillon fazën përgatitore. Me përjashtim të mesfushorit Muço dhe mbrojtësit Lamaj, të cilët janë të dëmtuar, të gjithë futbollistët e tjerë janë në dispozicion të trajnerit Ilir Spahiu. I vetmi përforcim në radhët e ekipit është rikthimi i mesfushorit Gjergji Dhima, i cili vjen pas aktivizimit 6-mujor në kampionatin e kategorisë së tretë greke, me ekipin Olimpiakos Volos. Gjithshtu, gjatë këtyre ditëve, bluezinjve pritet t'u shtohen edhe dy futbollistë të huaj, të cilët vijnë nga kampionati belg. Këta të fundit janë dhuratë e donatorit Mihal Delijorgji, një nga financuesit kryesorë të ekipit. Ndërkohë, me grupin në Ulqin po stërvitet edhe sulmuesi kryesor i skuadrës, Arlind Nora. Kohët e fundit, gjirokastriti është lakuar shumë në shtypin sportiv, për një largim të mundshëm të tij drejt Elbasanit, me të cilin fitoi edhe titullin kampion në sezonin 2005-2006. Për "Sportin shqiptar", në linjë telefonike nga Ulqini, Nora shprehet se është pjesë e Luftëtarit dhe nuk do të largohet, duke respektuar kështu, kontratën që ka firmosur në fillim të sezonit futbollistik.
Arlind, kohët e fundit është folur shumë për një rikthim tuajin në Elbasan, madje pak ditë më parë jeni parë edhe në shoqërinë e presidentit Arben Laze. Si qëndron e vërteta?
Përpara se të nisesha me ekipin për fazë përgatitore në Ulqin, kam qenë për një vizitë miqësore në qytetin e Elbasanit. Shkova atje thjesht për të takuar shokët që kam pasur dhe presidentin Arben Laze. Kemi kaluar një vit të mrekullueshëm së bashku dhe nuk mund të ndahemi kaq lehtë nga njëri tjetri. Kjo është e gjitha dhe asgjë më tepër.
Pra, e mohoni mundësinë e një rikthimi në Elbasan?
Unë jam pjesë e ekipit të Luftëtarit dhe nuk do të largohem prej tij. Kam lidhur një kontratë, që skadon në fund të këtij sezoni dhe që dua ta respektoj deri në fund. Në lidhje me një kalim të mundshëm tek Elbasani, mund të them se gjithçka në dorë e kanë donatorët e ekipit. Në qoftë se midis dy klubeve bëhet një marrëveshje për kalimin tim tek Elbasani, do të isha dakord, sepse ai është një ekip që unë e dua dhe kam fituar diçka me të. Gjithsesi, e shikoj të pamundur kalimin atje, sepse drejtuesit e klubit nuk duan që unë të largohem.
Pjesën e parë të kampionatit, Luftëtari ka bërë një paraqitje të kënaqshme. Si një prej lojtarëve kryesorë të skuadrës, çfarë u premtoni tifozëve gjirokastritë në pjesën e mbetur të kampionatit?
I përshëndes tifozët për mbështetjen mjaft të zjarrtë që na kanë dhënë në takimet e luajtura në Gjirokastër. U premtojmë atyre se do ta realizojmë patjetër objektivin që kemi, pra qëndrimin në superligë. Ndërkohë, vitin tjetër besoj se do të jemi në vendet më të larta, pasi edhe ekipi do të përforcohet dhe ana financiare do të rritet.
Keni shënuar pak gola gjatë këtij kampionati, vetëm tre...
Dënimi që mora nga federata, ndikoi shumë në ecurinë time. Gjithsesi, unë jam i kënaqur edhe me tre golat që kam shënuar, pasi kanë qenë gola vendimtarë dhe e kanë ndihmuar ekipin në ato pikë që ka marrë.
Si kanë kaluar dy ditët e para të stërvitjes në Ulqin?
Këtu në Ulqin ka kushte mjaft të mira për t'u stërvitur dhe besoj se do të na vlejë shumë kjo minifazë që po zhvillojmë. Nën drejtimin e stafit teknik, po stërvitemi me dy seanca në ditë. Duhet të arrijmë formën e duhur, në mënyrë që të jemi të gatshëm për takimin e parë të vitit, të cilin e kemi me Besën, në transfertë.
- Në çfarë repartesh ka nevojë Luftëtari për t'u përforcuar me lojtarë?
- Na duhen patjetër dy ose tre lojtarë, një mesfushor i majtë, një organizator dhe një qendërsulmues, që të jetë i fortë në luftën në ajër. Donatorët na kanë premtuar se do të na sjellin dy futbollistë të huaj mjaft cilësorë. Gjithashtu, mund të them se rikthimi i Gjergji Dhimës në ekip është një përforcim mjaft i mirë, duke pasur parasysh që ai mund të luajë si organizator, pasi na mungon një i mirëfilltë në këtë pozicion.

[wxz]

Më në fund, në stërvitjen e djeshme me bardheblutë u bashkuan edhe dy lojtarët e mbetur, Oriand Abazaj dhe Abanda Fish. Bashkë me ta ishte edhe drejtori teknik, Alban Tafaj, i cili i shoqëroi nga Tirana për në Kemer. Trajneri Muça e kishte kërkuar me ngulm ardhjen e sulmuesit Abazaj në skuadër, ndërkohë që për kontratën, ajo do të firmoset pas mbërritjes në kryeqytet. Për sa i takon Fishit, mësohet se në vendlindje është stërvitur në mënyrë individuale, por kjo nuk e shpëton për të kryer të gjitha testimet fizike me përgatitësin atletik, Dimraj. Në stërvitjen e djeshme ka munguar mesfushori Jetmir Sefa, i cili luajti me ekipin Shpresa përballë atyre turq. 21-vjeçari do të jetë sot një "kartë" për t'u aktivizuar ndaj Istambulsporit.

[wxz]

Në pritje për të marrë vizën në Ambasadën Italiane, Isli Hidi që nga dita e diel është duke u stërvitur individualisht në kryeqytet. Portieri bardheblu nuk udhëtoi me skuadrën në Turqi, pasi skuadra italiane e Empolit i ka bërë kërkesë për ta provuar për gjashtë ditë. Hidi tashmë i ka futur dokumentet në ambasadë, ndërkohë që pret përgjigje se kur do të paraqitet për të marrë vizën përkatëse. Menjëherë ai më pas do të udhëtojë drejt Italisë, ku edhe do të provohet nga trajneri i Empolit, Luixhi Kanji. Aktualisht, skuadra blu ndodhet në vendin e gjashtë në renditje, zonë e cila e çon në fund të sezonit në Kupën UEFA.

[wxz]

Mbrojtësi bardheblu është i kënaqur me kushtet dhe stërvitjen në Turqi, teksa beson verbërisht te titulli.


Për mbrojtësin Igli Allmuça, stërvitja që po zhvillohet në Turqi, do t'i mundësojë Tiranës "karburantin" e nevojshëm për gjithë vitin. Ish-lojtari i Partizanit sezonin e kaluar është ambientuar më së miri te bardheblutë, duke qenë një prej pikave më të forta në mbrojtje. Nga Kemeri, ku skuadra e tij prej katër ditësh është grumbulluar për të kryer fazën përgatitore, 24-vjeçari shprehet i kënaqur me gjithçka që është ofruar. "Nuk na mungon asgjë këtu në Antalia. Thuajse i kemi të gjitha kushtet e nevojshme për të kryer një fazë përgatitore të një niveli të lartë, kjo falë mbështetjes së donatorëve. Duke filluar nga kushtet e stërvitjes, te hoteli dhe deri te ushqimi, janë çdo gjë perfekte. Secili prej nesh po mundohet të japë maksimumin në këto momente, sepse dihet që kjo periudhë është shumë e rëndësishme për një lojtar profesionist, që kërkon të qëndrojë në formën më të mirë fizike,"- shprehet Allmuça për "Sportin shqiptar".
Që nga dita e hënë, trajneri Shkëlqim Muça, së bashku edhe me përgatitësin atletik, Rauf Dimrajn, po zhvillojnë nga dy seanca stërvitore ditën, ndërkohë që sot në plan është miqësorja me turqit e Istambulsporit. "Deri tani kemi kryer nga dy seanca ditën dhe lodhja është e ndjeshme në këmbët tona. Për fat të mirë, asnjëri prej nesh nuk ka pësuar trauma dhe kjo është meritë e trajnerëve, Muça e Dimraj. Pas kaq ditësh stërvitje intensive, sot do të luajmë edhe një miqësore me Istambulsporin, për të parë më mirë se në çfarë gjendjeje ndodhemi,"- shton më tej nëpërmjet telefonit mbrojtësi i dalluar i 22 herë kampionëve.
Edhe pse kampionati do edhe dy javë për të rifilluar, mendja e lojtarëve të Tiranës qëndron te sfida e parë me Teutën. Në fazën e parë, bardheblutë nuk arritën ta mposhtnin këtë rival, që është vetëm gjashtë pikë larg. Për Allmuçën, nëse fitohet edhe ky takim, titulli kampion është thuajse i siguruar. "Normalisht, e dimë që përballë Teutës do të vendoset një pjesë e mirë e titullit kampion. Duhet ta fitojmë me çdo kusht këtë ndeshje, në mënyrë që të kompletojmë të gjithë kampionatin me fitoret e arritura ndaj rivalëve direkt. Personalisht, kam besim të verbër se do ta fitojmë titullin këtë vit, ndërkohë që për mua do të ishte gëzim i dyfishtë, sepse deri tani nuk e kam provuar asnjëherë shijen e tij,"- përfundon Igli Allmuça.

[wxz]

Bardheblutë do të luajnë sot miqësoren me ekipin turk. Pritet debutimi i A.Duros, Çapjes, Turdiut dhe Abazajt.



Tirana do të luajë sot miqësoren e programuar me Istambulsporin. Në orën 16:00, bardheblutë do të zbresin në stadiumin e vendësve për të zhvilluar takimin e parë për këtë vit, kur kujtojmë se vitin 2006 e mbyllën si kampionë të dimrit, me gjashtë pikë diferencë nga ndjekësja më e afërt, Teuta. Pas 10 ditësh stërvitje sa në kryeqytet dhe sa në Antalia, për djemtë e Muçës ka ardhur momenti të tregojnë se deri në çfarë pike kanë shkuar me përgatitjet e tyre. Me ardhjet e fundit në skuadër, duhet thënë se te Tirana është shtuar ndjeshëm rivaliteti për një vend në formacion. Kështu, sot pritet të bëjnë debutimin me fanellën bardheblu futbollistët Albert Duro, Hetlem Çapja, Erald Turdiu, Oriand Abazaj dhe Florenc Rrapi. I vetmi që do të mungojë është portieri Isli Hidi, i cili ndodhet në kryeqytet, në pritje të marrjes së vizës për të shkuar për provë në Itali. Ndaj turqve pritet të provohen në formacion dy të huajt e vetëm, Fish dhe Abraham, të cilët janë bashkuar me vonesë, sepse ndodheshin për pushime në vendlindje. Miqësorja me Istambulsporin do t'i shërbejë gjithashtu trajnerit Shkëlqim Muça për të parë më mirë se ku çalon skuadra, pasi kundërshtari mund të quhet i një niveli të lartë. Sipas informacioneve të marra nga Kemeri, formacioni i mundshëm që do të zbresë sot në fushë është: Nallbani, Allmuça, Dede, Pisha, Bakalli, Muka, Bulku, Çapja, K.Duro, Pema dhe Sinani. Në pjesën e dytë pritet të provohen emra si A.Duro, Hajdari, Abraham, Turdiu, Abazaj, Fish, Sefa, Rrapi. Përveç ndeshjes së sotme, gjatë qëndrimit të tyre në Turqi, bardheblutë pritet të zhvillojnë edhe tri miqësore të tjera, me skuadra ruse, azerbajxhanase dhe kazakistanase. Për trajnerin Muça, vetëm duke luajtur skuadra mund të kapë formën e saj më të mirë në prag të rifillimit të kampionatit, por gjithashtu edhe repartet do të konsolidohen.

[wxz]

Kosovari Ahmed Jonuzi ka bindur për talentin e tij dhe do të jetë në radhët e ekipit kavajas.


Si askush tjetër me potencën e tij fizike, ai mbetet ndër futbollistët më të përgatitur te Besa. Ka marrë mjaft komplimente nga shokët, por edhe stafi teknik i Besës. Po çfarë përbën kjo fazë përgatitore e parë jashtë Kosovës për sulmuesin 18 vjeçar Ahmed Jonuzi? Si e vlerëson ai besimin dhe vlerësimin për vlerat e tij? Cilat janë mangësitë që sheh te vetja sulmuesi i ri i kavajasve? Po konkurrenca në ekip e frikëson sadopak? Për të gjitha këto, ja intervista e talentit kosovar:
Pas dy javësh te Besa, si e vlerësoni ekipin tuaj të ri?
Ajo që më gëzon më shumë është klima mjaft miqësore që më rrethon. Ngado marr përkrahje dhe motivim për të bërë më shumë. Këtu nuk e kam fjalën vetëm për patriotët e mi nga Kosova, por për të gjithë futbollistët. Nga sa kam konstatuar deri tani, habitem se si ky ekip ka vetëm 19 pikë, pavarësisht se konstatohet lehtë se sulmi ka qenë pika më nevralgjike e ekipit. Besoj se tani ndihemi më të plotësuar dhe kjo edhe për përmirësimin e dobësive që janë vërejtur në manovrën sulmuese. Jam i kënaqur nga puna e këtushme.
Ndërkohë keni marrë mjaft komplimente për lojën tuaj, veçanërisht për përgatitjen fizike...
Jam i ri për t'ia bërë me sy vetes. Të gjitha komplimentet natyrisht që më pëlqejnë, por njëkohësisht i vlerësoj si nxitje të mëtejshme e jo fjalë të momentit. Kam edhe unë mangësitë e mia. Ndër më kryesoret mbetet mungesa e përvojës në një kampionat si ky i superligës. Kam ende nevojë të përmirësoj veçmas goditjen përfundimtare drejt portës. Një sulmues quhet i suksesshëm kur nuk fal shumë para portës. Nuk duhet harruar se e gjithë djersa e ekipit varet pikërisht nga një gol i vetëm në një takim të kampionatit. Po djersij shumë dhe besoj se diçka kam përmirësuar në teknikën time individuale.
Nisur nga përgjigjja juaj, i druheni asaj çfarë pritet nga ju dhe konkurrencës në ekip?
Eshtë përvoja ime e parë jashtë Kosovës dhe nuk mund të premtoj për vetë moshën që kam se tani Besa do të shënojë më shumë gola se luaj unë. Pa diskutim që golat e mi nuk do të mungojnë, por shikoni, sulmuesi nuk luan i vetëm në një ishull, që do të thotë se goli vjen pas një manovre të qartë sulmuese e të gjithë ekipit. Përgjegjësia e sulmuesit mbetet përgjegjshmëria dhe përqendrimi maksimal para portës kundërshtare. Edhe raste do të humben, por me kriter dhe jo gjithmonë për fajin e sulmuesve. E përsëris, shpesh djersa e shokëve për një moment është në këmbët e mia e shokëve të mi. Sa për konkurrencën, ajo vetëm sa ma shton "inatin" për punë. Jonuzin duhet ta vlerësoni jo si shpëtimtar të Besës, por si një i ri që kërkon të bëhet dikushi nesër në futbollin shqiptar dhe me ambicie për më tej.
Së fundi, jo të gjithë i vlerësojnë ideale kushtet tuaja të stërvitjes. Ju çfarë mendoni?
Nuk e di për ekipet e tjera, por Besa i ka të gjitha kushtet ideale për trajtim e stërvitje. Kam dëgjuar se në hotele të tjera ka dyndje, ndërsa te ne ndodhet vetëm Luftëtari. Sa për terrenet, mirë do të ishte të kishte më shumë. Së fundi, habitem se si gjithë bregdeti i Shqipërisë nuk paska kaq metra katrorë tokë për të pasur një fushë futbolli, pasi hotelet luksoze nuk mungojnë. Kjo fazë përgatitore besoj do t'u vlejë edhe presidentëve dhe pushtetit lokal për të menduar ndryshe për investimet e tyre perspektive në infrastrukturë. Fusha stërvitore është aq e vlefshme sa vetë rezultatet momentale të çdo ekipi, qoftë edhe titulli kampion.

[wxz]

Një telefonatë urgjente e menaxherit kosovar të Besës dhe vetë Krasniqit, Nexhmedin Haxhiut, ka bërë që mbrëmë vonë futbollisti Driton Krasniqi të largohet nga kampingu stërvitor i Besës drejt qytetit turk të Antalias. Në bisedë telefonike me Dritonin, mësohet se në qytetin turk ai do të ketë një provë me një ekip ukrainas dhe janë të gjitha shanset që Krasniqi t'i thotë lamtumirë Besës të paktën për këtë sezon. Krasniqi ka dy vite që luan plot sukses në radhët e Besës dhe kishte ardhur nga ekipi kryeqytas i Prishtinës, ku kishte luajtur për tri sezone rresht. Largimi i tij nga Besa do t'i kushtonte jo pak linjës së djathtë të ekipit.

[wxz]

Siç është bërë e ditur prej ditësh, këtë fundjavë do të zhvillohet një takim miqësor mes ekipeve të Vllaznisë dhe Buduçnostit. Ky takim nuk do të jetë thjesht sa për të mbushur hapësirën e fazës përgatitore, ngaqë të dy skuadrat ndodhen në fazë përgatitore në Hercegnovi të Malit të Zi. Arsyeja e vërtetë pse këto dy skuadra do të ndeshen me njëra tjetrën ka të bëjë me faktin se mes tyre mund të ketë shkëmbime lojtarësh. Sulmuesi që ka luajtur në fazën e parë të kampionatit me Vllazninë, Drazhen Miliç, ditët e fundit është duke u stërvitur në radhët e Buduçnostit, ngaqë ka arritur një marrëveshje me drejtuesit e tij për të luajtur me ta në vazhdim të sezonit. Por pas bisedimeve mes krerëve të dy klubeve, ka lindur ideja që për ta marrë Miliçin në parametrat zero, skuadra malazeze është gati të huazojë te shkodranët një nga lojtarët e saj të mesfushës, repart që ka nevojë për përforcime. Prandaj edhe miqësorja e kësaj fundjave do t'i japë mundësi trajnerit Josa që përveçse të kërkojë më të mirën nga skuadra e tij në miqësoren ndaj Buduçnostit, të vëzhgojë edhe ndonjë nga lojtarët e kësaj skuadre që mund të vishet kuqeblu. Piketat e para duket se janë vënë dhe Vllaznia pritet që të shohë më konkretisht për Sekuliçin, një mesfushor shumë potent dhe njëkohësisht një nga lojtarët më të mirë të kryesuesve të kampionatit malazez.

[wxz]

Drejtuesit e kuqebluve kanë pritur që ish sulmuesi dinamovit të mbërrinte dy net më parë, por ai nuk duket.



Kuqeblutë duket se janë gënjyer edhe një herë tjetër nga ana e afrikanit Gudjabi. Ai megjithëse kishte lajmëruar se do të ishte në Rinas mesnatën e së martës, sërish nuk ka ardhur, duke sjellë jo pak shqetësim në radhët e drejtuesve të Vllaznisë. Këta të fundit kishin dërguar përfaqësuesit e tyre për ta pritur në aeroport, siç kishte njoftuar vetë lojtari se do të zbriste në orën 23:00 të së martës, por ata kanë pritur më kot për më tepër se dy orë dhe afrikani nuk është dukur asgjëkundi. Një gjë e tillë ka sjellë shqetësim edhe te tifozët e kësaj skuadre, të cilëve nuk u pëlqejnë aspak të tilla lëvizje, duke deklaruar se më mirë do të ishte që një lojtar i tillë të mos bëhej pjesë e skuadrës. Përderisa ai nuk është korrekt të paktën në paraqitjen e tij, kjo tregon se në radhë të parë sulmuesi që ka luajtuar me Dinamon nuk është profesionist. I shqetësuar bëhet e ditur se ka qenë edhe trajneri Josa, i cili nuk e quan aspak të favorshme një vonesë të tillë të blerjes më të rëndësishme të Vllaznisë në merkaton e janarit. Megjithatë, një lajm tjetër i gëzuar vjen nga kampi kuqeblu. Trajneri Mirel Josa ka mbetur i kënaqur nga paraqitja e kosovarit Xhelal Miroçi gjatë provës dhe i ka dhënë atij "ok"-in. Tashmë fjala i mbetet presidentit Fushaj, për të arritur akordin financiar me futbollistin në fjalë. Skuadra tashmë po shkon drejt fundit të javës së dytë të përgatitores dhe e ka marrë njëfarë forme. Ndërkohë, Gudjabi, edhe nëse do të vinte sot, do t'i duhej njëfarë kohe për të kapur formën. Ditët në të vërtetë kalojnë dhe çdo vonesë nuk është në të mirë të skuadrës, e cila në ditët e para të shkurtit do të jetë e detyruar të paraqesë më të mirën e saj në fushë, nisur edhe nga kalendari i vështirë që ka me rinisjen e ndeshjeve, teksa do të ketë dy ndeshje në transfertë, fillimisht me Flamurtarin dhe më pas me Dinamon. Mosardhja e Gudjabit në Shqipëri në radhë të parë nuk është një minus për Vllazninë. Ai është një minus i madh për futbollin shqiptar, sepse Gudjabi nuk është i vetmi që vepron ashtu. Shumë nga të huajt që kanë luajtur në kampionatin tonë, nuk kanë qenë asnjëherë korrektë me ardhjet dhe largimet e tyre. Në të vërtetë, ata paguhen shumë ndoshta më tepër sesa e meritojnë. Dhe të presësh kaq shumë dhe të prishësh planet që ke bërë, sepse një lojtari i teket të shtyjë për disa ditë pushimet dhe të mos vijë për të zhvilluar fazën përgatitore, sepse është e lodhshme, kjo është e padurueshme. Pa lënë më pas edhe veprimet e tjera të këtyre të huajve, që shpeshherë kanë futur në sherr ekipet tona, ngaqë këta lojtarë u premtonin besnikëri njëherazi disa klubeve. Madje kështu është duke ndodhur edhe me Gudjabin, ku merret vesh se atë e pret edhe Besa për ta pasur në radhët e veta, ndërkohë që Dinamo vazhdon të këmbëngulë se lojtari është i saj deri në korrik të këtij viti. Presidenti i Vllaznisë, Valter Fushaj, ndërkohë, me idenë e mirë për ta fuqizuar skuadrën e tij, përveçse pati firmosur një parakontratë me senegalezin, i pati dhënë atij "kesh" në dorë edhe 5 mijë euro. Shpërblimi është ky: në fillim afrikani thotë se do të vijë më 7 janar, më pas më 9 dhe së fundi më 16 janar. Deri mbrëmë ai nuk ka ardhur dhe kësisoj gjërat nuk janë aspak mirë.

[wxz]

Prania e madhe e ekipeve të vendit tonë "frymëzoi" shumë drejtues që superliga të zhvillohej në qytetin e Ulqinit.


Kush do ta kishte menduar që një qytet i vogël bregdetar jashtë Shqipërisë do të priste kaq shumë ekipe futbolli të vendit tonë? Por ja që gjendesh në mesin e janarit dhe sheh që shtatë ekipe, pesë të superligës dhe dy të kategorisë së parë, pa harruar që pritet të udhëtojë edhe Turbina, stërviten pranë njëri tjetrit, sikur aty do të zhvillohej ndonjë kompeticion i përmasave të mëdha. 7 8 km larg qytetit të Ulqinit gjendet një rezidencë, ku terrenet e shumta sportive bëjnë të mundur edhe stërvitjen e ekipeve të futbollit.
7 ekipe në një hotelin "Olimpik"
Teuta, Partizani, Flamurtari, Lushnja dhe Besëlidhja qëndrojnë në një hotel, pa harruar që në këtë hotel janë edhe dy ekipe serbe, Hajduku i Kulës dhe një ekip të rinjsh. Hotel "Olimpiku", ku janë të akomoduara këto ekipe, është ndërtuar që në kohën e Titos dhe akoma nuk është privatizuar, duke pasur disa drejtorë dhe ku burokracia vihet re shumë në këto raste. Hoteli është i një kapaciteti të madh, por duke pasur një fluks të tillë në dimër (hoteli më shumë është për sezonin e verës), natyrisht që lindin probleme. Dy restorantet në kohën e ngrënies, natyrisht që sforcohen shumë, pasi u duhet të shërbejnë për të paktën 200 veta njëherësh. Nga pjata e parë deri tek e fundit duhet të presësh dhe shumica e futbollistëve ankohen për cilësinë dhe sasinë e ushqimit. Por nuk janë vetëm futbollistët që ankohen, por edhe mjekët dhe drejtuesit e skuadrave. Duke qenë hotel i vjetër, aty ndodhet vetëm një bar kafe dhe asnjë gjë tjetër për t'u argëtuar dhe futbollistët pas ngrënies vrapojnë drejt dhomave të tyre, ku duhet thënë se ngushtësia bën të vetën. Flitej për një rikonstruksion, për një kondicioner dhe një frigorifer, pasi kaloriferët kanë qenë, nuk mund të quhen kushte, pasi ata më shumë shërbenin për në verë. Thuhet që ka pishinë, sauna dhe sallë force. Pishina është me ujin akull, për saunën duhet të presësh gjatë, ndërsa salla e forcës lë shumë për të dëshiruar. Duke parë këtë amulli, trajnerët e ekipeve shpesh flisnin për disiplinë dhe rregull, ku duhet thënë se Starova me të tijtë ishin shembull, por edhe Partizani nuk mbetej shumë prapa. Megjithatë, ishte e pamundur që të kishte qetësi, pasi gallatat nëpër dhoma zgjasnin deri vonë.

[wxz]

Hotel "Imperiali", diçka më mirë
Në këtë hotel janë akomoduar Besa dhe Luftëtari, por edhe dy ekipe vendëse atletike, por të paktë në numër. Kushtet janë më të mira, pasi hoteli është më i ri dhe ndodhet disi më larg zonës së banuar. Por nëse dy ekipet zbrisnin njëherësh, aty fillonte amullia, pasi ngushtësia e korridorit, batutat e futbollistëve dhe përshëndetjet e tyre bënin që serioziteti të binte. Restoranti është më i vogël, sa nuk i zë njëherësh të gjithë, por të paktën këtu ushqimi ishte më i mirë. Të gjitha këto të mira që kishte hotel "Imperiali" kompesoheshin kur binte fjala për daljen në stërvitje, pasi duhej të shkonin te terrenet e "Olimpikut", që ishte 3 4 km më larg dhe vetëm ngjitja dhe zbritja nga autobusët të lodhte.

[wxz]

Terrenet sportive, kushte mesatare
Janë katër fusha stërvitore, përfshi edhe stadiumin, një stadium me kushte mesatare. Në krahasim me kushtet e vitit të kaluar, fushat ishin përmirësuar dhe u qëndrohej në kokë çdo ditë për nivelim. Ekipet i kishin ndarë fushat, por duke qenë se nuk ishin parashikuar kaq shumë ekipe, qëllonte që ekipet stërviteshin me orar dhe nxehja bëhej në pishat pranë hotelit, ku hapësirat janë të shumta. Miqësoret zhvillohen në stadium dhe shpesh gjykohen nga vendës, duke pasur seriozitet. Klima e Ulqinit gjatë janarit është e thatë, pasi zakonisht fryn erë gjatë gjithë ditë. Por këtë vit duhet thënë që futbollistët shqiptarë kanë qenë me fat, pasi koha ka qenë e mrekullueshme. Era fillonte pasdite dhe nuk ishte e fortë dhe e ftohtë. Në këtë aspekt, mjafton një ulje e temperaturave dhe te futbollistët do të vëreheshin simptoma të gripit, ashtu si vitin e kaluar, kur shumë lojtarë kishin temperaturë.

[wxz]

Vasil Ruci intrigon drejtuesit serbë
Ndërsa në Shqipëri luten për të rënë ca pika shiu, për të sjellë dritat, këtu në Ulqin pjesëtarët e ekipit të Flamurtarit thonë që shyqyr që edhe koha ka qenë e mirë për t'u stërvitur. Një paradoks, por që drejtuesit e ekipit vlonjat kërkojnë ta shfrytëzojnë në maksimum. Në stërvitjen e paradites së djeshme mungonte trajneri Vasil Ruci, por ai kishte një arsye. Ruci ishte ulur me drejtuesit e ekipit serb të Hajdukut të Kulës. Siç duket, drejtuesit e Hajdukut të Kulës e mbanin mend mirë Rucin, kur ai së bashku me brezin e artë të vlonjatëve trondisnin Partizanin e Beogradit, me shumë famë në atë kohë. Nga ky takim është rënë dakord për zhvillimin e një ndeshjeje miqësore, e cila do të luhet të dielën. Me sa kuptohet, vlonjatët nuk duan të ndeshen me një ndër ekipet e tjera të superligës, me idenë se me ata do të përballen në garën e kampionatit. Flamurtarit iu bashkua edhe Bokatola dhe tashmë priten vetëm Delain dhe Roxher. Ky i fundit, sipas drejtuesve vlonjatë, nuk është përjashtuar. Ai do t'i bashkohet së shpejti ekipit, ndoshta edhe pas fazës përgatitore. Një gjë bie menjëherë në sy tek ekipi vlonjat: stafi i drejtuesve është i kompletuar, madje edhe fizioterapisti qëndronte në këmbë, pa harruar përgatitësin atletik, që këshillohej shpesh me zëvendëstrajnerin. Në stërvitje binin në sy edhe dy futbollistët kosovarë të ardhur së fundi, Hashani dhe Kyçyku. Portieri Kyçyku kishte një trup të gjatë dhe elegant, ndaj bënte kontrast me lojtarët e tjerë kuqezinj. Për të dy këta futbollistë përgjigjja do të jepet vetëm në fund të fazës përgatitore, për të mos marrë vendimin e gabuar. Me ardhjen e dy lojtarëve në fjalë, nga sa vërehej, përfundon dhe merkatoja e janarit për Flamurtarin, shumë modest në objektivat e këtij sezoni, për kapjen e një vendi sa më të mirë, pasi qëndrimi në superligë për vlonjatët është një fakt i kryer.

[wxz]

Ketu Ju Mundeni Te Vendosni Hapni Tema Rreth Sportit Shqipetare Edhe Gjithashtu Nese Nje Teme Egziston Athere Mos Hapni Me Tema Te Reja Thjesht Lajmi Qe Ju Keni Postojeni Ne Ate Teme Ju Lajmerojm Te Gjithve Ju Lutem Mos Hapni Tema Rreth Sportit Te Huaj Sepse Do Fshihen Automatikisht Nga Stafi i Forumit Kalofshit Sa Me Mire Ne Kete Forum Edhe Ju Flm Per Viziten Tuaj Me Respekte i Gjithe Stafi I Forumit WwW.MalesiaForum.CoM !!!

[wxz]

Një futbollist nga Kosova i është bashkuar grupit që stërvit trajneri Sejdini. Naim Berisha vjen nga qyteti i Prishtinës me dëshirën për t'u veshur bardhekaltër e për të qenë pjesë e kampionatit tonë, duke afirmuar njëherazi vlerat e tij sportive. Futbollisti që akoma nuk i ka mbushur 20 vjeç është aktivizuar rregullisht me ekipin Shpresa të Kosovës dhe vjen nga ekipi Flamurtari i kryeqytetit kosovar. Ndërkohë, seanca e djeshme e Shkumbinit ka qenë relativisht e lehtë, krahasuar me të tjerat. Por dje Sejdini ka planifikuar vrapime në pyllin me pisha pranë kompleksit të klubit, të shoqëruara me ushtrime çlodhëse. U zgjodh kjo formë stërvitjeje relaksuese për faktin se një ditë më parë ekipi zhvilloi miqësoren me Dinamon në Tiranë, që ishte e dyta për të brenda 5 ditësh. Në këtë miqësore ekipi i Sejdinit humbi thellë 5 1, por megjithatë për "Xhaxhin" rezultati nuk është edhe aq shqetësues nisur nga fakti se futbollistët për momentin janë në kulmin e ngarkesës fizike. Sejdini pohon se një ditë më parë futbollistët kanë qenë të detyruar të përballojnë një ngarkesë të lartë në stërvitje dhe kjo sigurisht që do të reflektohej në miqësore. "Miqësorja mbetet miqësore dhe na shërben si ne, ashtu edhe Dinamos. Nuk më intereson shumë rezultati në këtë takim, sepse ndryshe nuk zgjidhja Dinamon, por një ekip tjetër më të lehtë. Deri në njëfarë mase, në pjesën më të madhe të lojës jam pak a shumë i kënaqur me atë që treguan futbollistët në fushë. Duhet pranuar se Dinamo ka më tepër kontigjent, ashtu siç duhet pranuar se futbollistët vinin pas një dite kur zhvilluan një stërvitje me ngarkesë të madhe fizike dhe kjo patjetër do të reflektohej në fushë," shprehet Sejdini, duke dashur të bëjë konkluzionet e kësaj miqësoreje të bukur. Ndërkohë që vazhdon të stërvisë grupin e të zhvillojë takime miqësore, "Xhaxhit" i duhet të vëzhgojë nga afër edhe futbollistët që kanë ardhur për t'u provuar te Shkumbini, për të parë sesa janë të vlefshëm për ekipin. Edhe pse e lodhshme për Sejdinin, ai kërkon të veçojë më të përgatiturit, ata që merren se i duhen ekipit për të ardhmen.

[wxz]

Strikt dhe i pasionuar pas punës së tij, trajneri i ekipit të Luftëtarit, Ilir Spahiu, nuk është i kënaqur me vendin aktual që ka skuadra gjirokastrite, edhe pse misionin e saj e ka kryer më së miri deri tani, duke qëndruar në superligë. Spahiu shpjegon se përse ekipi gjirokastrit nuk është i kënaqur me këtë ecuri dhe punën që do të bëhet në përgatitoren e Ulqinit për t'i shërbyer sa më mirë ecurisë në kampionat, kompeticioni i vetëm ku luan Luftëtari. "Mbërritëm disi të lodhur në Ulqin, kjo edhe për shkak të ndeshjeve miqësore që zhvilluam rresht, atë me Bylisin në Ballsh dhe me Kastriotin në Kamëz. Edhe në ditët e para të stërvitjes djemtë dukeshin pak të lodhur dhe unë nuk i ngarkova me shumë ushtrime. Dalëngadalë do të hyjmë në fazën më interesante të stërvitjes, duke marrë ngarkesat e duhura," shprehet trajneri Spahiu. Në ndeshjen e fundit miqësore të zhvilluar në Kamëz trajneri Spahiu ka pasur mundësinë të vëzhgonte edhe një sulmues afrikan, por që nuk mund të jepte një vendim të shpejtë, pasi të paktën duheshin edhe dy ndeshje të tjera miqësore. "Donatori Delijorgji solli për të provuar një sulmues afrikan dhe, me thënë të drejtën, ai ishte mjaft i lëvizshëm dhe kishte të dhëna, por duke qenë se ai kushtonte, nuk mund të merrja një vendim të shpejtë, pasi në të kundërt më duhet të mbaj përgjegjësi, kështu që vendosa që kur të kthehemi ta shoh edhe një herë, pasi ai nuk mund të vinte me ne në Ulqin. Ndërkohë, Delijorgji më ka premtuar se do të vijë së shpejti edhe një brazilian me pasaportë franceze dhe një afrikan, të dy me tipare sulmuese, pasi në këtë repart ne kemi nevojë më shumë. Shpresoj që këto lëvizje të bëhen shpejt, sepse nuk ka shumë kohë në dispozicion," shton numri një i stolit gjirokastrit. Spahiu thotë se mënyra më e mirë për të matur forcat janë ndeshjet miqësore. "Sapo kemi ardhur dhe këto ditë do të takoj drejtuesit e ekipeve të tjera për të zhvilluar ndonjë miqësore. Në hotelin tonë është vetëm Besa, por me kavajasit nuk mund të ndeshemi, pasi kemi ndeshjen e parë në kampionat me ta. Luftëtari nuk është modest në pretendimet e tij. Ne vërtet mund të jemi të sigurt, por kjo nuk do të thotë se do të qëndrojmë në vend, pasi një nënvlerësim dhe mund ta pësosh. Përkundrazi, ekipi ynë do të kërkojë të ngjitet sa më shumë në renditje. Në ndeshjen e parë me Besën do të ishim të kënaqur edhe me një pikë, duke parë që ndeshja është në transfertë dhe kundërshtari është poshtë nesh në renditje," përfundon trajneri i Luftëtarit, Ilir Spahiu.

[wxz]

Futbolli maqedonas, edhe pse përjeton probleme, mendon për miqësoren me kuqezinjtë.


Drejtuesit e futbollit maqedonas kanë pohuar se asgjë nuk do të prishë planet e tyre për miqësoren e 7 shkurtit me komëtaren shqiptare. Madje ata janë shprehur se kombëtarja e vendit të tyre është duke i përfunduar përgatitjet për këtë ndeshje.
Federata Maqedonase e Futbollit (FMF) këto ditë është goditur nga një krizë, pas një lajmi mbi një skandal financiar, i cili nuk i ka shpëtuar medias së shkruar. Fjala është se policia e Shkupit ka marrë të martën në pyetje për 10 orë sekretarin e përgjithshëm të FMF së, Llazar Mitrevski, i cili akuzohet se ka falsifikuar diplomën e tij nga Universiteti i Sarajevës. "Rreth ndeshjes me Shqipërinë gjithçka do të jetë në rregull. Trajneri Sreçko Katanec do t'i bëjë përgatitjet e nevojshme për këtë miqësore dhe së shpejti pritet që të caktohet zyrtarisht edhe udhëtimi i kombëtares sonë dhe i gazetarëve drejt Shqipërisë",- thotë sekretari i FMF-së, Mitrevski. Trajneri i Maqedonisë, slloveni Katanec nuk do të udhëtojë për në Shkup për t'u konsultuar rreth miqësores me Shqipërinë. Ai pritet të vendoset në një nga hotelet më të njohura të Tiranës, ku do të presë t'i bashkohet stafi dhe lojtarëve maqedonas. Në Tiranë, më 3-4 shkurt, do të grumbullohen të gjithë futbollistët maqedonas që luajnë në skuadra të huaja.
"Katanec do të shkojë direkt në Tiranë, ku do të bëjë përgatitjet e nevojshme për ndeshjen me Shqipërinë. Jemi në bisedime edhe për
vendosjen e futbollistëve në ndonjë nga hotelet e Tiranës, pasi kemi informata se në hotelin "Adriatik" në Durrës do të vendosen
futbollistët e Shqipërisë",- të thotë sekretari i FFM së, Llazar Mitrevski. Trajneri Sreçko Katanec ka thënë se turbullira në futbollin maqedonas mund të ndikojnë në psikikën e lojtarëve, por deri në takimin me Shqipërinë, gjithçka do të jetë në rregull.
Lista e lojtarëve të ftuar në kombëtaren e Maqedonisë për miqësoren e 7 shkurtit ndaj Shqipërisë do të mësohet të martën, një ditë pasi të mbahet Këshilli Drejtues i FFM së. Jo zyrtarisht mësohet se nga futbollistët me etni shqiptare në kombëtaren e vendit fqinj mund të ftohen pesë lojtarë, bëhet fjalë për Artim Shaqirin, Artim Pollozhanin, Ismail Ismailin, Nderim Nexhipin dhe Vullnet Eminin.

[wxz]

Pritej ardhja në Tiranë e trajnerit të kombëtares Oto Bariç, që të shpallesh lista e lojtarëve që do të grumbullohen në Antalia. "Zbori" i rradhës i kombëtares do të zhvillohet nga data 20 deri më 29 janar. Në listë që shpalli trajneri Bariç bie në sy disa emra të rinj, të cilët kanë spikatur kohët e fundit në kampionatin shqiptar. Nga lojtarët që luajnë jashtë do të marrin pjesë vetëm Dallku, Curri, Aliaj, Dedej, Neziraj dhe Hasani. Në këtë listë është edhe sulmuesi i Bran Bregen, Migen Memelli. Gjithashtu, prurjet më të rej janë Elis Bakaj dhe Xhevahir Sukaj, të cilët ishin autor të golave në takimin miqësor të kombëtares Shpresa përballë Turqisë. Nga ekipet e kampionatit shqiptar, më shumë lojtarë të thirur, ka nga skuadra e Tiranës, shtatë të tillë. Ndërkohë, akomodimi i kombëtares në Antalia, do të bëhet në Hotel Limak Limar, ku është edhe ekipi i Tiranës. Sipas informacioneve nga FSHF-ja, nuk përjashtohet mundësia që të grumbulluarit e Bariçit, të zhvillojnë një takim miqësor me Tiranën. Nisja për në Antalia të Turqisë, do të bëhet nesër.
Lista e lojtarëve të grumbulluar
Isli Hidi, Ilion Lika, Arion Mustafa, Armir Teli, Nevil Dede, Endri Vrapi, Armend Dallku, Anton Dedej, Adrian Aliaj, Shpëtim Hasani, Leutrim Neziraj, Debatik Curri, Erion Xhafa, Julian Ahmataj, Ervin Bulku, Jahmir Hyka, Gjergji Muzaka, Migen Memelli, Elis Bakaj, Sabino Plaku, Xhevahir Sukaj, Devi Muka, Klodian Duro, Vioresin Sinani, Oriand Abazaj.

[wxz]

Menaxheri dhe babai i sulmuesit 22-vjeçar, Maksi Abazaj, zbulon detaje nga bisedat me presidentin Zhilli.

Nuk ka dyshim se kalimi i Oriand Abazajt nga Kastriotit te Tirana, është kthyer tashmë në telenovelën më të fundit për kampionatin shqiptar. Edhe pse drejtuesit krutanë e kanë humbur çështjen në komisionin e disiplinës, vazhdojnë të pretendojnë se sulmuesi 22-vjeçar është pjesë e skuadrës. Madje, presidenti Shkëlzen Zhilli vazhdon të kërcënojë se çështjen e ka çuar si në komisionin e apelit, ashtu dhe në gjykatën civile. Pavarësisht gjithë këtyre problemeve, lojtari në fjalë prej dy ditësh është bashkuar në stërvitje me Tiranën, ndërkohë që me problematikën në fjalë, po merret menaxheri dhe gjithashtu babai i tij, Maksi Abazaj. Për "Sportin shqiptar", ai pranon të zbulojë detaje nga çështja e shumëpërfolur e djalit të tij. "Nuk e kisha menduar që largimi i Oriandit nga Kastrioti do të bënte gjithë këtë zhurmë sa në federatë, por edhe në media. Duke pasur parasysh se në duar kisha një kontratë të rregullt, që në pikat e saj sqaron shumë mirë çdo detaj për sa u takon detyrimeve të të dyja palëve, mendoja se gjithçka do të zgjidhej në konsensus të plotë. Por ja që nuk ishte e thënë të ndodhte kështu dhe tashmë unë, si menaxher dhe babai i futbollistit, ua kam lënë në duar komisioneve juridike zgjidhjen e këtij problemi. Komisioni i apelit, i mbledhur ditën e shtunë, na dha ne plotësisht të drejtë, duke e nxjerrë futbollist të lirë Oriand Abazajn, në bazë të pikës 4, ku thuhet qartë se ai është i lirë të largohet gjatë muajit janar 2007, në qoftë se largohet trajneri i ekipit Ramadan Ndreu. Përveç kësaj, Oriandi nuk është paguar për rrogën e dhjetorit, kështu që automatikisht ai ka dalë i lirë,"- shprehet Maksi Abazaj. Në deklarimin e tij për gazetën, menaxheri Maksi Abazaj nuk ngurron të bëjë të ditur edhe disa detaje bisedash të konsumuara me presidentin Shkëlzen Zhilli. Sipas tij, nuk bëhet fjalë që Oriand Abazaj të konsiderohej lojtar i rëndësishëm për skuadrën, por çdo gjë lidhej me çështje pazaresh. "Meqenëse po më jepet mundësia të flas nëpërmjet gazetës suaj, dua të them se në takimin e parë që pata me presidentin Zhilli, ai nuk pranoi absolutisht ta lejonte Abazajn të largohej. I shkova sërish për herë të dytë në Krujë dhe këtë herë, pasi ishte i informuar që po e kërkonte ekipi i Tiranës, më tha shprehimisht: "Dua 40 mijë euro nga donatorët". Edhe këtë herë nuk ramë dakord, ndërkohë që në takimin e tretë, pasi kishte biseduar me presidentin e Vllaznisë, Valter Fushaj, më tha që ishte i gatshëm ta lëshonte drejt Shkodrës, duke i ndarë lekët përgjysmë. I ndodhur në këtë situatë aspak normale, ku djali im shihej si një mall tregu nga ky president, vendosa që ai të mos stërvitej më në Krujë dhe me këtë problem të merrej vetë komisioni i disiplinës. Siç dihet tashmë, ky komision na ka dhënë të drejtë, kështu që ne vazhdojmë ta presim me qetësi edhe komisionin e apelit. Ajo që doja të bëja të ditur për sportdashësit krutanë, ka të bëjë me atë që ne vazhdojmë të ruajmë konsideratat më të mira, sepse në këto muaj që Abazaj u aktivizua, pati mbështetjen e të gjithëve. Ne nuk u larguam nga Kastrioti për çështje lekësh, por sepse na kërkoi bashkëpunimin një klub i madh si Tirana, ku çdo lojtar do të kishte dëshirë të ishte pjesë përbërëse. Një skuadër si Tirana të jep mundësinë të formohesh si futbollist, të luash në arenën europiane dhe më pas të pretendosh ekipin kombëtar,"- përfundon Maksi Abazaj.

[wxz]

Superliga Shqipetare Sa Vjen Edhe Ul Nivelin E Saj Pasi Shume Nga Ndeshej Qe Luhen Manipulohen Dmth Sot Nuk Lozin Ekipet Por Loz (Leku & Euro) Football.!

[wxz]

Mbrojtësi tiranas i verdhebluve thotë se pas përforcimeve dhe fazës përgatitore ekipi do të jetë ndryshe.


Elbasani vazhdon përgatitjet në Malin e Zi, ku futbollistët kampionë çdo ditë zhvillojnë dy seance stërvitore në ditë. Ndërkohë që nuk ka asnjë ndryshim nga grupi i futbollistëve që nisën fazën përgatitore. Ndonëse drejtuesit verdheblu janë shprehur se do të vazhdojnë merkaton, deri tani në kampin e Elbasanit nuk ka pasur ndonjë ardhje të re. Ndërkohë, një nga futbollistët titullarë të Elbasanit, tiranasi Elvis Sina, në një prononcim për "Sportin shqiptar", është shprehur se ndihet tepër mirë në akomodimin e Elbasanit në Hercegnovi. Sina thekson se deri tani ekipi i tij po ecën mirë dhe ka hedhur poshtë në mënyrë kategorike zërat që e shohin atë në një skuadër tjetër. "Në gazeta kam lexuar se do të shkoj te Shkodra, apo ku ta di unë në ekipe të tjera. Unë kam një kontratë me Elbasanin dhe do ta vazhdoj ta respektoj këtë marrëveshje. Deri tani drejtuesit e Elbasanit janë sjellë shumë korrektë me mua, kështu që nuk ka arsye pse të largohem, apo të mendoj "divorcin" nga Elbasani," shprehet Elvis Sina. Gjithsesi, për momentin kampionët janë të fokusuar vetëm në stërvitje dhe duket se merkaton e kanë lënë në dorën e dytë. Vetëm ardhja e Tikos mund të thuhet deri tani, ndonëse drejtuesit premtojnë se shumë shpejt do të vijnë edhe dy futbollistë të tjerë, një sulmues dhe një mbrojtës. Sina shton se Elbasani deri diku është i kompletuar, ndonëse nuk e fsheh dëshirën për të pasur sa më shumë futbollistë cilësorë në ekipin ku luan. "Kemi ndryshuar dhe po ecim në rrugën e duhur, pasi nuk jemi si në gjysmën e parë të kampionatit, ku kishim disa mangësi, pasi s'kishim futbollistë që të bënin diferencën, por këtë më mirë do ta tregojnë ndeshjet e kampionatit dhe që në takimin e parë në shkurt na pret në fushën tonë një përballje tepër e fortë, si ajo ndaj Partizanit," thekson mbrojtësi i verdhebluve. Ndërkohë që në rezidencën e Elbasanit janë akomoduar edhe dy ekipe të tjera, vetë Sina shton se nuk përjashtohet mundësia për zhvillimin e ndonjë ndeshjeje miqësore me këta dy ekipe, teksa thotë: "Normale që në të tilla raste miqësoret janë tepër të domosdoshme. Mendoj sesa më shumë takime miqësore të zhvillojmë, aq më shumë kemi për të përmirësuar. Elbasani nuk ka nevojë vetëm për stërvitje, por edhe për ndeshje, kështu që do të mundohemi t'i shfrytëzojmë në maksimum këto mundësi, pasi edhe një javë do të qëndrojmë këtu dhe më pas, në javën e fundit, do të stërvitemi në Elbasan." Elvis Sina shpreh edhe dëshirën për t'u shpallur kampion, pavarësisht se është shumë e vështirë. Përderisa pranova të jem pjesë e Elbasanit, sigurisht që e kisha menduar fitimin e titullit, kështu që ne do të luftojmë për të fituar diçka. Edhe pse jemi larg nga vendi i parë, kjo nuk do të thotë që mundësitë për t'u shpallur sërish kampion janë të ndaluara, përkundrazi, kemi shanse të mëdha me përforcimet që kemi bërë gjatë merkatos së dimrit," përfundon mbrojtësi i Elbasanit.

[wxz]

Kampionët, stërvitje edhe në palestër
Elbasani ka vijuar normalisht stërvitjen edhe gjatë ditës së djeshme. Kampionët kanë zhvilluar stërvitjen e paradites në palestër, ndërsa pasdite i janë drejtuar fushës sportive. Në ndryshim me kushtet e Ulqinit, Në Hercegnovi kushtet janë shumë më të mira dhe nuk ka amulli, pasi vetëm tri ekipe po stërviten aktualisht. Siç duket, presidenti Laze ka menduar të shpenzojë pak më shumë, por stërvitja të jetë në kushte optimale dhe pa shqetësime.

[wxz]

Dinamo është pranë një futbollisti të Hajdukut të Splitit, i cili luan si mbrojtës i djathtë dhe libero.


Dinamo vijon me intensitet përgatitjet në kompleksin e klubit, ndërkohë që nuk harron edhe merkaton e dimrit. Pasi ka përforcuar repartin më problematik të saj, me shqiptaro-maqedonasin Nuhiu dhe beratasin Mile, tashmë është reparti i mbrojtjes që ka probleme. Mungesa e lojtarëve të mirëfilltë në këtë rol e ka detyruar trajnerin-lojtar Jupi të eksperimentojë me lojtarë të reparteve të tjera, duke i përshtatur si mbrojtës. Sidoqoftë, kjo është një zgjedhje e sforcuar dhe nuk jep shumë garanci, prandaj drejtuesit e lartë të Dinamos janë futur në merkato sërish, me synim të qartë, afrimin e ndonjë mbrojtësi tjetër. Sikurse duket, preferencat e dinamovitëve për lojtarë të huaj kanë qenë nga më të ndryshmet, por këto kohët e fundit kroatët e kanë zgjeruar diapazonin e tyre. Kroatët tek Dinamo kanë qenë prezentë jo vetëm si futbollistë, por edhe si trajnerë. Madje blutë kanë marrëdhënie të mira me ata, që tashmë nuk janë në gjirin e Dinamos dhe po bashkëpunojnë midis tyre edhe në plane të tjera, si për shembull me gjetje dhe rekomandime lojtarësh për skuadrën dinamovite. Me sa duket, reparti difensiv i bluve pritet që të përforcohet me kroatë dhe, sipas drejtuesve të ekipit, pranë Dinamos është shumë pranë një futbollist i Hajdukut të Splitit, i cili luan si mbrojtës i djathtë dhe libero. Nuk deklarohet, por merret vesh se "shkesi" i kësaj transfertë do të jetë Luka Bonaçiç, i cili e ka drejtuar në të shkuarën ekipin dinamovit dhe lidhja e presidencës blu me të mbetet e ngushtë. Drejtuesit blu shpresojnë se, duke filluar nga java që vjen, edhe mbrojtja e Dinamos do ta marrë trajtën e plotë dhe stafi teknik të mos ketë asnjë mangësi në organikë. Në këtë mënyrë, organika e skuadrës blu do të jetë e duhura, duke i dhënë mundësi trajnerit Jupi të ketë më shumë mundësi zgjedhjeje dhe të realizojë objektivin, pjesëmarrjen në kupat e Europës.

[wxz]

Nga kampi dinamovit
- Dinamo ka zhvilluar dje vetëm një seancë stërvitore, por grupi i lojtarëve ka qenë i ndarë në dy pjesë. Senjorët janë përgatitur në fushën e zezë, ndërsa të rinjtë janë përgatitur në sallën e forcës.
- Artion Poçi, mesfushori i Dinamos, dje ka kryer një përgatitje të diferencuar, pasi në ndeshjen me Shkumbinin ka marrë një dëmtim të lehtë në këmbë. Kështu që mjeku Asllan Kasa e ka caktuar dinamovitin të kryeje vetëm disa vrapime dhe ushtrime të lehta.
- Papa Diop ka qenë dje i vetmi lojtar i Dinamos që ka kryer dy seanca stërvitore. Duke ditur që senegalezi është prapa me përgatitjet, paradite Diop është stërvitur me trajnerin Artan Mergjyshi, ndërsa pasdite është përgatitur me grupin e të rinjve.
- Nertil Ferraj, njëri nga dinamovitët që ishte i grumbulluar me ekipin Shpresa, të cilët fituan ndaj Turqisë me rezultatin 2-0, dje është përgatitur së bashku me blutë e tjerë. Pra, dje Ferraj ka përfunduar nga Turqia në kompleksin "Dinamo". Ndërsa mesfushori tjetër, Ilirian Çaushaj, dje nuk ka qenë prezent me skuadrën, pasi në ndeshjen që ka zhvilluar me kombëtaren U-21 ka marrë një dëmtim të lehtë.
- Ilion Lika dhe Erion Xhafa janë dy nga dinamovitët që janë përfshirë në listën e ekipit kombëtar të drejtuar nga trajneri kroat, Oto Bariç. Të dy dinamovitët do të mungojnë dhjetë ditë në skuadër dhe do të jenë të gatshëm për trajnerin Jupi vetëm pak ditë përpara ndeshjes me Kastriotin.

[wxz]

Të kuqtë edhe në këtë sezon mbeten larg mundësive për fitimin e titullit kampion.


Në përfundim të javës së 17-të të kampionatit, Partizani e sheh veten 10 pikë larg vendit të parë, Tiranës, që ndryshe nga vjet komandon e vetme kreun. Diferenca e thellë e krijuar thuajse ka shuar çdo shpresë për titullin kampion. Skuadra e drejtuar prej gati 8 vjetësh nga presidenti Xhani vazhdon të mos jetë në nivelet e kërkuara, ndonëse paratë e hedhura janë të konsiderueshme. Vështirësitë e hasura gjatë pjesës së parë të këtij sezoni janë të shumta, që nga krijimi i grupit, fazës së mekët përgatitore të muajit gusht dhe te përforcimet, që sado të shumta në numër, nuk ishin aq cilësore për ta përballuar bluzën e kuqe. Fillimi i sezonit 2006-2007 nuk mund të ndahet nga fundit i 2005-2006-ës. Pas një viti bashkëpunimi me Pirro Angjelin, presidenti Xhani detyrohet t'i përballojë përsëri i vetëm shpenzimet dhe vështirësitë e para vijnë që me formimin e grupit fillestar. Vështirësitë financiare të fillimsezonit kushtëzuan blerjet e merkatos së verës dhe zhvillimin e një faze përgatitore normale. Vetëm pak ditë para fillimit të përgatitjeve për këtë sezon, presidenti Xhani mezi arrin të gjejë trajnerin e ri, Neptun Bajkon, që pikërisht vetëm një vit më parë ishte shkarkuar nga njëshi i klubit të kuq për lojëra të dobëta. "Dashuria" e vjetër kthehet sërish, duke i bërë skeptikë tifozët e shumtë të Partizanit. Pas një periudhe më shumë se dyjavore, në kërkim të talenteve të reja (gjatë dy javëve të dyta të muajit korrik janë provuar nga Bajko një numër i madh lojtarësh të rinj, të ardhur nga të gjitha anët, me dëshirën e madhe për të veshur fanellën e kuqe) më në fund Xhani hap "thesin", duke i paguar lojtarët me këstin e parë të kontratave. Shumë lojtarë afrohen tek skuadra e Bajkos, por asnjëri prej tyre nuk është emër pikant si Vioresin Sinani, që pasi ka pritur e pritur ofertën e Xhanit, bën një zgjedhje me të mirë dhe sigurisht më të sigurt për veten, duke iu bashkuar Tiranës. Në të njëjtën kohë, në kuadër të largimit të futbollistëve pa "perspektivë", Allmuça dhe Gallo s'janë më pjesë e Partizanit. Vetëm në përfundim të fazës përgatitore të gushtit, që në fakt vetëm e tillë nuk mund të quhet, rikthehet edhe kapiteni Bylykbashi. Vjen edhe Kardek me Leandron, që zyrtarisht ishte i Vllaznisë, dhe skuadra bëhet gati për përballimin e një sezoni të tërë.
Fillimi i kampionatit, surprizues
Fillimi i Kampionatit të 68-të Kombëtar të Futbollit qe surprizues për tifozërinë e kuqe. Ajo skuadër që Bajko e kishte ndërtuar me aq mund, brenda 5 javësh arrin të marrë kreun e renditjes. Arma më e fortë e këtij Partizani janë ndeshjet në transfertë, ku të kuqtë kanë grumbulluar shumë pikë, duke mos i ngjarë aspak skuadrës së një sezoni më parë. Në këtë aspekt, Bajko ka korrigjuar shumë, por përsëri mbarëvajtjet e ndeshjeve dhe rezultateve cënohen nga një fenomen negativ, që janë pikët e lëna në "Qemal Stafa". Partizani në këto 17 javë të para të kampionatit nuk ka humbur asnjë ndeshje jashtë (këtu bën përjashtim humbja në derbi me Tiranën, e luajtur në "Qemal Stafa", ku Partizani ishte udhëtues), por përsëri renditet në vendin e katërt, shumë pikë poshtë Tiranës. "Tersi" i të kuqve këtë radhë janë ndeshjet brenda. Skuadrat rivale direkte si Vllaznia e Elbasani kanë arritur të marrin pikë me mjaft vlera në fushën e të kuqve, por Partizanit nuk mund t'i falet humbja shkatëruese me Flamurtarin dhe barazimi me Besën.
Momenti më i vështirë në kampin e kuq ka qenë shkarkimi i Bajkos, që u shoqërua me polemika të shumta mes dy drejtuesve më të lartë të skuadrës. Akuza dhe kundërakuza, mëri e mllef, dosje si të sigurimit të shtetit, gjithëka që hedh baltë mbi emrin e madh që mban kjo skuadër. Hasan Lika emërohet pasues i Neptun Bajkos dhe menjëherë has vështirësitë e para. Pika e fituar ndaj Dinamos, në premierën e tij si trajner i të kuqve, qe inkurajuese, por ajo do të pasohej me një barazim dhe një humbje po në "Qemal Stafa", duke ligjëruar kështu mendimin e Bajkos, se Partizani nuk ka kapacitete për të fituar titullin. Në ndeshjet e fundit gjatë muajit dhjetor, pati një rehabilitim në rezultatet e Partizanit të Likës, por përsëri të kuqtë mbeten larg objektivave të tyre historikë.

[wxz]

Lika: Jam pjesërisht i kënaqur me Partizanin
Hasan Lika është emëruar trajner i Partizanit në përfundim të javës së nëntë, teksa skuadra renditej në vendin e katërt, me 15 pikë të grumbulluara nga trajneri Bajko. Atëherë diferenca me Tiranën e vendit të parë ishte vetëm gjashtë pikë. Në përfundim të javës së 17-të, Partizani i Likës mban të njëjtin vend në tabelë, por ndryshimi vjen tek thellimi i diferencës me bardheblutë, të cilët kanë grumbulluar 10 pikë më shumë. Lika shprehet se është pjesërisht i kënaqur me ecurinë e skuadrës së tij, pasi rritje ka pasur vetëm në nivelin e lojës. "Që në fillim dua të theksoj se jam pjesërisht i kënaqur më atë që ka arritur skuadra që drejtoj. Kemi kaluar vështirësi të shumta gjatë kësaj periudhe, por kemi kaluar edhe momente të mira. Partizanit i mungojnë vetëm pikët e lëna në shtëpi, pasi jashtë jemi shfaqur në nivelin e duhur. Është punuar me seriozitet në stërvitje dhe dua të theksoj se të gjithë lojtarët janë munduar të japin më të mirën e tyre. Skuadra që në fillim të sezonit ka pasur një ecuri mjaft të mirë, por për arsye të ndryshme në ndeshjet e fundit para se ta merrja unë drejtimin, nuk po shkonte si duhet, çka u shfaq në disa rezultate jo të mira brenda. Ishte një moment i keq, një situatë jo e mirë psikologjike, e cila ndikoi edhe në disa ndeshje të tjera. Më pas, mund të them se gjithçka iu kthye normalitetit dhe skuadra krijoi stabilitet. Skuadra ka pasur rritje nga ndeshja në ndeshje, ka bërë volum të madh loje, por duhet të kishte shfrytëzuar më shumë rastet e krijuara. Në këtë drejtim duhet të punojmë edhe më shumë,"- shprehet trajneri i Partizanit.

[wxz]

Shpresat tek merkatoja e janarit
Ecuria e deritanishme në kampionat e skuadrës së kuqe, duke pasur parasysh organikën e saj, jep pak shanse për arritjen e objektivave. Vështirë se formacioni i Likës do të arrijë të rivalizojë Vllazninë, ELbasanin, Teutën dhe Tiranën kryesuese, të cilat kanë bërë një merkato më aktive. Drejtuesit e Partizanit kanë qenë të parët që kanë deklaruar në media se do të bëjnë një merkato cilësore, duke afruar vetëm ata elementë që arrijnë të bëjnë diferencën. Deri tani asnjë emër konkret nuk ka firmosur, për të mos thënë se që nga fillimi i sezonit "rrjedhjet" janë të shumta, ndërsa "prurjet" qëndrojnë në kuotën zero (Leandro dhe Kardek u "arratisën" pa lajmëruar askënd). Në kundërshtim me atë që drejtuesit e kuq kanë deklaruar në shtyp, tek Partizani po ndodh "eksodi" i titullarëve. Ndreka dhe Bylykbashi janë larguar prej gati një jave në Antalia, për t'u provuar tek Krivbas, skuadër e kampionatit ukrainas. Mësohet se të dy lojtarët në fjalë janë gati të hedhin firmën, për t'i thënë lamtumirë Partizanit. Megjithëse lajmet e merkatos kanë qenë më shumë dekurajuese për mbështetësit e kuq, ata përsëri shpresojnë se presidenti Xhani do të blejë disa lojtarë, të paktën për të zëvendësuar Ndrekën dhe Bylykbashin.

[wxz]

Orges Shehi, më shumë minuta në fushë
Portieri durrsak, Orges Shehi, është futbollisti që ka luajtur më shumë minuta gjatë këtyre 17 javëve. I ardhur sezonin e kaluar nga Vllaznia, Shehi nuk e ka diskutuar asnjëherë vendin e titullarit, që nga ndeshja e tij e parë zyrtare me bluzë e kuqe. Portieri mbetet arma më e fortë e formacionit të Likës, duke marrë vlerësimet më të mira nga pjesëtarët e stafit teknik. Shehi i ka nisur të gjitha takimet si titullar dhe nuk është zëvendësuar asnjëherë. Shehi është ulur në stol vetëm në ndeshjet e kupës, ku kualifikimi nuk vihej në rrezik. "Sikur të gjithë futbollistët të kishin impenjimin dhe seriozitetin e Shehit në stërvitje, Partizani do të kishte grumbulluar më shumë pikë," - është shprehur Bejkush Birçe, drejtori teknik i Partizanit.

[wxz]

Sulmi, në kuota nën mesataren
Reparti më pak i kuotuar gjatë pjesës së parë të sezonit është sulmi. Duke i hedhur një sy listës së golashënuesve të Partizanit, vihet re se Muzaka, edhe pse në vetëm pak ndeshje është aktivizuar si sulmues, renditet i pari me 4 gola. Më pas vijnë Dhëmbi, Leandro, Sokol Bulku, Abilaliaj etj. Nëse do të bëhej një krahasim, shumicën e golave e kanë shënuar futbollistët e mesfushës dhe të mbrojtjes. Nga 20 gola të shënuar, vetëm 6 mbajnë firmën e Abilaliajt, Progrit, Bylykbashit e Bakajt. Duke e konsideruar edhe Muzakën sulmues, përsëri gjysmën e golave e kanë realizuar futbollistët mbrojtës apo mesfushorë.

[wxz]

Zhvillime të shumta dhe disa prej tyre mund të konsiderohen surprizë tek ekipi i Gramshit. Në këtë mënyrë, drejtuesit më të lartë të ekipit, konkretisht presidenti Hyqmet Koçi, ka konfirmuar për "Sportin shqiptar" largimin e vëllezërve Bujar dhe Dashamir Muça, ndërkohë që në këtë linjë është dhe mbrojtësi Erald Isaku. E ndërsa për qendërmbrojtësin B.Muça dhe për Isakun gazeta jonë kishte ditë që e kishte bërë fakt të kryer largimin, surprizë duket se është largimi i mesfushorit Dashamir Muça. Në largimin e këtij të fundit nga ekipi gramshiot duket se ka influencuar drejtpërsëdrejti vëllai i tij, Bujari. E ndërsa vetë lojtarët me anë të deklaratave të tyre e kishin zyrtarizuar këtë divorc, tashmë është presidenti Koçi, i cili mbyll çdo thashethem për ndonjë rikthim të mundshëm të këtyre lojtarëve, duke theksuar: "Mund të konfirmoj për gazetën tuaj se futbollistët Bujar Muça, Erald Isaku dhe Dashamir Muça nuk do të jenë më pjesë e ekipit tonë. Ata nuk kanë rënë dakord me kontratat e propozuara nga ne, kështu që tashmë konsiderohen pjesë e së kaluarës. Madje mund të them që nuk do të diskutohet më me këta lojtarë." Presidenti i ekipit gramshiot tregon më tej problemin e lindur ditët e fundit. Bëhet fjalë për deklaratën e mesfushorit Besmir Xhika, i cili u shpreh se ai tashmë është futbollist i Turbinës dhe se askush nuk mund t'ia ndalonte një lëvizje të tillë nga klubi "Gramshi". Por reagimi i presidentit Koçit duket se është i fortë dhe mjaft i prerë. "Derisa të jem unë president i këtij ekipi, Xhika nuk do të largohet, të paktën pa paguar një dëmshpërblim për kontratën që ka me ne. Ai ka një kontratë dhe në bazë të rregullores së FSHF së, mund të transferohet te një ekip tjetër vetëm në formë huazimi. Kështu, në çështje, "topin" e ka klubi ynë," - citoi numri 1 i klubit të kategorisë së parë. Ai beson se edhe Sajmir Bardhi do të rikthehet në skuadër. "Bardhi po stërvitet me ne dhe kam bindjen se do ta kemi sërish në gjirin tonë, pasi e vlerësojmë si lojtar. Mund të konfirmoj njëkohësisht se kemi marrë premtimin e presidentit Arben Laze për të huazuar nga Elbasani mesfushorin Bastriu. Emrat e tjerë të merkatos do t'i zbuloni pas takimit miqësor që do të zhvillojmë të premten me Sopotin," - përfundoi presidenti Koçi.

[wxz]

Trajneri i cërrikasve sqaron se skuadra e tij do të plotësoshet me 3 lojtarë të Kastriotit.



Gjatë merkatos dimërore tek ekipi i Turbinës kanë ardhur disa lojtarë cilësorë, por, nga ana tjetër, trajneri Bardhi ka vendosur të bëjë një seleksionim. Pra, do të ketë largime të disa lojtarëve, të cilët kanë dhënë kontributin e tyre për cërrikasit gjatë fazës së parë. Kështu, pas Emiliano Çelës, qendërmbrojtësit që ka dorëzuar fanellën e Turbinës pas një debati me trajnerin Sinan Bardhi, edhe afrikani Abdurrahman është larguar pa luajtur qoftë edhe një ndeshje të vetme. Me të nuk është arritur një marrëveshje nga ana e presidentit Gjoka. Mësohet se largimi i mesfushorit afrikan ka të bëjë me kërkesat e tij të larta. Bëhet e ditur se Abdurrahman kishte kërkuar 3000 dollarë vetëm për fazën e dytë. "Po, është e vërtet që futbollistët Çela dhe Abdurrahman nuk do të jenë më në planet e mia për fazën e dytë. Keqkuptimet e kohëve të fundit kanë të bëjnë me disa arsye serioze. Nuk po kuptohej se cilët janë ata që vënë kushte, presidenti apo lojtarët. Mungesa e tyre nuk do të ndihet, sepse janë zëvendësuar menjëherë me disa futbollistë të ardhur nga ekipi i Kastriotit, të cilët priten veçse të plotësojnë disa formalitete me presidentin," - ka thënë për "Sportin shqiptar" trajneri i Turbinës, Sinan Bardhi. Ndërkaq, stërvitja, që mendohej të zhvillohej në stadiumin "Nexhip Trungu" të Cërrikut, ka gjetur një zgjidhje tjetër. Ajo do të zhvillohet në një nga fushat sportive të kompleksit në Kamëz, ku kushtet janë vërtet të mira. Nga drejtuesit e klubit mësohet se atje do të punohet deri ditën e shtunë dhe më pas ekipi do të niset drejt Malit të Zi, ku do të zhvillojë fazën përgatitore. "E kemi llogaritur që deri të shtunën tre futbollistët e Kastriotit të kenë firmosur për Turbinën. Gjatë fazës përgatitore ne do të zhvillojmë disa miqësore me kundërshtarë si Flamurtari dhe Besëlidhja, për të parë se deri ku kemi arrritur dhe çfarë kemi mangut. Pas fazës përgatitore, stërvitja do të zhvillohet në Cërrik," - ka përfunduar trajneri Bardhi. Turbina, që gjatë fazës së parë arriti rezultate të kënaqshme, kërkon të ruajë ekuilibrin edhe për fazën e dytë, që mendohet të jetë më e ashpër. Për këtë arsye, presidenti Gjoka ka vënë në dispozicion gjithçka që i nevojitet skuadrës së tij.

[wxz]

Braziliani nis stërvitjen me skuadrën beratase, duke konfirmuar ardhjen e 3 brazilianëve të tjerë.

Ndërsa trajnerët Mile dhe Arbri kanë munguar për të tretën ditë radhazi, duke iu përmbajtur fjalës së tyre se pa ardhur përforcime, nuk do të zyrtarizohen në krye të Tomorit, në stadium ka zbritur braziliani Olivera, i cili është përshëndetur nga dhjetëra shikues vendës si shpëtimtari i "varkës" beratase. Braziliani, i cili luajti një sezon për ngjyrat e Partizanit, tashmë e ka ndarë mendjen se do të shërbejë vetëm për ngjyrat e Tomorit. Jo vetëm kaq, por ai po kryen edhe detyrën e një menaxheri, teksa flet për ardhjen e tre brazilianëve të tjerë. Olivera, ose siç i thërrasin në Berat, Oli, duket se është miqësuar shpejt me qytetin futbolldashës. Edhe pse i lodhur nga udhëtimi, ai ka dalë në fushën e stërvitjes, duke u bashkuar me grupin e lojtarëve të përhershëm, ndërkohë që skuadra ka vijuar stërvitjen pa praninë e ndonjë trajneri. Por më mirë të kënaqemi me atë çfarë mendon vetë braziliani i Tomorit:
Olivera, tashmë keni ardhur dhe pa dyshim që ky është një ogur i mirë për tifozërinë beratase. A e kishit menduar ndonjëherë se mund të mos ktheheshit në Berat?
- Absolutisht jo. Nëse ndodhi që u vonova, kjo ka pasur arsye, pasi jam përpjekur të sjell në skuadër të tjerë futbollistë. E kam parë këtë si një kontribut personal ndaj skuadrës së këtij qyteti, që jeton intensivisht me futbollin. Personalisht, do të vazhdoj të jem pjesë e skuadrës së Tomorit, me qëllimin e vetëm që të ringremë futbollin e këtij qyteti.
Thatë që pas jush priten të tjerë "shpëtimtarë", gjithmonë brazilianë. A mund të na shpjegoni për cilët është fjala?
- Tashmë nuk ka asnjë dyshim se me Tomorin do të jenë dhe tre brazilianë të tjerë. Bëhet fjalë për dy mbrojtës dhe një sulmues, emrat e të cilëve do të bëhen të njohur sapo të mbërrijnë në Berat. Madje mund të konfirmoj se për ta janë prerë biletat dhe është caktuar dita e mbërritjes. Eshtë vetëm çështje ditësh dhe Tomori do të ketë kontributin e tyre. Natyrisht që janë lojtarë me kualitet dhe që do t'i shërbejnë shumë futbollit në Berat. Ne po vijmë që nga Brazili për të mos lejuar që ky Tomor të "shembet".
Ju jeni vlerësuar nga shumë fansë beratas si shpëtimtari i Tomorit. A kini menduar ndonjëherë se Tomori mund të zbresë një kategori më poshtë?
- Nëse do të kisha menduar rënien nga kategoria, të jeni të sigurt që as unë dhe as shokët e mi nuk do të merrnim mundimin për të ardhur deri këtu. Personalisht, kam luajtur pak ndeshje me Tomorin dhe kam besim se kjo skuadër mund të bëjë shumë gjëra të mira. Pse të na shkojë mendja tek e keqja dhe të mos mendojmë më të mirën? Mendoj se ky Tomor, në fazën e dytë, do të jetë krejt ndryshe dhe as që do të bëhet ndonjëherë fjalë për ndryshim kategorish.
Si ndihet Olivera këto kohë që po jeton në qytetin e Beratit dhe cili është mesazhi që u përcjell sportdashësve të këtij qyteti?
Të them të drejtën, ndihem shumë mirë, si në shtëpinë time. Berati është një qytet i bukur dhe me njerëz bujarë dhe futbolldashës. Pikërisht kjo vlerë e tyre njerëzore më obligon për më shumë punë dhe kontribut në të mirë të futbollit të këtij qyteti. Nganjëherë Berati, për nga dashuria për futbollin, më ngjason me Brazilin tim dhe kjo është një e vërtetë që duhet vlerësuar. Mesazhi im për sportdashësit beratas është që të vijnë dhe të shikojnë futboll, ta mbështesin skuadrën dhe të gëzojmë së bashku.

[wxz]

Pas miqësores me Hajdukun, sot ekipi gjirokastrit do të zhvillojë një tjetër miqësore me Lushnjën.

Bluezinjtë e drejtuar nga trajneri Ilir Spahiu zhvilluan të enjten një takim miqësor me ekipin serb Hajduk Kula. Gjirokastritët e humbën takimin me rezultatin 3 0. Stafi teknik, më shumë rëndësi i kushtoi vendosjes në fushë të lojtarëve, të cilët ende nuk e kanë arritur formën optimale. Gjatë takimit u provuan të gjithë lojtarët që janë në dispozicion të stafit teknik. Ndërkohë, sot do të zhvillohet një tjetër takim miqësor, ku Luftëtari do të ketë përballë Lushnjën. Sipas informacioneve nga Ulqini, ekipi kryen dy seanca në ditë, ku ajo e paradites është me theks fizik, ndërsa në seancën e mbasdites, stërvitja më shumë është e karakterit teknik. Deri më tani, kontigjenti është i plotë dhe nuk ka pasur asnjë lojtar të dëmtuar. Lojtarët e premtuar nga donatori Mihal Delijorgji, ende nuk kanë mbërritur, por nga burime të sigurta në kampin bluezi, dy lojtarët e huaj pritet të bashkohen me ekipin të hënën. Bëhet fjalë për një mesfushor organizator dhe një sulmues, të cilët aktivizohen në kampionatin belg me skuadrën e Lokerenit. Ndërkohë, e reja më e fundit nga fronti i merkatos është oferta që i ka bërë Delijorgji, mesfushorit të Dinamos, Enkel Alikaj. Dinamoviti që luan në krahun e majtë të mesfushës, në qoftë se bashkohet me Luftëtarin, mund t'i bënte shumë punë gjirokastritëve. Gjasat janë të shumta që ai të firmosë, por gjithsesi ende nuk vendosur asgjë. Nga drejtuesit e klubit gjirokastrit është piketuar edhe një tjetër futbollist i Dinamos, bëhet fjalë për sulmuesin beratas Klodian Arbri. Duke lënë pas merkaton, pjesa e parë e kampionatit, mund të quhet e suksesshme për Luftëtarin, në disa aspekte. Gjatë ndeshjeve që janë zhvilluar, ka rënë në sy aktivizimi i disa të rinjve të talentuar, të cilët kanë dalë nga shkolla gjirokastrite e futbollit. Emra të tillë, si Shameti, Shenaj, Braho, Sinani, Stoja etj., e kanë justifikuar plotësisht aktivizimin. Tre të parët janë pjesë e formacionit bazë, ndërsa mbrojtësi Sinani dhe mesfushori Stoja, edhe pse nuk janë aktivizuar shumë, janë fituar si lojtarë, pasi kanë zhvilluar lojëra të kënaqshme. Një nga ata që premton shumë për të ardhmen është mesfushori i qendrës, Nertil Stoja. Në linjë telefonike nga Ulqini, 20 vjeçari Stoja shprehet se është i kënaqur me paraqitjen e tij, ndërkohë që thotë se duhet punuar më shumë për të fituar formacionin. "Edhe pse nuk jam aktivizuar shumë, besoj se me aq sa kam luajtur, e kam justifikuar besimin e trajnerëve, të cilët më duhet t'i falënderoj, pasi më kanë dhënë një kurajo të madhe. Bashkë me moshatarët e mi po punojmë dyfish, sepse jemi gjirokastritë dhe duhet të kontribojmë maksimalisht për ekipin e qytetin tonë, ku natyrisht, objektivi është që të arrijmë rezultate sa më pozitive. Duhet thënë se eksperienca jonë është e paktë dhe normalisht kemi hasur vështirësi në takimet që kemi zhvilluar në transfertë, por mendoj se pjesën e dytë të kampionatit do të bëjmë një paraqitje më të mirë se ajo e para. Personalisht do të punoj fort në stërvitje për të zënë një vend në formacionin e parë," deklaroi për "Sportin shqiptar" gjirokastriti Stoja.

[wxz]

Gentian Stojku e shpreh hapur dëshirën e tij për të qenë goleador i verdhebluve këtë sezon.

Gentian Stojku, në një intervistë për "Sportin shqiptar", është shprehur se këtë vit do të jetë golashënuesi më i mirë i Elbasanit, por sulmuesi kampion nuk e fsheh dëshirën për t'u shpallur edhe "këpuca e artë" e kampionatit shqiptar, pavarësisht se do të ketë një duel me Sinanin e Tiranës, apo dhe të tjerë. Ja çfarë thotë më shumë i kudondodhuri në fushë Gentian Stojku:
Stojku, si po shkon faza përgatitore në Hercegnovi?
Deri tani po shkon mirë, kushtet janë shumë të mira dhe pa dyshim që grupi është tepër i motivuar në stërvitje. Elbasani në kampionat do të futet vetëm me një objektiv, fitoret në ndeshjet e mbetura, sepse nga kupa jemi eliminuar, kështu që i vetmi objektiv tashmë është titulli. Pavarësisht se do ta kemi të vështirë, mund të them se edhe vendi i dytë nuk do të jetë i keq, pasi na çon në zonën europiane.
Ndërkohë që Gëzdari është shprehur se kërkon një sulmes tjetër, cili është komenti juaj?
Këtë e ka në dorë trajneri. Sigurisht, sa më shumë konkurrentë të ketë sulmi, aq më mirë i bëhet Elbasanit. Ardhja e Tikos na ka dhënë një ngritje në nivelin e sulmit, pasi është një futbollist me eksperiencë, kështu që bashkë me Kaçin, Tikon dhe Kuçin, pse jo edhe ndonjë sulmues tjetër, Elbasani blindohet në repartin e sulmit.
Nuk i trembeni se mund të humbisni vendin e titullarit pas ardhjes së Tikos?
Aspak, përkundrazi, kjo ma shton akoma më shumë dëshirën për të shënuar sa më shumë gola. Po stërvitem maksimalisht që të jem sa më mirë fizikisht dhe të jem shënuesi më i mirë i Elbasanit, si në dy fazat e para. I kam vënë një objektiv vetes: të arrij kuotën e 21 golave. Nëse e arrij, më pas do të tentoj të fitoj edhe "Këpucën e artë" të kampionatit, pavarësisht se përballë do të kem Sinanin e Tiranës, apo konkurrentë të tjerë.
Ju ka ngrohur çmimi i fituar nga tifozët, apo merkatoja e Elbasanit?
Tani dua të shtoj dy gjëra. E para, janë tifozët që dua t'i falënderoj shumë, sepse janë pjesa jonë më e rëndësishme. Pa ta nuk do të arrijmë aty ku pretendojmë. Sa për merkaton, mund të them se presidenti Arben Laze e ka bërë punën e tij dhe tani na mbetet neve futbollistëve për të kryer detyrën tonë.
Kur do të zhvillojë Elbasani ndonjë ndeshje miqësore në Malin e Zi?
Besoj se nga fillimi i javës, pasi po stërvitemi maksimalisht dhe kam mendimin se nga e hëna, ose e marta, ekipi është i gatshëm për një ndeshje miqësore. Shpresojmë që në fillim jave të gjejmë edhe kundërshtarin për t'u përballur, sepse pas një jave stërvitjeje ekipi ka nevojë edhe për miqësore.

[wxz]

- Dje dinamovitët kanë kryer dy seanca stërvitore, të cilat janë zhvilluar në fushën e zezë, pasi terreni me bar ishte i rënduar nga shirat e fundit.
- Artion Poçi dhe Ilirian Çaushaj gjatë përgatitjeve të djeshme janë bashkuar me grupin, pasi dëmtimet që kanë marrë kanë filluar të rikuperohen. Poçi mori një lëndim të lehtë në kofshën e djathtë gjatë takimit me Shkumbinin, ndërsa Çaushaj ka luajtur vetëm 40 minuta në ndeshjen që Shpresa jonë luajti me moshatarët turq, pasi pikërisht në këtë minutë dinamoviti mori një goditje nga kundërshtari.
- Dinamo ka planifikaur që në shtatë ditët në vijim të zhvillojnë tri takime miqësore. Sot është parashikur që blutë të kryejnë në kompleksin e tyre një ndeshje kontrolli dhe kundërshtari i mundshëm është ekipi i Laçit, me të cilën kanë humbur përpara një jave. Ditën e martë është planifikuar që të luajnë ndaj Erzenit dhe në fundjavë do të ndeshen me Luftëtarin.
- Përforcime të reja priten që të shikohen gjatë ditës së sotme në ekipin e Dinamos dhe pikërisht bëhet fjalë se do të vijnë dy mbrojtësit e premtuar. Njëri nga këta është kroati Goran Graniç, ndërsa tjetri mësohet se do të jetë boshnjak. Sipas dinamovitëve, çështja e mbrojtësit të djathtë Graniç është një punë e përfunduar, ndërsa verdikti për boshnjakun pritet të jepet pasi të jetë provuar.
- Llazi Gjika, portieri i dytë i Dinamos, dje nuk është përgatitur me skuadrën, sepse korçari po kalon një problem shëndetësor dhe, sipas rekomandimit të mjekut, ai është detyruar që të vazhdojë një kurë mjekimi.
- Alban Hoxha, portieri i ri dinamovit, i cili stërvitet me Dinamon dhe luan për Turbinën si i huazuar, sot do të jetë titullar në ndeshjen e kontrollit që blutë do të zhvillojnë ndaj Laçit. Pas dëmtimit të Gjikës dhe largimit të Ilion Likës me kombëtaren në turneun e kombëtares, "gardiani" i ri, i cili është edhe pjesëtar i ekipit Shpresa sot do të ketë mundësinë të ruajë nderin e portës dinamovite.

[wxz]

Duke filluar nga dita e sotme, tek Dinamo do të mungojnë disa ditë tre lojtarë të formacionit bazë, pasi ata janë pjesëtarë të ekipit kombëtar, që udhëhiqet nga trajneri kroat, Oto Bariç. Përveç të përhershmëve Ilion Lika dhe Erion Xhafa, vlen të theksohet edhe rikthimi në skuadrën kuqezi të mesfushorit të adaptuar si mbrojtës tek blutë, Julian Ahmataj. Elbasanasi dinamovit e ka pritur normalisht këtë thirrje për të qenë në ekipin kombëtar dhe nuk shikon ndonjë arsye për t'u vetëkënaqur. "Më vjen mirë që emri im është përfshirë në listën e trajnerit Oto Bariç dhe këtë ftesë që kam marrë nga kombëtarja e quaj një vlerësim të punës sime. Fanellën kuqezi nuk e vesh për herë të parë, prandaj kësaj radhe e përjetoj normalisht, sepse paraqitja me Dinamon m'i ka ngjitur shkallët një nga një, derisa arrita te kombëtarja,"- është shprehur shkurtimisht dinamoviti Ahmataj.

[wxz]

Timonieri i bluve e ndien veten më komod si lojtar sesa trajner, sepse aty ka më shumë eksperiencë.

Prej pak më shumë se dy muajsh skuadra e Dinamos drejtohet nga Redi Jupi, i cili njëkohësisht kryen edhe rolin e lojtarit. Eksperienca e Jupit në fushën e futbollit është e gjatë, pasi luan prej 15 vitesh, ndërsa në profesionin e trajnerit është i ri. Në këto ditë të fazës përgatitore Dinamo po punon me seriozitet të lartë, pasi ekipi e mbylli vitin 2006 në një gjendje jonormale, sepse blutë e kryeqytetit janë një ekip me tradita në futbollin tonë dhe detyrimisht meritojnë të jenë më lart se vendi i gjashtë. Sipas trajnerit-lojtar, Redi Jupi, stafi drejtues dhe teknik i Dinamos po punon me përkushtim të madh, në mënyrë që skuadra të dalë tek imazhi që meriton. "Ecuria e Dinamos nuk ka qenë e mirë, pasi kjo është trashëguar që nga përgatitoret e verës. Gjatë kësaj periudhe të ndërprerjes së kampionatit po punojmë shumë që të ndryshojmë diçka në skuadër. Pas javës së 17-të Dinamo ndodhet në vendin e gjashtë dhe kjo situatë nuk është normale për një ekip me traditë, por tradita mbetet prapa dhe humbet kur nuk punohet apo gjërat s'parashikohen me një plan të detajuar. Momentalisht po punojmë maksimalisht që Dinamoja e 2007-ës të ndryshojë nga ajo që mbylli pjesën e parë të kampionatit. Shpresoj që deri tani të kemi bërë diçka më të mirë nga 2006-ta, por përsëri nuk jemi të kënaqur, sepse kemi afruar tre lojtarë dhe na janë larguar dy. Në ditët që vijnë besoj se do të kemi përforcime të reja, kryesisht në sektorin mbrojtës. Pra, bilanci i deritanishëm i merkatos së Dinamos nuk është pozitiv,"- është shprehur trajneri i bluve të kryeqytetit Redi Jupi. Ish-kapiteni kampion i Dinamos po e drejton me sukses ekipin dhe kryesorja është se të gjithë janë të kënaqur nga puna dhe fryma që Jupi ka sjellë në skuadër. Megjithatë, nëse ndokush do ta detyronte Redin të zgjidhte njërën midis trajnerit dhe lojtarit, sipas dinamovitit do të preferonte rolin e futbollistit, sepse këtë profesion e kryen prej 15 vitesh. "Detyrën e trajnerit e mora në një moment të befasishëm, të cilën e pranova duke parë kushtet në të cilat ndodhej Dinamo. Natyrisht, veten e ndiej më komod në rolin e futbollistit, pasi këtë profesion e ushtroj prej 15 vitesh, ndërsa punën e trajnerit e bëj prej dy muajsh. Është fare e lehtë që ta bësh krahasimin, sepse disniveli është prezent, 15 vite me pak më shumë se 2 muaj. Që nga momenti kur mora përgjegjësinë drejtuese të Dinamos dhe deri tani jam munduar të bëj më të mirën dhe të gjithë bagazhin tim ta vë në funksion të ekipit. Normalisht çdo drejtues ka strategjinë e tij të të bërit skuadër dhe puna do të ndryshojë si me paraardhësin dhe pasardhësin. Do apo s'do, çdo person sjell ndryshime dhe të reja në ekip, prandaj mendoj se edhe unë jam munduar të sjell tek Dinamo frymën time të të bërit futboll profesionist dhe dashje pa dashje kam sjellë edhe të reja. Detyra e çdo drejtuesi është që të sjell të reja, por vlerësimin e punës e japin rezultatet, pasi shifrat janë barometri i gjithsecilit,"- ka përfunduar për gazetën "Sporti shqiptar" trajneri i Dinamos, Redi Jupi. Sipas trajnerit-lojtar, merkatoja e bluve është në kulmin e saj, por nuk është ai që merret me afrimin e lojtarëve, pasi është një shtab tjetër që punon për afrimin e futbollistëve të rinj. Po sipas Jupit, në varësi të merkatos do të strukturohet edhe ekipi, pasi nuk do të mbahen lojtarë të tepërt. Pra, nëse vijnë kroatët e përfolur, detyrimisht që do të ketë edhe largime rreth të cilave qarkullojnë edhe emra.

[wxz]

Një tjetër takim miqësor ka planifikuar sot trajneri Sejdini për ekipin e tij. Kundërshtari i radhës do të jetë Erzeni i Shijakut, duke preferuar stadiumin "Tofik Jashari". Për Shkumbinin, ky i sotmi është i treti që zhvillon në këto ditë të përgatitores. Të shtunën e kaluar Shkumbini priti në fushën e vet ekipin e Sopotit, ku fitoi ngushtë 1 0, ndërsa të mërkurën pati përballë Dinamon në Tiranë, takim që u humb thellë 5-1.

[wxz]

Flamurtari, në kuadër të përgatitjeve të janarit, ka zhvilluar ndeshjen e parë miqësore në stadiumin e Ulqinit.


Flamurtari, në kuadër të përgatitjeve të janarit, ka zhvilluar ndeshjen e parë miqësore në stadiumin e Ulqinit. Kundërshtari i kuqezinjve vlonjatë ishte Besëlidhja e Lezhës, një ekip i kategorisë së parë, i cili synon superligën. Skuadra e Vasil Rucit në përfundim të ndeshjes ka dalë e fituar, por vetëm me një gol. Sipas trajnerit të portierëve, Luan Birçe, në përfundim të 90-minutëshit, si trajneri Ruci, por edhe stafi teknik, kanë mbetur të kënaqur nga loja e Flamurtarit. Goli i vetëm i takimit është shënuar nga fantazisti i Flamurtarit Roland Nenaj, pas një goditjeje dënimi nga larg në 15 minutat e para të lojës. Të dy skuadrat kanë paraqitur në fushën e lojës formacionet e tyre më të mira, duke i dhënë përparësi mënyrës së lojës sesa golave të shënuar, raste të cilat për vlonjatët nuk kanë munguar. Në fillim të takimit trajneri Vasil Ruci ka aktivizuar Dinen, Drizën, Beharin, Bedinin, Sakajn, Begën, Stratin, Kuqin, Nenajn, Hashanin, Xhafën. Në pjesën e dytë trajneri Ruci ka bërë zëvendësime në formacion, duke aktivizuar edhe Kyçykun, Gunën, Rustemin, Bokatolën. Ndeshja ndaj Besëlidhjes, sipas ish portierit të viteve '80, Luan Birçe, është vlerësuar nga trajneri Vasil Ruci si një sinjal pozitiv për ecurinë e skuadrës për vitin 2007. "Flamurtari e fillon mbarë vitin 2007 pa paragjykuar skuadrën e Besëlidhjes, pasi kundërshtari u shfaq i fortë dhe i denjë, i cila me meritë po kërkon superligën. Unë mendoj se ky takim i ka shërbyer skuadrës sonë për të kontrolluar gjendjen e deritanishme të saj. Të dy skuadrat shfaqën një mënyrë loje të kënaqshme, pavarësisht se fitorja i buzëqeshi skuadrës sonë. Gjithsesi, nëpërmjet këtij takimi, ne kemi evidentuar edhe mangësitë, të cilat do t'i korrigjojmë në vazhdimësi," shprehet përgatitësi i portierëve Birçe. Ditën e diel, në orën 10:00, paradite në stadiumin e Ulqinit, Flamurtari do të zhvillojë takimin e dytë miqësor, atë me Hajdukun e Kulës, në të cilin, sipas Birçes, do të provohen edhe lojtarë të tjerë, të cilët nuk u aktivizuan ndaj Besëlidhjes. Veç sulmuesit kosovar, formacioni i Flamurtarit kishte në përbërje vetëm lojtarë vlonjatë, në të cilin bëjnë pjesë 6 lojtarë të rinj, si Kuqi, Guga, Bega, Strati, Bedini, Guna, por edhe talentet e ardhur në skuadër, si Zeqiri, Dhrami, Serjani, Veliu etj. "Qëllimi është ashtu, siç ka pohuar edhe trajneri Ruci, që Flamurtari sezonin tjetër të ndërtohet vetëm me lojtarë vlonjatë. Do të vlerësoja përpjekjet pozitive të sulmuesit kosovar Hashani. Nga afrikanët me skuadrën është vetëm Bokatola, i cili erdhi me vonesë në përgatitore, ndërsa Delain flitet se vazhdon testingun, ndërsa dy të tjerët, Sisoko dhe Roxher, edhe mund të përjashtohen. Gjithsesi, ne jemi të kënaqur me përbërjen aktuale të lojtarëve tanë," përfundon trajneri i portierëve të Flamurtarit, Luan Birçe, i cili ka pohuar se stafi teknik i Flamurtarit ka dhënë "ok" in për Burim Hashanin. Më tej ai do të aktivizohet në sulm së bashku me Fjodor Xhafën. Ndërsa mesfushori i Besës së Pejës, Festim Kasapi, largohet nga Flamurtari, pasi nuk kalon testin.

[wxz]

I bindur se ka bërë zgjedhjen e duhur, portieri shqiptaro maqedonas shprehet se mund të veshë fanellën kuqezi.


Portieri Suad Zendeli, që ka firmosur për skuadrën fierake, ndihet optimist. Edhe pse ka vetëm pak ditë që stërvitet te skuadra fierake, Zendeli po ambientohet dita ditës. Tashmë Zendeli shpreson që me kontributin tek Apolonia të lërë shije të mirë në superligën shqiptare.
Keni ditë që jeni pjesë e skuadrës fierake. Si ndiheni tashmë që keni bërë këtë zgjedhje, duke pranuar për të mbrojtur katërkëndëshin bardhëjeshil?
Mund të them pa frikë se kam gjetur një ambient tepër të kulturuar dhe që e do shumë futbollin. Ndihem mirë këtu në Fier. Përpara se të pranoja për të ardhur te skuadra fierake, kam folur me mikun tim Pollozhani, që disa sezone më parë ishte aktivizuar me skuadrën e Apolonisë. Ai më ka folur shumë mirë për njerëzit dhe kjo më shtyu më tepër për të qenë pjesë e skuadrës së presidentit Kokëdhima. Jam shok i ngushtë me të dhe besoj se edhe ai ka ndikuar.
Atëherë më konkretisht cila është skeda e Suad Zendelit?
Kam lindur në Shkup në 24.2.1981. Hapat e parë si sportist i kam hedhur në Slloba Jugomat. Trajnerët e mi të parë kanë qenë Joranoski dhe Muharem Mehmeti. Jam fejuar dhe kam mbaruar shkollën e mesme, por dëshira ime është të vazhdoj studimet e larta për sportin. Kam luajtur në Maqedoni me Bashkimin e Kumanovës, ndërsa në Turqi prej 1 viti kam qenë tek Samsunspori.
Atëherë si u lidhët me Dinamon e Tiranës?
Ka qenë këmbëngulja e mikut tim nga Kavaja, Bekim Kuli, i cili më kërkoi të vija në Shqipëri. Në fillim erdha tek ekipi i Dinamos, ku do të veçoja punën mjaft të mirë që kam zhvilluar me profesor Bozhiqin. Për profesor Bozhiqin kam fjalët më të mira, sepse gjatë gjithë kohës që kam qenë me të kam fituar shumë eksperiencë dhe qetësi dhe më ka ngritur shumë jo vetëm teknikisht, por edhe nga ana taktike. Gjatë punës me të jam ngritur shumë nga ana profesionale. Shkollën që kam marrë nga ai do ta kem gjatë gjithë jetës sime futbollistike.
Shpresoni që Apolonia juaj do të mbetet në superligë?
Unë nuk jam shpëtimtari i Apolonisë. Kam pranuar të jem pjesë e kësaj skuadre deri në maj, me të drejtë rishtyrjeje të kontratës sime. Me përforcimet që do të sjellë presidenti Kokëdhima shpresojmë të mbetemi në superligë. Pa dyshim një detyrë e vështirë për ne, por duke vënë zemrën në fushë besoj se do t'ia dalim mbanë. Jemi duke kryer një stërvitje mjaft të mirë nën drejtimin e trajnerit Andrea Marko, për të cilin ruaj respektin tim të madh, sepse është një trajner mjaft i zoti. Unë si Suad mendoj se do të jap më të mirën për skuadrën. Shpresoj se me ndihmën dhe përkrahjen e tifozëve fierakë, të cilët më qëndrojnë mjaft afër, do të dimë të bëjmë maksimumin tonë për të mbetur në superligë.
Shpresoni që një ditë të vishni fanellën kuqezi?
Do të ishte një sukses i madh për mua nëse do të isha të paktën portieri i dytë. Besoj se do të më përkrahin të gjithë për të realizuar këtë qëllim.

[wxz]

Sipas burimeve pranë skuadrës së Partizanit, sulmuesi i ri do të transferohet tek AEK-u.


Pas kthimit në Shqipëri të ekipit të Shpresës, futbollistët e rinj të Partizanit janë nisur menjëherë drejt Ulqinit, për t'u vënë nën urdhrat e trajnerit Lika. Progri, Karabeci dhe Malindi që prej dy ditësh po stërviten me Partizanin. Enco Malindi është thirrur në minutat e fundit nga trajneri Bushati, por qëllimi i tij ka qenë kalimi i një periudhe të shkurtër prove tek skuadra e AEK-ut të Athinës, menaxherët e së cilës e kanë ndjekur prej kohësh. Si ndërmjetës në tratativat me Malindin është presidenti Xhani, që me sa duket po kërkon të fitojë para me shitjen e lojtarëve të rinj. Sipas burimeve pranë lojtarit, është arritur marrëveshja mes palëve, kështu që Malindi nuk do të jetë më pjesë e Partizanit për fazën e dytë të kampionatit. Enco Malindi do të vazhdojë të stërvitet me skuadrën e kuqe edhe për pak kohë, për t'u shkëputur përfundimisht në muajin shkurt. Në fillim të këtij muaji, kombëtarja e Shpresës, pjesë e së cilës është edhe Malindi, do të udhëtojë drejt Greqisë për t'u ndeshur me homologen helene. Pas këtij takimi, Malindi nuk do të kthehet më tek Partizani, por do të vazhdojë stërvitjen me skuadrën greke të AEK-ut. Ndërkohë nuk ka asnjë lajm interesant nga Ulqini për sa u përket lojtarëve afrikanë apo kosovarë që do t'i bashkoheshin skuadrës gjatë fazës përgatitore. Edhe dje janë zhvilluar dy seanca stërvitore. Seanca e pasdites ka pasur më shumë karakter taktik, pasi sot Partizani do të luajë takimin e dytë miqësor me Teutën.

[wxz]

Kapiteni i Shpresës, Andi Lila, është bashkuar me grupin në Ulqin dhe ka filluar të stërvitet.


Kapiteni i ekipit tonë kombëtar Shpresa, mesfushori kavajas Andi Lila, së bashku me Arapin dje rreth mesditës i janë bashkuar ekipit kavajas në Ulqin. Menjëherë pas kthimit nga Turqia, ku ekipi ynë Shpresa arriti të fitonte miqësoren ndaj Turqisë, ne i morëm mesfushorit kavajas intervistën e mëposhtme. Lila me kënaqësi iu përgjigj interesimit tonë për takimin me Shpresën, ambicien e tij personale dhe ekipin e tij, Besa.
Si e vlerësoni fitoren që arritët në miqësoren ndaj Turqisë?
Ishte një fitore e vëshirë, ndaj një kundërshtari me jo pak suksese në këtë grup-moshë. Hymë në këtë takim me besim e bindje se duhet të tregonim diçka nga vlerat tona. Këtu ndikoi jo pak fakti që ekipi përfaqësues është drejt rinovimit të tij dhe secili kërkoi të bindte për vlera. Merita i takon edhe punës së trajnerëve Bushati, Shulku e Kaçi, që kanë ditur të na motivojnë e trajtojnë si në aspektin njerëzor e moral, ashtu dhe në atë profesional. Shpresoj që kjo fitore të jetë një ogur i mbarë për takimin e radhës në Tiranë për eliminatoret.
Sa ka ndikuar ky rezultat në moralin e vetë Andi Lilës?
Eshtë normale që kur i bashkohesh ekipit pas një fitoreje, morali është lart. Këtu e kam fjalën edhe për shokët e mi. Kjo përvojë me ekipin Shpresa vjen në ndihmë e shërbim të karrierës sime të mëvonshme. Besa ka nevojë edhe për kontributin tim, së pari, se jam kavajas dhe më dhimbet kjo fanellë. Së dyti, sepse objektivi i presidentit Bizhdili kërkon më shumë angazhim e djersë nga të gjithë, duke filluar nga unë.
Ju mundon fakti që keni munguar kaq ditë në stërvitjen e ekipit tuaj?
Aspak. Edhe me ekipin Shpresa jemi stërvitur, madje më shumë se me ekipin. Trajnerët tanë, Bushati e Shulku, nuk tolerojnë aspak, ndaj kjo shkon në favorin e përgatitjes sonë. Pastaj nuk është se jam futbollist "jabanxhi" dhe kam nevojë të njoh e ingranohem me lojën e Besës. Unë e njoh "dhëmbë e dhëmballë" lojën e ekipit, rolin dhe detyrën time në fushë. Tjetër gjë pastaj sesa jap në ndeshje.
Kjo do të thotë se Lila do të jetë po aq i suksesshëm sa në pjesën e parë të kampionatit?
Nuk kam zgjidhje tjetër, përveçse të jem akoma më mirë se ç'isha në pjesën e parë të kampionatit. Jam ende i ri, pavarësisht kampionateve mbi shpinë, që do të thotë se punoj për të ardhmen time. Gjatë verës pata oferta nga disa klube dhe nuk pranova për shkakun e vetëm se besova dhe besoj se Besa ka nevojë për mua, aq sa kam edhe unë nevojë të përfitoj prej saj. Do të stërvitem dyfish në Ulqin, që ndeshjet e mbetura të kampionatit të shërbejnë si një "pasaportë" e mirë për të më mundësuar një dalje jashtë Shqipërisë. Ndërsa Besa juaj?
Nëse të gjithë futbollistët, dhe këtu nuk dyshoj, do të mendonin e luanin për të ardhmen e tyre, suksesi i Besës do të ishte më i besueshëm dhe i vërtetë. Fundja, e kemi detyrim të japim maksimumin tonë, pasi për këtë edhe paguhemi jo pak nga presidenti. Me sa kam konstatuar gjatë një jave që u stërvitëm bashkë në Kavajë, futbollistët kosovarë të ardhur në merkaton dimërore treguan se janë një gjetje e mirë e presidentit. Nisur nga përbërja e grupit, shtoj këtu edhe ardhjet, besoj se nuk na mungon asgjë që të harrojmë se kemi vetëm 19 pikë, por të luajmë si të kishim 30 pikë. Megjithatë, kupa mbetet objektivi ynë për këtë sezon dhe besoj se do ta arrijmë.

[wxz]

Dje në stadiumin "Loro Boriçi" kanë nisur punimet për rregullimin e ambienteve të jashtme të tij, si dhe të disa kërkesave që kanë lënë përfaqësuesit e UEFA s, në mënyrë që aty të luhen ndeshjet ndërkombëtare të përfaqësuesuese shqiptare. Këta punime do të financohen nga presidenti i Vllaznisë, Valter Fushaj, i cili e ka fituar këtë të drejtë pas firmosjes së një kontrate sipërmarrjeje me Bashkinë e Shkodrës, e cila është pronarja legjitime e stadiumit. Në bazë të kësaj kontrate, Fushaj do të financojë rreth 9 milionë lekë të rinj për kryerjen e këtyre punimeve dhe si rrjedhojë do të ketë të drejtë të administrojë për 4 vite me radhë stadiumin "Loro Boriçi". Duke qenë kështu, puna ka nisur dje për shtrimin e rrugës së hyrjes në stadium, por edhe rregullimin e disa ambienteve të tjera të tij. Çdo gjë bëhet në mënyrë që në Shkodër të luhen dy ndeshjet e radhës të kombëtares shqiptare, ajo miqësore me Maqedoninë më 7 shkurt dhe ajo zyrtare me Slloveninë në mars.

[wxz]

Kosovari Xhelal Miroçi kërkon të arrijë ekipin Shpresa dhe më pas atë të përfaqësueses shqiptare.

Dëshira e tij kryesore ka qenë për të ardhur edhe më parë në futbollin shqiptar, por vetëm tani është bërë realitet. Kontrata e firmosur dy ditë më parë me Vllazninë, për Xhelal Miroçin pritet t'i japë atij shansin për të bërë emër në futbollin shqiptar, duke pretenduar që të jetë sa më shpejt pjesë e ekipit U 21 të Shqipërisë dhe më pas dhe atij kombëtar. Ai ende nuk i ka mbushur 20 vjeç (datëlindja 13.3.1987) dhe i kanë mjaftuar vetëm 3 ditë për të bindur trajnerin e kuqebluve Mirel Josa për vlerat e tij, gjë që më pas çoi edhe në akordin financiar me presidentin Valter Fushaj dhe për pasojë është hedhur firma në letër. Një kontratë 6-mujore në mënyrë që të dy palët të shohin si shkojnë punët e më pas mund të zgjatet edhe më tej. Ka qenë vetë lojtari, i cili ka shpjeguar për "Sportin shqiptar" pse nguli këmbë që kontrata të ishte vetëm deri në përfundim të këtij sezoni. "Desha të firmos vetëm për 6 muaj dhe për këtë ishte dakord edhe presidenti Fushaj, në mënyrë që gjatë kësaj periudhe të shohim si do të shkojnë punët dhe më pas kontrata mund të zgjatet sërish. Dëshira ime është t'i bind me lojëra të mira drejtuesit e Vllaznisë për vlerat që kam dhe për këtë do të bëj më të mirën në fushë," ka shpjeguar ai. Xhelal Miroçi ëshhtë nga Juniku i Kosovës dhe ka emigruar në Gjermani që në vitin 1996. Ndoshta ngaqë ka mbi 10 vjet që jeton në këtë vend, 20-vjeçari e ka të vështirë ta flasë rrjedhshëm gjuhën shqipe, megjithatë nuk është shumë problem të komunikosh me të. Karrierën e futbollit e ka filluar pikërisht në këtë vend, teksa më pas ka arritur të luajë në disa ekipe të kategorisë së tretë dhe të katërt të futbollit gjerman. Kryesisht ka luajtur në Ausburg, ndërkohë që sezonin e fundit ka qenë pjesë e ekipit SG Dornheim. Pamundësia për t'u bashkuar me Vllazninë e kosovarit tjetër, Popova, ka bërë që menaxherët t'u sugjerojnë drejtuesve shkodranë pikërisht këtë lojtar. Ai luan kryesisht në krahun e djathtë të mesfushës dhe Josa është mahnitur nga veprimet e tij në miqësoren me serbët e Banatit. Kaq ka mjaftuar dhe trajneri i kuqebluve ka dhënë "ok" in e tij. "Të them të drejtën, u entuziazmova shumë kur trajneri më tha se për të isha i gatshëm të luaja me Vllazninë. Njëkohësisht falënderoj edhe presidentin Fushaj, që menjëherë më plotësoi edhe kërkesat financiare. Duke qenë kështu, premtoj se në këta 6 muaj do të jap maksimumin për të nderuar trajnerin, presidentin, por edhe për të kënaqur tifozërinë shkodrane, që siç kam dëgjuar, është shumë e zjarrtë," ka shtuar më tej blerja e fundit e kuqebluve. Në këtë mënyrë, me ardhjen e Miroçit janë rregulluar edhe disa plane të trajnerit Josa, që kërkonte një lojtar të fuqishëm për krahun e djathtë të mesfushës.

[wxz]

Presidenti durrsak, Edmond Hasanbelliu, pas vizitës në Ulqin, flet për gjendjen e Teutës.


Paraqitja dhe gjendja e ekipit në Mal të Zi ka qenë pozitive. Kështu është shprehur presidenti i Teutës, Edmond Hasanbelliu, duke ju referuar "inspektimit" të tij më të fundit në Ulqin, ku ekipi është grumbulluar prej një jave. Hasanbelliu ka marrë të gjithë informacionin e duhur nga trajneri Starova, i cili është shprehur se është i kënaqur me paraqitjen e ekipit dhe me faktin që të gjithë futbollistët janë të impenjuar në fazën përgatitore.
- Zoti Hasanbelliu, si shkoi "inspektimi" i ekipit në Ulqin?
- Nuk do ta quaja inspektim për faktin se shkova thjesht për të parë kushtet e ekipit, përgatitjen e deritanishme të futbollistëve, si dhe për komunikuar me trajnerët në lidhje me gjendjen e ekipit.
- A ka pasur probleme ekipi gjatë qëndrimit në Mal të Zi?
- Me sa pashë dhe nga sa u informova nuk ka pasur asnjë problem. Stërvitja po zhvillohet në kushte ideale dhe trajneri me stafin po bëjnë një punë të mirë. U interesova veçanërisht për ndeshjen me Besëlidhjen dhe u informova se Teuta ka bërë një prezantim bindës.
- A nuk është problem fakti që Daniel Xhafaj ka pasur shqetësime në gju?
- Jo, nuk bëhet fjalë për ndonjë problem. Danieli nuk ka pasur ndonjë shqetësim, por vetë trajneri dhe stafi për të qenë të sigurtë për çdo gjë, i kanë këshilluar që të bëjë rezonancën. Nëse do të kishte ndonjë problem, sigurisht që do t'jua thosha. Tani ai ndodhet në Antalia, ku për testohet tek një ekip turk. Nuk mund ta ndaloja, sepse i dëshiroj më të mirën, edhe pse ne na prish shumë punë.
- A mund të quhet e mbyllur merkato?
- Më përpara mendoja se po, por nëse Xhafa nënshkruan me ekipin turk, ku po testohet, atëherë duhet të gjejmë zëvendësuesin e tij. Nëse kthehet, puna ndryshon, pasi me Bledi Shkëmbin kemi përforcuar repartin, ku realisht kishim probleme.Bëmë një provë me një futbollist serb, por nuk rezultoi e suksesshme. Nuk kemi nevojë për futbollistë mesatarë, por për futbollistë të nivelit të formacionit të Teutës. Nëse e shikoni me kujdes formacionin, në fushë do të shihni disa nga futbollistët më të mirë të kampionatit.
- A besoni se ky grup do t'jua shpërblejë investimet që keni bërë?
- Unë besoj shumë te ky grup dhe te trajneri Starova. Kjo është dhe arsyeja që këtë sezon kemi investuar shumë për këtë ekip.
- A ju shqetësojnë deklaratat, sipas të cilave, Tirana e ka titullin në xhep?
- Unë nuk merrem me deklaratat e të tjerëve, por shikoj ekipin tim. Unë e thashë dhe më parë, që besoj se ky ekip do t'i sjellë qytetit titullin. Shpresoj që dhe tifozeria të besojë në këtë realitet dhe të na mbështesë siç duhet.
- Çfarë do të kërkoni më shumë nga ekipi dhe Starova?
- Objektivi ynë është titulli dhe me grupin që kemi dhe një trajner profesionist si Starova, mundësitë janë për ta bërë realitet këtë synim.

[wxz]

Mungesa e Nevil Dedes në ndeshjen e së enjtes ndaj Istambulsporit ishte evidente për Tiranën. Qendërmbrojtësi bardheblu nuk u aktivizua në miqësoren ndaj turqve, për shkak të dhimbjeve që ndiente në mes. Stafi mjekësor i rekomandoi atij të qëndronte pushim absolut, pasi ngarkesa fizike që ka marrë gjatë këtyre ditëve e ka bërë të sajën. Në të vërtetë, dhimbjet në mes janë bërë shumë të shpeshta për Deden vitet e fundit, ku ka munguar edhe në ndeshjet e kampionatit si me Elbasanin, ashtu dhe me Tiranën. Në ditët në vazhdim pritet që gjendja e 31-vjeçarit të shkojë drejt përmirësimit, madje mund të luajë që nga minuta e parë në miqësoren ndaj ukrainasve.

[wxz]

Pasi ka humbur në premierë në Shkodër me Vllazninë, Luftëtari në Gjirokastër shënon golin e parë ndaj Dinamos me anë të ish dinamovitit Stafa dhe fiton. Në Gjirokastër fiton edhe me Apoloninë dhe quhet surprizë barazimi në Durrës me Teutën, kurse vazhdoi të fitojë në fushën e vet edhe me Besën, Shkumbinin, Kastriotin, ndërsa jashtë pëson humbje, por sidoqoftë e mbyll fazën e parë në vend të 5 të, që është edhe shkalla më e lartë që ka arritur në pjesën e parë të kampionatit. Pra, Luftëtari si asnjëherë tjetër fiton në fushën e vet të gjitha ndeshjet e një faze, madje pa pësuar as gol në to. Në ndeshjen e parë të fazës së dytë Luftëtari thyhet në Gjirokastër nga Vllaznia, në një ndeshje mjaft të përfolur. Pjesën e parë të kampionatit e mbyll në vend të 7 të.

Portieri Toçi, hallka më e fortë
Irakli Toçi , portieri elbasanas i Luftëtarit, në rezultatet luajti një rol të dorës së parë, pasi në 8 ndeshje, nga 16 që, ai luajti, nuk pësoi asnjë gol dhe në 8 të tjerat ka pësuar 13 gola, pra është një arritje mjaft interesante, ku pa dyshim meritë ka edhe reparti mbrojtës para tij.
Shterpësi golash të sulmit
E derisa mbrojtja, nga sa thamë, veçanërisht në Gjirokastër është treguar mjaft solide, sulmi realisht nuk qe rezultativ dhe për këtë flet fakti që Luftëtari nga ky tregues, me 14 gola të shënuar në 17 ndeshjet, është së bashku me Apoloninë dhe Besën, ndër ekipet më të dobëta. Golat e Luftëtarit janë shënuar nga Stafa (4), nga Nora dhe Novi nga 3, Shenaj 2 dhe Braho e Shameti nga 1. E pra, ka të drejtë që stafi i ekipit kërkon me insistim një golashënues të mirëfilltë për pjesën e dytë të kampionatit, që nuk është larg.

[wxz]

Luftëtari do të niset për javët e tjera të kampionatit nga pozicioni i 7 të, duke pretenduar më shumë.


Lavdia e shkuar Luftëtari pothuajse me 11 kundërshtarët e superligës ka bilanc negativ në tërësi, por ndërkaq ka një emër të mirë dhe konsiderohet ekip me tradita. Ndodh kështu për faktin se në sezonet 1975 1976 deri më 1987 1988 ai qëndroi për 13 kampionate në kategorinë superiore, ku në sezonin 1977 1978 arriti deri në nënkampion dhe pati Brahon, Kallucin, Bonin, Seitin, që realisht në ato vite tërhoqën vëmendjen si futbollistë të talentuar, që aplikuan me mjaft sukses kundërsulmin e shpejtë dhe rezultativ. Në kampionatin e 56 të (1994 1995) pati golashënuesin më të mirë të tij, Arben Shehun, me 21 gola, ndërsa nga Luftëtari kanë dalë lojtarët e kombëtares Millo, Xhumba, Bellai, Haxhi, vlerat e të cilëve njihen. Luftëtari i këtij sezoni, që u rikthye në superligë pas 4 sezonesh mungesë në të, ku u kualifikua i 4 ti, pas gjysmës së kampionatit, dhe skuadrat e fatit të tij, Flamurtarin, Apolonia, Kastrioti, i ka nën vete në renditjen provizore. Por kampionati ka edhe 16 javë...
Formimi, si gjithmonë, me vonesë
Hyrja në superligë u konsiderua sukses, që natyrisht është, por doli problemi që futbollistët që e arritën këtë nuk do të ishin në gjendje ta mbanin në superligë. Kështu që duheshin bërë përforcime. Pas shumë përpjekjesh, edhe pse kampionati kishte filluar, ekipi u kompletua me ato forca që mbaruan pjesën e parë të tij. Kështu, nga Elbasani u kthye në ekipin e vetë Nora dhe po ashtu nga Besa, F.Braho, dhe më tej erdhën jogjirokastritët, Dibra, Ndoja, Lamaj, Hasalla, Stafa, Bejollari, madje edhe afrikani Simo. Po ashtu, pas ndeshjes së parë trajner i Luftëtarit u caktua Ilir Spahiu, ndërsa Hysi me Cikon mbetën ndihmës të tij.

[wxz]

Me angazhimin dhe kujdesin e vetë kryebashkiakut Flamur Bime u krijua bordi i donatorëve me forcë kryesore Bashkinë e Gjirokastrës dhe biznesmenët Mihal Delijorgji e Qazim Muho. Kështu u bë i mundur edhe forcimi i Luftëtarit, ndërkaq sekretar klubi u emërua Eduard Pesha me aftësi organizative. Pati dhe ka edhe sponsorë të tjerë. Tani Luftëtari është në tratativa për 2 3 përforcime të reja për të përballuar me sukses pjesën e dytë të kampionatit.
Sindroma "muret e shtëpisë"
Luftëtari jashtë fushe arriti vetëm dy barazime, pra nuk e ka marrë shijen e fitores. Por jo vetëm aq, edhe tri ndeshje miqësore që luajti kohët e fundit i mbylli pa sukses jashtë Gjirokastrës, me dy humbje e një barazim. Pra, me sa kuptohet, gjithë forcën e merr nga "muret e shtëpisë". Po si do të vazhdojë në kampionat? Më së fundi, mbërriti lajmi i mirë se Luftëtari fitoi jo vetëm brenda fushe, por edhe jashtë shtetit, tek mundi në Ulqin Lushnjën. Le ta quajmë ogur të mbarë.
Pesë ndeshjet e "ferrit" në vazhdim
Kanë mbetur edhe 5 ndeshje për mbylljen e fazës së dytë, që do të fillojë më 3 shkurt, dhe Luftëtari në fushën e vet do të presë Tiranën dhe Elbasanin, ku e para do që të shpallet kampione dhe i dyti është kampioni në fuqi, tek kërkon të paktën vendin e dytë. Jashtë fushe do të ndeshet me Besën, Shkumbinin, Kastriotin, që vërtet i ka ndër vete, por që nuk duan të dalin nga superliga, pra një kalendar që tremb.
Donatorët, të gatshëm për gjithçka
"Triumvirati" Bime Delijorgji Muho, me sa është deklaruar, ka vënë në dispozicion të stafit të ekipit gjirokastrit disa futbollistë, madje dhe të huaj, për t'i provuar dhe për të marë më cilësorët për vazhdimin e kampionatit. Tifozët gjirokastritë presin me ankth kthimin e Luftëtarit për të parë nëse "armata" që do të kthehet nga Ulqini do të jetë më e pasur, më e fortë, pra duan të shohin blerjet e reja, të cilat ende nuk janë bërë.
Elementi i ri vendës
Sipas opinionit gjirokastrit të futbollit dhe të disa specialistëve, disa futbollistë vendës, që si të thuash janë në fillim të karrierës së tyre, si Shameti, Bistri, Braho, Shenaj, Dhima, Stoja, Zholi, Sinani e ndonjë tjetër, mund të përbëjnë kontigjentin vendës për të ardhmen, që patjetër duhet të zgjerohet edhe nga ekipi i të rinjve. Duke e gërshetuar me eksperiencën e Novit dhe të Norës, ekipi i Luftëtarit mund të pretendojë shumë më tepër në të ardhmen.
Perspektiva dhe ambiciet e trajnerit
Ambiciet e trajnerit Spahiu dhe të bashkëpunëtorëve të tij, Hysi e Ciko, rezultatet premtuese të pjesës së parë, përgatitjet e kryera dhe që vazhdojnë, blerjet e reja që shpresohet se do të realizohen dhe do jenë të spikatura, përbëjnë një garanci se Luftëtari, edhe pse kontradiktor në arritjet e tij në vartësi të faktorit fushë, qëndrimin në superligë që pretendon do ta realizojë. Por vëmendja e drejtuesve, shto këtu edhe trajnerin Spahiu të palodhur, nuk është vetëm për këtë sezon, por edhe në ata në vazhdim, duke mos diskutuar vetëm qëndrimin në superligë, por të pretendohet më shumë.

[wxz]

Fierakët i janë rikthyer përsëri ambienteve të aneksit të stadiumit "Loni Papuçiu" për të filluar stërvitjet e javës. E veçanta e djeshme ka qenë se nga drejtuesit e skuadrës u konfirmuan dy futbollistët maqedonas, Mickov dhe Jakimovski, si pjesë përbërëse e skuadrës fierake. Ata kanë udhëtuar drejt shtetit fqinj për t'u pajisur me dokumentacionet e nevojshme që do të homologohen pranë FSHF së nga klubi bardhëjeshil. Ka qenë takimi përgatitor i zhvilluar në Ballsh që ka nxjerrë në dritë lojën e pëlqyeshme të këtyre dy futbollistëve, të cilët, sipas informacioneve që kemi, kanë një karrierë të mirë në futbollin maqedonas. Në takimin përgatitor që Apolonia e fitoi 1 0 me skuadrën ballshiote janë aktivizuar edhe dy futbollistë nga Afrika. Bëhet fjalë për nigerianin Charls, që u aktivizua në repartin e sulmit, i datëlindjes 26 korrik 1985, i aktivizuar më parë në Nigeri dhe ganezin Yakubu Nuru, lindur më 25 mars 1987 dhe i aktivizuar në Unaire të Ganës. Për këta dy futbollistë ende nuk është dhënë ndonjë vlerësim nga drejtuesit e skuadrës, pasi ata kanë vetëm pak kohë me skuadrën, por dje ata kanë vijuar stërvitjen me grupin tjetër të skuadrës, që dje ka pësuar një tjetër tkurrje. Përfundimisht janë lajmëruar për largim nga skuadra tre futbollistë të tjerë. Bëhet fjalë për portierin Hazizi, mbrojtësin tiranas Bega dhe fierakun 20 vjeçar Bratja. Megjithëse nuk jepen detaje lidhur me largimet e fundit të futbollistëve nga kjo skuadër, tashmë është e sigurt se për "plangprishësit" presidenti Koço Kokëdhima po përdor politikën e largimeve të buta dhe pa zhurmë. Bojkoti i zhvilluar në takimin me Flamurtarin tashmë ka viktimat e veta, të cilët nëse nuk zëvendësohen me futbollistë të tjerë, pa dyshim që do të krijonte një boshllëk jo të vogël. Por nëse nesër pranë skuadrës do të mbërrijë një duzinë futbollistësh nga Brazili, do të jetë verdikti i trajnerit Andrea Marko që do të vendosë nëse futbollistët e rinj do të jenë të vlefshëm për skuadrën. Megjithëse deri më 31 janar ka ende kohë për të kryer federimet, për trajnerët kjo nuk mjafton, sepse së paku kolaudimi i skuadrës kërkon më tepër kohë. Blerjeve të Zendelit, Çukos, Mickovit dhe Jakimovskit pa dyshim do t'i shtohen në ditët në vazhdim edhe ato të Udekes, apo ndonjë futbollist tjetër, për të cilët ende nuk është dhënë një visto zyrtare. E rëndësishme është që diçka pozitive po lëviz te skuadra e trajnerit Marko, e cila nesër do të zhvillojë takimin tjetër përgatitor ndaj Cakranit, kampion i kategorisë së dytë në grupin e parë. Ishte lajmëruar pak ditë më parë që kjo ndeshje do të luhej në qytetin e Patosit për shkak të punimeve në stadiumin e Cakranit, por dje përfundimisht është konfirmuar fusha e "Loni Papuçiut" për zhvillimin e kësaj ndeshjeje nëse do të jetë kohë e mirë. Në të kundërt, kjo ndeshje do të luhet në aneksin stërvitor të këtij stadiumi.

[wxz]

Mbrojtësi kosovar i vlerëson miqësoret e ekipit kavajas jo nga rezultatet, por nga paraqitja.


Gjendja mjaft e mirë e Besës në këtë fazë përgatitore nuk është shoqëruar me rezultatet teknike të pritshme. Po çfarë nuk ka shkuar në këto miqësore në lojën e Besës? Çfarë mendon mbrojtësi kosovar Dragusha lidhur me këtë fakt? Çfarë përbën primare për Albanin në momentin që kalon Besa? A ka ndopak qejmbetje Dragusha se pse nuk është thirrur nga trajneri i kombëtares, Oto Bariç? Për të gjitha këto ja përgjigjet nëpërmjet linjës telefonike nga Ulqini të qendërmbrojtësit kosovar Alban Dragusha:
Dy miqësore dhe asnjë fitore për Besën në Ulqin. Si i gjykoni?
Atë që trajnerët vlerësojnë më pak, sipas meje, është rezultati në një miqësore. Mjafton t'ju kujtoj se Partizani na mundi neve dhe Teutën thellë. Vallë kujtoni se kjo është diferenca reale në cilësi loje midis këtyre klubeve? Trajneri ynë Bici ka realizuar mjaft zëvendësime në të dy takimet, duke u dhënë mundësi të gjithëve të tregojnë vlerat e tyre. Një motiv tjetër i mungesës së fitores është edhe kujdesi i secilit prej nesh për të mos u dëmtuar. Mos harroni se këto miqësore janë kryer gjatë marrjes së ngarkesave fizike me dy seanca stërvitore në ditë.
Po në tërësi si i gjykoni përgatitjet e ekipit tuaj?
Ka një angazhim model të të gjithë futbollistëve. Secili mundohet të përfitojë sa më shumë për formën e tij në këto ditë ulqinake. Nga ana tjetër, trajneri Bici ia ka bërë të qartë të gjithë grupit se do të luajë ai që është stërvitur më mirë dhe që do të bindë stafin. Duke filluar nga porta, ku Mustafa e Dura po djersijnë, deri te mesfusha, ku tashmë me ardhjet e reja një vend në formacion kërkon tjetër paraqitje.
Po vetë Albani a ndihet më i sigurt në lojën e tij?
Nuk jam aq modest të pranoj se kjo fazë ka pasur ndonjë ndikim të madh te forma ime. Për formën time sportive unë investoj në stërvitje e disiplinë gjatë gjithë vitit. Mund të saktësoj se Albani në këto ditë në Ulqin po stërvitet për t'u përshtatur me variantet e ndryshme taktike që po aplikon trajneri Bici. Më shumë se për gjithçka Besa ka nevojë për forcimin e lojës në grup. Ishte kjo, sipas meje, dobësia kryesore e ekipit në vitin 2006, pasi elementët nuk munguan dhe as që mungojnë.
Ndërsa Kraja ka shprehur hapur keqardhjen për mosthirrjen nga trajneri Bariç, po Dragusha ka diçka për të shtuar?
Ajo që më bashkon me Krajën është gjykimi se Bariçi është nisur vetëm nga renditja e Besës në këto 17 javë kampionati. Them kështu pasi besoj se kam dhënë më të mirën time, pavarësisht lojës apo rezultateve të ekipit. Kjo nuk më pezmaton edhe aq, pasi besoj se këtë vit Kosova fiton pavarësinë dhe vendi im me siguri është me ngjyrat e Kosovës sime. U thirra në ekipin kombëtar të Kosovës dhe mjafton kjo që Bariçi të më jepte një mundësinë të tregoja edhe para tij se sa vlej.
Do t'jua shtojë kjo "inatin" që me fillimin e kampionatit të jeni akoma më mirë me lojën tuaj?
Për momentin Besa mbetet kombëtarja ime. Dje Elbasani plot të drejtë thoshte: Dede, Elbasani është kombëtarja jote! Besoj se kjo do të shkonte edhe për mua. Nuk jam në moshë të madhe që të pezmatohem. Rezultatet pozitive të Besës në pjesën e mbetur të sezonit do të ishte ajo çfarë do të më gëzonte më shumë. Dragusha ju garanton se do të mbetet gjithnjë i angazhuar me shpirt për fitoret e Besës. Prania e mjaft patriotëve të mi ma shton moralin dhe dëshirën për punë.

[wxz]

Zëvendëstrajneri i verdhebluve thotë se me këtë mentalitet dhe grup që ka ekipi mund të shkojë edhe te titulli.

Në një intervistë për "Sportin shqiptar", zëvendëstrajneri i Elbasanit, Ilirjan Filja, është shprehur se ekipi i tij mund të shpallet sërish kampion i Shqipërisë, pavarësisht se Tirana është shkëputur nga verdheblutë. Filja komenton edhe ecurinë e fazës përgatitore në Malin e Zi, konsolidimin e grupit dhe përshtatjen e të ardhurve në merkaton e fundit.
Keni një javë në Malin e Zi dhe nuk keni gjetur një kundërshtar për miqësore. Pse?
Nuk ka asgjë për t'u çuditur. Ekipe ka plot, por deri tani stafi drejtues, me në krye trajnerin tonë Gëzdari, e ka parë të arsyeshme të përqëndrohemi totalisht te stërvitja. Nuk ka se si të mendojmë për miqësore, kur në fillim duhet të shikonim gjendjen e futbollistëve të rinj që kanë ardhur gjatë kësaj merkatoje. Por edhe ndeshjet miqësore i kemi planifikuar.
Elbasani në merkato nuk është se ka bërë shumë blerje. Do të ketë të tjera afrime?
Unë dua të shtoj dy gjëra për merkaton, se afrimet e Patushit dhe Periçit bashkë me Tikon vlejnë shumë. Mund të them se Elbasani e ka shfrytëzuar në maksimim merkaton. Gjithashtu kemi afruar edhe dy futbollistë nga Kosova, Nallbanin, që do të jetë lider i mesfushës, dhe mbrojtësin Papuci, i cili ka premisa për të ardhmen. Por gjithsesi, merkatoja nuk është mbyllur ende, kështu që Elbasani ka kohë për të menduar edhe për këtë gjë.
Objektivi do të jetë Kupa UEFA, apo besoni ende te titulli?
Elbasani ka një ekip që tashmë e ka fituar mentalitetin e kampionit. Kemi tre vite radhazi që jemi mësuar me trysninë e të qenit i pari, kështu që edhe grupi i futbollistëve që kemi afruar ka eksperiecnë për të luftuar deri në momentin e fundit. Sigurisht që Kupa UEFA është një objektiv i rëndësishëm, por edhe titulli kampion mund të arrihet.
Kur do ta zhvilloni takimin e parë miqësor?
Këtë javë me siguri që do të zhvillojmë edhe takimin e parë miqësor. Jemi në kontakte me kampionen e Malit të Zi, kështu që këtë javë Elbasani do të tregojë më së miri edhe vlerat e tij në një ndeshje miqësore. Forma e futbollistëve të Elbasanit është tepër e mirë, kështu që jam optimist se edhe në miqësore djemtë tanë do të tregojnë të njëjtat vlera.
Në media janë përhapur fjalë se Laze po synon sërish Bejzaden, pasi sulmuesi francez që u fol kohë më parë duket se nuk do të vijë. Besoni se do të rikthehet "Arusha"?
Këto janë fjalë merkatoje. Bejzade është një futbollist i rëndësishëm për çdo ekip. Dëshira jonë është që ta kemi sërish në grup, por kjo nuk varet nga ne. Pastaj me merkaton merret presidenti Laze, nuk mund të them asgjë më tepër. Ne si staf do ta presim me krahëhapur Skerdin në qoftë se rikthehet.

[wxz]

Sulmuesi durrsak shprehet se ekipi ka sulmues dhe mesfushorë që mbushin boshllëkun e Danielit.

"Sulmi i Teutës do ta mbushë boshllëkun e largimit të Daniel Xhafajt." I këtij mendimi është fantazisti i ekipit të "djemve të detit", Bledar Mancaku, sipas të cilit largimi i Xhafajt përbën një problem për Teutën, por kjo nuk do të thotë që sulmi nuk do të dijë të tregojë veten në kampionat. Në një intervistë për "Sportin shqiptar", Mancaku komenton atmosferën pas përfundimit të fazës përgatitore dhe sfidat e vështira në kampionat dhe në kupë që e presin Teutën.
Si ndihet vija sulmuese pa golashënuesin më të mirë?
Në fakt, mungesa e një futbollisti të klasit të Danielit është një boshllëk për ne, por mendoj se do të dimë që ta mbushim këtë boshllëk, duke dhënë maksimumin në fushën e lojës, pa harruar që kemi edhe mbështetjen e një mesfushe që di të shënojë.
Çfarë humbet sulmi i Teutës me largimin e këtij futbollisti?
Humbet finalizuesin, por unë mendoj se fakti që unë dhe Kuli do të kemi mundësinë për të luajtur më pranë portës, do të jetë një nga mundësitë e zgjidhjes së këtij problemi.
A mendoni se Danieli e la në baltë Teutën?
Jo, Danieli dha shumë për Teutën, por duhet të jemi realistë se në futbollin profesionist futbollistët synojnë që të arrijnë ekipe të një klasi më të lartë. Ne si ekip i urojmë që të bëjë më të mirën me ekipin ku luan.
E dini se shpresat tashmë janë varur te dyshja Mancaku Kuli?
Nuk jemi vetëm ne, pasi mund të ketë edhe të tjerë, por mendoj se me Kulin do të bëjmë gjëra të mira në këtë pjesë të sezonit. Kuli është një futbollist që po tregon se është ndër sulmuesit më të mirë në kampionat. Pastaj ne kemi një mesfushë më cilësore tashmë dhe natyrisht edhe ajo do të jetë protagoniste.
Ka rrezik që mungesa e konkurrencës ta ulë nivelin e sulmit?
Nuk mendoj kështu. Me sa di unë, në rast të një largimi përfundimtar të Danielit, stafi po mendon për afrimin e ndonjë futbollisti tjetër. Kjo besoj se do të shtonte konkurrencën.
A mendoni se me një mbipopullim në Ulqin ekipi nuk mori maksimumin?
Jo, mendoj të kundërtën. Ka qenë një nga fazat stërvitore më të mira.
Ju ka lënë një shije të hidhur humbja me Partizanin?
Jo, ishte thjesht një ndeshje stërvitore, ku nuk kishte shumë rëndësi rezultati.
E ka ndryshuar mënyrën e lojës së Teutës largimi i Xhafajt dhe afrimi i Shkëmbit?
Them se po. Eshtë larguar një sulmues tipik në variantin taktik të ekipit dhe është afruar një mesfushor po tipik në mesfushë.
Do të ketë Teuta tashmë një galashënues të ri?
Them se po. Uroj që ky të jetë Kuli.
Mendoni se përballja me Tiranën nuk është në momentin e duhur?
Unë mendoj të kundërtën. Eshtë pikërisht momenti i duhur për të treguar veten. Do të jetë një ndeshje për "jetë a vdekje".
E përcakton kjo ndeshje titullin?
Kjo ndeshje do të përcaktojë nëse do të luftojmë për vend të parë apo të dytë.

[wxz]

Nga data 18 dhjetor deri më 21 janar, 28 trajnerë kanë ndjekur një kurs për t'u pajisur me licensen "B" të UEFA-s. Njëri nga këta ka qenë edhe dinamoviti Ilir Bozhiqi, i cili në përfundim të kursit njëmujor u kompletua me licensën e drejtimit në fjalë. Tashmë radhëve të stafit trajnues të Dinamos u shtohet edhe grada e sapomarrë e trajnerit Bozhiqi. Iliri është përgatitësi i portierëve të Dinamos dhe gjatë gjithë kohës i duhet të punojë me të paktën katër të tillë, si Ilion Lika, që është edhe pjesëtar i ekipit kombëtar, Llazi Gjika portieri i dytë, Alban Hoxha që stërvitet me blutë, por luan në Cërrik si dhe disa portierë të rinj, si Doku, apo ata të ekipeve zinxhir të Dinamos. "Kursi njëmujor ishte një eksperiencë e mirë për të gjithë pjesëmarrësit, pasi mendoj se në të vërtetë morëm disa gjëra të mira. Unë dhe të gjithë të tjerët patëm mundësi të përfitonim nga leksionet dhe praktikat e lektorëve të pranishëm, ku spikatnin dy italianët, Franko Ferrari dhe Ferreto Ferreti,"- është shprehur trajneri i sapodiplomuar me licensën "B" të UEFA-s, Ilir Bozhiqi.

[wxz]

- E hëna ka nisur përsëri fuqishëm për blutë, pasi edhe dje dinamovitët kanë kryer dy seanca stërvitore dhe trajneri Jupi po mundohet që kësaj jave t'u japë futbollistëve dozën e fundit të mbingarkesës.
- Pasditja ka qenë më shumë e fokusuar mbi tre lojtarët e huaj që janë në provë, pasi trajnerët Jupi dhe Mergjyshi kanë mbajtur në fushë vetëm një pjesë të lojtarëve që do të përdoreshin në testin e dy kroatëve dhe boshnjakut. Pjesa e mbetur e dinamovitëve, pasi kreu nxehjen në fushë, u drejtua drejt sallës së forcës.
- Llazi Gjika, portieri i dytë i bluve të kryeqytetit, vazhdon të jetë larg stërvitjeve të ekipit, pasi "gardiani" akoma është i sëmurë dhe po kryen mjekimet e nevojshme.
- Përgatitjen e pasdites së djeshme të Dinamos e ka ndjekur edhe zv.presidenti i bluve, Avni Braçe, i cili ka dashur që t'i shikojë nga afër të tre lojtarët që presin të veshin fanellën dinamovite. Gjithashtu, prezent në stërvitje ka qenë edhe menaxheri i tre lojtarëve ballkanas, Idriz Sulejmani.
- Ilir Rexha, ndihmësi i mjekut Asllan Kasa, dje ka pasur shumë punë, pasi disa herë i është dashur që të hyjë në fushë për të mjekuar dinamovitin e ri Bejtia, i cili bënte pjesë në grupin që testonin të huajt. Derisa të kthehet kontigjenti blu i kombëtares, në të cilën bën pjesë edhe mjeku dinamovit Kasa, Ilir Rexha është i detyruar që të punojë i vetëm.
- Fati i miqësores së planifikuar për sot midis Dinamos dhe Erzenit është në dorë të tre futbollistëve të huaj, pasi nxitimi i tyre mund ta shtyjë ndeshjen e programuar për një ditë më vonë.

[wxz]

Shkëlzen Rustami, një nga mesfushorët veteranë të ekipit të Kastriotit, duket se vazhdon të jetë optimist për ekipin edhe më 2007 ën. Sipas tij, edhe të ardhurit po japin kontributin e tyre, duke bërë që ekipi të forcohet akoma më shumë, duke rritur oreksin për t'u ngjitur në klasifikimin e përgjithshëm. "Fazën e parë ekipi krutan e ka nisur me jo mirë. Kjo pasi lojtarët nuk ishin akoma në kondicionin e tyre fizik dhe nuk arritëm të gjenim gjuhën e përbashkët për të kombinuar. Edhe përse kemi zhvilluar pothuajse në çdo takim ndeshje të mira, rezultatet na munguan, pasi nuk arrinim të shënonim. Megjithatë, ekipi filloi të ngrihej gradualisht, të dilte në lojën e tij dhe bëmë një kthesë të madhe, duke fituar brenda fushës dhe jashtë saj, pa harruar edhe disa barazime. Mund të them se gabimet e fazës së parë për mua dhe Kastriotin janë një kapitull i mbyllur dhe janë harruar, ndërsa do të kërkojmë që në çdo takim të japim e të kërkojmë të marrim maksimumin," është shprehur Rustami. Kastrioti, sipas Rustamit, nuk mund të shikohet më si një ekip debutues në superligë, por një ekip i cili kërkon të radhitet ndër ekipet më të mira. Ndërsa për sa i përket largimit të Abazajt, ai thotë se në ekip nuk ka lojtarë të pazëvendësueshëm. "Më vjen keq që iku me shumë zhurmë dhe nuk gjeti mënyrën e duhur dhe kohën, pasi ai e filloi dobët kampionatin dhe pas mesit të fazës së parë hyri në lojën e tij. Them se ekipi ka akoma nevojë për të, por e përsëris, askush nuk është i pazëvendësueshëm," përfunon mesfushori i Kastriotit, Shkëlzen Rustami.

[wxz]

Mesfushori bardheblu, edhe pse i kërkuar nga ukrainasit e Krivbas Krivirogut, ka të tjera plane.


Për mesfushorin Ervin Bulkun, përgatitorja që po zhvillohet në Turqi, po i shërben skuadrës për të bërë korrigjimet e fundit përpara rifillimit të kampionatit. 25-vjeçari sheh si problem të vetëm të Tiranës, vetëkënaqësinë e mundshme, e cila është rrjedhojë e fitoreve në sfidat me kundërshtarët direkt. Sipas tij, nëse në ndeshjet e mbetura nuk do të shfaqen shenja neglizhence, titulli kampion mund të arkivohet disa javë përpara mbylljes së garës. Ervin Bulku bën të ditur për "Sportin shqiptar", se nga ana e stafit drejtues janë krijuar të gjitha kushtet moderne, për një fazë përgatitore dinjitoze. Fitorja 2-1 ndaj Istambulsporit tregoi se bardheblutë këtë edicion do të jenë sërish dinjitozë edhe në kupat europiane. "Prej 8 ditësh po zhvillojmë një stërvitje intensive në Antalia, e cila mendohet të jetë baza e suksesit tonë për ndeshjet që na presin. Angazhimi është total nga ana e të gjithë lojtarëve, përfshi këtu edhe blerjet e fundit, çka sigurisht i ka dhënë optimizmin e duhur stafit drejtues. Për sa u takon kushteve të stërvitjes, apo ato të hotelit, nuk bëhet fjalë që të diskutohen, ku të gjithë jemi të kënaqur. Problemi i vetëm, nëse mund ta quanim kështu, është vetëm largësia me familjarët,"- deklaron numri 8 i bardhebluve.
Në sfidën e së enjtes përballë Istambulsporit, Ervin Bulku luajti për herë të parë me Hetlem Çapjen në qendër të mesfushës, ku duhet thënë se të dy funksionuan shumë mirë në këtë repart delikat. Elbasanasi, i bashkuar vetëm ditët e fundit me kryeqytetasit, përveçse kreu një volum të madh loje, u shfaq edhe si golashënues, kur barazoi golin e Baljiçit. Për Bulkun, vlerat e Çapjes njihen nga të gjithë, pasi ai kujton këtu kontributin e dhënë prej tij në shpalljen kampion. "Me ardhjen e Çapjes, jemi forcuar edhe më shumë në mesfushë. M'u bë shumë qejfi që ai shënoi gol që në takimin e parë me fanellën bardheblu, çka do t'ia lehtësojë ambientimin në vazhdim. Përveç tij, duhen përmendur edhe blerjet e tjera, si A.Duro, Turdiu, Rrapi apo Abazaj, të cilët do të shtojnë konkurrencën brenda grupit. Kështu siç jemi, mendoj se Tirana është mjaft e fortë dhe kundërshtari i vetëm që mund të ketë është vetëkënaqësia. Në jo pak raste na ka ndodhur që jemi goditur, kur kemi kaluar të parët në avantazh dhe më pas në fund gjërat janë përmbysur,"- shton më tej mesfushori shkatërrues i Tiranës.
Me të mbërritur në kryeqytet më datë 29 janar, kampionëve të dimrit u duhet të mendojnë për sfidën e radhës përballë Teutës. Durrsakët janë ndjekësit më të afërt, me 6 pikë diferencë, dhe është pikërisht kjo arsyeja që ky 90-minutësh të intrigon. Në këtë kampionat, në ndeshjet e luajtura në stadiumin "Qemal Stafa", Tirana i ka fituar të gjitha pikët e mundshme, por duket se prova e së vërtetës do të jetë ndaj djemve të ish-trajnerit Sulejman Starova. "Për ekipin e Teutës do të fillojmë të mendojmë sapo të kthehemi në kryeqytet. Sigurisht që do të jetë një ndeshje e vështirë, që do të përcaktojë jo pak në luftën për titullin kampion. Favori ynë është se do të luajmë në stadiumin ku deri tani nuk na ka thyer askush,"- përfundon komentin e tij nëpërmjet linjës telefonike mesfushori i dalluar i 22 herë kampionëve, Ervin Bulku.

[wxz]

Kampionët e Azerbajxhanit mundin 1-0 bardheblutë, që ishin të pafat në rastet e goditjeve të shtyllës nga Muka dhe Bulku.

MKT ARAS - TIRANA 1-0

Formacioni: Nallbani, Allmuça, Dede, Pisha, Abraham, K.Duro, Muka, Bulku, Çapja, Abazaj, Sinani. Trajner: Sh. Muça. (U aktivizuan Bakalli, Fish, Hajdari, Pema, A.Duro, Rrapi, Turdiu.)

Tirana humbet minimalisht 1-0 miqësoren e djeshme me kampionët e Azerbajxhanit, MKT Aras. Një gol në minutën e 65-të nga Dorosh, pas kthimit të gabuar të topit mbrapa prej Pemës, i jep mundësi sulmuesit me origjinë moldave të ndëshkojë bardheblutë. Në një ndeshje emocionuese, kanë qenë azerbajxhanasit më me fat për të fituar këtë ndeshje miqësore, sepse për Tiranën shtyllat nuk lejuan që topi të prekte rrjetën. Trajneri Shkëlqim Muça, edhe në takimin e djeshëm, preferoi të luante me modulin e lojës 4-4-2, por me ndryshimin që në formacionin e parë luajtën Dede dhe Abazaj, në vend të Hajdarit dhe Pemës. Kështu, porta iu besua sërish Blendi Nallbanit, pasi Isli Hidi bëri stërvitje të diferencuar. Në mbrojtje u aktivizuan Allmuça, Dede, Pisha, Abraham, ndërsa në mesfushë katërshja K.Duro-Bulku-Çapja-Muka. Në sulm, përkrah Sinanit luajti blerja më e fundit, Oriand Abazaj. Pjesa e parë është e mirë për tanët, që përveçse kryejnë një volum të madh loje, godasin edhe dy herë shtyllën me anë të Devi Mukës dhe Ervin Bulkut. Gjithashtu, raste të volitshme u humbën edhe nga ana e Klodian Duros dhe Hetlem Çapjes, çka bëri që pjesa e parë të mbyllej në shifrat 0-0. Në fraksionin e dytë të lojës, pikërisht në intervalin e minutave 50-55, trajneri Muça largon nga fusha K.Duron, Mukën dhe Dede, të cilët do të luajnë sot një tjetër ndeshje miqësore, këtë herë me fanellën kuqezi. Në vend të tyre u aktivizuan Pema, Bakalli dhe Hajdari. Në minutën e 65-të vjen edhe goli i parë i takimit, ku Pema gabimisht kërkon të kthejë topin te Nallbani dhe ia pason sulmuesit Dorosh, që nuk fal përballë me portën. 1-0 për azerbajxhanasit. Me kalimin e minutave, lodhja ndihet te të dy skuadrat, ndërkohë që për Tiranën bëhen edhe katër zëvendësime të tjera, duke u futur në lojë Fishi, Rrapi, Turdiu dhe A.Duro. Edhe pas këtij momenti, asgjë nuk ndryshoi në rezultat për bardheblutë, të cilët marrin leksionin e parë të humbjes për vitin 2007. Ndeshja e ardhshme miqësore e Tiranës do të jetë ajo e së enjtes përballë ekipit kombëtar, ndërkohë që një ditë përpara kthimit në kryeqytet mund të luhet ndeshja e fundit përballë ekipit ukrainas Krivbas Krivirog.

[wxz]

Në Ulqin me ekipin gjirokastrit është bashkuar edhe kroati Ivan Rançiç, i cili do të provohet nga stafi teknik.

Nën drejtimin e Ilir Spahiut, gjirokastritët vazhdojnë të stërviten me intensitet të plotë në Ulqin. Luftëtari ka tetë ditë që është shpërngulur në Ulqin, ndërkohë që gjatë qëndrimit atje ka zhvilluar edhe dy takime miqësore, me Hajduk Kulën dhe me Lushnjën. Dje ka zhvilluar stërvitjen e parë me ekipin gjirokastrit, futbollisti kroat Ivan Toni Rançiç. Ky i fundit do të provohet dhe më pas stafi teknik do të vendosë për qëndrimin e tij ose jo tek Luftëtari. Rançiç është 23 vjeç dhe luan në repartin e sulmit, ndërkohë që fazën e parë e ka zhvilluar me ekipin e kategorisë së tretë austriake, RF Vocklabruck. Ivan Rançiç është aktivizuar në 13 ndeshje dhe ka shënuar pesë gola me skuadrën Vocklabruck. Gjithsesi, sipas trajnerit Spahiu, vendimi për Rançiçin do të merret ditët e ardhshme, kur Luftëtari pritet të luajë një takim miqësor, përsëri me ekipin serb Hajduk Kula. Ndërkohë, të premten, gjirokastritët do të luajnë një tjetër miqësore, kësaj radhe me Vllazninë në Shkodër. Sipas informacioneve nga kampi bluezi, pritet me interes ardhja e dy futbollistëve të premtuar nga donatori Mihal Delijorgji. Ndërkohë, deri në këto momente blerja e vetme për gjirokastritët është mesfushori Gjergji Dhima. Ky i fundit rikthehet tek Luftëtari pas aktivizimit gjashtëmujor në Greqi, me ekipin Olimpiakos Volos. Në linjë telefonike nga Ulqini, gjirokastriti Dhima deklaron se do të japë maksimumin për ekipin e zemrës. "U riktheva në ekip pasi e ndieja që duhet të jepja edhe unë kontributin tim për qytetin, që më bëri futbollist. Periudha e aktivizimit tim tek Olimpikos Volos më vlejti shumë, sepse pavarësisht se ekipi ku luaja ishte në një kategori inferiore, atje luhej një futboll profesionist. Në skuadër kisha edhe ish-sulmuesin e Partizanit, Mashado, i cili po bën një paraqitje mjaft të mirë. Te Luftëtari nuk e pata të vështirë të ambientohesha, ndonëse ekipi ka ndryshuar shumë nga ai i vitit të kaluar. Gjithsesi, shpresoj që me lojën time ta justifikoj besimin e donatorëve dhe të stafit teknik. Do të jap maksimumin për ekipin tim të zemrës dhe besoj se në fund të kampionatit do të jemi në mesin e artë të tabelës,"- tha për "Sportin shqiptar" 21 vjeçari Gjergji Dhima.

[wxz]

Në mungesë të Bylykbashit dhe Ndrekës dhe pas largimit të Bjelokanoviçit shteron stoli.


Përgatitjet e skuadrës së kuqe në Malin e Zi vazhdojnë rregullisht, por prej andej vjen lajmi se kroati Bjelokanoviç ka ikur pa mbaruar faza. Sipas informacioneve pranë skuadrës, Ante Bjelokanoviç nuk ka arritur t'ia fitojë "zemrën" trajnerit Lika, që, me sa duket, e ka "shpallur" futbollist të panevojshëm. Ky lajm, natyrisht, nuk përbën sensacion, pasi në një periudhë merkatoje lojtarët shkojnë e vijnë dhe firmosin vetëm ata që me të vërtetë bëjnë diferencën. Problemi është se me Bjelokanoviçin drejtuesit e kuq kërkonin të mbyllnin një vrimë në mbrojtje dhe tani që ai u largua kjo vrimë vazhdon të mbetet e hapur. Sikur të mos mjaftonte mungesa e rezervave për repartin e pasmë, edhe Henri Ndreka është shumë pranë nënshkrimit me skuadrën ukrainase të Krivbasit, duke bërë që në mbrojtje Partizani të ketë lojtarë sa për të plotësuar numrin, pasi për rezerva apo për rritjen e konkurrencës as që bëhet fjalë. Partizani e nisi sezonin me një mbrojtje të kompletuar, por pa kaluar dy muaj, Alan Kardek De Souza u largua papritur bashkë me Leandron, duke i lënë me gisht në gojë drejtuesit e kuq. Largimi i Kardekut duket se do të pasohet me nënshkrimin e Henri Ndrekës me Krivbasin, duke e çuar në dy numrin e lojtarëve të repartit të pasmë që "rrjedhin" nga Partizani. Këto ngjarje e detyrojnë trajnerin Lika të bazohet të kontributi i një numri më të kufizuar lojtarësh e si pasojë në repartin e mbrojtjes mund të lindin probleme krejtësisht të parashikueshme për shkak dëmtimesh apo ndëshkimesh me kartonë të verdhë apo të kuq gjatë rrugës së gjatë të kampionatit. Të gjithë futbollistët aktualë të mbrojtjes e kanë nisur kampionatin nga stoli i rezervave, për ta fituar vendin me punë, por edhe me pak fat, pas largimit të lojtarëve titullarë si Ndreka e Kardek apo të spostimit në mesfushë të Ardit Beqirit. Problemi nuk qëndron tek cilësitë e lojtarëve aktualë, pasi me punë dhe përkushtim gjithsecili e meriton vendin e tij, por ngërçi mbetet te stoli, që mbetet krejtësisht i zbuluar. Ndryshe qëndron puna në mesfushë dhe në sulm, ku lojtarët janë më të shumtë në numër dhe trajneri ka më shumë mundësi zgjedhjeje dhe adaptimi. Megjithatë, largimi i mundshëm i Bylykbashit përsëri do t'i hapte shumë punë skuadrës. Duke përjashtuar 11 futbollistët e formacionit dhe duke mos i konsideruar të rinjtë e akademisë, numri i lojtarëve të stolit do të reduktohej në 3-4 veta, shumë pak për një ekip pretendent. Pjesa e dytë e kampionatit e gjen Partizanin me një formacion tjetër titullar, ku gjysma e lojtarëve kanë qenë të stolit të rezervave në fillim të sezonit. Faza përgatitore e Malit të Zi solli vetëm përmirësimin e formës sportive, ndërsa për sa i përket organikës ka pasur vetëm "rrjedhje". Shpresa e vetme mbetet ardhja e futbollistëve afrikanë, të cilët më parë duhet të provohen nga trajneri Lika, pastaj mund të hedhin të zezën mbi të bardhë. Por edhe nëse ndonjëri prej tyre i bind drejtuesit e kuq, do të duhet një kohë e gjatë për përshtatjen e tij me futbollistët e tjerë, që luajnë bashkë prej shumë muajsh apo vitesh.

[wxz]

Dy futbollistët e Partizanit, Dorian Bylykbashi dhe Henri Ndreka, janë shumë pranë kalimit te Krivbasi. Në miqësoren e dytë të skuadrës ukarainase, Henri Ndreka ka luajtur 90 minuta, duke pasur më shumë mundësi për t'u transferuar nga Partizani tek Krivbasi. Sipas informacioneve që vijnë nga klubi ukrainas, në miqësoren e dytë Bylykbashi nuk është aktivizuar për asnjë minutë, por nuk dihen shkaqet përse trajneri i kësaj skuadre e ka marrë këtë vendim. Në kampin e kuq nuk ka asnjë lajm për nënshkrimin e dy titullarëve e me sa duket edhe për disa ditë Bylykbashi dhe Ndreka do të vazhdojnë provën e filluar që para nja jave.

[wxz]

Sot dhe nesër djemtë e Likës do të zhvillojnë seancat e fundit stërvitore në tokën malazeze. Sipas programit të paracaktuar, të mërkurën do të zhvillohet vetëm një seancë stërvitore dhe skuadra do të përgatitet për kthimin në shtëpi. Të enjten Partizani do t'i kthehet stërvitjes në klub, ku problem më i madh mbetet mungesa e ujit të ngrohtë në dushe për të gjithë futbollistët.

[wxz]

"Firot" në kampin e kuq do ta detyrojnë trajnerin Lika të mendojë për aktivizimin edhe të lojtarëve të akademisë, të cilët deri në këtë moment kanë luajtur vetëm në ndeshjet e kupës. Me largimin e Ndrekës dhe Bylykbashit 18-shja bazë do të plotësohet me futbollistët e rinj si Aliu, karabeci, Capo, Doda e Miska. Aktivivzimi i tyre do të varet edhe nga forma e lojtarëve titullarë.

[wxz]

Këtë fakt e kanë provuar pothuajse të gjithë lojtarët e Vllaznisë në atë Loja e rëndë e Zetës nuk ka qenë e vetmja gjatë fazës përgatitore në Mal të Zi këtë vit. Kujtojmë që ditë më parë Vllaznia luajti një takim miqësor me serbët e Banatit, takim i cili u fitua nga shkodranët 2 1. Në këtë ndeshje miqësore kundërshtari serb ka luajtur shumë ashpër, madje duke përdorur edhe fjalor në drejtim të shkodranëve.ndeshje, duke u mjekuar pas ndeshjes nga goditjet dhe shkelma e serbëve. Pjesëtarët e Vllaznisë shpresojnë që të gjitha këto ngjarje të mos kenë prapa ndonjë skenar. Ndërsa federate malazaze nuk ka reaguar fare për këto incidente.

[wxz]

Dje në drekë, më në fund ka mbërritur në Rinas sulmuesi senegalez "i prenotuar" nga Vllaznia, El Haxhi Gudjabi. Ai më në fund është bërë "i gjallë" dhe dje ka prekur tokën shqiptare, por vetëm sa e ka prekur në Rinas, sepse autoritetet shqiptare në doganën e Rinasit nuk e kanë lejuar të futet në vendin tonë. Arsyeja ka qenë dokumentacioni jo i plotë i lojtarit, çka ia ka bërë të pamundur futjen në vendin tonë. Pjesëtarë të klubit "Vllaznia", që kishin dalë për ta pritur në Rinas, janë shqetësuar në lidhje me këtë fakt, por tashmë ende nuk dihet se si do të veprohet. Bëhet e ditur se shkodranët do t'i bëjnë gati një leje-qëndrimi pranë autoriteteve tona, sepse vetëm në këtë mënyrë Gudjabi mund të hyjë në Shqipëri.

[wxz]

Ndonëse objektivi i Flamurtarit është për një renditje me 6 më të mirët, megjithatë sekretari i klubit të Flamurtarit është i kënaqur me ecurinë e skuadrës. Nga njëra anë shfaqet loja e bukur e kuqezinjve vlonjatë, por edhe kthimi në shkallët e stadiumit të sportdashësve. Nga ana tjetër evidentohen luhatjet në rezultatet e skuadrës dhe zëvendësimi i 2 trajnerëve për uljet e ngritjet e herëpashershme në renditje. Pikërisht për këto anë të kundërta dhe objektivat e skuadrës shprehet sekretari Ilir Metaj në intervistën për "Sportin shqiptar":
Pas 17 javë kampionat, Flamurtari është me 21 pikë. E vlerësoni të pranueshëm vendin e 8 të në klasifikim?
Në fillim të kampionatit Flamurtari kishte si objektiva paraqitjen e një futbolli të bukur, rikthimin e sportdashësve në stadium dhe renditjen në 6 vendet e para. Mendoj se të tre objektivat janë realizuar, pasi për momentin skuadra ndodhet në vendin e 8 të, por sipas planeve tona dhe ecurisë të ekipit, jemi të bindur se do ta arrijmë vendin e 6 të.
Në 5 ndeshjet e para Flamurtari e nisi keq kampionatin, por dhe më tej rezultatet e tij kanë qenë me ulje-ngritje. Pse?
Skuadra jonë e ka nisur kampionatin tamam si një ndër ato të cilat vijnë nga një kategori inferiore te superliga. I rëndësishëm është fakti se si reagon skuadra ndaj vështirësive. Eshtë e sigurt se impakti ka qenë pozitiv, pasi Flamurtari njihet për karakterin e fortë të djemve të tij. Patëm disa luhatje rrugës, por kemi objektivat tona, që absolutisht janë të realizueshme.
E vlerësoni të dështuar merkaton e lojtarëve për këtë sezon, pasi deri tani tre, nga pesë afrikanë, i keni përjashtuar nga skuadra?
Natyrisht, gjatë sezonit veror ata që u morën me përforcimet në skuadër mund të organizonin një merkato më të mirë. Kjo ka ndodhur për mungesën e eksperiencës sonë, pasi vinin nga një kategori inferiore dhe nuk i njihnim si duhet cilësorët e superligës, por u munduam të afronim lojtarët, të cilët ishin provuar më parë. I afruam afrikanët për të ndërtuar një skuadër sa më të mirë, por ata na kanë zhgënjyer pjesërisht.
Në 17 javë kampionati janë vendosur tre trajnerë, si Canaj, Memushi, Ruci. Kush do të ishte trajneri ideal për të drejtuar Flamurtarin nga plejada e trajnerëve vlonjatë në vite?
Trajneri ideal është ai që arrin më shumë suksese në historinë e skuadrës. Unë nuk mund të lë pa përmendur vlerat e trajnerit Leonidha Çurri, ose Vasil Rucit, i cili e ktheu përsëri Flamurtarin në superligë. Jemi të sigurt, duke u nisur nga Ruci, se po vazhdojmë rrugën e suksesit, ku e kishim nisur një vit më parë.
Jeni i bindur se Flamurtari do të rreshtohet ndër 6 më të mirët, apo do të rrezikohet për të zbritur tek inferiorët?
Flamurtari pretendon të ngjitet më lart se vendi i 6 të dhe jo të rrezikojë. Absolutisht jam i bindur se skuadra do të jetë ndër 6 më të mirat në përfundim të kampionatit.
Delaini dhe Roxheri kanë një kontratë njëvjeçare me Flamurtarin, por nuk janë kthyer në skuadër që nga fundi i dhjetorit. Si do të veproni me ta?
Delaini është kthyer ditën e diel në Vlorë, pas një testimi jashtë shtetit. Ai ka filluar stërvitje të diferencuar me inspektorin e klubit të futbollit, Adrian Nini, me dy seanca në ditë dhe do të bashkohet me Flamurtarin më 25 janar. Të jeni të sigurt se Sasha do të integrohet plotësisht me grupin. Ndërsa Roxheri kuptohet që është i vonuar dhe mungesa e tij do të dënohet me gjobë, ose mund të shkojmë edhe më tej me masat disiplinore.
Merkatoja e Flamurtarit kalon nga afrikanët te kosovarët Kyçyku dhe Hashani. Do të ketë të tjera përforcime deri në fund të janarit?
Për momentin do të mjaftohemi me 2 lojtarët kosovarë në merkaton e janarit, të cilët për emergjencë i plotësojnë mangësitë që ka skuadra. Merkatoja e këtij sezoni na shërben si një eksperiencë për të mos gabuar në sezonin e ardhshëm.
Eshtë folur nga stafi teknik i skuadrës se Flamurtari sezonin e ardhshëm do të ndërtohet tërësisht nga lojtarë vlonjatë. Eshtë përgatitur terreni, apo është thjesht dëshirë?
Presidenti ynë, Shpëtim Gjika, Vasil Ruci dhe unë kemi përgatitur një plan perspektiv 3 vjeçar për të ndërtuar një skuadër ndoshta të ngjashme me Flamurtarin e lavdishëm të viteve '80 '90. Qëllimi është që gradualisht të integrojmë në skuadër lojtarë të rinj të talentuar së bashku me grupin e lojtarëve aktualë të moshës 18 25 vjeç. Për sa i përket termit "vetëm vlonjatë", kuptimi i saj është që të gjithë ata që vijnë duhet t'i afrohen mentalitetit vlonjat të futbollit.

[wxz]

Ekipi vlonjat fiton me ekipe të forta, por gabon me disa të tjera, që pasojnë edhe rokada trajnerësh të njohur.


Ndonëse vlerësohet nga specialistët dhe trajnerët si një skuadër që luan futboll të bukur, kurba e rezultateve të Flamurtarit në 17 javë të superligës ka njohur paqëndrueshmëri. Dëshira e presidentit të Flamurtarit, Shpëtim Gjika, prej dy vitesh për emërimin e trajnerit Agim Canaj bëhet realitet vetëm në fillim të këtij sezoni. Ish futbollist i Flamurtarit, Canaj, nuk gjeti si duhet akordin e duhur me skuadrën mikse të ndërtuar me 20 vlonjatë dhe 5 afrikanë dhe që pas dy sezonesh tek inferiorët kthehet në superligë. Në fund të javës së pestë, pikërisht në ndeshjen ndaj Kastriotit, pas humbjes 1 0, Canaj largohet për në Tiranë, duke njoftuar se jepte dorëheqjen. Në 5 ndeshje trajneri Canaj arriti të fitonte vetëm ndeshjen me Apoloninë. Pra, një fitore dhe katër humbje dhe me një golaverazh 7 7. Ndonëse skuadra arriti një formë të shkëlqyer fizike, vërejtjet e Canaj për futbollistët ishin në drejtim të mungesës së profesionalizmit. Me shprehjet se "vazhdoni me mentalitetin e kategorisë së parë nga keni ardhur", "në çdo ndeshje mundni vetveten", krijuan një moment të heshtur shkëputjeje midis trajnerit e skuadrës, e cila ndikoi në aspektin psikologjik. Gjithsesi, Canaj ishte trajneri i palodhur e serioz. Pas Canajt në drejtim të skuadrës vendoset zëvendëstrajneri i asaj periudhe, Eqerem Memushi. Vetëm në 10 ndeshje pa shumë eksperiencë në detyrën e trajnerit, Memushi i Flamurtarit arrin 4 fitore, 4 humbje, 2 barazime. Pra, 14 pikë dhe golaverazh 14 12. Për të veçuar duhet të përmendim fitoren ndaj Tiranës dhe fitoren në Tiranë ndaj Partizanit 3 0. Pas humbjes në Vlorë ndaj Elbasanit dhe Teutës në Durrës, Memushi largohet nga detyra e trajnerit dhe emërohet drejtor teknik, pasi drejtori i mëparshëm teknik Përparim Lushaj largohet pranë familjes në SHBA. Gjatë kohës në detyrën e trajnerit, Memushi largoi afrikanët Sisoko e Riçard dhe aktivizoi disa prej futbollistëve të rinj, të cilët më parë ishin jashtë formacionit. Gradualisht këta të rinj janë evidentuar si lojtarë të suksesshëm në pozicionet ku luajnë. Nisur nga mungesa e eksperiencës në detyrën e trajnerit, rezultatet e arritura në 10 javët e drejtimit ndoshta për Memushin do të shërbejnë si një pikënisje pozitive në karrierën e gjatë në strukturat e futbollit. Vetëm në dy javë dhe trajneri Vasil Ruci i emëruar rishtaz merr 4 pikë, ku Flamurtari fiton me Kastriotin në Vlorë dhe barazon me Luftëtarin në Gjirokastër. Ruci është trajner kampion, i cili e ktheu përsëri Flamurtarin nga kategoria e parë në superligë. Ndonëse skuadra vlonjate ka një diferencë me dy skuadrat e fundit prej 9 10 pikësh, trajneri Ruci thekson se ndeshja ndaj Vllaznisë më 2 shkurt është vendimtare për fatet e Flamurtarit.
Merkatoja e dështuar
Flamurtari në sezonin 2006 2007 organizon një merkato të pastudiuar me kujdes. Ky është opinioni i disa specialistëve të futbollit të Vlorë, por edhe ndonjë drejtuesi brenda strukturave të klubit "Flamurtari". Në merkaton e verës 2006 anëtarë të stafit teknik dështuan në organizimin e merkatos me kroatë, sllovenë, kosovarë dhe maqedonas. U propagandua me forcë se në shtetet fqinje stafi teknik i Flamurtarit kishte gjetur "gjahun e duhur", por askush nga rreth 20 lojtarët e huaj nuk e fitoi testin njëjavor në Vlorë. Pas këtij dështimi në skuadër drejtuesit vlonjatë afrojnë 5 afrikanë dhe largojnë në drejtim të Librazhdit 6 të rinj vlonjatë. Pa përfunduar ende kampionati, drejtuesit e Flamurtarit kanë përjashtuar dy prej afrikanëve, Sisoko dhe Riçard, dhe po presin me padurim që një ditë të paraqitet Roxheri (pa adresë) për t'i drejtuar kartonin e kuq. Ende pa filluar kampionati në Vlorë, mbërriti për t'u testuar mesfushori aktual i Tiranës, Fish, së bashku me dy afrikanë të tjerë, por specialistët seleksionues vlonjatë nuk ishin në gjendje të mirë atë ditë për të vlerësuar cilësitë e tij. Mangësi të tilla sekretari i Flamurtarit, Ilir Metaj, i justifikon me mungesën e eksperiencës së stafit aktual të skuadrës vlonjate. Aktualisht në skuadrën e Vasil Rucit stërvitet vetëm Bokatola, pasi Delain ka mbërritur me vonesë në Vlorë dhe ende nuk është bashkuar me skuadrën. Në përfundim të merkatos së janarit, te Flamurtari janë afruar dy lojtarë kosovarë të nivelit të zakonshëm, si portieri Kyçyku dhe Hashani sulmues, që sipas stafit teknik, do të jenë përforcimet e fundit për skuadrën.

[wxz]

"Brenda ditës së enjte do të kemi formuar grupin që do të përbëjë Apoloninë." Kështu ka thënë trajneri tiranas Andrea Marko pak përpara fillimit të stërvitjes së ditë së djeshme. "Nesër do të zhvillojmë në shtëpinë tonë një tjetër takim përgatitor me ekipin e Cakranit, takim që do të na vlejë për të parë edhe futbollistët e ardhur," shton Marko. Edhe dje grupi i trajnerëve të skuadrës ka vijuar përgatitjet në aneksin e stadiumit, ku krahas punës tekniko fizike ka zhvilluar edhe një stërvitje taktike. Afrimi i ditës së rifillimit të ndeshjeve të superligës pa dyshim e ka shtuar ankthin e trajnerëve, pasi ende nuk është krijuar një ide e saktë për futbollistët që do të vijnë sot e në vazhdim. Gjithnjë sipas futbollistit Zheraldinjo, i cili dje është bashkuar me skuadrën, do të jenë brazilianët Jean da Silva dhe Uashington Luis Galvao, të cilët së bashku me Roshën dhe grupin tjetër do të mbërrijnë sot në aeroportin "Nënë Tereza". Do të jetë dita e nesërme për këta futbollistë, të cilët pas 48 orëve, do të jenë nën urdhrat e Andrea Markos. Bëhet fjalë për një mesfushor dhe një sulmues, të cilët nëse rezultojnë të vlefshëm për bardhëjeshilët, do t'i bashkohen Apolonisë. Me gjithë kohën e paktë në dispozicion në këtë periudhë përgatitje, tashmë futbollistët e ardhur, qoftë maqedonas, qoftë edhe brazilianë, do të jenë pasuria e vetme e fierakëve në luftën për mbijetesën në superligë. Dihet tashmë objektivi i skuadrës fierake për të qëndruar në superligë, një objektiv ky sa i vështirë, por jo i pamundur, nëse përforcimet rezultojnë të suksesshme. Themi kështu, pasi nuk mund të japim një vlerësim për brazilianët e rinj që do të jenë në skuadër së bashku me futbollistët Mickov dhe Jakimovski. Do të vijë edhe një tjetër futbollist, i cili mund ta çojë në 4 numrin e futbollistëve të ardhur nga vendi fqinj. Ndërkohë që pritej edhe afrimi i futbollistëve Emanuel dhe Udeke pranë skuadrës fierake, tashmë kjo pistë mund të quhet e mbyllur, pasi ata nuk kanë mundur të marrin dokumentet e federimit nga ish skuadrat e tyre respektive, Laçi dhe Burreli. Kështu është quajtur kapitull i mbyllur afrimi i futbollistëve afrikanë, të cilët i kanë lënë vendin nigerianit Çarls dhe ganezit Nuru, të cilët janë ende në provë te skuadra fierake. Ndoshta sot trajnerët e skuadrës mund të japin një vlerësim për këta futbollistë, të cilët nuk kanë më shumë se tri ditë që i janë bashkuar skuadrës bardhejeshile. Ditën e shtunë ata kanë pasur mundësi të provohen 45 minutat e dyta të takimit me Bylisin, por sot ndoshta do të krijohet një ide më e saktë për ta. Janë këto lëvizjet më të fundit të skuadrës së Apolonisë, që nëse rezultojnë pozitive, mund t'i japin një tjetër imazh kësaj skuadre, e cila do të kërkojë të mbetet në superligë.

[wxz]

Kosovari i verdhebluve premton se këtej e tutje do të jetë një nga protagonistët e ekipit kampion.


Në një prononcim për "Sportin shqiptar", Liridon Leci, futbollisti kosovar i kampionëve të Shqipërisë, është shprehur se kërkon që këtë vit të arrijë formën e tij më të mirë, që të të bëhet një lider i vërtetë në mbrojtjen e Elbasanit. Ndërkohë, shtatlarti nuk e anashkalon edhe një ftesë për në kombëtare. "Po stërvitem intensivisht dhe mendoj se deri tani jam shumë mirë fizikisht, por e kam të qartë që na duhet punë," thekson mbrojtësi kosovar Leci, i cili erdhi në fillim të këtij sezoni tek Elbasani nga ekipi i Prishtinës. Leci thotë se ambienti që ka gjetur në Shqipëri është tepër i mirë dhe kjo ia ka lehtësuar së tepërmi punën futbollistit në fjalë, kur shprehet: "Unë e kam thënë edhe herë të tjera që në Elbasan kam gjetur që në ditët e para ngrohtësinë e të gjithëve dhe kjo më ka dhënë shumë përparësi, por ajo që dëshiroj është që të fitoj diçka me këtë fanellë." Për kosovarin, ky vit do të jetë një provë e vërtetë për karrierën e tij sportive. "Kam luajtur edhe në Suedi dhe e di ç'do të thotë që të luash në një kampionat të rëndësishëm, por pa dyshim që këtë sezon, përveçse do të synoj që të bëj paraqitje sa më dinjitoze me Elbasanin, dua që me lojën time të arrij edhe në ekipin kombëtar të Shqipërisë," komenton Leci. Ndërkohë, në vijim të prononcimit të tij, kosovari 21 vjeçar shprehet se ekipi i tij është forcuar shumë gjatë merkatos së dimrit dhe pret me padurim startimin e kampionatit. "Gjatë fazës përgatitore në Malin e Zi ekipi mund të them se është konsoliduar shumë si në anën fizike, ashtu edhe atë teknike. Tani na duhet të punojmë edhe për këtë javë shumë që të jemi gati për takimin e parë me Partizanin, që është një ndeshje e vështirë, por jo e pamundur për t'u fituar," shton kosovari i verdhebluve. Në fund të prononcimit të tij, Liridon Leci e shikon këtë vit Elbasanin në kupat e Europës. "Afrimet e shumta të Patushit, Nallbanit, Papucit dhe Periçit do të na japin më shumë shanse për të fituar, pse jo, çdo javë. Kam besim ende edhe te titulli kampion, pavarësisht se Elbasani është shumë larg vendit të parë. Kemi bërë disa gabime në fund të fazës së dytë që nuk na falen, por besoj se këto gabime nuk do të përsëriten më, kështu që me afrimin e këtyre futbollistëve tashmë skuadra është konsoliduar së tepërmi dhe objektivat tona do të jenë të realizueshme," përfundon prononcimin e tij kosovari i Elbasanit, Liridon Leci.

[wxz]

Që "jabanxhinjtë" blu janë më të privilegjuarit tek Dinamo, tashmë dihet, por kjo u vërtetua më shumë edhe me ardhjen e dy futbollistëve kroatë dhe sulmuesit boshnjak. Shqiptarët ndaj të huajve mundohen të tregohen shumë mikëpritës, madje nuk duan t'ia dinë edhe për njerëzit e shtëpisë. Në kohën e luftës përdorej shprehja që "edhe atë pak bukë që kemi do ta ruajmë për partizanët", ndërsa në kohët e sotme tek Dinamo kjo shprehje është konvertuar në "edhe atë pak komoditet që kemi do t'ua vëmë në dispozicion të huajve". Sapo të tri përforcimet e reja kanë vendosur që të rrinë tek Dinamo, në hotelin e klubit kanë filluar lëvizjet, sepse disa dinamovitë kanë ndryshuar dhomat e tyre, pasi dhoma më e mirë do të shkonte në dispozicion të dy kroatëve dhe boshnjakut. Megjithëse ne mundohemi t'i respektojmë të huajt (kjo gjë ndodh jo vetëm tek Dinamo, por edhe te skuadrat e tjera), asnjeri nga këta nuk ka treguar deri tani se di të bëjë "vezën e kuqe" në fushën e futbollit.

Nga kampi dinamovit
- Ndeshja miqësore e planifikuar midis Dinamos dhe Erzenit ka shumë mundësi të luhet sot, por fati i këtij takimi është edhe në varësi të motit, pasi nëse koha është e mirë, takimi do të zhvillohet në Shijak, nëse ka reshje do të bëhet spostimi në kompleksin "Dinamo".
- Klevis Bejtja një nga lojtarët me moshë të re të Dinamos, por që shikohet me të ardhme në futboll, dje nuk është përgatitur me ekipin, sepse është dëmtuar gjatë përgatitjeve të ditës së hënë. Për disa ditë dinamoviti do të qëndrojë larg fushës së blertë, sepse i duhet të marrë veten nga dëmtimi.
- Llazi Gjika, njëri nga katër portierët që stërvitet me Dinamon, dje i është rikthyer stërvitjes me ekipin. Portieri ka munguar në stërvitje për disa ditë, pasi ka qenë i sëmurë. Madje edhe gjatë ditës së djeshme Gjika është paraqitur në stërvitje me temperaturë 37 e gjysmë.
- Ekipi i Dinamos dje ka kryer vetëm një stërvitje. Ajo është zhvilluar pasdite dhe të gjithë të pranishmit kanë ndjekur planin kompleks të përgatitur nga stafi trajnues.
- Ndryshe nga pjesa më e madhe e skuadrës, tre nga dinamovitët, pikërisht Enkel Alikaj, Klodian Arbri dhe Papa Diop, kanë kryer dje përgatitje edhe gjatë paradites. Të tre dinamovitë janë stërvitur nën mbikëqyrjen dhe urdhrat e trajnerit Artan Mergjyshi si dhe të drejtorit teknik, Ilir Daja. Ky program ekstra është ndjekur me qëllim që të tre futbollistët të kapin formën optimale.
- Mbrojtësi 23-vjeçar i Dinamos, Zdravko Sushak, i cili sapo ka firmosur me ekipin, shikohet si një zëvendësues ideal, madje edhe më i mirë, i ish-dinamovitit Zoran Kastel. Sipas përshtypjeve të para, mbrojtësi shtatlartë ka rënë më shumë në sy sesa dy prurjet e tjera.

[wxz]

Pas firmosjes së kontratës së dy kroatëve dhe boshnjakut merkatoja e Dinamos konsiderohet e mbyllur.


Duke filluar nga dita e djeshme, blutë e kryeqytetit e kanë përfunduar pazarin e blerjeve të futbollistëve dhe tashmë do të përqendrohen në përgatitjet e skuadrës. Të tre të ardhurit e fundit janë konsideruar të vlefshëm për skuadrën e trajnerit Redi Jupi, pasi presidenca ka firmosur me dy kroatët dhe boshnjakun. Me sa duket, turravrapi i lojtarëve ballkanas i ka detyruar drejtuesit dinamovitë që të gjejnë gjuhën e përbashkët midis palëve në mënyrë që futbollistët të veshin fanellën blu deri në fund të këtij sezoni. Megjithatë, stafi trajnues është shprehur ditën e hënë se do të ishte më e favorshme sikur lojtarët të provoheshin për të paktën dy-tri ditë. Dy mbrojtësit kroatë Goran Graniç dhe Zdravko Sushak janë menduar si të nevojshëm për të mbyllur boshllëqet që shfaqi ekipi i Dinamos në 17 javët e para. Ndërsa sulmuesi boshnjak Zoran Novakoviç është konsideruar një alternativë më shumë në repartin e sulmit. Nëse dy përforcimet në mbrojtje priteshin, ardhja e sulmuesit Novakoviç ka qenë një surprizë, pasi vija e parë e bluve dukej më e plotë se kurrë me firmosjen në fillim të janarit të futbollistëve Vangjel Mile, Ardian Nuhiu dhe Eldorado Merkoçi. Sipas drejtuesve dinamovitë, nga Dinamo nuk do të ketë largime, por që me shikim të parë shikohet një mbipopullim në repartin sulmues, pasi, përveç të lartpërmendurve, ndodhen edhe Ilir Qorri me Klodian Arbrin. Në këtë mënyrë shkon në gjashtë numri sulmuesve te blutë, megjithëse trajneri po aplikon edhe sistemimin e tyre në poste më të tërhequra. Pra, alternativat dhe konkurrenca në vijën e parë të Dinamos janë në shkallën më të lartë.
Idriz Sulejmani, shofer apo menaxheri?
Emri i Idriz Sulejmanit është i lidhur me Dinamon që në kohën kur te blutë lindi një dashuri për drejtues dhe lojtarë kroatë. Në kohën që frenat dinamovite i mori në dorë kroati Luka Bonaçiç, tek Dinamo u shfaq edhe Idriz Sulejmani si përkthyes i trajnerit. Por me kalimin e kohëve Sulejmani arriti të marrë notat e menaxherit, pasi ai sillte lojtarë nga Kroacia. Në listën e këtij bashkëpunimi hyri edhe emri i Goran Vinçetiçit, i cili nuk e pranoi zotin Sulejmani si menaxher të tij, por si përkthyes. Duke filluar nga e shtuna në darkë, tek Dinamo ndodhen edhe dy kroatë dhe një boshnjak, që kanë ardhur në shoqërinë e Idriz Suljemanit. Edhe në këtë rast u fol se ai është menaxheri i të tre futbollistëve ballkanas, por e vërteta doli ndryshe. Sipas burimeve brenda klubit, mësohet se Idriz Sulejmani nuk është menaxheri apo rekomanduesi i këtyre lojtarëve për blutë e kryeqytetit. Të tre lojtarët, Graniç, Sushak dhe Novakoviç, kanë përfunduar tek Dinamo si rezultat i marrëdhënieve të mira që ka presidenca blu me trajnerët kroatë Luka Bonaçiç dhe Zllatko Daliç. Në ardhjen e këtyre tre lojtarëve, Idriz Sulejmani, ka luajtur rolin e shoqëruesit dhe transportuesit. Por njëkohësisht ai ka bërë edhe punën e përkthyesit midis palëve, pasi i flet të dyja gjuhët, shqipen dhe serbo-kroatishten.
Boshnjaku firmos dhe largohet në atdhe
Gjatë përgatitjes së pasdites së djeshme të ekipit të Dinamos sulmuesi boshnjak, Zoran Novakoviç, nuk ka qenë i pranishëm, pasi është larguar në drejtim të atdheut të tij. Sipas shoqëruesit të sulmuesit, Idriz Sulejmani, shkaku i largimit të Novakoviçit ka të bëjë me faktin se lojtari do të shkojë të marrë dokumentacionet e nevojshme si dhe pajisjet vetjake që i nevojiten. Pak përpara fillimit të seacës stërvitore të së martës, boshnjaku ka hyrë në terrenin stërvitor të ekipit së bashku me zotin Sulejmani dhe, pasi ka përshëndetur shokët e rinj të skuadrës, është drejtuar drejt Bosnjes. Gjithashtu, një urim të ngrohtë dinamovitët kanë marrë edhe nga dashamirësi i bluve, Idriz Sulejmani, i cili u ka uruar suksese dhe u ka thënë që vendin e dytë e kanë të sigurt në superligë, pasi i pari duket disi larg për Dinamon. Nëse Novakoviçi u largua për t'u kthyer, komplet ndryshe ishte puna me dy mbrojtësit kroatë, Graniç dhe Sushak, pasi kanë ndjekur programin stërvitor të përgatitur nga trajnerët blu.
Merkatoja e bluve quhet e mbyllur
Dinamo e mbylli vitin 2006 me shumë halle, pasi gishti tregues kudo tregonte probleme. Por presidenca blu e kuptoi gabimin e fillimsezonit dhe, me t'u hapur merkatoja, nisi të lëvizë në drejtim të ndërtimit të një ekipi kompakt. Me firmosjen e dy kroatëve dhe boshnjakut, sipas drejtuesve blu, merkatoja dinamovite duhet të konsiderohet e mbyllur. Sipas administratorit të Dinamos, Ismet Saliu, bilanci i merkatos së skuadrës është pozitiv, sepse në gjirin e bluve kanë ardhur plotë gjashtë lojtarë të rinj, ku njëkohësisht duhet të merren parasysh edhe rinovimet e kontratave të dy të huajve të tjerë, Goran Vinçetiç dhe Papa Diop. Sipas drejtuesve dinamovitë, ekipi duhet të konsiderohet i plotë, sepse dy repartet problematike, mbrojtja dhe sulmi, i kanë marrë përforcimet e kërkuara. Në këtë merkato dimërore nga Dinamo janë larguar 2+1 lojtarë (El Haxhi Gudjabi, Zoran Kastel si dhe i riu Indrit Taçi) dhe janë afruar gjashtë të tjerë (Vangjel Mile, Eldorado Merkoçi, Ardian Nuhiu, Goran Graniç, Zdravko Sushak dhe Zoran Novakoviç), pra bilanci është +3.

[wxz]

Mbrojtësi i Teutës, Entonio Pashaj, mendon se ekipi durrsak nuk ka hequr dorë për të kapur vendin e parë.


"Lufta për titullin kampion mbetet e hapur." I këtij mendimi është mbrojtësi i ekipit të Teutës, Entonio Pashaj, sipas të cilit kampionati është në mes të rrugës dhe diferencat mes ekipeve janë të vogla. Sipas mbrojtësit të Teutës, veç ekipit durrsak dhe Tiranës, Vllaznia, Partizani dhe Elbasani janë fuqizuar dukshëm dhe mund t'u hapin probleme kryesuesve.
Si ndiheni tashmë që jeni rikthyer në "bazë"?
Të them të drejtën, ndihemi mirë, pasi ditët e fundit në Ulqin u dyndën shumë ekipe dhe mendoj se ishte momenti më i mirë për t'u rikthyer në Durrës.
Si po përballohet ngarkesa e lartë në stërvitje?
Them se të gjithë futbollistët po e përballojnë ngarkesën, që besoj do të vazhdojë edhe këtë javë stërvitore.
Ç'do të thotë për ju fakti që me një futbollist të larguar dhe tre të dëmtuar të pretendoni të mundni Tiranën?
Në fakt, akoma nuk dihet saktë nëse Danieli do të largohet apo jo. Së dyti, si Shkëmbi, ashtu dhe Lako e Zëre, nuk kanë ndonjë dëmtim për t'u shqetësuar. Ata do të jenë gati për sfidën me Tiranën.
A mendoni se mbrojtja është reparti i konkurrencës te Teuta?
Po, është e vërtetë që mbrojtja është një repart ku ka konkurrencë dhe sigurisht është një nga repartet më rezultative. Mendoj se atje ku ka konkurrencë, ka edhe cilësi.
Si e shpjegoni që kjo mbrojtje pësoi plot 3 gola me Partizanin?
Në radhë të parë, me Partizanin ishte thjesht një takim miqësor dhe, së dyti, mund të them se në këtë ndeshje patëm shumë mungesa, që në njëfarë mënyre ndikuan edhe në rezultat dhe mënyrën e lojës.
Ka sfidantë Tirana me 6 pikë para?
Jemi vetëm në mesin e kampionatit dhe nuk mund të thuhet që Tirana nuk ka sfidantë kur ekipet pretendente nuk kanë diferenca të mëdha. Merkatoja e dimrit ka forcuar shumë edhe disa ekipe, si Vllaznia, Elbasani, apo Partizani, që krahas nesh mund t'i hapin probleme Tiranës.
Do të ngushëlloheshit me kupën nëse nuk arrini kampionatin?
E rëndësishme është që të kapim një trofe, por gjithsesi kampionati mbetet trofeu më i rëndësishëm dhe serioz.

[wxz]

Ekipi i Teutës ka nisur stërvitjen në stadiumin e futbollit "Niko Dovana" pas rikthimit nga Mali i Zi. Trajneri Starova ka filluar përgatitjet me 2 seanca përgatitore, paradite dhe pasdite, me një stërvitje me ngarkesë të lartë. Me përjashtim të Shkëmbit, Lakos dhe Zëres, që kanë pasur probleme shëndetësore, grupi tjetër i futbollistëve është vënë nën urdhrat e trajnerit. Me ekipin është bashkuar edhe mesfushori Qazim Buna, i cili për arsye familjare nuk u bashkua me ekipin në Ulqin të Malit të Zi. Në provë te Teuta është edhe sulmuesi 19 vjeçar Blloku, i cili është aktivizuar edhe në kategorinë e dytë kroate. Ekipi do të grumbullohet në hotel "Florida" për të vijuar fazën përgatitore. Sipas burimeve nga stafi i Teutës, çështja e Daniel Xhafajt ka mbetur akoma pezull dhe deri në zgjidhjen përfundimtare të saj nuk do të tentohet për afrimin e ndonjë futbollisti tjetër në ekip.

[wxz]

Dy futbollistët e Partizanit, Dorian Bylykbashi dhe Henri Ndreka, vazhdojnë të provohen tek Krivbasi. Ata kanë qenë protagonistë edhe në miqësoren e tretë, që skuadra ukrainase ka luajtur ndaj rusëve të Spartakut. Ndreka edhe në këtë takim është aktivizuar gjatë me minutazh të plotë, ndërsa Bylykbashi është zëvendësuar në minutën e 75-të të takimit. Nga burime pranë menaxherit të lojtarëve, nuk është arritur ende ndonjë marrëveshje konkrete. Edhe drejtuesit e Partizanit ngrenë supet për provën e futbollistëve të kuq. Me sa duket, edhe pse ka përfunduar me kohë afati njëjavor i trajnerit Lika, Ndreka dhe Bylykbashi do të jenë edhe për disa ditë mes Krivbasit dhe Partizanit.

Nisja për Tiranë, rreth orës 14:30

Sot Partizani zhvillon seancën e fundit stërvitore në Ulqin, për t'i vijuar përgatitjet në ambientet e klubit. Futbollistët do të bëjnë një seancë stërvitore paradite dhe pas drekës do të përgatiten për udhëtim. Nisja nga Ulqini do të bëhet rreth orës 14:30 të pasdites dhe udhëtimi do të zgjasë rreth një orë.

[wxz]

"Gardiani" i portës së kuqe mendon se Partizani do të rivalizojë deri në fund të kampionatit.


Sot në Ulqin do të zhvillohet seanca e fundit stërvitore e të kuqve, të cilët në orët e pasdites do të jenë në Tiranë, për t'iu bashkuar familjeve të tyre. Për rreth 12 ditë futbollistët janë stërvitur me ngarkesë të lartë fizike. Gjatë pjesës së parë të kamponatit forma fizike ka qenë justifikimi kryesor i rezultateve të dobëta, por kjo nuk mund të ndodhë në të ardhmen. Për këtë qëllim, të gjithë lojtarët e kuq kanë ulur kokën dhe janë munduar të rikuperojnë forcat për ndeshjet e mbetura. Orges Shehi, një nga pikat më të forta të skuadrës, mendon se faza e Ulqinit u ka shërbyer shumë futbollistëve, sidomos për formën fizike, që ka qenë pika e dobët në javët e para të kampionatit. "Mendoj se kjo fazë ka qenë shumë e nevojshme për skuadrën e Partizanit. E kemi filluar sezonin pa përgatitjet e duhura dhe si pasojë ecuria jonë ka qenë me ulje-ngritje. Gjithmonë rezultatet janë justifikuar me përgatitjen jo të mirë fizike, çka na ka detyruar të ulim kokën dhe të përfitojmë maksimumin nga kjo fazë. Nesër (sot) ne kthehemi në Tiranë për t'i vazhduar aty përgatitjet, por mendoj se pjesën kryesore të fazës e kemi kaluar këtu në Ulqin,"- është shprehur për "Sportin shqiptar" futbollisti që i ka luajtur të gjitha takimet e fazës së parë. Partizani ka zhvilluar në Ulqin 2 ndeshje miqësore me Besën dhe Teutën, duke marrë dy fitore që kanë rëndësi vetëm në aspektin moral. Këto dy rezultate tregojnë se të kuqtë kanë një grup të konsoliduar, që premton shumë në të ardhmen. Shehi mendon se dy fitoret në miqësoret e zhvilluara nuk është se e bëjnë Partizanin të pathyeshëm, por gjithsesi janë një tregues pozitiv për punën që është bërë në Ulqin. "Ndeshje të tilla më shumë u shërbejnë trajnerëve për vendosjen dhe rolin e lojtarëve në fushë, pasi rezultati përfundimtar nuk ka shumë rëndësi. Megjithatë, ne kemi treguar se jemi një grup kompakt dhe i konsoliduar dhe se mund të ecim përpara në ndeshjet e mbetura,"- është shprehur numri një i portës së Partizanit. Drejtuesit kanë premtuar përforcimin e skuadrës me elementë cilësorë, por në fakt deri tani ka pasur vetëm rrjedhje. Ndreka dhe Bylykbashi vazhdojnë të stërviten me skuadrën ukrainase të Krivbasit dhe ka shumë mundësi që të mos jenë pjesë e Partizanit për pjesën e mbetur të seonit. Shehi shprehet se janë drejtuesit ata që vendosin për afrimin e lojtarëve të tjerë, ndërsa detyra e tij dhe e shokëve të skuadrës është dhënia e maksimumit në stërvitje dhe në lojë. "Unë nuk mund të flas për Ndrekën dhe Bylykbashin, pasi është e drejta e tyre për t'u provuar tek skuadrat e huaja. Unë jam i bindur se grupi që ka punuar në Ulqin do ta justifikojë veten, ndërsa për sa u përket përforcimeve janë drejtuesit që e thonë fjalën e fundit," - ka saktësuar Shehi. Janë disa nga skuadrat e superligës që kanë objektiva të njëjtë sezonalë. Elbasani, Vllaznia, Teuta, pa harruar dhe Dinamon, synojnë një vend në kupat e Europës, çka bën që rivaliteti të jetë i ashpër deri në fund. Shehi mendon se Partizani do të jetë në pararojë dhe do të synojë jo vetëm Europën, por edhe trofetë. "Partizani sigurisht që synon të arrijë diçka në këtë sezon. Përderisa janë disa skuadra të superligës që pretendojnë, unë nuk e shoh Partizanin jashtë garës. Grupi aktual është kompakt dhe ka punuar fort gjatë fazës përgatitore, ndërsa përforcimet janë në dorë të drejtuesve,"- ka përfunduar Shehi.

[wxz]

Në fitoren e javës së kaluar në Turqi të ekipit tonë Shpresa, përballë ekipit vendës të moshës 21 vjecare ka kontribuar me lojën e tij edhe mbrojtësi peqinas Daniel Ramazani, i cili luajti si titullar për 90 minuta. Për 20 vjeçarin bardhekaltër, i grumbulluar rregullisht nga Bushati në "zboret" e fundit, ndeshja me ekipin turk ishte takimi i tij i parë ndërkombëtar, edhe pse miqësor, e kjo padyshim ka lënë mbresa te futbollistët që premton shumë dhe për më tepër që u mbyll me fitore. Për këtë privilegj vetë Danieli gjen rast të falënderojë shokët e ekipit, sidomos trajnerët Sejdini e Bici, që e kanë përkrahur vazhdimisht, duke i besuar një vend titullari tek ekipi i Shkumbinit. Në këtë kampionat mbrojtësi me perspektivë, që sapo mbushi 20 vjeç, arriti t'i bindte të gjithë se meritonte të aktivizohej me ekipin e tij, ku u rrit e u bë futbollist. Ramazani ka luajtur në 15 takime nga 17 javët e gjysmës së parë të kampionatit, duke e filluar si zëvendësues në javët e para, për të zënë më pas vendin e titullarit në mbrojtjen e Shkumbinit, krah Muçës, Xhyrës e Ndonit. Ai ka meritën se është edhe autor i një goli me Shkumbinin, kur diti të shënojë në takimin e parë me Flamurtarin, gol që rezultoi përcaktues dhe i dha fitoren Shkumbinit. "Falënderoj të gjithë futbollistët e Shkumbinit që më kanë ndihmuar dhe ma kanë bërë më të lehtë në fushë, por për mua merita u takon trajnerëve Sejdini e Bici, që kanë besuar në të dhënat e mia sportive dhe më kanë dhënë dorën e më kanë përkrahur vazhdimisht. Jam përpjekur ta justifikoj këtë besim me punë dhe me stërvitje, për të bërë më të mirën, që asnjëri të mos zhgënjehet," thotë me sinqeritet Daniel Ramazani. Ai nuk e fsheh kënaqësinë që ka arritur të realizojë një ëndërr të tijën të hershme për të veshur fanellën "e vogël" të kombëtares, duke qenë plotësisht i bindur se stërvitja e vazhdueshme do të japë për të maksimumin. "Të luash me ekipet kombëtare është një nder për çdo futbollist, por edhe një ëndërr që e dëshiron secili. Për mua ishte hera e parë që e vishja këtë fanellë të rëndë, me të cilën provova emocione të mëdha. Tani që e arrita këtë, është më e rëndësishmja që ta mbash e ta justifikosh. Në radhë të parë, kjo duhet të arrihet tek ekipi im, sepse është Shkumbini që më hapi dyert e Shpresës. Sa më i vlefshëm të jem për Shkumbinin, duke merituar formacionin, aq më i dobishëm do të jem për ekipin Shpresa," shton Danieli, i cili është i ndërgjegjshëm se për ekipin e tij do të jetë e vështirë, por jo e pamundur që të realizojë objektivin që ka për të mbijetuar mes më të mirëve në superligë. Ai beson tek aftësitë e trajnerit Sejdini dhe te puna cilësore që "Xhaxhi" po bën në këtë periudhë përgatitore me Shkumbinin. "Kemi përpara dhe gjysmën e dytë të kampionatit dhe puna e mirë që po bën trajneri Sejdini të jep garanci të plotë se ekipi ynë nuk do të lërë më pikë rrugës, siç ka lënë më parë. Tani ne rikthehemi në fushën tonë dhe sigurisht do ta kemi më të lehtë për të realizuar synimet tona për t'iu larguar fundit të tabelës dhe për t'u ngjitur atje ku e ka vendin Shkumbini, në mesin e saj," përfundon plot optimizëm e besim mbrojtësi i Shkumbinit, Daniel Ramazani.

[wxz]

Dita e djeshme ka qenë shumë e ngarkuar për kuqeblutë. Presidenti Fushaj ka qenë në Ulqin pranë lojtarit të tij, ndërsa futbollistët ishin shumë të shqetësuar për fatin e kolegut të tyre. Ata nuk e kishin menduar kurrsesi se Lici do ta kalonte një natë në rajonin e policisë, sepse mendonin se një çështje e tillë do të mbyllej shpejt, pasi nuk ishte aq e rëndë sa u bë. Për rrjedhojë, e gjithë dita e djeshme ka pasur telefonata të shumta mes futbollistëve për të mësuar rreth fatit të shokut të tyre të skuadrës. Vërtet dje kuqeblutë nuk kanë pasur stërvitje, por edhe po të kishin pasur, vështirë se do të bëhej me kaosin e shkaktuar nga kjo çështje.

Suad Lici, edhe një natë tjetër në polici

Nuk është mbyllur as dje çështja e futbollistit të Vllaznisë, Suad Lici. Sipas drejtuesve të Vllaznisë, çështja ka shkuar në apel, sepse vendimi i dhënë nga Gjykata e Ulqinit nuk i ka pëlqyer prokurorit të çështjes, çka ka bërë që ai ta çojë këtë çështje një shkallë më lart. Bëhej fjalë për një vendim prej 4 mijë eurosh gjobë për Licin për veprimin e kryer ndaj gjyqtarit anësor nga Mali i Zi. Vetë Lici, i shoqëruar nga familjarët e tij dhe presidenti Fushaj në këtë seancë gjyqësore, ka qenë dakord për të bërë pagesën e kësaj shume vetëm që të lirohej. Çështja ka shkuar kësisoj një shkallë më lart dhe për pasojë dje pasdite futbollisti shkodran nga Ulqini është çuar në Podgoricë, kryeqytetin e Malit të Zi, ku dhe do të zhvillohet seanca e sotme gjyqësore që pritet t'i japë fund edhe këtij problemi. Ajo çfarë flitet nga njerëzit pranë ekipit të Vllaznisë, por edhe familjarë të lojtarit, ai me shumë të ngjarë sot para drekës do të jetë i lirë. Seanca e sotme do të zhvillohet në orën 9:30 të paradrekes. Në këtë mënyrë, një incident i vogël në një fushë futbolli këtë radhë ka marrë përmasa më të mëdha, aq sa Suad Lici prej dy netësh është i ndaluar në rajonet e policisë së shtetit fqinj. Mbase një çështje e ekzagjeruar së tepërmi, por ky është realiteti.

[wxz]

Ka qenë si "bombë" për ta një lajm i tillë, por megjithatë të bindur se pjesëtari i familjes së tyre nuk e meritonte një gjë të tillë, janë munduar ta mbyllin sa më shpejt atë. Pajtimi i një avokati të njohur malazez për këtë çështje, gatishmëria për të kërkuar falje, apo gjobën e vënë nga gjykata, janë fakte se familjarët e familjes Lici nuk kanë dashur kurrsesi që Suadi të bëhej protagonist për keq në një çështje të tillë, që në të vërtetë mori përmasa më të mëdha sesa duhet.

[wxz]

Portieri i Vllaznisë ka qenë personi që i ka qëndruar më pranë Suad Licit në këto 48 orë të vështira.


Ka qenë ndër njerëzit që i ka qëndruar më pranë Suad Licit në momentet e tij më të vështira në Ulqin. Portieri Armir Grima, përveçse koleg i tij, është njëkohësisht edhe shoku më i ngushtë i mesfushorit me tipare mbrojtëse. Duke folur për "Sportin shqiptar", ai rrëfen të gjithë skenën e asaj çfarë ndodhi pasditen e së hënës në Ulqin, çka çoi dhe në arrestimin e Licit nga policia malazeze. Portieri Grima ka qenë gjithnjë në krah të shokut të tij, por pa mundur të bëjë gjë për shpëtimin e tij. Megjithatë, ndihet njëlloj i shqetësuar, sepse, sipas tij, nuk ishte ngjarje me të cilën mund të bëhej bujë. Thjesht një incident i vogël, që gjithsesi është zmadhuar në përmasa të mëdha. Ja si shprehet Armir Grima në intervistën e tij:
Armir, si një nga njerëzit që i keni qëndruar më pranë nga të gjithë Licit në momentet e tij më të vështira, si do ta komentonit gjithë atë çfarë ndodhi?
Të them të drejtën, jemi mërzitur shumë, sepse nuk e kishim menduar se mund të ndodhte një gjë e tillë. Sa i takon incidentit të ndodhur, mund të them se edhe Lici mund të ketë pjesën e tij të fajit, por ai ka qenë i detyruar të reagonte ashtu, sepse gjyqtari anësor në atë moment e ofendoi. Normalisht, të gjithë jemi njerëz dhe reagojmë pas momenteve të tilla, por gjërat janë fryrë më tepër se duhet. Nuk ka pasur as thyerje të kockës së hundës, siç pretendohet, dhe as gjak. Thjesht, anësori ra në tokë.
Gjërat thuhet se nuk kanë shkuar mirë në këtë ndeshje sa i takon arbitrimit dhe lojës së ashpër të kundërshtarit. Mos është ky shkaku kryesor i reagimit në atë mënyrë të kolegut tuaj?
Të them të drejtën, as unë nuk arrij ta kuptoj se përse çdo ekip malazez kur luan ndaj nesh, ndonëse thjesht miqësore, bën të pamundurën për të fituar. Në këtë valle futen edhe gjyqtarët dhe kështu ndodhi edhe në miqësoren ndaj Zetës. Ne po e kontrollonim lojën dhe avantazhin. Thjesht donim ta fitonim atë takim, megjithëse ishte miqësore, por kundërshtari e shtoi dozën e lojës së rëndë. Po ashtu, gjyqtarët u bën palë me ta, na anuluan një gol më se të regullt, jepnin pozicione të paqena jashtë loje, derisa erdhi momenti që solli gjithë këtë rrëmujë. Kuptohet, ne të gjithë nuk donim të bëheshim qesharakë me atë çka po ndodhte, ndërkohë që reagimi i Suadit ishte më i ashpri, por malazezët e meritonin atë gjë. Ka vite që luaj futboll dhe ende nuk e mbaj mend një miqësore me ekipet malazeze që të ketë përfunduar në mënyrë miqësore.
Kur u bë arrestimi i Licit?
Pas momentit të goditjes së gjyqtarit, ishte ekipi i Zetës që nuk deshi ta vazhdonte më ndeshjen. Më pas ata u bindën, por në ato momente ka qenë trajneri Josa që nuk preferoi më ta vazhdonte atë takim kur gjërat nuk shkuan mirë. Për rrjedhojë, kemi vazhduar edhe për disa minuta të stërvitemi në fushën, që është pranë ambienteve të hotelit "Olimpik" në Ulqin dhe, pasi jemi larë dhe bërë gati për t'u nisur për Shkodër, kanë ardhur policët malazezë. Ata fillimisht deshën nga Suadi vetëm një deklaratë të firmosur prej tij, ku të shpjegonte atë çfarë kishte ndodhur dhe vetëm kaq. Por në ato momente aty ka ardhur edhe gjyqtari anësor me disa njerëz të tij, të cilët kishin në dorë një ekzaminim të një mjeku, sipas të cilit gjoja bëhej fjalë për thyerje të kockës së hundës. Në këto kushte, kur ai kishte bërë edhe denoncimin në polici, uniformat blu ishin të detyruar ta shoqëronin Suadin në rajonin e policisë. Kjo gjë na shqetësoi së tepërmi dhe për rrjedhojë i gjithë ekipi për disa orë qëndroi pranë rajonit për të pritur lirimin e tij, por kjo nuk ndodhi.
Keni qëndruar deri në mesnatën e së premtes në Ulqin. Përse nuk pranonin ta lironin?
Nuk u lirua që atë natë, sepse gjyqtari, që ishte një 18 vjeçar malazez nga Nikshiqi dhe që jetonte në Ulqin, kishte bërë denoncimin, por nuk e tërhiqte atë, i shtyrë nga një njeri i afërt i tij, që ishte polic dhe që kishte punuar edhe në Kosovë vite më parë si ushtar me serbët. Ndërkohë, babai i arbitrit anësor ishte i mendimi se çështja për të duhej mbyllur, megjithatë çdo gjë ia la në dorë të birit. U zhvillua gjyqi i parë dhe Lici u gjobit me 560 euro gjobë për gjoja prishje të qetësisë publike, kur në të vërtetë nuk pati prishje të qetësisë. Më pas u kalua te gjyqi civil, për të cilin nuk u dha asnjë vendim atë natë, duke bërë që Suadi ta kalonte atë natë në rajonin e policisë.
A ka pasur solidaritet për këtë çështje nga ana e shqiptarëve që jetojnë në Ulqin?
Shumë, madje jemi habitur për një gjë të tillë. Do të veçoja mbi të gjitha kryetarin e Bashkisë së Ulqinit, zotin Gëzim Hajdinaga, që bëri të pamundurën për ta zgjidhur sa më shpejt këtë çështje. Po ashtu, edhe shumë shqiptarë të tjerë na përkrahën, por dikush donte që çështja të bëhej e madhe. Spitali i Podgoricës, ku anësori bëri ekzaminimet, nuk vërtetoi asnjë thyerje të kockës së hundës, siç pretendohej, dhe avokati që kishte marrë Suadi ua bëri më se të qartë gjykatësve këtë gjë, sepse ajo shihej ditën për diell që nuk kishte asnjë problem. Jam shumë i bindur se, nëse një gjë e tillë do të kishte ndodhur në Shqipëri, ne do t'i kishim bërë miq malazezët.
Shpresoni që kjo punë të mbyllet me kaq dhe Suadi të lirohet?
Shpresoj, sepse nuk e meritonte një gjë të tillë. Nuk është njeri që shkakton probleme, por dëshira e të gjithë neve është që kjo çështje të mbyllet sa më parë.

[wxz]

Sulmuesi kavajas premton t'i gjejë golat e munguar në gjysmën e dytë të kampionatit.


Pavarësisht se ka shënuar një nga golat ndaj Partizanit në miqësoren e Ulqinit, sulmuesi kavajas Parid Xhihani e ndien peshën e fajit mbi supe për të gjithë ato raste të humbura gjatë vitit 2006. Një shqetësim që duket se mbetet motivi kryesor i punës së tij. Ja se si sulmuesi rrëfen golat e pashënuar që i kanë mbetur merak: "Më shumë se golat e mi të humbur, më djeg fakti i mosmarrjes së fitoreve nga ekipi im. Akoma më rrinë në mendje veçmas dy golat e humbur ndaj Elbasanit pas rezultatit 1 0 dhe në minutën e fundit ndaj Partizanit në Tiranë. Kam shënuar, por edhe humbur gola të tjerë, por këto dy gola mundet t'i jepnin tjetër rrjedhë renditjes së Besës në tabelën e klasifikimit." Nuk është ndonjë habi që një sulmues të humbasë raste shënimi, po a mbetet kjo përgjegjësi vetëm e Xhihanit dhe çfarë ndikimi ka pasur partneri i tij Elokan dhe loja sulmuese e vetë ekipit? A ka qenë loja e Besës me defekte në manovrën sulmuese të saj? Ja çfarë mendon sulmuesi kavajas: "Në fakt, ajo që më dhemb më shumë është fakti se loja sulmuese e ekipit nuk ka çaluar. Ju jeni dëshmitarë të lojës mjaft të mirë dhe të barabartë me Elbasanin, Tiranën, Dinamon, Partizanin e ndoshta ndaj dikujt edhe më mirë. Vetëm rastet e humbura nga ne i kanë hequr shanset e fitores ekipit tonë. Nuk mund ta mohoj faktin se Elokani kërkoi kohë të njihte lojën time dhe të vepronim si një dyshe harmonike. Loja e tij ishte mjaft e mençur dhe intuitive, por në momentin e fundit edhe ai nuk pati atë goditje vdekjeprurëse si të Fortunatit, bie fjala. Edhe trajneri Bici ka qenë në vështirësi kur ka qenë i detyruar të luajë vetëm me ne të dy." Duket se kjo që citon Xhihani jo vetëm është shumë e vërtetë, por nisur nga ky fakt konstatojmë se mungesa e konkurrencës ndoshta ka qenë një arsye më shumë. Besa ka qenë e detyruar të luajë në sulm vetëm me Xhihanin dhe Elokanin. Spostimi ndonjëherë i Binagolit përpara, por edhe i Krajës e Veliajt, nuk ka dhënë asnjë rezultat konkret. Si i përgjigjet sulmuesi kavajas këtij fakti, ndërsa djersin në qytetin e Ulqinit? Çfarë mesazhi ka lexuar prej këtij konstatimi vetë sulmuesi kavajas Xhihani, kur për fatin e tij të keq sulmuesi Elokan ende nuk po duket? "Pajtohem plotësisht me konstatimin e trajnerit Bici se Besa ka vuajtur më shumë në manovrën sulmuese si ekip sesa te loja e vetme e sulmuesve. Nuk është kusht në futbollin e sotëm që të shënojë ose sulmuesi, ose s'ka. Mjafton t'ju kujtoj se sot në Europë mjaft shënues golash vijnë nga radhët e mesfushës dhe mbrojtjes. Ndërsa te Besa kjo është kërkuar vetëm nga sulmi. Pavarësisht nga kjo kërkesë, po punoj e po përpiqem në maksimum që të fitoj qetësinë dhe sigurinë e munguar para portës. Golin e kam njohur që kur isha 15 vjeç në radhët e Besës dhe e provova edhe me ekipin kombëtar U 18. Jam i bindur dhe kam besimin e plotë se gjatë javëve të mbetura do të shihni një tjetër Xhihan. Kaq mund t'ju premtoj, sepse kam dëshirë ta shihni në javët në vijim," përfundon Parid Xhihani, i cili nuk është sulmuesi i vetëm, pasi, siç dihet, në ekip stërvitet edhe sulmuesi 18 vjeçar, kosovari Ahmed Jonuzi, gjendja fizike e shkëlqyer e të cilit pritet të jetë një partner i denjë i Xhihanit. Në këtë mënyrë, Besa për pjesën e mbetur të sezonit është e detyruar të luajë me këta dy sulmues. Objektivi i Besës, që është kupa, kërkon që edhe sulmi të jetë në nivel më të lartë.

[wxz]

Pas dy miqësoreve tashmë të luajtura, ndaj Partizanit e Besëlidhjes, ekipi kavajas sot do të zhvillojë miqësoren e tretë. Kundërshtari i radhës do të jetë ekipi i Lushnjës. Pritet me interes të shihet loja e portierit kavajas Guma, i cili u nis me Besën dhe pas huazimit do të mbrojë portën lushnjare. Besa deri tani në dy miqësoret e përmendura ka arritur të barazojë ndaj Besëlidhjes dhe të humbë ndaj të kuqve 2-3.

[wxz]

Pas humbjes 1-0 në miqësoren ndaj MTK Arazit, dita e djeshme i ka parë bardheblutë të zhvillojnë një analizë të detajuar të gabimeve që u bënë. Trajneri Shkëlqim Muça, së bashku me drejtorin teknik, Alban Tafajn, dhe përgatitësin atletik, Rauf Dimrajn, u kanë shpjeguar lojtarëve problemet e vëna re. Më pas, skuadra zhvilloi dy seanca, fillimisht paradite me vrapime dhe mbasdite në fushën e lojës, me ushtrime të karakterit tekniko-taktik. Mungesat e vetme ishin ato të Duros, Mukës, Dedes dhe Bulkut, të cilët u thirrën nga ana e trajnerit të kombëtares, Oto Bariç, për miqësoren e djeshme.


Hidi-Sinani-Abazaj në pritje të thirrjes

Isli Hidi, Vioresin Sinani dhe Oriand Abazaj nuk u preferuan nga ana e trajnerit Oto Bariç për miqësoren e djeshme të kombëtares ndaj ekipit të Antaliasporit. Edhe pse figurojnë në listën e të grumbulluarve, të tre këta futbollistë dje u stërvitën me fanellën e Tiranës, ndërkohë që tashmë janë në pritje të thirrjes për miqësoren e së enjtes, kur Tirana do të ndeshet ndaj kuqezinjve. Në të vërtetë, midis stafeve drejtuese mësohet se ka një marrëveshje gojore, ku me ekipin kombëtar do të lejohen ata futbollistë që janë më të nevojshëm për momentin. Ndaj turqve dje u preferuan Duro, Muka, Dede dhe Bulku.

[wxz]

Mesfushori fantazist u vu dje në dispozicion të trajnerit Bariç, teksa luajti 45 minuta ndaj Antaliasporit.

Klodian Duro është një ndër katër lojtarët që për momentin është i ndarë mes Tiranës dhe ekipit kombëtar. Së bashku me Devi Mukën, Nevil Deden dhe Ervin Bulkun, ai dje luajti 45 minuta në miqësoren e fituar 6-2 ndaj Antaliasporit. Për sa u takon tre lojtarëve të tjerë, të cilët figurojnë në listën e trajnerit Oto Bariç, siç janë Isli Hidi, Vioresin Sinani dhe Oriand Abazaj, nuk u preferuan për takimin e djeshëm. I kontaktuar nga gazeta, mesfushori fantazist Klodian Duro shprehet se ky grumbullim i kombëtares i shërben trajnerit Bariç për të parë disa lojtarë të rinj, të cilët mund të afrohen në ekipin kombëtar në të ardhmen. "Është normale që në këtë periudhë trajneri Oto Bariç të bëjë vëzhgimet e tij për sa u takon elementëve të rinj, që duhen afruar në ekipin kombëtar. Dje zhvilluam një ndeshje miqësore me ekipin e Antaliasporit, të cilën e fituam me rezultat të thellë, ndërkohë që për veten mund të them se u aktivizova vetëm në pjesën e parë. Trajneri e pa të arsyeshme që lojtarët e Tiranës t'i aktivizonte vetëm një pjesë loje, sepse një ditë më parë ne kishim luajtur një tjetër miqësore, ndaj MTK Arazit. Personalisht, mendoj se në ndeshjen e ardhshme miqësore ndaj Sllovenisë do të shihet në fushë një skuadër më e kompletuar, ndërsa për sfidën me Slloveninë e gjithë skuadra do të japë maksimumin, për të arritur fitoren e parë në këto eliminatore,"- thotë nëpërmjet linjës telefonike mesfushori i krahut.
Sot pritet që Klodian Duro të vihet nën urdhrat e trajnerit të Tiranës, Shkëlqim Muça, ndërkohë që vetëm nesër do të vendoset se më cilën skuadër do të aktivizohet, duke parë që Tirana ka planifikuar të luajë me ekipin kombëtar. Për Duron, kjo periudhë përgatitore është shumë e rëndësishme në marrjen e ngarkesës fizike, e cila do të shërbejë si "karburant" për takimet e ardhshme në kampionat. "Duhet thënë se gjatë këtyre ditëve qëndrimi në Antalia jemi duke u stërvitur me seriozitet të plotë dhe, për fat të mirë, nuk ka pasur asnjë lojtar të dëmtuar. Trajnerët Muça dhe Dimraj po bëjnë një punë të mirë me ne, frytet e së cilës do t'i marrim kur të mbërrijmë në Tiranë. Deri tani, në dy ndeshjet miqësore që kemi zhvilluar, skuadra ka luajtur mirë, pavarësisht se ndaj azerbajxhanasve humbëm vetëm me një gol, që ishte rrjedhojë e një gabimi nga ana jonë,"- shton më tej 29-vjeçari.
Në lidhje me merkaton e bërë, ku deri tani janë afruar pesë futbollistë të rinj, mes të cilëve edhe Albert Duro, vëllai i Klodit, ky i fundit shprehet: "Rezultatet e blerjeve të reja do të shihen shumë shpejt në fushë. Stafi drejtues është munduar të bëjë më të mirën në këtë aspekt, duke kërkuar të përforcohet në ato aspekte ku kemi pasur probleme dhe them se boshllëqet janë mbushur tashmë. Personalisht mendoj se largimi i Salihit do të na i prishë disi planet, sepse ai ishte pikë referimi për skuadrën, por tani jemi të detyruar të bëjmë edhe pa të. Në lidhje me objektivat, nuk bëhet fjalë që, përveç titullit kampion, duam të mbrojmë me dinjitet edhe Kupën e Shqipërisë, ku jemi fitues në fuqi,"- përfundon Klodian Duro, mesfushori që është i ndarë mes Tiranës dhe ekipit kombëtar në këtë periudhë pauze të kampionatit.

[wxz]

Të grumbulluarit e trajnerit Oto Bariç e kanë fituar takimin miqësor me rezultat të thellë.

Shqipëria: Lika, Teli, N.Dede, E.Xhafa, Vrapi, Bulku, Muka, Duro, Aliaj, Memelli, Sukaj (u aktivizuan Neziraj, Dedaj, Hyka, Plaku, D.Xhafa, Hasani). Trajner: Oto Bariç
Shënuesit: Plaku 47', 53, 90, Memelli 49', Aliaj 50', D.Xhafa 57', Hasani 69'

U zhvillua dje në orën 14:00, në qytezën turistike të Kemerit, testi i parë i të grumbulluarve të trajnerit Oto Bariç. Edhe pse në fillim dukej si një takim i vështirë për kombëtaren, nuk rezultoi kështu, sepse përballë tyre ishte skuadra e të rinjve të klubit "Antaliaspor". Ekipi i parë, Antaliaspor, i cili renditet në vendin e 16-të në superligën turke, pardje zhvilloi një miqësore me skuadrën austriake të Vienës. Megjithatë, pavarësisht faktit se kombëtarja kishte përballë një skuadër të rinjsh, prova e parë kaloi me sukses. Tregolëshi i të riut Sabino Plaku, si dhe golat e Memellit, Aliajt, Hasanit dhe Daniel Xhafës, vulosën fitoren e thellë, 7-2, të kombëtares. Prurjet e reja, Memelli, Plaku, Hasani dhe sulmuesi i Teutës, Xhafa, e nisën me gol këtë grumbullim, duke lënë një përshtypje të mirë. Trajneri i përfaqësueses, Oto Bariç, kishte vendosur në fillim të lojës një formacion konkurrues dhe me emra të njohur. Ndërkohë, pjesa e parë e takimit nuk u ngrit në nivelin e duhur nga kuqezinjtë. Gjatë kësaj pjese u humbën disa raste të pastra për shënim, por edhe të rinjtë e Antalias rezistuan disi. Në 45-minutëshin e dytë të takimit, kroati Bariç kreu gjashtë zëvendësime. Lojtarët e sapofutur në lojë u shfaqën mjaft mirë dhe e ndryshuan krejtësisht rrjedhën e takimit. Nga të rinjtë e aktivizuar në këtë takim, spikati sulmuesi i talentuar i Apolonisë, Sabino Plaku, i cili shënoi tre gola. Nga informacionet brenda stafit kuqezi, një paraqitje të shkëlqyer në këtë takim, bëri Jetmir Hyka, i cili me veprimet e tij teknike e zbukuroi lojën. Edhe sulmuesi pogradecar Migen Memelli, që aktivizohet në Norvegji, la përshtypje të mirë në prezantimin e tij të parë me ekipin kombëtar. Nga informacionet pranë stafit kuqezi, mësohet se trajneri Bariç ka ngelur i kënaqur, madje në fund të takimit i ka lavdëruar lojtarët e rinj për paraqitjen mjaft të mirë që bënë në pjesën e dytë. Gjithsesi, ata që do t'i mbushin mendjen kroatit duhet të kenë vazhdimësi në lojën e tyre, sepse pritet të luhen edhe dy takime miqësore, që do të jenë mjaft të rëndësishme për vetë lojtarët, të cilët janë kandidatë për t'u bërë pjesë e kombëtares. Takimi më i afërt miqësor i kombëtares është ai që do të luhet të enjten, ku përballë kuqezinjtë do të kenë bardheblutë e Tiranës. Sot kombëtarja pritet të zhvillojë dy seanca stërvitore

[wxz]

Nuk është caktuar ende kundërshtari i kombëtares për takimin miqësor të datës 27 janar. Ndërkohë, burime të sigurta nga kampi kuqezi flasin për një takim miqësor me ekipin e kategorisë së tretë të gjermanisë, Furtuna Dyseldorf. Ekipi gjerman po zhvillon fazën përgatitore në Kemer dhe me shumë mundësi mund të luajë në këtë datë një miqësore me të grumbulluarit e Oto Bariçit. Stafi teknik i kombëtares ka ndërmjetësuar, por ende nuk është caktuar përfundimisht.

[wxz]

- VAZHDON puna për ristrukturimin e statusit ligjor organizativ të klubeve të futbollit në Shqipëri. Dje, në ambientet e FSHF-së, u mblodh grupi i punës, i cili përbëhej nga anëtar i KE-së, Arben Dervishi, shefi i licensimeve, Arben Bici, ndërkohë që merrte pjesë në rolin e konsulentit edhe Artan Shyti. Këta të fundit diskutuan dje me përfaqësuesit e klubeve të kategorisës së parë.
- SOT nisen për në Dyseldorf të Gjermanisë presidenti i FSHF-së, Armando Duka, dhe sekretari i përgjithshëm, Roland Mici. Këta të fundit do të marrin pjesë në Kongresin e UEFA-s, ku më datën 26 do të bëhen edhe zgjedhja e presidentit të UEFA-s. Kandidatë për president janë, Lenart Johanson dhe Mishel Platini.
- PERFUNDUAN dje testimet e gjyqtarëve shqiptarë të futbollit. Për dy ditë me radhë "bluzat e zeza" u testuan në stadiumin "Niko Dovana" të Durrësit, ndërkohë që përgjigjet për arritjen ose jo të normave nga ana e tyre pritet të dalin sot.

[wxz]

Vendimin përfundimtar për zhvillimin e takimit në Shkodër pritet ta japin inspektorët e UEFA-s.


Tek "Qemal Stafa" apo në "Loro Boriçi"? Kjo ka qenë çështja për t'u zgjidhur nga FSHF-ja, që për më shumë se një muaj u kthye në një "telenovelë" me shumë seri, që nuk po i vinte ende fundi. Caktimi i stadiumit për takimin eliminator të 24 marsit, midis kombëtares shqiptare dhe asaj sllovene, mbizotëroi gjatë në shtypin sportiv. Pati shumë deklarata nga të gjitha palët e interesuara, por në fund institucioni më i lartë i futbollit në Shqipëri vendosi që takimi i 24 marsit të luhet në Shkodër. Dëshira e drejtuesve të FSHF-së për ta zhvilluar këtë takim në stadiumin "Loro Boriçi" u zyrtarizua dje. UEFA duhet të lajmërohet 60 ditë përpara datës së takimit, ndërkohë që dje, me anë të një shkrese zyrtare, FSHF-ja lajmëroi organizmin më të lartë të futbollit ne Europë. Pra, takimi eliminator, i vlefshëm për EURO 2008, Shqipëri-Slloveni, do të luhet në stadiumin "Loro Boriçi". Gjithashtu, në bazë të marrëveshjes së FSHF-së me kompaninë "Sport Five" (kjo kompani ka të drejtën televizive të kombëtares sonë) u caktua edhe orari i zhvillimit të takimit, i cili është 20.15. Natyrisht, ky është një lajm i mirë për sportdashësit e zjarrtë shkodranë. Gjithsesi, jo çdo gjë është përfundimtare për zhvillimin e ndeshjes në stadiumin "Loro Boriçi". Pas konfirmimit nga ana e FSHF-së që takimi të zhvillohet atje, në ditët në vijim pritet edhe zyrtarizimi i inspektorëve të UEFA-s. Këta të fundit do të vijnë për ta inspektuar stadiumin dhe më pas pritet të japin "ok"-in ose jo të zhvillimit të takimit në këtë stadium. Pavarësisht se duhet pritur fjala e fundit e inspektorëve të UEFA-s, për FSHF-në, zhvillimi i takimit në Shkodër është fakt i kryer. Megjithatë, duke lënë pas takimin e 24 marsit me Slloveninë, më 7 shkurt na pret takimi miqësor i kuqezinjve me Maqedoninë.
Dje FSHF-ja mendoi të jepte dy lajme të mira në një ditë për qytetin Shkodrës, pasi edhe takimi miqësor me Maqedoninë do të zhvillohet në "Loro Boriçi". Ky takim tashmë është zyrtarizuar, madje do të luhet në orën 16:00. Me zhvillimin e të dy takimeve në "Loro Boriçi", drejtuesit e FSHF-së i plotësojnë dëshirën trajnerit të përfaqësueses shqiptare, Oto Bariç. Kroati i kombëtares e kishte kërkuar një gjë të tillë, pasi, sipas tij, zhvillimi i të dy takimeve në një fushë do të ishte në të mirën e futbollistëve.

[wxz]

Sulmuesi vlonjat i Teutës, Daniel Xhafaj, me shumë mundësi do të largohet nga kampionati shqiptar.


Një nga lojtarët më të mirë të kampionatit shqiptar, Daniel Xhafaj, pritet t'i japë lamtumirën ekipit durrsak. Ofertat e shumta në drejtim të sulmuesit kanë bërë që vlonjatit t'i prishet mendja, duke synuar kështu një zgjidhje të favorshme jashtë shtetit. Dje, në takimin miqësor që zhvilloi kombëtarja shqiptare në Kemer, ku dhe Xhafa u aktivizua, asistonte trajneri i skuadrës FC Baku. Ky i fundit kishte ardhur në Kemer për të parë nga afër sulmuesin e Teutës dhe për t'i paraqitur ofertën e klubit. Trajneri i skuadrës azerbajxhanase, menjëherë pas përfundimit të takimit miqësor, ka kontaktuar me Xhafajn dhe me menaxherin e tij. Gjithashtu, në tratativa për të marrë shërbimet e vlonjatit, është edhe një skuadër ukrainase, por që emri nuk bëhet i ditur. Ndërkohë, i kontaktuar në linjë telefonike nga "Sporti shqiptar", Daniel Xhafaj pohon për tratativat që po bëhen me këto skuadra dhe thekson se me 90% do të aktivizohet jashtë shtetit në pjesën e mbetur të kampionatit. "Menjëherë pas përfundimit të takimit miqësor, unë bashkë me menaxherin tim u takuam me trajnerin e ekipit azerbajxhanas FC Baku. Ai i parashtroi menaxherit tim ofertën, që unë të jem pjesë e këtij e ekipit që drejton ai. Nuk mund të them me 100% që do të luaj tek ky ekip, pasi kam ofertë edhe nga një ekip ukrainas. Megjithatë, do të mendohem mirë përpara se të firmos, pasi nuk është vetëm ana financiare. Personalisht, kam dëshirë të aktivizohem në një kampionat me nivel dhe nuk dua të nxitohem. Çdo gjë ia kam lënë në dorë menaxherit tim dhe mund të them se shumë shpejt do të mësohet edhe ekipi im i ri. Nuk dua të them që tani se po largohem nga Teuta, pasi çdo gjë mund të ndodhë, por mund të them se me 90% pjesën e mbetur të kampionatit do ta luaj jashtë vendit. Në këto momente këto janë mundësitë dhe kërkoj që t'i shfrytëzoj, sepse do të ishte në të mirë të karrierës sime si futbollist aktivizimi në një kampionat me nivel më të lartë se yni,"- deklaroi për "Sportin shqiptar" në linjë telefonike nga Kemeri Daniel Xhafa.

[wxz]

Kavajasit u japin fund përgatitjeve trijavore në Ulqin dhe kthehen për ndeshjen e radhës në kampionat.


Kanë mbaruar edhe ditët ulqinake për Besën. Pas një takimi miqësor që do të luhet sot paradite ndaj ekipit malezez të Buduçnostit, ekipi kavajas do të kthehet në shtëpi. Faza përgatitore për Besën në qytetin e Ulqinit nisi si një fazë që do të sillte një konkurrencë mjaft të madhe në radhët e Besës, kjo pasi bashkë me grupin udhëtuan edhe 7 futbollistë të marrë në merkaton dimërore. Krejt papritur futbollistët kosovarë janë larguar tri ditë më parë nga kampingu i ekipit, duke lënë zbuluar Besën. Largimi i një numri kaq të madh, plot pesë futbollistë, ka lënë një hendek jo të vogël në planet e trajnerit Bici. Ishte trajneri i Besës, i cili kishte folur me tone mjaft optimiste për vlerat e futbollistëve kosovarë, veçmas për sulmuesin 18 vjeçar Ahmed Jonuzi. "Ardhja e futbollistëve nga Kosova mendoj se do të mbushë shumë boshllëqe ekipit në të tri repartet. Tre nga këta futbollistë, në mbrojtje, mesfushë, sidomos sulmuesi Jonuzi, mbeten futbollistë që do të jenë ndoshta pjesë e formacionit." Këto ishin fjalët e Vasil Bicit dhënë disa ditë më parë për gazetën "Sportin shqiptar". Tanimë ato mbeten vetëm fjalë, sepse futbollistët u larguan. Po çfarë solli stërvitja e Besës në Ulqin në aspekte të tjera? I vetmi shans i Besës ishin kushtet e mira të akomodimit e stërvitjes, krahasuar me ekipet e tjera që u stërvitën në Ulqin. Gjatë qëndrimit trijavor ekipi kavajas zhvilloi edhe dy takime miqësore, ndaj Partizanit e Besëlidhjes. Themi kështu, pasi takimi ndaj Lushnjës solli një cënim jo të vogël të imazhit të ekipit para tifozëve dhe medias malazeze e asaj shqiptare. Të gjitha këto miqësore nuk sollën atë kënaqësi e vlerë që pritej nga të besuarit e Bicit. Ndaj të kuqve, pavarësisht lojës për t'u vlerësuar, rezultati ishte në disfavor të Besës, 2 3. Ndaj Besëlidhjes përsëri mungoi fitorja, pavarësisht justifikimeve të Bicit. Nisur nga investimet dhe përbërja e të dy ekipeve, ky barazim la një shije të hidhur te tifozët kavajas. Sa për miqësoren e fundit, ajo e nxiu jo pak prapagandën për harmoni të grupit. Pas të gjithave këtyre që thamë, tani duhet të pranojmë faktin e hidhur se Besa u nis me 26 futbollistë dhe kthehet me 19 të tillë. Këtu kemi parasysh edhe largimin në formë huazimi të portierit të ri kavajas Guma tek ekipi i Lushnjës. Situata në kampin verdhezi nuk është më aq optimiste sa ishte, kur ekipi u nis drejt Malit të Zi. Si për të përforcuar këtë ide vjen edhe lajmi i pakonfirmuar se mbrojtësi shkodran Kraja qenka në planet e presidentit të të kuqve, Xhani, çka do të thotë se Besa, në vend që të vinte "vetulla", duket se po i nxjerr "sytë" vetes. Kundër këtij konkluzioni del presidenti Bizhdili, i cili i pyetur sot mbi ngjarjet e fundit te Besa, premton se kjo situatë do të ndryshojë shumë shpejt. "Mos e nxini fare fatin e Besës. Vërtet që disa futbollistë u larguan dhe nuk më vjen aspak mirë, por unë nuk do të jem rehat derisa të plotësoj grupin me futbollistë cilësorë. Me tre futbollistë të tillë jam duke mbyllur bisedimet dhe njëri prej tyre tashmë ka nënshkruar për ekipin tonë. Deri te takimi i 3 shkurtit ndaj Luftëtarit të jeni të bindur se grupi do të plotësohet, pa mohuar faktin se Besa edhe aktualisht ka mjaft kualitete. Ekipi ka nevojë për mbështetje e kurajo dhe jo për shkopinj nën rrota," - shprehet Bizhdili. Një apel që duket se buron nga ngjarjet e fundit në ekip. Ajo që më ë shumti u intereson tifozëve kavajas është të shohin në fushën e blertë blerjet e reja dhe jo premtimet. Presidenti Bizhdili, për hir të së vërtetës, ka treguar jo pak herë se di të rindërtojë një Besës të fuqishme edhe brenda një jave. Le të presim e të mos i paragjykojmë premtimet e tij.

[wxz]

Elbasani ka zhvilluar të premten paradite stërvitjen e fundit përpara takimit miqësor me ekipin e Shkumbinit. Stërvitja është zhvilluar në pallatin e sportit, ndërsa nuk ka qenë i pranishëm trajneri Gëzdari, i cili ka marrë leje nga klubi. Sot do të luhet në Peqin miqësorja me Shkumbinin, ndërsa të martën do të luhet një tjetër takim miqësor me Sopotin, për të qenë gati për ndeshjen e radhës në kampionat me Partizanin.

[wxz]

Afrim Deliu është rikthyer tek ekipi i Kastriotit pas një periudhe gjashtëmujore, kua ai kishte nënshkruar për ekipin e kategorisë së parë, Burrelin. Mbrojtësi energjik mund të quhet një nga veteranët e ekipit krutan, pasi ka luajtur prej vitesh në superligë, ku është aktivizuar fillimisht me ekipin e Kastriotit, më pas me Laçin, për t'u rikthyer sërish në Krujë me ekipin që ai sapo ka nënshkruar një kontratë njëvjeçare. Sipas presidentit të Kastriotit, Shkëlzen Zhilli, afrimi i Deliut do t'i shërbejë konsolidimit të repartit të mbrojtjes pas largimit të mbrojtësit Turdiu për tek ekipi i Tiranës. "Aktualisht kemi në plan edhe dy përforcime të tjera, pasi stafi i ekipit ka ndjekur dy lojtarë brazilianë në Greqi, të cilët luajnë me ekipe të kategorisë së dytë në shtetin helen, por që çuditërisht jan ndaluar nga ana e palës shqiptare në doganën e Kakavijës për mungesë dokumentacioni. Edhe pse dy lojtarët tashmë janë pjesëtarë të ekipit të Kastriotit dhe kanë marrë lejet e kalimit nga ekipet e tyre, ata kanë mbetur në Greqi. Kjo ka bërë që unë të nisem sot (dje) për në Greqi që të tërheq dy sulmuesit brazilianë për t'i sjellë në Krujë. Ndërsa ka firmosur përfundimisht Klodian Asllani dhe tentativat me pesë lojtarë të tjerë vazhdojnë. Të pesë lojtarë janë pjesë të ekipeve të superligës shqiptare, por çuditërisht edhe ata me sa duket presin nëse ekipet e tyre ua plotësojnë kërkesat për të nënshkruar në momentet e fundit. Unë mund të them se edhe ne si ekip nuk do të nënshkruajmë me ta kur duan ata, sepse nevojat janë të dyanshme. Ne kemi nevojë për ta dhe ata për ne. Por nuk do të lejoj që askush të përfitojë në kurrizin tim dhe të ekipit. Nuk do të marr lojtarë që mbeten pa ekip, kur ne kemi kohë që bisedojmë me ta dhe ata thonë do të vijmë të nënshkruajmë, por që realisht na lënë në pritje. Kjo na dëmton ne si ekp dhe kjo më ka detyruar që të shkoj përtej kufijve për gjetjen e lojtarëve cilësorë, që të dublojë të gjithë rolet në ekip, për të rritur konkurrencën dhe ngritur lojën e ekipit të Kastriotit," - është shprehur presidenti i Kastriotit, Shkëlzen Zhilli.

[wxz]

- Dje dinamovitët kanë kryer dy seanca stërvitore. Paradite blutë janë përgatitur në kompleksin "Dinamo", ndërsa seanca e pasdites është zhvilluar në fushat e minifutbollit që ndodhen pranë klubit. Shkak për lëvizjen e seancës së pasdites është bërë moti i keq, i cili i ka rënduar terrenet stërvitore të bluve.
- Llazi Gjika, një nga portierët dinamovitë, dje përsëri i ka ndërprerë stërvitjet me blutë, sepse pas një kontrolli të imtësishëm mjekësor ka rezultuar se dinamoviti ka bronshit. Kështu që mjekët i kanë dhënë portierit një kurë për të ndjekur, si dhe e kanë urdhëruar që të mos stërvitet disa ditë.
- Dinamo kishte mbetur dje vetëm me një portier, Alban Hoxhën, pasi Ilion Lika është me kombëtaren, ndërsa dy të tjerët janë të sëmurë. Kështu që trajneri Ilir Bozhiqi ka qenë dje në vështirësi, pasi për të plotësuar programin stërvitor të skuadrës i duheshin katër portierë. Për të plotësuar kontigjentin, Bozhiqit i është dashur që të marrë përforcime nga ekipet zinxhir.
-Goran Vinçetiç nuk ka qenë dje në përgatitjet e skuadrës, pasi për arsye familjare ka marrë leje te drejtuesit e skuadrës. Dje mesfushori kroat ka qenë i detyruar që të shoqërojë për në aeroportin e Rinasit pjesëtarët e familjes së tij që jetojnë në Kroaci, të cilët për disa ditë kanë jetuar në Tiranë me dinamovitin.
- Klevis Bejtia, mesfushori i ri i Dinamos, pas lëndimit që mori ditën e hënë, dje i është rikthyer plotësisht stërvitjes me ekipin.
- Boshnjaku blu, Zoran Novakoviç, as dje nuk ka qenë i pranishëm në ambientet e klubit. Ishte folur për një rikthim të tij pikërisht për të premten, por përsëri ka munguar.
- Sot pritet që Dinamo të zhvillojë një takim miqësor me Teutën dhe, sipas parashikimeve, kjo ndeshje do të luhet në Durrës. Megjithatë, asgjë nuk ka marrë trajtën përfundimtare, pasi fati i këtij takimi është edhe në dorë të motit, sepse nëse koha është me shi, ka shumë mundësi që miqësorja të anulohet.

[wxz]

Blutë nuk e lëshojnë falas sulmuesin, pasi deri më tani i kanë shlyer të gjitha detyrimet ndaj tije.


Dje El Haxhi Gudjabi u paraqet tek Dinamo për t'u përshëndetur me dinamovitët, pasi do të veshë fanellën e Vllaznisë. Por ndryshe nga vendimi i senegalezit, nga kampi blu dalin informacione kontradiktore rreth problemit të sulmuesit. Gudjabi pretendon që nuk ka kontratë me Dinamon dhe ka pasur të drejtë që ka zgjedhur Vllazninë, ndërsa drejtuesit blu shprehen se sulmuesi senegalez ka kontratë me skuadrën deri në përfundim të sezonit. Prandaj, sipas drejtuesve dinamovitë, kush nuk beson, fare thjesht mund ta vërtetojë nëse shkon në FSHF dhe të shikojë se cila palë ka të drejtë. "Pavarësisht se çfarë ka deklaruar sulmuesi, e vërteta qëndron komplet ndyshe, sepse gjithçka është e zeza mbi të bardhë dhe vërtetohet lehtë. Ne nuk mbajmë lojtarë me zor, por nëse shkodranët pretendojnë se Gudjabi është i tyre, atëherë puna qëndron ndryshe. Pra, nëse Vllaznia dëshiron që ta ketë Gudjabin në skuadrën e saj, më parë duhet të shlyejë detyrimin financiar tek Dinamo, sepse sulmuesi ka kontratë me blutë edhe për gjashtë muaj të tjerë. Nuk kemi si ta lëshojmë falas sulmuesin, pasi deri më tani ne kemi shlyer të gjitha detyrimet ndaj tij, madje edhe udhëtimet e fundit të senegalezit janë paguar nga presidenca dinamovite,"- është shprehur dje administratori i Dinamos, Ismet Saliu.

[wxz]

Senegalezi e konsideron veten ish-dinamovit, pasi blutë nuk shfaqin më interes për shërbimet e tij.

Çështja e sulmuesit senegalez El Haxhi Gudjabi ka qenë një lajtmotiv i merkatos së janarit dhe, kur kanë mbetur edhe 4 ditë nga mbyllja e lëvizjeve të lojtarëve, fati i afrikanit akoma nuk ka marrë zgjidhje. Gudjabi gjatë kësaj periudhe ka luajtur me disa porta, por edhe në këtë fushë senegalezi nuk po arrin të shënojë. Është folur shumë që Gudjabi është lojtar i Vllaznisë, pasi përpara se sulmuesi të largohej me pushime në Senegal ka firmosur një parakontratë me presidentin e klubit shkodran, Valter Fushaj. Por edhe klubi dinamovit e konsideron Gudjabin pjesë të tij dhe, nëse shkodranët dëshirojnë ta kenë në gjirin e tyre, duhet të paguajnë, sepse senegalezi është nën kontratë me blutë deri në fund të sezonit. Ndërsa El Haxhi Gudjabi është shprehur dje se me Dinamon nuk ka asnjë lidhje, pasi kontrata i ka përfunduar që me 15 dhjetor dhe kështu që ka pasur të drejtë të hyjë në bisedime dhe të firmosë për Vllazninë. Dje senegalezi ishte i pranishëm në ambientet e klubit dinamovit, pasi, sipas tij, kishte ardhur për t'u përshëndetur me shokët dhe për të marrë disa gjëra të vogla që i kishte lënë në dhomën e hotelit, sepse sot pritet që të niset drejt Shkodrës. "Prania ime te Dinamo nuk do të thotë që kam ndryshuar mendim për t'u kthyer, por kam ardhur thjesht për t'u përshëndetur me shokët, pasi nesër (sot) do të nisem drejt Shkodrës për të vazhduar karrierën me Vllazninë. Nuk ka asnjë arsye që të quhem lojtar i Dinamos, pasi kontrata ime me blutë ka përfunduar dhe tashmë jam kuqeblu. Në përfundim të dhjetorit, pashë që Dinamo nuk kishte interes për të më mbajtur, kështu duke ditur që edhe kontrata me blutë më kishte përfunduar, rashë dakord me drejtuesit e Vllaznisë për të qenë pjesë e kësaj skuadre. Shumë po flitet se kam kontratë me Dinamon, por unë jam i qartë se nuk kam asnjë detyrim ndaj bluve dhe shpresoj se edhe ata nuk do të paraqesin ndonjë pengesë që të shkoj drejt Shkodrës. Prandaj zgjidhjen e këtij problemi të vogël teknik do ta gjejnë presidentët e të dy klubeve, sepse unë nuk kam lidhje në këtë mes,"- u shpreh dje sulmuesi senegalez, El Haxhi Gudjabi. Gudjabi e konsideron veten një ish-dinamovit dhe shpreson që tek Vllaznia të tregojë forcën e tij të vërtetë. Sulmuesi ka ardhur në Shqipëri me shumë vonesë, por sipas tij nuk është prapa me stërvitjet, sepse është përgatitur në Senegal dhe si rezultat i kësaj përgatitje ka humbur edhe disa kilogramë. "Ardhja me vonesë ka ndodhur për shkak të peripecive që pata me dokumentacionet, por mendoj se jam i gatshëm për Vllazninë dhe te kuqeblutë shkoj për të kontribuar e jo për të ngrohur stolin. Mendoj se atmosfera e re do të ndikojë pozitivisht për mua dhe shpresoj që edhe golat të mos më mungojnë,"- përfundon sulmuesi senegalez, El Haxhi Gudjabi.

[wxz]

Trajneri Andrea Marko ka pasur në dispozicion të stërvitjes së djeshme rreth 26 futbollistë.

Gjatë zhvillimit të stërvitjes së djeshme të Apolonisë kanë qenë të pranishëm jo vetëm drejtuesit e klubit, por edhe qindra tifozë, të cilët nga kurioziteti për të parë prurjet e reja tek ekipi fierak, nuk kanë munguar. Trajneri Andrea Marko ka pasur në dispozicion të stërvitjes së djeshme rreth 26 futbollistë, të cilët në ditët e ardhshme do të reduktohen, pra do të kryhet një seleksionim në qëllimin e vetëm që në javën e ardhshme ekipi të fillojë nga puna tekniko taktike. Megjithëse grupi tashmë është konfirmuar, do të jenë ditët e fundit për t'u shprehur drejtuesit e skuadrës për futbollistët maqedonas, të cilët kanë ardhur për t'u provuar. Sot do të zhvillohet një ndeshje testuese brenda grupit. "Mendoj se pas një muaji tepër të ngjeshur përgatitjesh dhe seleksionimi, tashmë jemi futur në javën e fundit, ku nga trajnerët e skuadrës do të vendosin jo vetëm për grupin e futbollistëve që do të veshin fanellën e Apolonisë, por edhe të grupit të 11 esh së parë. Me ardhjen edhe të futbollistëve nga Brazili, mendoj se kemi krijuar një ide më të qartë për formacionin tonë, që mund të them do të jetë një grup ambicioz. Dihet synimi ynë, që është mbetja në superligë, ndaj në funksion të këtij objektivi do të përpiqemi të bëjmë më të mirën. Jemi nga të paktët ekipe që nuk e kemi shpërngulur procesin e përgatitjeve jashtë Shqipërisë për vetë faktin se klubi ynë zotëron kushte tepër të favorshme stërvitjeje. Kjo ka qenë arsyeja që futbollistët që kanë ardhur për provë u kanë pëlqyer shumë kushtet e afruara nga klubi ynë. Kemi pasur shumë kërkesa për të ardhur tek ekipi ynë, por tashmë janë trajnerët e skuadrës ata që vendosin për emrat që na nevojiten," shprehet sekretari i klubit të Apolonisë, Liu Bistika. Lidhur me zhvillimin e ndeshjes përgatitore brendapërbrenda ekipit, sekretari Bistika do të shtonte: "Ora 10:00 do të shënojë fillimin e takimit përgatitor, që ndryshe nga herët e tjera do ta zhvillojnë brenda grupit. Do të jetë kjo një ndeshje testuese për t'i dhënë dorën e fundit jo vetëm seleksionimit të futbollistëve të ardhur së fundi, por për të krijuar një ide edhe më të saktë për mënyrën e lojës. Mendoj se në përforcimet që tashmë i kemi konfirmuar do të jemi një ekip ndryshe nga sezoni i parë i superligës. Do të na duhej që qysh në takimin e parë me Shkumbinin të kërkojmë të arrijmë rezultat pozitiv, në mënyrë që të kemi mundësi për të mbijetuar në superligë." I pyetur lidhur me largimet më të fundit te skuadra fierake, Bistika do të shprehej: "Eshtë e vërtetë që ka pasur largime nga ekipi, por shumica e futbollistëve do të jepen me huazim. Ardhjet e fundit pa dyshim që kanë sjellë shumë futbollistë, ndaj nga presidenca u pa e udhës për të lënë të lirë disa prej tyre dhe disa të tjerë në formë huazimi. Kjo mënyrë bëhet jo vetëm për të forcuar ekipin, por edhe për të mos i larguar futbollistët, për të cilët është investuar ndër vite. Sot trajnerët e skuadrës do të kenë mundësi për të vënë dorën e fundit për sa i përket seleksionimit të futbollistëve maqedonas, të cilët ditët e fundit janë shtuar shumë".

[wxz]

Partizani do të luajë sot ndeshjen e fundit miqësore në prag të rifillimit të kampionatit. Siç ishte parashikuar, sot djemtë e Likës do të udhëtojnë drejt Shijakut, për t'u ndeshur në "Tofik Jashari" me Erzenin vendës. Drejtuesit e kuq janë të kënaqur me kundërshtarin që kanë zgjedhur, pasi do të mund të luajnë në një fushë të mirë.

[wxz]

Elbasanasi i Partizanit, Dorian Bylykbashi, ka shënuar golin e dytë për skuadrën e Krivbasit në takimin me Nacionalin e Bukureshtit, që është mposhtur 2-1 nga ukrainasit. Në këtë takim është aktivizuar edhe Henri Ndreka, që ka pasur tjetër detyrë, atë të zbrapjes së aksioneve të kundërshtarit. Të dy futbollistët e Partizanit janë aktivizuar në pjesën e dytë të takimit. Bylykbashi dhe Ndreka sot do të jenë në Tiranë për të tërhequr dokumentacionin nga Partizani, pasi firma e tyre me Krivbasin është thjesht një formalitet.

[wxz]

Kapiteni gjirokastrit deklaron se me ardhjen e dy lojtarëve të huaj ekipi do të jetë i plotë.


Pas një periudhe 10-ditore, dje skuadra gjirokastrite u dha fund përgatitjeve në Ulqin të Malit të Zi. Minifaza përgatitore që u zhvillua në Ulqin u karakterizua nga stërvitje të forta për futbollistët, gjithashtu u zhvilluan edhe disa takime miqësore. Vlen të theksohet se përgatitjet shkuan në mënyrën më të mirë, ku në radhët e lojtarëve nuk pati asnjë të dëmtuar dhe i gjithë grupi i përballoi ngarkesat e dhëna nga stafi teknik, me në krye trajnerin Ilir Spahiu. Ky i fundit e la pushim skuadrën për sot dhe nesër, ndërsa të hënën rifillon stërvitja në fushën sportive "Lefter Millo", të fshatit Dervician. Fillimi i kampionatit është në prag dhe të shtunën e ardhshme gjirokastritët do të luajnë në transfertë me Besën, ndërkohë që një javë më vonë presin Tiranën në shtëpi. Të dy takimet cilësohen të vështira, por në kampin bluezi janë përgatitur që t'i kalojnë me sukses. Nga merkatoja dimërore, deri më tani i vetëm përforcim në radhët e Luftëtarit është mesfushori Gjergji Dhima. Ndërkohë, drejtuesit gjirokastrit kanë punuar në fshehtësi për afrimin e lojtarëve. Nga burime të sigurta pranë donatorëve të Luftëatrit, këta të fundit kanë arritur përfundmisht akordin për të sjellë në Gjirokastër dy futbollistë të tjerë. Bëhet fjalë për një sulmues dhe një mesfushor, të cilët aktivizohen në divizionin 2 të kampionatit francez. Futbollistët pritet që ditën e hënë të dalin në stërvitje me ekipin. Sipas informacioneve, lojtarët huaj janë cilësorë dhe nuk do të kalojnë në provë. Ndërkohë, për sa i përket marrëveshjes me ta, donatori Mihal Delijorgji ka mbyllur gjithçka. Me ardhjen e dy lojtarëve të huaj, merkatoja për Luftëtarin mund të quhet e mbyllur. Një nga lojtarët veteranë të Luftëtarit, kapiteni Neritan Novi, në një prononcim për "Sportin shqiptar", thekson se Luftëtari do të bëjë një paraqitje më të mirë pjesën e mbetur të kampionatit. "Vijmë pas një stërvitjeje 10-ditore në Ulqin, e cila na vlejti mjaft. Kemi marrë ngarkesa të rënda nga trajnerët dhe tani ndihemi pak të lodhur. Gjithsesi, besoj se deri në takimin me Besën do të jemi në formën më të mirë. I garantoj tifozët gjirokastritë se paraqitja e ekipit në pjesën e dytë të kampionatit do të jetë edhe më e mirë. Presim që të vijnë dy lojatarët huaj, të cilët janë shumë cilësorë për kampionatin shqiptar. Me ardhjen e tyre ne kompletohemi dhe jemi të sigurt në realizimin e objektivit kemi. Do të jemi një "kockë e fortë" për të gjitha skuadrat,"- deklaroi për "Sportin shqiptar" kapiteni i Luftëtarit, Neritan Novi.

[wxz]

Ka mbërritur më në fund në Shqipëri senegalezi Gudjabi dhe sot pritet që të jetë në stërvitje me Vllazninë. Kështu bëhet e ditur nga burime pranë skuadrës shkodrane, sipas të cilave, thuhet se afrikani me të mbërritur në Rinas është drejtuar për në Tiranë, ku ka shkuar në klubin "Dinamo" për të sqaruar pozicionin e tij. Bëhet e ditur se ai ka këmbëngulur në përfundimin e kontratës që ka pasur me blutë dhe një çështje e tillë duket se ka marrë fund pas deklarimit të lojtarit se ka ardhur në Shqipëri për llogari të Vllaznisë. Madje ka qenë vetë presidenti Fushaj që i ka siguruar vizën e hyrjes në Shqipëri dhe njëkohësisht edhe lejen e qëndrimit në vendin tonë. Sot pritet që lojtari të drejtohet për në Shkodër për të filluar stërvitjen me kuqeblutë.

[wxz]

Dita e djeshme ka qenë e ngarkuar për kuqeblutë. Ata kanë zhvilluar sërish dy seanca stërvitore sipas planit të trajnerit Josa. Paradreke skuadra ka qenë në sallën e forcës së kompleksit "Zmijani", ndërsa pasdite në fushën e Shtojit është zhvilluar një ndeshje kontrolli brenda skuadrës. Anulimi i ndeshjes me Luftëtarin ka bërë që kuqeblutë të zhvillojnë gjithsesi një test një javë para ndeshjes zyrtare me Flamurtarin. Në stërvitjet e djeshme, përveç kosovarit Miroçi, që ka mbërritur në darkë nga Gjermania, nuk kanë qenë as dy lojtarët që vazhdojnë të jenë në grumbullimin e kombëtares në Turqi, Teli e Sukaj. Në stërvitjen e sotme pritet të jenë prezent edhe Gudjabi e Miroçi.

[wxz]

Mesfushori dhe kapiteni shkodran Safet Osja se ekipi ka potenciale për të kapur edhe kreun e klasifikimit.


Vllaznia e këtij viti duhet medoemos të mos bjerë më poshtë se ajo e vitit të kaluar, por veçse të synojë për më lart. Ky është mendimi që jep kapiteni i kësaj skuadre, Safet Osja. Ai ka besim se skuadra që përfaqëson do të paraqitet mirë në pjesën e mbetur të sezonit, nisur nga puna e mirë që është duke u bërë. Zhvillimi i fazës përgatitore në kushte shumë të mira në Hercegnovi të Malit të Zi e ka shtuar entuziazmin në radhët e kuqebluve. "Jemi duke kaluar një periudhë të mirë. Në dyjavëshin që u stërvitëm në Mal të Zi, kemi zhvilluar një stërvitje intensive, falë edhe kushteve shumë të mira që gjetëm atje. Pikërisht kjo punë e bërë gjatë kësaj periudhe na bën shumë optimistë për të dhënë më të mirën në vazhdim të sezonit," ka thënë Osja. Sakaq, shkodranët nuk janë përforcuar shumë nga merkatoja e janarit, gjë që ua ka prishur disi planet drejtuesve të skuadrës. Ardhjet e reja i kanë mirëpritur edhe titullarët aktualë të Vllaznisë, sepse, sipas tyre, sa më shumë lojtarë cilësorë të jenë në skuadër, aq më shumë shtohen mundësitë për të pasur pretendime maksimale. Këtë gjë e pranon edhe numri 5 i Vllaznisë, i cili shton: "Presidenti pati premtuar se do të afronte disa lojtarë cilësorë nga merkatoja e janarit, por deri tani ka firmosur vetëm kosovari Miroçi dhe po ashtu mendohet edhe Gudjabi për të qenë pjesë e skuadrës. Shpresojmë shumë që deri në periudhën e mbylljes së merkatos të ketë edhe ndonjë përforcim tjetër, sepse ata janë gjithmonë të domosdoshëm në një skuadër me pretendime maksimale. E dimë se në këtë periudhë është e vështirë të gjesh lojtarë cilësorë, por jemi në pritje edhe të ndonjë tjetri." Vllaznia e mbylli vitin 2006 në vendin e tretë në renditje dhe kjo gjë ka shtuar interesin për të kërkuar vende më lart në tabelën e renditjes. Kapiteni Osja shprehet se vendi i tretë është më se i merituar dhe është arritur me meritë, por objektivi është të shpresohet për më lart. "Të tretët jemi në renditje. Vend që e kemi arritur vetëm me këmbët tona dhe kështu do të vazhdojmë të luajmë edhe në të ardhmen. Kuptohet që më poshtë nuk do të biem, kjo është e rëndësishme dhe objektivi ynë është të shkojmë më lart në renditje. Jemi të vendosur për këtë gjë dhe do të bëjmë të pamundurën për t'ia arritur," shton ai. Safet Osja në 17 ndeshjet e deritanishme në kampionat ka munguar vetëm në njërën prej tyre për arsye shëndetësore, duke luajtur në të gjitha përreth 90 minuta në fushë. Ai është shembulli i futbollistit që nuk pushon së lëvizuri në fushën e lojës dhe për këtë është një busull edhe për më të rinjtë që janë në skuadër.

[wxz]

Në 18 muaj qëndrim te Tirana, Hamdi Salihi arriti të fitonte një Kupë Shqipërie, një Superkupë dhe trofeun e "Këpucës së artë". I vetmi trofe që i mbeti pa shijuar, si kur luante te Vllaznia, ashtu edhe te Tirana, ishte titulli kampion. Për një sulmues të kalibrit të Salihit, sigurisht ndihet mungesa e këtij trofeu, që mbetet nga më prestigjiozët. "E kam peng faktin që nuk arrita ta fitoja një titull kampion në superligë. Bëra maksimumin e mundësive për ta bërë realitet një ëndërr të tillë, por nuk ishte e thënë të ndodhte, sepse disa gabime që bëmë te Tirana na kushtuan shumë."

[wxz]

Pavarësisht se ndodhet shumë larg Shqipërisë, Hamdi Salihi nuk i harron ditët e bukura që kaloi në kampionatin shqiptar. Vllaznia dhe Tirana ishte kulmet e tij të karrierës, ku shënoi një mal me gola, teksa tashmë është kthyer në një idhull nga të dyja tifozeritë. Përveç familjes së tij, Hamdiu komunikon edhe me ish-shokët e tij, në veçanti me Vioresin Sinanin, pa harruar Devi Mukën, Klodian Duron dhe Eldorado Merkoçin. Ky i fundit, që tashmë është bërë pjesë e Dinamos, foli fjalë të mira kur drejtuesit e Riedit e pyetën nëse Salihi ishte i përshtatshëm për kampionatin austriak. Disa vjet më parë, Merkoçi ka qenë pjesë e Worglit, por vetëm një dëmtim i pësuar në gju e ndau nga ky ekip. Ja se si shprehet Salihi për komunikimet që ka me ish-shokët e tij: "Kam folur në telefon me Sinanin, Duron, Mukën apo Merkoçin. Edhe pse jam larg, vazhdoj t'i ruaj kontaktet me ta, sepse kanë qenë ndër shokët e mi më të mirë në Shqipëri. Te Vllaznia ndodhet Teli, një tjetër mik i imi, me të cilin flas gjithashtu dhe e pyes se si po i shkojnë përgatitjet. Është e vërtetë që zemra ime është e ndarë mes dy skuadrave, Vllaznisë dhe Tiranës, teksa nuk e përjashtoj mundësinë se një ditë do të kthehem sërish aty. Profesioni ynë është i tillë që asnjëherë nuk mund të thuash kurrë,"- bën të ditur Salihi.

[wxz]

Ish-sulmuesi i Tiranës, Vllaznisë dhe Panionosit tregon ditët e para të bashkëjetesës me skuadrën austriake.


Hamdi Salihi nuk ndihet aspak si i huaj në Austri. Me pritjen që i rezervuan drejtuesit, shokët e rinj të skuadrës, por edhe tifozët, shkodrani është ambientuar më shpejt nga sa e kishte menduar. Prej 25 ditësh, ish-sulmuesi i Tiranës, Vllaznisë dhe Panionosit është bërë pjesë e skuadrës së Riedit, skuadër e cila drejtohet nga trajneri Helmut Kraft. I larguar nga bardheblutë me konsensusin e donatorëve, "bomberi" që shënoi plot 50 gola për Tiranën në 18 muaj bashkëjetesë, ka nisur një karrierë të re, e cila mund t'i hapë rrugën për të qenë titullar i kombëtares. Kalimi i Salihit në kampionatin austriak u bë falë mbështetjes së madhe që trajneri Oto Bariç dha në favorin e tij, duke e krahasuar me Gert Mylerin e Gjermanisë. Kur të gjithë prisnin që 23-vjeçari të kalonte te Rapidi i Vjenës, ku edhe vetë kroati i kombëtares është konsulent, në çastet e fundit ngjarjet ndryshojnë dhe Salihi firmos me Riedin, deri më qershor të vitit 2009. Është pse nuk është zyrtare shuma që shkodrani do të përfitojë, nën zë mësohet se ajo vërtitet te 200 mijë eurot në vit. Në një intervistë telefonike për "Sportin shqiptar" nga qyteti i Riedit, "këpuca e artë" e kampionatit shqiptar zbulon detaje interesante të jetës së re që sapo ka nisur.
- Hamdi, si jeni? Nga Shqipëria ju flasim dhe pikërisht gazeta "Sporti shqiptar" ju shqetëson...
- Përshëndetje. Mirë jam dhe faleminderit që më telefonuat. Kam kënaqësi të flas për këtë gazetë, që sigurisht ka dhënë kontributin e saj në afirmimin e vlerave të mia. Por një pyetje desha t'ju bëj, ku e gjetët numrin tim që kam në Austri?
- Ia morëm Klodian Duros, po ku ndodheni tani dhe si po ia kaloni?
- Jam në supermarket, duke bërë pak pazarin për shtëpinë time të re. Sapo mbarova stërvitjen dhe tani kam dalë në qendër të qytetit.
- Si është koha në Ried dhe me se jeni marrë në këto ditë të para qëndrimi atje?
- Këtu i gjithë qyteti është mbuluar nga bora. Sapo kam mbërritur, nga ana e drejtuesve më është vënë në dispozicion apartamenti dhe një makinë Suzuki. Pothuajse gjithë muajin janar e kemi kaluar në stërvitje, me nga dy seanca ditën. Në Ried kemi vetëm pak ditë që jemi kthyer nga Turqia, ku zhvilluam pjesën e parë të fazës përgatitore. Gjatë javës tjetër do të nisemi sërish në Belek, për të mbyllur gjithë planin përgatitor dhe gjithashtu të bëhemi gati për fillimin e kampionatit më 24 shkurt.
- Çfarë mund të na thoni për pritjen që ju kanë rezervuar në Austri dhe a ju ka marrë malli për të afërmit?
- Të them të vërtetën, kam mbetur i habitur nga mënyra se si më kanë pritur të gjithë, duke filluar nga shokët e skuadrës, trajneri, drejtuesit e tjerë, por edhe tifozët, të cilët tashmë më njohin dhe më flasin gjithmonë në rrugë. Nuk më ka munguar asgjë deri tani dhe për këtë dua t'i falënderoj të gjithë, pa përjashtim. Në lidhje me familjen time në Shkodër, ndiej shumë mall, por të paktën flas çdo ditë në telefon dhe çmallem disi. Mezi pres që të rikthehem në Shqipëri, ndoshta për miqësoren e kombëtares me Maqedoninë.
- A keni pasur ndonjë person me të cilin jeni shoqëruar më shumë?
- Po, sigurisht. Bëhet fjalë për shokun e ekipit, shqiptarin nga Maqedonia, Emin Sulejmanin. Me të thuajse kaloj pjesën më të madhe të kohës, ndërkohë që shok të afërt tjetër kam edhe serbin Damjanoviç. Pastaj, këtu në skuadër kanë ardhur edhe disa lojtarë të tjerë të rinj, kështu që unë nuk jam blerja e vetme për këtë sezon të ri që do të nisë shumë shpejt.
- Në çfarë gjuhe komunikoni aty?
- Këtu flitet në gjuhën gjermane, por unë personalisht komunikoj në anglisht. Shumë shpejt mendoj se do të nis të mësoj edhe gjermanishten, e cila është gjuhë zyrtare në Austri.
- Po me trajnerin Kraft, si i keni marrëdhëniet?
- Shumë të mira. Ai thuajse çdo ditë më pyet se si jam dhe çfarë problemesh kam. Gjithashtu, mundohet të më udhëzojë në detaje për çdo lëvizje timen në fushë.
- Në miqësoren që keni zhvilluar ndaj skuadrës së kategorisë së dytë, SC Shvanenstadit, edhe pse humbët, keni shënuar dy golat e parë me fanellën e Riedit...
- Njërin gol e shënova me penalltinë që e fitova vetë, ndërkohë që golin e dytë me këmbën e majtë, pas një gjuajtjeje brenda zonës. Për sa i takon humbjes, nuk na shqetëson edhe aq shumë, sepse tani jemi në fazën e përgatitjeve dhe harmonizimit të veprimeve.
- Sa ndryshon niveli i futbollit austriak nga ai shqiptar?
- Në anën e infrastrukturës ka dallime të mëdha, ku fushat e stërvitjes janë thuajse të njëjta me ato të stadiumeve. Në këtë aspekt austriakët janë profesionistë, ndërsa për nivelin e futbollistëve, mund të them se Riedi nuk ka lojtarë më të mirë se sa ata të Tiranës. Këtu nuk ka yje, por elementë të nevojshëm për të pasur një skuadër që e ka forcën e vet te grupi dhe që do të pretendojë shkallët më të larta në renditje.
- Cili është moduli i lojës që përdor trajneri dhe a ndiheni titullar në ekip?
- Deri tani kemi provuar më shumë të luajmë me modulin 4-5-1, ku unë jam qendërsulmues dhe mbrapa meje vijnë dy mesfushorë me tipare sulmuese. Në skuadër jemi gjithsej 4 sulmues dhe lufta për një vend në formacion është e madhe. Unë sigurisht kam ardhur në Austri për të luajtur dhe për të dhënë kontributin tim në objektivat e ekipit. Në njëfarë mënyre, Riedi për mua është një bast që dua ta fitoj, ku me anë të golave që do të shënoj, të arrij të fitoj edhe vendin e titullarit në përfaqësuesen kuqezi. Nuk do të jetë e lehtë, megjithatë, jam i vendosur për të dhënë më të mirë time në fushë, sepse tani ndihem edhe më i pjekur në krahasim me disa vite më parë, kur provova të luaja në Greqi.

[wxz]

Lezhjani nuk ka dalë dje në stërvitje, ndërkohë që askush nuk e ka justifikuar mungesën e tije.

"Hallet" s'kanë të mbaruar për skuadrën e Partizanit. Robert Grizha është futbollisti i katërt që, me sa duket, në ndeshjet që vijnë nuk do të jetë më pjesë e të kuqve. Sipas burimeve pranë klubit, lezhjani është larguar përfundimisht nga Partizani, pas mosmarrëveshjeve financiare me presidentin Xhani. Ndonëse lajmi nuk konfirmohet zyrtarisht nga klubi i kuq, pasi drejtuesit e stafit teknik vetëm ngrenë supet, një gjë është e sigurt: Grizha nuk ka dalë dje në stërvitje, duke mos i lajmëruar drejtuesit. "Nuk di ç'të them. Grizha nuk ka ardhur në stërvitje dhe unë s'e di arsyen." Kaq ka folur trajneri i Partizanit, Hasan Lika, për mungesën shtatlartit lezhjan, që në fakt ka rënë shumë në sy. Arsyeja e vërtetë, sipas burimeve pranë skuadrës, është mosmarrëveshja financiare e Grizhës me presidentin Xhani. Siç dihet, pak ditë më parë, sapo skuadra u kthye nga faza përgatitore e Ulqinit, futbollistët u paguan me këstet e dyta të kontratave. Grizha, që gjatë kthimit nga Mali i Zi ndaloi në Lezhë, u nis përnjëherë drejt Tiranës pikërisht për të marrë këstin e dytë të kontratës. Me sa duket, mes palëve ka pasur mosmarrëveshje për shumën e parave që do të përfitonte futbollisti, çka ka sjellë "divorcin" e parakohshëm. Mungesa e pajustifikueshme e lojtarit dhe ngritja e supeve nga pjesëtarët e stafit teknik tregojnë qartë se ka ndodhur diçka serioze mes presidentit Xhani dhe mbrojtësit Grizha. Lezhjani është futbollisti i katërt që me ç'shihet nuk do të jetë pjesë e Partizanit për pjesën e mbetur të sezonit. Në këtë situatë të krijuar, mbrojtja mbetet reparti më i zbuluar, pasi edhe Henri Ndreka është larg Partizanit. Barra e mbrojtjes bie vetëm mbi supet e Tafajt dhe Pinarit, duke e detyruar Likën të tërheqë edhe Beqirin, që pjesën më të madhe të ndeshjeve e ka luajtur si mesfushor i djathtë. Në dispozicion të trajnerit janë edhe futbollistët e rinj si Aliu, Miska, Capo etj., por eksperienca e tyre në ndeshjet e superligës është e paktë. Organika e Partizanit është e pasur në numër, por në këtë grup ka lindur nevoja për adaptimin në role. Kështu, në mbrojtje mund të tërhiqen Hallaçi ose Gjyla, që kanë dhënë prova të mjaftueshme në ndeshjet e mëparshme. Takimi me Elbasanin po troket, ndërkohë që problemet në formacionin e të kuqve janë të dukshme. Dita-ditës po veniten edhe shpresat për përforcimin e skuadrës me lojtarë afrikanë, që kanë sjellë në Tiranë vetëm pasaportat e tyre. Me gjithë punën e mirë të bërë në Ulqin, Partizani mbetet larg pretendimeve për trofetë e sezonit.

[wxz]

Formacioni i të kuqve është në emergjencë në repartin e pasmë, pas largimit të dy futbollistëve.



As tifozi më largpamës nuk e kishte parashikuar këtë situatë që është krijuar në skuadrën e Partizanit, kur kanë mbetur vetëm katër ditë nga mbyllja e merkatos së janarit. Mbrojtja e kuqe është në pikë të hallit, pasi janë larguar dy futbollistë të formacionit, ndërkohë që zëvendësimi i tyre nuk është bërë ende. Nëse deri para dy ditësh boshllëku i krijuar nga largimi i Ndrekës mendohej të mbushej nga futbollistët afrikanë, me ikjen edhe të lezhjanit tjetër, Robert Grizha, situata është bërë e jashtëzakonshme. Trajneri Lika jo vetëm që nuk ka futbollistë në dispozicion për këtë rol, por është i detyruar të tërheqë lojtarët e mesfushës në repartin e pasmë. Kjo u pa qartë edhe në miqësoren e djeshme me Erzenin, ku Beqiri nga e majta dhe Hallaçi në të djathtë kishin marrë më shumë detyra mbrojtëse. Në përfundim të ndeshjes, trajneri i Partizanit e pranon gjendjen e vështirë që po kalon formacioni i kuq, duke theksuar se shpreson që të mbyllet ndonjë "vrimë" gjatë këtyre ditëve të fundit të merkatos. "Duhet ta pranojmë se kemi mungesa të theksuara në të repart. Sigurisht, kampionati po troket dhe në këtë situatë ku jemi nuk do ta kemi aspak të lehtë. Unë shpresoj shumë se gjatë ditëve të mbetura të merkatos do të arrijmë të gjejmë futbollistët e duhur për të zëvendësuar ata që janë larguar,"- është shprehur Lika. Natyrisht, trajneri i të kuqve ka komentuar edhe largimin e Grizhës, që, sipas tij, ka ardhur nga pretendimet e vetë lojtarit: "Nevoja për përforcime nuk ka lindur tani që u largua Grizha. Me Grizhën e pa Grizhën ne kishin nevojë për t'u përmirësuar. Lojtari në fjalë kishte pretendimet e tij, por unë shoh punën time." Partizani është futur prej disa ditësh në tratativa për të sjellë në Tiranë Elvis Krajën, shkodranin që aktualisht aktivizohet me Besën. Pengesa e vetme për këtë transferim është kontrata e shkodranit me ekipin kavajas. Trajneri Lika i pranon bisedimet me lojtarin dhe shpreson në kompromisin mes presidentëve respektivë, Xhani e Bizhdili. "Duhet të pranoj se bisedimet kanë arritur deri në një pikë, por nuk është çdo gjë në dorën tonë. Shpresoj që presidentët të bien dakord që Kraja të kalojë tek Partizani. Natyrisht, do të ishte një afrim cilësor, sidomos në këtë situatë të krijuar,"- është shprehur më tej trajneri Lika. Kraja ka qenë nën urdhrat e Likës në fillim të sezonit, teksa trajneri aktual i Partizanit ishte në krye të stolit të Besës. Shanset për ardhjen e Krajës shtohen me kalimin e mundshëm të Robert Grizhës tek Besa. Lezhjani në këtë moment po shqyrton ofertat që i vijnë nga skuadrat e superligës.

[wxz]

Pas suksesit në kategorinë e parë dhe investimeve, askush nuk e mendonte ekipin fierak në vend të fundit.

Investimet dhe fillimi i stërvitjes herët
Pakkush do të kishte menduar se skuadra fierake Apolonia në fund të sezonit 2006 do të ishte në vendin e fundit në tabelën e klasifikimit të superligës. Fillimi i përgatitores që më 4 qershor, kohë kur ekipet e tjera ende nuk ishin ndarë me pushimet dhe mbi të gjitha konfirmimi i grupit të vazhdimësisë, bënë që drejtuesit e skuadrës fierake të ishin për një skuadër ambicioze. Vetë presidenti i FK "Apolonia", zoti Koço Kokëdhima, më shumë se një herë kishte shprehur hapur objeksionet e tij për një ekip të përbërë kryesisht nga futbollistë të rinj, por gjithmonë duke ruajtur boshtin e futbollistëve që kishin siguruar biletën për në superligë. "Qëndrimi në superligë, deklaroi zoti Kokëdhima përpara fillimit të sezonit, do të jetë synimi ynë." Por njëkohësisht në përfundimin e Akademisë së Futbollit do të synojë të trajnojë rreth 300 talentët më të mira të zonës për të qenë një klub me një infrastrukturë tepër moderne. Dhe ndërsa njëshi i skuadrës fierake ka deklaruar për ndërtimin e akademisë, tashmë është zyrtarizuar muaji prill 2007 si afati i fundit për përfundimin e punëve, duke i hapur kështu rrugë një investimi tepër gjigant.
Trajneri rumun Dumitresku dhe nisja e dobët
Pas disa tratativash, zoti Kokëdhima do të sillte në drejtimin e skuadrës rumunin Silviu Dumitresku, i cili më parë kishte drejtuar vetëm në kampionatin rumun dhe kishte zgjedhur Apoloninë si trampolinë për të hapur rrugën një eksperience internacionale. Por edhe pse Dumitresku e udhëhoqi skuadrën prej disa javësh, nuk mundi ta nxirrte nga kriza që e kishte kapur qysh në javët e para. Madje rumuni ka mbetur i habitur se si një skuadër që sapo vjen në një kampionat më lart se ai ku konkurron, i luan dy ndeshjet e para jashtë fushës së vet. Takimin e parë skuadra e drejtuar nga Dumitresku do ta luante në stadiumin "Selman Stërmasi" me skuadrën e Partizanit. Mungesa e eksperiencës së shumë futbollistëve, por mbi të gjitha edhe mospërshirja në formacionin e fillimit të sulmuesit më produktivë të skuadrës, Sebino Plaku, e vuri në pështjellim lojën, që u rregullua disi në pjesën e dytë, po që u humb 2 3 dhe ngushëllimi i vetëm jo vetëm për tifozët, por edhe i drejtuesve të skuadrës, ishte se u luajt mirë. Por skuadra do të zhgënjente përsëri përballë skuadrës vlonjate, me një rezultat që nuk të bindte për investimet që ishin kryer në skuadër. Skuadrës i mungoi lojtari me eksperiencë dhe mbi të gjitha te repartet e skuadrës u shfaqën dobësi të theksuara. Por a do të ndryshojë imazhi i kësaj skuadre? Në njëfarë mënyrë kjo ishte një pyetje që kërkonte shumë përgjigje me shumë të panjohura. Por drejtuesit e skuadrës e kishin menduar këtë krizë, ndaj kishin federuar me urgjencë në afatin e fundit 5 brazilianë të sugjeruar nga Zheraldinjo.
Mbërrijnë brazilianët e shumëpritur
Duke parë gjendjen e skuadrës, presidenti Kokëdhima nëpërmjet futbollistit Zheraldinjo, sjell në skuadër disa futbollistë brazilianë, të cilët me përjashtim të Roshës, që ishte provuar më parë në kampionatet shqiptare, nuk bindën. Me kalimin e javëve brazilianët nisin të "avullojnë" një e nga një, pasi kjo merkato me ta pothuajse u quajt e dështuar. Edhe pjesa tjetër që mbeti te skuadra pak hapësira gjeti, ku Rosha do të ishte më i aktivizuari.
Barazimi me Teutën dhe goli i anuluar
Barazimi në Fier me Teutën do të mbahet mend nga tifozëria vendase jo vetëm për futbollin e bukur që skuadra luajti, por edhe për golin e anuluar nga gjyqtari Arjan Mali. Një gol që u mohoi fierakëve tri pikë tepër të çmuara, por që e la përsëri skuadrën në vendin e fundit, por tashmë me vetëm një pikë. Por vuajtjet e skuadrës do të vazhdonin edhe në javët në vazhdim, ku përsëri do të regjistrohej një humbje në Gjirokastër, por edhe një tjetër goditje nga Besa brenda në Fier. Të gjitha këto humbje pa dyshim që nuk janë kapërdirë lehtë nga presidenti Koço Kokëdhima, i cili prej kohësh kishte në tavolinë dorëheqjen e Dumitreskut, por vetëm në javën e 7 të zyrtarizoi largimin e tij. Në stolin e Apolonisë do të zyrtarizohej trajneri Dhimitër Papuçiu, i cili si një njohës i mirë i futbollit fierak, së bashku me bashkëpunëtorët e tij, do t'i jepte një ngritje nivelit të pikëve të skuadrës, ku me interes do të ishin fitoret në transfertë me Vllazninë, e cila rriti jo vetëm moralin e skuadrës, por edhe besimin e vërtetë. Fitorja ndaj Dinamos, edhe pse me rezultat minimal, e vërteton këtë fakt më së miri, duke i mbyllur ndeshjet e fazës së parë me një moral më të lartë dhe mbi të gjitha me lojëra në ngritje.
Fillimi i keq i fazës së dytë dhe bojkoti
Fillimi i fazës së dytë riktheu edhe një herë rezultatet negative në skuadër dhe humbja me Partizanin ka ardhur si rrufe në qiellin e pastër. Por kjo do të ishte gjysma e së keqes pas asaj që ndodhi një javë më vonë. Bojkoti i futbollistëve përpara fillimit te Flamurtari do të shënonte një precedent të paparë në historinë e futbollit shqiptar. Dhe skuadra përballë kuqezinjve të Flamurtarit do të paraqitej me djem 16 17 vjeçarë dhe brazilianë, që duke qenë se janë futbollistë me kontrata, e respektuan në mënyrë dinjitoze fanellën e besuar.
Marko: Do të japim maksimumin tonë
Dorëheqja e trajnerit Papuçiu në prag të mbylljes së vitit 2006 i ka hapur rrugën në krye të stolit fierak tiranasit Andrea Marko. Si një ish futbollist me përvojë, por edhe drejtues i skuadrave, si Luftëtari, Dinamo, Bylisi, Pogradeci, Andrea Marko menjëherë do të deklaronte se merrte përsipër drejtimin e kësaj skuadre për të bërë maksimumin e tij dhe për ta mbajtur ekipin në superligë. Pas disa bisedave të tij me presidentin e skuadrës, hapet rruga për afrimin e disa futbollistëve cilësorë pranë skuadrës. I pari që firmos do të jetë shqiptaro maqedonasi Suad Zendeli, një portier mjaft i mirë, që pas një eksperience te Dinamo, rikthehet në superligë me një ambicie jo vetëm për t'u afirmuar, por edhe për të kërkuar fanellën kuqezi. Më pas do të firmosë Çuko, Jakimovski, Jean Da Silva, Uashington Luis Galvao, Nuru, Carls, të cilët janë pjesë e Apolonisë për pjesën e mbetur të superligës. "Të gjitha përforcimet e kryera në skuadër pa dyshim janë kryer për të realizuar objektivin e skuadrës, që për këtë sezon është mbetja në superligë. Një objektiv ky sa i vështirë, kur dihet niveli i pikëve të grumbulluara, shpresa vdes e fundit. Do të përpiqemi të japim maksimumin tonë për të realizuar objektivin, që për ne mbetet qëndrimi në superligë. Me ardhjet e fundit mund të them se jemi gati për ta filluar sa më mbarë, ku shpresojmë edhe të kënaqim tifozët tanë, të cilët na kanë mbështetur gjatë gjithë javëve që jam në krye të skuadrës," thotë trajneri Andrea Marko.

[wxz]

Presideti i ekipit të Kastriotit i ka mohuar zërat për një bashkëbisedim të tij me futbollistin lezhjan që luan për ngjyrat e Partizanit, Robert Grizhën. Sipas Zhillit, ai nuk ka kontaktuar asnjëherë mne Grizhën dhe për më tepër të ketë kërkuar shërbimin e tij me ekipin e Kastriotit. "Jam në bisedime me të tjerë futbollistë. Unë nuk kam asgjë kundër nëse Grizha dëshiron të vijë në Krujë, por duhet të marrë notën kaluese te trajneri Haxhiaj. Eshtë ai arkitekti i ekipit të Kastriotit, ndërsa të gjithë ne të tjerët jemi në shërbimin e tij," - shprehet Zhilli. Ndërkohë që nga Greqia ai shprehet se tashmë dy brazilianët do të luajnë përfundimisht për ekipin e Kastriotit. Sipas Zhillit, dy futbollistët në fjalë kanë marrë të gjithë dokumentacionin në Greqi dhe janë pajisur dje me leje qëndrimi në vendin tonë. Ndërkohë që sot në mesditë ata do të jenë në stërvitje me ekipin e Kastriotit. "Për momentin unë po mendoj për strehimin sa më komod të tyre dhe njëkohësishtë jam në tentativa për të sjellë të tjerë lojtarë në Krujë," ka përfunduar Zhilli. Lidhur me "pengun" më të madh që i ka mbetur, për Oriand Abazajn, ai shprehet se "menaxheri" i Abazajt duhet të derdhë shumën prej 14 milionë lekësh të vjetra në arkën e klubit të Kastriotit detyrimisht.

[wxz]

Kapiteni i verdhebluve shprehet se ekipi me këtë grup është edhe në vallen e titullit kampion.


Në një intervistë për "Sportin shqiptar", kapiteni i Elbasanit, Elvis Kotorri, këtë herë është shprehur ndryshe, duke theksuar se titulli kampion nuk është i pamundur. Kotorri thekson se Elbasani është forcuar shumë në lojën në grup dhe se nuk do të gabojë në sfidën me Partizanin në ndeshjen e parë zyrtare të këtij viti. Portieri elbasanas mendon se duhet parë çdo ndeshje si finale, pasi çdo hap fals do të ishte i pafalshëm për ekipin.
Kotorri, dy miqësore që nuk janë shfrytëzuar nga titullarët, pasi janë lënë pushim nga Gëzdari...
Nuk mund të themi se janë lënë pushim, se kanë pasur miratimin e Gëzdarit, por ka qenë të detyruara. Në Gramsh nuk mund të luhej në atë terren, ku shiu nuk pushoi një sekondë, pastaj unë mund të them se grupi njihet tashmë dhe është forcuar shumë, pasi edhe në stërvitje shikohet një impenjim maksimal nga të gjithë. Elbasani po më bind dhe mund të them se jemi në vallen e titullit kampion.
Ju keni thënë disa kohë më parë se e shikoni të vështirë titullin. Keni ndryshuar mendim?
Unë e kam thënë këtë, por në kohën e duhur, pra kur nuk kishim filluar merkaton dhe kur nuk kishim marrë këta futbollistë që kemi sot. Mund të them se me ardhjet e fundit Elbasani është bërë më i fortë dhe me siguri do të marrë maksimumin në të gjitha takimet që do të kemi në javët e ardhshme.
Ndërkohë që jemi në prag kampionati, nuk mendoni se mangësia e ndeshjeve miqësore mund ta dëmtojë Elbasanin në kampionat?
Që ndeshjet miqësore janë të domosdoshme, këtë as nuk e diskutoj, por që nuk mund të luash në shi dhe borë, këtë as nuk e vë në dyshim. Gjithsesi, të martën do të zhvillojmë miqësoren e tretë, kështu që besoj se Elbasanit i mjaftojnë këto ndeshje, pasi në stërvitje gjatë javëve kemi bërë shpesh ndeshje kontrolli.
Nuk mendoni se Elbasani ka nevojë ende për forcime?
Po të kemi sërish përforcime, aq më mirë, pasi do të na ndihmonte shumë. Sa më tepër futbollistë të kemi, aq më shpejt do të na vijnë edhe rezultatet. Këtë e ka në dorë presidenti, kështu që kjo është një pjesë që nuk më përket mua.

[wxz]

Miqësorja midis Elbasanit dhe Shkumbinit që u zhvillua sot në qytetin e Peqinit ka filluar me 30 minuta vonesë. Ndeshja ishte fiksuar për t'u zhvilluar në orën 14:00 dhe është zhvilluar në orën 14:30, pasi ekipi kampion i Elbasanit ka mbërritur me vonesë në qytetin e Peqinit. Shkak është bërë breshëri i fortë që filloi pikërisht në atë orë.

[wxz]

Treshja e futbollistëve të Elbasanit, Kaçi, Patushi, Osmani, nuk kanë qenë të pranishëm me ekipin në miqësoren e zhvilluar në Peqin. Të tre futbollistët kanë marre leje, pasi kanë pasur impenjime në Universitet, ku ka nisur edhe sezoni i provimeve për ta.

[wxz]

Takimi miqësor me Erzenin në "Tofik Jashari" i ka pasur të dyja anët e medaljes. Partizani është gjendur në disavantazhin e dy golave vetëm pak minuta para se të përfundonte takimi dhe në momentin që janë ndërruar të gjithë titullarët, ka ardhur barazimi i rezultatit. Në përfundim të ndeshjes Lika nuk ka qenë aspak i kënaqur me lojën e skuadrës së tij, sidomos me impenjimin e titullarëve. "Ishte një takim miqësor që nuk u ngrit në nivelin e ndeshjeve të tjera që kemi luajtur gjatë kësaj faze. Në fakt, unë prisja më shumë nga disa titullarë, që duhet ta theksoj se nuk u impenjuan aq sa duhet. Ndoshta në lojën e skuadrës ka ndikuar pushimi njëditor pas kthimit nga faza e Ulqinit. Fakti që barazuam, edhe pse në lojë ishin thuajse të gjithë lojtarë të rinj, tregon se kemi futbollistë të mirë që po përmirësohen nga ndeshja në ndeshje.
Erzeni barazon 2-2 me Partizanin
Dje, në "Tofik Jashari", Erzeni vendës ka barazuar 2-2 me Partizanin në një takim miqësor, që u paraprin ndeshjeve zyrtare të pjesës së dytë të sezonit. Djemtë e trajnerit Dedja e kishin vlerësuar shumë këtë ndeshje, çka u pa qartë në lojë dhe në rezultat. Shijakasit e nisën lojën me këtë formacion: Rizvani, Doku, Peqini, Dollaku, Troplini, Lala, Bejko, Sulo, Ndoja, Bylyku e Shero. Gjatë lojës u aktivizuan Rrema, Mitro, Vora, Renxa, Skilja e Bubani etj. Ndërsa Partizani e nisi lojën me formacionin e tij më të mirë: Shehi, Pinari, Tafaj, Beqiri, Hallaçi, Babamusta, Dhëmbi, Muzaka, Progri, Bakaj dhe Abilaliaj. U aktivizuan gjithashtu Bulku, Gjyla, Aliu, Malindi, Karabeci, Capa, Doda dhe portieri Bakaj. Në minutat e para Partizani ishte më konkret në lojën e tij, por mbrojtja shijakase u shfaq në nivelin e duhur, duke sprapsur sulmet e shumta të të kuqve. Me kalimin e minutave vendësit fituan siguri në lojë dhe e rrezikuan shpesh portën e Shehit. Në një formë të shkëlqyer është paraqitur edhe portieri Rizvani, i cili e ka shpëtuar disa herë radhazi portën e Erzenit nga gjuajtjet e Progrit e Bakajt.

[wxz]

Flamurtari ditën e shtunë ka zhvilluar ndeshjen miqësore ndaj Lushnjës të kategorisë së parë. Takimi ka përfunduar me rezultatin 2 0 për Flamurtarin. Golat u shënuan në minutën e 28 të nga sulmuesi vlonjat F.Xhafa dhe në minutën e 30 të nga A.Rustemi, i cili në fazën e parë është aktivizuar te Sopoti, i huazuar nga Flamurtari. Pavarësisht nga rezultati, të dyja skuadrat kanë zhvilluar një lojë të nivelit të kënaqshëm. Xhafa e Rustemi për Flamurtarin dhe Elezi e Xhagalliu kanë krijuar disa raste të pastra për shënim, veç 2 golave, por pa mundur të finalizojnë për gjuajtje të pasakta.

[wxz]

Ka përfunduar në barazim me shumë gola miqësorja e djeshme mes dy ekipeve fqinj, Shkumbinit dhe Elbasanit. Ka qenë një lojë e barabartë dhe kjo është dukur edhe në përfundim të takimit. Në 15 minutat e para vendasit krijojnë një epërsi të lehtë dhe shënojnë në minutën e 15 të me anë të Bubeqit nga pika e 11 metërshit, të fituar po nga ai vetë. Kështu mbyllet edhe pjesa e parë, ndërsa në pjesën e dytë ndërrohen pothuajse të dy formacionet. Minutat nga 53 deri në 65 janë emocionuese, pasi shënohen plot 4 gola, me Bizhytin 2 herë dhe Stojkun 2 herë nga kampi elbasanas. Në minutat e fundit Elbasani është më këmbëngulës dhe me një gjuajtje nga distanca Kuçi vulos rezultatin në 3 3. Kjo ishte miqësorja e fundit për Shkumbinin, ndërsa Elbasani do të zhvillojë një të tillë edhe të martën me ekipin modest të Sopotit.

[wxz]

Flamurtari është kthyer nga stërvitja 10-ditore e Ulqinit para 4 ditësh. Trajneri Vasil Ruci dhe stafi teknik janë shprehur të kënaqur për përvetësimin e programit stërvitor të skuadrës në 10 ditët ulqinake. Kushte e shkëlqyera, të cilat iu krijuan skuadrës në Ulqin, sipas trajnerit Ruci, nuk i kanë gjetur në Vlorë. Një situatë e pafalshme kjo, e cila ka ndikuar në moszbatimin si duhet të programit stërvitor. "Nga stërvitja që skuadra kreu në Ulqin të Malit të Zi, të gjithë futbollistët përfituan si në aspektin e përgatitjes fizike, por edhe taktiko teknike. Një situatë e tillë optimiste u krijua për shkak të kushteve të mrekullueshme. Gjithsesi, tani në stërvitjet e seancave në Vlorë nuk ndihem i qetë për shkak të mungesës së terreneve, në të cilat duhet të stërvitet skuadra. "Kemi 4 ditë që jemi kthyer nga Mali i Zi dhe stërvitjen e kemi zhvilluar në salla të mbyllura kalçetoje, ose përgjatë bregdetit. Veç fushës së stadiumit, Flamurtari të vetmen fushë për t'u stërvitur ka atë të aneksit, por ajo në ditët me shi mbushet me pellgje me ujë dhe baltë. Kjo situatë na ka penguar të realizojmë programin e stërvitjes" u shpreh trajneri Vasil Ruci. Përpara Flamurtarin e pret ndeshja ndaj Vllaznisë, e cila do të zhvillohet në Vlorë më 2 shkurt, ditën e premte, por skuadra e ka të vështirë të gjejë një fushë për t'u stërvitur. "Ditën e premte do të ndeshemi me Vllazninë në fushën tonë, por vështirë është të gjejmë një fushë për t"u stërvitur, të paktën deri ditën e enjte, pra 24 ora para ndeshjes me Vllazninë. Nuk mund të pretendojmë se skuadra e mban formën optimale të lojës me topin, duke u stërvitur në kalçeto. Sot (dje) zhvilluam një miqësore ndaj Lushnjës në fushën e stadiumit, por mua më duhet ende të zhvilloj ndeshje kontrolli brenda grupit, për të evidentuar formën stërvitore të gjithsecilit dhe pastaj të vendos për formacionin anti Vllazni," ka vazhduar më tej mjeshtri Ruci. Ditën e premte, në ndeshjen me Vllazninë, Flamurtari nuk do të ketë ndonjë mungesë, pasi deri tani nuk ka asnjë të dëmtuar, por edhe të dënuar me kartonë të verdhë, por sipas Rucit, këto ditë te Flamurtari do të afrohet Petroviçi. "Të gjithë lojtarët janë të gatshëm për ndeshjen ndaj Vllaznisë, pasi nuk kemi asnjë lojtar me probleme fizike, ose teknike. Për sa i përket lojtarëve kosovarë, si Kyçyku dhe Hashani, ata janë tani pjesë e skuadrës dhe do të trajtohen si gjithë të tjerët dhe sipas aftësive që shfaqin. Jemi në pritje të mbrojtësit 22 vjeçar malazez Gavril Petroviç, me të cilin s'kemi asnjë pengesë për ta afruar te Flamurtari," - përfundon trajneri Vasil Ruci.

[wxz]

Thuajse është fakt i kryer tashmë: Vllaznia nuk ka ndër mend të synojë marrjen e ndonjë lojtari tjetër nga merkatoja e janarit. Me ardhjen e senegalezit Gudjabi, kuqeblutë duket se u kanë dhënë fund përforcimeve. Numri i të ardhurve shkon në tre, duke përfshirë këtu Gudjabin, Miroçin dhe shkodranin Cani. Ndërkohë, largimet nga skuadra kanë qenë në shifrat dy, teksa ka ikur malazezi Miliç dhe tiranasi Durishti. Të larguarit duhet thënë se nuk kanë qenë shumë në planet e Josës, ndërkohë që të tre të ardhurit pritet të jenë lojtarë të rëndësishëm për Vllazninë në pjesën e mbetur të sezonit.

[wxz]

Sulmuesi shkodran, pas dy titujve të fituar me Vllazninë, kërkon suksesin e radhës me kryeqytetasit.

Vioresin Sinani e ka nisur me tre gola vitin 2007. Sulmuesi shkodran i bardhebluve i mbylli 17 javët e para në kuotën e 13 golave, ndërkohë në 3 miqësoret e zhvilluara në Turqi është shfaqur sërish si protagonist. Pas largimit të Hamdi Salihit drejt Austrisë, tashmë barra më e madhe në repartin e sulmit i takon atij, edhe pse në merkato është afruar Oriand Abazaj, një element i nevojshëm për kryeqytetasit. Në miqësoren e djeshme ndaj ekipit kombëtar, Sinani shënoi dy golat e vetëm për Tiranën, të cilat më pas u barazuan nga ana e kuqezinjve. Pas kësaj ndeshjeje, faza përgatitore për kampionët e dimrit mund të quhet e mbyllur, sepse sot do të udhëtojnë për në Shqipëri. Për fat të keq, gjatë takimit sulmuesi 29-vjeçar pësoi një tërheqje muskulore, çka e detyroi trajnerin Shkëlqim Muça ta zëvendësonte menjëherë. Nga Kemeri i largët, ai shprehet kështu për "Sportin shqiptar": "Nuk e di se çfarë grade mund të jetë dëmtimi i pësuar në kofshë, megjithatë, kur të mbërrij në Tiranë, do të bëj një rezonancë. Gjatë një sprinti në lojë, ndieva dhimbje dhe u detyrova t'i kërkoja trajnerit të më zëvendësonte, pasi nuk doja që të rrezikoja më. Shpresoj të mos jetë një lëndim i rëndë, në mënyrë që të jem i gatshëm për ndeshjen e javës së ardhshme ndaj Teutës,"- pohon Viori nëpërmjet telefonit. Në lidhje me ditët turke, sulmuesi i 22 herë kampionëve bën të ditur se ato ishin shumë të rëndësishme për marrjen e plotë të ngarkesës fizike, e cila do të shërbejë si "karburant" për pjesën e mbetur të sezonit. "Në opinionin tim, faza përgatitore që zhvilluam në Turqi ishte e një niveli të lartë, sepse u stërvitëm me një përgatitës atletik, por gjithashtu edhe një trajner të zoti, si Shkëlqim Muça. Gjithashtu, kushtet e stërvitjes, ushqimi dhe hoteli ishin mjaft të mira, duke bërë atë që të mos e ndienim shumë largësinë me Tiranën. Duke parë edhe afrimet e fundit në skuadër, them se grupi është i plotë dhe do t'i përballojë me dinjitet ndeshjet delikate që na presin,"- shton më tej Sinani. Gjatë karrierës së tij sportive, sulmuesi shkodran ka arritur të fitojë shumë trofe, duke filluar me "Këpucën e artë", 2 titujt kampion dhe superkupën. Tashmë që është pjesë e bardhebluve, Vioresin Sinani është shumë pranë fitimit të tri trofeve, por më së shumti ai deklaron se po ndien "aromën" e titullit kampion. "Nuk ka se si të mos e ndiesh "aromën" e titullit kampion kur luan në një skuadër si Tirana. Jemi pranë fitimit të këtij trofeu, por nuk mund të themi kurrsesi se çdo gjë ka përfunduar. Fakti që deri tani kemi arritur të mposhtim kundërshtarët direkt, do të thotë se jemi një hap para tyre. Ndeshja e ardhshme në kampionat me Teutën do të jetë vendimtare për t'u shkëptur më shumë në renditje, kështu që nuk duhet ta humbasim këtë shans që na paraqitet. Për veten time do të uroja që të shënoja edhe sa më shumë gola të tjerë, më pas le të presim nëse do ta fitoj apo jo "Këpucën e artë". Sigurisht, largimi i Salihit m'i shton edhe më shumë përgjegjësitë, por unë kam besim se Pema me Abazajn do të japin kontributin e tyre në skuadër,"- përfundon Vioresin Sinani, sulmuesi kryesor i Tiranës.

[wxz]

Pasi shënoi edhe dy gola në miqësoren e djeshme ndaj ekipit kombëtar, Vioresin Sinani ka pësuar një tërheqje muskulore në kofshë, çka e detyroi ta linte ndeshjen në mes. Edhe pse stafi mjekësor ka ndërhyrë menjëherë, duke ia fashuar këmbën, shkodrani nuk ka mundur të vazhdojë më tej lojën. Me mbërritjen sot në Tiranë, pritet që nesër sulmuesi bardheblu të vërtetojë me anë të rezonancës magnetike shkallën e dëmtimit. Ajo që është për t'u theksuar është fakti se drejtuesit e skuadrës janë alarmuar pas këtij problemi të sulmuesit të tyre kryesor, kur kujtojmë se ndeshja me Teutën është në prag.

[wxz]

20 vjecari Indri Taçi mund të quhet tani futbollist i Shkumbinit, duke u rikthyer pas plot një viti te ky ekip. I preferuari i trajnerit Sejdini vjen nga Dinamo, ku ishte aktivizuar pak dhe si zëvendësues, për të qenë pjesë e Shkumbinit, duke pretenduar edhe rolin e titullarit. Ai e ka të qartë se një vend në formacionin bardhekaltër do t'i japë më tepër mundësi të jetë pjesë e ekipit Shpresa, duke përmendur kushtin e vënë nga trajneri Bushati se, për të qenë kandidat për këtë ekip, duhet të aktivizohesh domosdo në ekipet e superligës. Tiranasi Indri Taçi, që stërvitet prej dy javësh me Shkumbinin, pranon se nuk do të jetë e lehtë për të fituar besimin e "Xhaxhit", sepse gjen një konkurrencë të madhe përballë një grupi futbollistësh kryesisht të rinj, që kërkojnë të afirmohen e të tregojnë se meritojnë më shumë. "Rikthehem pas një viti në Peqin me dëshirë dhe gjej po atë mjedis dashamirës. Do të përpiqem të jap më të mirën në stërvitje e në fushë për të fituar besimin e trajnerit Sejdini, për t'u bërë pjesë e këtij ekipi dhe për të kontribuar për të. Shpresoj që nëpërmjet Shkumbinit do të kem mundësi të rikthehem në ekipin Shpresa. Por përpara kësaj duhet ta justifikoj që të jem i vlefshëm për Shkumbinin, duke u stërvitur sa më shumë për të dhënë më të mirën në ndeshje," shprehet Indri Taçi. Ish mbrojtësi i Dinamos ka rreth dy javë që stërvitet me Shkumbinin nën drejtimin e trajnerit Sejdini, duke pasur mundësi të zhvillojë edhe 2 3 miqësore me këtë ekip, edhe pse jo në vendin e tij të zakonshëm, por tani si mesfushor. Edhe në rolin e ri të caktuar nga Sejdini, Taçi pranon se e ndien veten mirë, duke arritur të harmonizohet me futbollistët e tjerë dhe duke u përpjekur t'i zbatojë siç duhet detyrat e dhënë nga trajneri. "Trajneri më ka vënë në një rol të ri, për të luajtur në mesfushë, ndryshe nga Dinamo, ku aktivizohesha si mbrojtës. Pranoj se edhe në këtë sektor e ndiej veten mirë. Ndoshta trajneri i ka parë më mirë të dhënat e mia, apo ndoshta bëhet për nevojat e ekipit, por e rëndësishme është që kam arritur të përshtatem mirë. Ndoshta ndikon edhe fakti që pjesa më e madhe e futbollistëve të Shkumbinit janë të rinj, gjë që ma bën më të lehtë detyrën," shton Taçi. Futbollisti më i ri që i është bashkuar Shkumbinit është i bindur se ekipi do të paraqitet më ndryshe në pjesën e mbetur të kampionatit, duke ditur të dalë nga gjendja ku është. Ai ka besim te grupi i futbollistëve që stërvit trajneri Sejdini, te puna që bën "Xhaxhi" çdo ditë me ta. "E kam ndjekur edhe më parë Shkumbinin, por tani që stërvitem me të përforcoj mendimin se ky ekip nuk e ka vendin në fundin e tabelës. Shumë shpejt, duke filluar nga ndeshja e radhës, ai do të dijë të tregojë se meriton më shumë. Forca e tij qëndron te kolektivi, ku edhe pse shumica janë të rinj, do të dinë të bëjnë më të mirën. Garancia më e madhe për ne të gjithë është aftësia e trajnerit Sejdini," përfundon optimist mbrojtësi mesfushor Indri Taçi.

[wxz]

Pas ekipit të Partizanit, edhe Iraklisi i Greqisë del në skenë për mbrojtësin shkodran Ervis Kraja.

Eshtë kundërpërgjigjur menjëherë stafi i klubit kavajas ofertës publike të Partizanit për ta pasur në radhët e tij qendërmbrojtësin Ervis Kraja. Nisur nga nevoja për të pasur një sulmues cilësor në radhët e tyre, oferta e Besës është konkrete dhe për të kuqtë hap jo pak telashe. "Lëshojmë Krajën nëse na jepet Muzaka." Kjo është ajo çfarë thuhet në kampin verdhezi sapo janë njohur me faqen e parë të gazetës më të madhe sportive "Sporti shqiptar". Në fakt, nuk ka ndonjë gjë që të bën të habitesh, pasi për momentin sulmi kavajas ka mbetur vetëm me Parid Xhihanin. E gjitha kjo erdhi si pasojë e largimit drejt Ukrainës të sulmuesit të ri kosovar Jonuzi, si dhe të mosardhjes të dy të huajve, Binagol dhe Elokan. Ndërsa futbollisti shkodran i Besës, Ervis Kraja, i pyetur mbi gjithçka thuhet e shkruhet rreth të ardhmes së tij, e komenton kështu këtë situatë: "Eshtë e vërtetë që kam pasur biseda me drejtuesit e kuq. Kjo nuk do të thotë se kam vendosur tashmë të largohem dhe i kam bërë publike te presidenti Bizhdili gjithçka më është afruar. Unë kam një kontratë me presidentin Bizhdili dhe mbetet në dorën e tij nëse do të më lejojë apo jo të largohem. Nga ana tjetër, mos e kuptoni këtë si kërkesë, pasi te Besa ndihem mjaft mirë dhe i respektuar në të gjitha drejtimet. Thjesht kam një ofertë dhe vetëm kaq." Po ndërkohë nga burime të tjera mësojmë se qendërmbrojtësi shkodran Ervis Kraja mbetet në epiqendër edhe të një mundësie kalimi te një klub jashtë Shqipërisë e pikërisht tek Iraklisi në Greqi. Pasi ia bëjmë publike edhe këtë ofertë, mbrojtësi Kraja nuk mund ta mohojë dhe i përgjigjet qartë pyetjes sonë: "Po, është e vërtetë që sezonin e kaluar, si unë, ashtu edhe mesfushori Andi Lila, u vëzhguam nga drejtuesit e Iraklisit dhe për probleme fare të vogla nuk shkuam atje. Më kanë njoftuar se sot drejtuesit e Iraklisit do të jenë prezent në stadiumin "Besa" në miqësoren e sotme ndaj Teutës për të riparë e konkluduar mbi formën time dhe të Lilës. Edhe në këtë rast mbetet presidenti Bizhdili ai që do të thotë fjalën e fundit. E përsëris, kam një kontratë me të, jam likuiduar rregullisht deri më sot, ndaj çdo hap i mëtejshëm varet vetëm nga lejekalimi i firmosur nga Bizhdili. Sido që të jetë, rasti i Krajës dhe largimet tashmë të bëra publike të futbollistëve nga Kosova kanë nxjerrë Besën zbuluar për sa i përket merkatos së saj. Jo vetëm nuk mund të përmenden afrime, por ndeshim tentativa të mjaft klubeve për të zhvatur nga ajo futbollistët më cilësorë. Kujtojmë se tentativa të tilla pati edhe për Dragushën, Babajn e Krasniqin nga Partizani e ekipe ukrainase. Ajo që po ndodh te Besa ka sjellë jo pak hutim në radhët e tifozërisë kavajase. Çdo orë e çdo ditë sjell të papritura në radhët e klubit kavajas. Flitet vetëm për oferta e largime dhe asnjë fjali se kush erdhi. Sipas burimeve tona, edhe dy futbollistët në provë që luajtën ndaj Buduçnostit, të dy të huaj, njëri malazez e tjetri afrikan, nuk kanë treguar se do të mund të jenë shpëtimi i Besës. Java që starton sot mund të sjellë të tjera përmbysje në listën e federimeve në radhët e kavajasve.

[wxz]

Më tepër se kujtdo trajnerit Vasil Bici i duhet një miqësore për të parë se ku ndodhet ekipi i tij. Kësajideje i shërben edhe takimi i sotëm miqësor që do të zhvillohet në stadiumin "Besa". Kundërshtari i kavajasve do të jetë Teuta e Durrësit, një kundërshtar që ka kryer të dy takimet me Besën. Mbetet të shihet sot se cila do të jetë Besa e kthyer nga Ulqini.

[wxz]

Mbrojtësi tiranas i verdhebluve shprehet se tashmë grupi është më i konsoliduar dhe i gatshëm për ndeshjen e parë.

Shumë optimistë në deklaratat e tyre të njëpasnjëshme futbollistët e ekipit kampion të Elbasanit, që besojnë ende se mund të shpallen kampionë. Dhe këto deklarata ata i bazojnë sidomos pas merkatos së fuqishme që presidenti Laze ka zhvilluar dhe pritet të zhvillojë edhe në orët e fundit të merkatos. Në një prononcim për "Sportin shqiptar", Elvis Sina shprehet se Elbasani tashmë është plotësisht i konsoliduar, por nga ana tjetër thekson se ekipi i tij duhet të qëndrojë me "këmbë në tokë" dhe të mos fluturojë pa filluar mirë kampionati. "Tashmë jemi një ekip i vërtetë, pasi kanë ardhur disa futbollistë, të cilët të them të drejtën bëjnë diferencën në ekipin tonë. Jo se më përpara ne të tjerët nuk ishim në formë, por çdo skuadër do ta kishte zili që të kishte në gjirin e saj Patushin, apo Nallbanin dhe Tikon," thekson Sina. Ish mbrojtësi i Tiranës, që së fundi po lakohet për një shkëmbim kokë më kokë me Nevil Deden, thekson se zërat e merkatos nuk e shqetësojnë aspak, duke shtuar se, nëse s'do të kishte merkato dhe zëra të tillë, futbolli do të ishte harruar për një muaj pushim. "Kam lexuar shpesh emrin tim të lakohet te Tirana edhe te Vllaznia. Unë jam futbollist i Elbasanit dhe kam një kontratë me këtë klub, kështu që nuk kam se çfarë të them më tepër, por përderisa drejtuesit e klubit më kanë respektuar dhe kanë qëndruar korrektë me mua, pse duhet ta mendoj largimin?" shton mbrojtësi i verdhebluve. Kampionët në orët e fundit po mendojnë lëvizje të reja në skuadër, ku duhet theksuar se gjithçka mund të ndodhë në 24 orët e ardhshme, pasi Laze me siguri që do ta mbyllë merkaton e dimrit me një goditje të madhe, por se cili do të jetë emri, atë duhet ta presim në limitin e datës së merkatos. Por Elvis Sina në prononcimin e tij thekson se për sa i përket merkatos, ekipi tij ka qenë tepër aktiv dhe mendon se Laze do ta mbyllë sërish merkaton me afrimin e një futbollisti kampion. "Këto janë çështje të klubit, nuk mund të them asgjë më shumë, por duhet të shtoj se, nëse Laze afron ndonjë futbollist tjetër, kjo do na ndihmonte shumë për të ardhmen. Duke njohur Lazen, mund të them se, nëse ai do të blejë ndonjë futbollist në këtë fund merkatoje, me siguri që do të sjellë në Elbasan një kampion të madh. Ky vit do të jetë ndryshe për verdheblutë. Eshtë e vështirë rruga që do të na jepte titullin, por me afrimet e fundit shpresat janë tepër të mëdha. Të shfrytëzojmë çdo gabim të kundërshtarit dhe të mos lëmë asnjë pikë si në fushën tonë, ashtu edhe në transfertë," - përfundon mbrojtësi tiranas, Elvis Sina.

[wxz]

Elbasani e ka bërë pushim ditën e diel, ndërsa sot kampionët do t'i kthehen stërvitjes. Ndërkohë, drejtuesit e klubit e kanë shtyrë për ditën e mërkurë miqësoren me Sopotin e Librazhdit, e cila do të jetë e fundit përpara fillimit të kampionatit, ku Elbasani do të presë në "Ruzhdi Bizhuta" ekipin e Partizanit.

[wxz]

Mesfushori fierak Marsel Rushani shprehet i kënaqur nga përgatitjet e skuadrës së tij.

Mesfushori fierak Marsel Rushani shprehet i kënaqur nga përgatitjet e skuadrës së tij. Për mesfushorin fierak Rushani, periudha e përgatitjes së skuadrës bardhejeshile, megjithëse intensive, ka qenë produktive, duke bërë konsolidimin e grupit në këtë periudhë dhe njohjen e lojës së futbollistëve të ardhur në janar. Ja çfarë thotë më shumë Rushani në intervistën e tij:
Tashmë keni hyrë në javën e fundit të përgatitjeve për ndeshjet e superligës. Si i vlerësoni ato?
Pa dyshim, shumë të mira. Pavarësisht se nuk jemi larguar nga qyteti ynë, ashtu siç bënë shumicat e skuadrave që marrin pjesë në superligë, të cilat i shpërngulën përgatitjet jashtë Shqipërisë, ne kemi vazhduar të stërvitemi të qetë në ambientet tona të stërvitjes. Eshtë normale që në një moment kur është e hapur edhe merkatoja e dimrit të ketë edhe periudhë seleksionimi, por kjo nuk na ka penguar të jemi të mobilizuar në stërvitje. Kam mendimin se me ardhjen e profesor Andrea Markos gjërat kanë lëvizur për mirë. Duke qenë se ai ka një mentalitet prej kampioni jo vetëm si ish-futbollist i një ekipi që i ka dhënë tonin futbollit shqiptar, por edhe si trajner i disa ekipeve skuadra e drejtuar prej tij, do të ketë një tjetër grintë nga ajo që kemi shfaqur deri në këto momente. Dhe po të gjykosh me qetësi, do të vëresh lehtë se çdo gjë është më mirë. Kjo Apoloni më pëlqen, sepse është e fortë, më e freskët edhe mbi të gjitha më agresive.
Afrimi i shumë futbollistëve të rinj në skuadër pa dyshim e ka rritur konkurrencën. Ju tremb kjo gjë?
Absolutisht jo. Konkurrenca veç mirë më bën jo vetëm mua, por edhe shokëve të tjerë të ekipit. Pa konkurrencë nuk mund të ketë ecje përpara. Afrimi i disa futbollistëve cilësorë dhe mbi të gjitha interesimi i drejtuesve të klubit për të pasur një skuadër të aftë për të qëndruar në superligë është sinjal pozitiv jo vetëm për përmirësimin në tabelën e klasifikimit, por edhe për të kënaqur tifozët tanë, të cilët kanë qenë vërtet të mrekullueshëm në përkrahjen që na kanë dhënë. Ka qenë kjo përkrahje që më ka vënë në pozita për t'ua shpërblyer atyre në rezultate pozitive në fushën e lojës. Unë kam besim të plotë se kthesa për ne ka filluar. Duroni edhe pak që të shijoni Apoloninë ambicioze.
Pra, nga ato që deklaroni ndiheni optimist?
Jo vetëm unë, por edhe shokët e tjerë të ekipit ndihen optimistë dhe mezi presin që të rifillojnë ndeshjet. Kemi zhvilluar një fazë përgatitore model, ku pavarësisht largimeve edhe afrimeve, boshti i skuadrës ka qenë gjithmonë i mobilizuar për t'u përgatitur sa më mirë. Kjo do të jetë java ku do të vendoset për skemën që do të luajmë, por edhe kur do të vihet secili në pozicionin e vet.
Në ndeshjen e fundit të kontrollit profesor Marko ju vendosi edhe në një pozicion mbrojtës. Mendoni se mund ta bëni edhe atë rol?
Pak rëndësi ka se ku mund të më aktivizojë trajneri. Unë në çdo pozicion do të jap 100% për Apoloninë time. Si fierak ndihem krenar që bashkë me Shoshin, Gërçon, Gegën jemi pjesë e kësaj skuadre. Jo se futbollistët e tjerë që kanë ardhur nuk e duan fanellën bardhëjeshile, por ne që vijmë direkt nga ekipet zinxhir të klubit të Apolonisë ndihemi dy herë të obliguar për të dhënë maksimumin për fanellën e Apolonisë.

[wxz]

Në miqësoren e së shtunës që Dinamo zhvilloi me Teutën dhe që përfundoi 3-1 në favor të bregdetarëve, golin e bluve e shënoi sulmuesi Klodian Arbri. Sulmuesi beratas ka treguar një progres të madh gjatë këtyre javëve të fundit, pasi paraqitja e tij ka pësuar ngritje nga java në javë. Shtatlarti dinamovit e nisi sezonin komplet jashtë forme, por tashmë sulmuesi po tregon vlerat e tij. Progresi i sulmuesit është një lajm i mirë edhe për drejtuesit dinamovitë, pasi beratasi po e justifikon besimin e tyre. Gjatë këtyre ndeshjeve të kontrollit Klodian Arbri ka filluar të mbajë një "korrespondencë" të shpeshtë me rrjetat e portave kundërshtare. Gjatë ndeshjes së djeshme midis Dinamos dhe Teutës goli i Arbrit ishte vetmja gjë pozitive për blutë e kryeqytetit.

[wxz]

Me ndeshjen e kontrollit ndaj Teutës ekipi i Dinamos i ka dhënë fund minifazës përgatitore, e cila për tri javë me radhë ka qenë e karakterizuar nga stërvitje intensive dhe të ngarkuara kryesisht në aspektin fizik. Në pjesën më të madhe të këtyre ditëve dinamovitët kanë kryer nga dy seanca stërvitore në ditë dhe stafi trajnues është përkushtuar si në aspektin fizik, por dhe atë taktik. Duke filluar nga dita e sotme, skuadra do të kthehet në rrjedhën e përgatitjeve për ndeshjet e fundjavës dhe, sipas kalendarit, i bie që blutë e Redi Jupit të nisin të projektojnë strategjinë anti-Kastrioti. E diela ka qenë pushim për dinamovitët, prandaj sot pritet që të zhvillohet një përgatitje atletike.

[wxz]

Dinamovitët kanë kryer disa blerje në merkaton e janarit, por jo të gjithë janë të gatshëm që të luajnë.

Merkatoja e janarit ishte një domosdoshmëri për ekipin e Dinamos, pasi në 17 javët e para u panë mungesat e lojtarëve alternativë. Për të riparuar hapësirat e krijuara, drejtuesit blu kanë afruar në ekip gjashtë futbollistë të rinj, ku dy nga këta, Vangjel Mile dhe Eldorado Merkoçi, përgatiten prej gati dy muajsh me skuadrën. Nga këta të ardhur dy bëjnë pjesë në repartin difensiv dhe bëhet fjalë për kroatët Goran Graniç dhe Zdravko Sushak, ndërsa katër të tjerët janë sulmues. Ardian Nuhiu dhe boshnjaku Zoran Novakoviç mendohet se do të jenë sulmues të mirëfilltë, ndërsa Mile dhe Merkoçi gjatë këtyre ndeshjeve të kontrollit janë provuar edhe si mesfushorë krahu. Në plan të parë merkatoja e Dinamos duket pozitive, pasi janë afruar gjashtë lojtarë të rinj dhe janë larguar dy. Por tashmë lind pyetja se sa këto prurje të reja të bluve të kryeqytetit janë të vlefshme për ekipin. Futbollistët e çdo ekipi gjatë një ndeshje rreshtohen në stadium në dy mënyra, vertikalisht dhe horizontalisht. Lojtarët e rreshtuar në mënyrë vertikale bëjnë pjesë në fushën e lojës, ndërsa ata që vendosen horizontalisht ngrohin stolin e rezervave. Por nga sa po shihet në këto ditët e fundit të kësaj minifaze përgatitore të Dinamos, del që blutë janë përforcuar më shumë në aspektin horizontal sesa vertikal. Vërtetësia e kësaj del nga forma që gëzojnë të sapoardhurit. Nga këto gjashtë përforcime, vetëm dy prej tyre janë 100% të gatshëm që të përballojnë një 90-minutësh të plotë dhe këta janë Vangjel Mile dhe Eldorado Merkoçi, ndërsa shqiptaro-maqedonasi Ardian Nuhiu nuk është në formën e tij optimale, pasi përpara se të vishte fanellën blu ka kryer një operacion. Megjithatë, gjatë kësaj periudhe përgatitore sulmuesi Nuhiu ka treguar gjithsesi se do t'i vlejë ekipit, sepse është një futbollist me bagazh, që di t'i shfrytëzojë rastet përpara portave kundërshtare. Ndërsa problematike është forma e tre lojtarëve ballkanas që kanë ardhur tek Dinamo përpara një jave. Sipas stafit teknik të ekipit, lojtarët kanë shumë mangësi në aspektin fizik dhe kjo gjë përligjet me faktin se ka nga ata si Goran Graniç, që kanë qenë pa skuadër prej gati gjashtë muajsh. Megjithëse dy mbrojtësit kroatë Graniç dhe Sushak janë përgatitur me blutë prej një jave, përsëri aktivizimi i tyre në transfertën e Krujës është në pikëpyetje. Ndërsa rasti i sulmuesit boshnjak Novakoviç është më specifik, sepse ai akoma nuk e ka nisur përgatitjen me skuadrën. Zoran Novakoviç, pasi firmosi me presidencën blu, u largua drejt Bosnjës me shkakun për të marrë dokumentacionin e nevojshëm dhe për t'u kthyer ditën e premte, por ndërkohë bashkimi i tij me skuadrën pritet që të ndodhë vetëm sot. Gjatë kësaj jave Dinamo do të nisë të mendojë seriozisht për ndeshjen e së shtunës me Kastriotin, por përsëri mbrojtja e bluve nuk është e konturuar. Prandaj përshtatjet e lojtarëve dinamovitë do të ndodhin edhe në Krujë, pasi dihet se në repartin difensiv të gatshëm janë vetëm Erion Xhafa me Julian Ahmatajn, pasi Papa Diop është prapa me përgatitjet dhe dy kroatët janë më keq se senegalezi. Afrimet e dy kroatëve dhe boshnjakut nuk kanë sjellë ndonjë entuziazëm tek Dinamo, pasi momentalisht ata janë jashtë forme dhe, sipas disa burimeve brenda klubit, mësohet se presidenca ka pranuar t'i pranojë të tre ballkanasit vetëm e vetëm për t'u bërë qejfin rekomanduesve të tyre, që janë Luka Bonaçiç dhe Zllatko Daliç. Megjithatë, testi i parë i merkatos së Dinamos do të shikohet të shtunën dhe në fund të sezonit del bilanci i vërtetë.

[wxz]

Flet kapiteni i Luftëtarit pas grumbullimit në Ulqin dhe në prag të rifillimit të kampionatit.

Të premten "armata" e Luftëtarit arriti e përgjysmuar në Gjirokastër, pasi "jabanxhinjtë" janë kthyer në qytetet e tyre, për t'u bashkuar sot së bashku me trajnerin Spahiu në Gjirokastër dhe për të rifilluar përgatitjet përfundimtare për përballjen me Besën. Pas rekordit që Luftëtari vendosi në fazën e parë të kampionatit në fushën e vet, ku i fitoi të gjitha ndeshjet pa pësuar asnjë gol, tani para fillimit të pjesës së dytë ai vendosi një rekord tjetër, të paktën vetjak, ku në periudhën 13 26 janar luajti 6 ndeshje miqësore, 1 fitore, 2 barazime, 3 humbje, që më parë nuk i ka luajtur për një sezon të tërë. Për të na thënë më shumë rreth përgatitjeve në Ulqin dhe në vazhdim ne intervistuam kapitenin e Luftëtarit, Neritan Novi.
Si i vlerësoni arritjet e deritanishme të ekipit tuaj?
Duke i parë në tërësi ndeshjet e pjesës së parë, mendoj se bilanci i ekipit tonë është i kënaqshëm, duke marrë parasysh edhe mungesën 4 vjeçare në superligë. Ndër problemet më shqetësuese, them se është diferenca e theksuar e rezultateve midis ndeshjeve në Gjirokastër dhe jashtë saj, problem që në njëfarë mase e mënyre është edhe për ekipet e tjera të kampionatit tonë. E mbyllëm pjesën e parë pa realizuar asnjë fitore jashtë fushe dhe ky fakt duhet të bëjë që në 16 ndeshjet e mbetura të gjejmë "ilaçin" e duhur. Nëse ashtu siç thuhet nga drejtuesit tanë, nesër ekipi do të përforcohet me një francez e një kongolez, për pjesën në vazhdim pa dyshim që ecuria jonë do të përmirësohet, edhe pse në fazën e dytë kemi një kalendar "gogol" për pesë ndeshjet e mbetura. Ne do t'ia dalim mbanë nëse luajmë me mendësi fituesi si me Besën, Tiranën, Shkumbini, Elbasanin, apo Kastriotin.
Cili është vlerësimi juaj për përgatitjet në Ulqin?
Kam përshtypjen, të bazuar në fakte, se aty u bë një punë mjaft e mirë dhe që do t'i japë frytet e veta në pjesën e dytë të kampionatit. Të gjithë ishim të angazhuar, edhe pse jemi disi të lodhur nga ngarkesat.
Zhvilluat shumë ndeshje miqësore. Përse shërbyen ato?
Dihet që ndeshjet miqësore janë pjesë përbërëse e një përgatitjeje serioze për një ekip. Sipas meje dhe duke u nisur nga sa pashë, këto miqësore patën vlera për ekipin, përfshirë stafin e trajnerëve. Kështu, në to u provuan disa lojtarë, u provuan lojtarë në role më të ndryshme nga ato që kanë luajtur, u përdorën për harmonizimin dhe kolaudimin e lojës, u përdorën sikur të ishim më afër kushteve reale të lojës, u përdorën për skemat taktike të tjera, që më mirë i dinë trajnerët që bënë eksperimentet e tyre.
E rifilloni kampionatin me Besën në Kavajë. Çfarë do të thoshit?
Ka rëndësi të madhe, veçanërisht në aspektin psikologjik, që ta nisim sa më mirë pjesën e dytë të kampionatit, aq më tepër që vijmë në këtë takim pas gjithë këtyre përgatitjeve. Por edhe Besa është përgatitur dhe forcuar dhe ndërkaq luan në fushën e saj. Pra, do të kemi një përplasje të fortë, pa kurrfarë kompromisi në luftën sportive për të siguruar mbijetesën në superligë, si ne, edhe ata. Në këto rrethana, duke qenë dhe pak më mirë në renditje ne, mendoj se do të luftojmë për dy rezultatet, fitoren dhe barazimin dhe besoj se do ta arrijmë objektivin tonë. Sa më pak të gabojmë, aq më të fituar do të dalim.

[wxz]

Mbrojtësi lezhjan deklaron se është ndarë përfundimisht me të kuqtë dhe pret të hedhë firmën për Besën.


Nuk është i vetmi që është paguar më pak se ç'shkruhet në kontratë, megjithatë vetëm ai ka guxuar të dalë hapur kundër, madje të bëjë "divorcin" e parakohshëm me presidentin Xhani. Robert Grizha nuk është futbollisti i parë që është larguar nga Partizani, pasi edhe Bylykbashi me Ndrekën nuk bëjnë më pjesë në formacionin e Likës, por është i vemti që është larguar pas mosmarrëveshjeve financiare. "Nuk është faji im që jam larguar nga Partizani. Presidenti më ofroi vetëm gjysmën e parave që ishin parashikuar në kontratë, kështu që nuk pranova të vazhdoja më tej. Pra, arsyet e ndarjes janë vetëm financiare, pasi s'kam pasur motiv tjetër për t'u larguar nga Partizani,"- është shprehur Robert Grizha. Lezhjani është ndarë përfundimisht nga të kuqtë, pas një eksperience disamujore, duke e lënë në pikë të hallit mbrojtjen e kuqe. Deri para dy ditësh shpresohej në rikthimin e tij në skuadër, por mungesa në ndeshjen miqësore me Erzenin zyrtarizoi "divorcin" e dytë mes tij dhe Partizanit. Grizha nuk është aspak i shqetësuar mbi të ardhmen e tij, pasi ai thotë se me 99% e ka gjetur skuadrën e re. Prej dy ditësh thuhet se Kastrioti dhe Besa janë më afër nënshkrimit me ish-futbollsitin e Partizanit. Këtë fakt e pranon vetë Grizha, që dje ka pasur një takim kokë më kokë me trajnerin e kavajasve, Vasil Bici. "Nuk do të jetë aspak problem gjetja e skuadrës së re. Me 99% jam te Kastrioti ose te Besa. Gjithçka do të varet nga plotësimi i kushteve,"- është shprehur Grizha. Dje lezhjani ka biseduar me trajnerin e Besës, por nuk bëhet e ditur se çfarë është vendosur. Kalimi i tij te skuadra e presidentit Bizhdili mund të bëjë të mundur afrimin e Krajës tek Partizani. Drejtuesit e kuq, për vetë cilësitë që zotëron shkodrani, e shohin atë si zëvendësuesin më të mirë të Henri Ndrekës, që bashkë me Bylykbashin do ta luajnë pjesën e mbetur të sezonit te skuadra ukrainase e kategorisë së parë Krivbas. Situata e krijuar i ka vënë në lëvizje drejtuesit e Partizanit, të cilët duhet të gjejnë futbollistët e duhur për të kompletuar repartin e pasmë. Ndonëse në ditët e fundit të 2006-ës u trumbetua fuqishëm për një merkato cilësore, deri tani askush nuk ka firmosur, madje ka pasur vetëm largime. Puna e mirë gjatë fazës përgatitore nuk mund ta justifikojë kurrsesi mungesën e disa titullarëve. Partizani është munduar të përmirësohet në sulm, por në fakt është dobësuar në mbrojtje, duke e bërë shumë më të vështirë arritjen e objektivave sezonalë. Pas pak ditësh mbyllet merkatoja e janarit, çka do të thotë se nëse presidenti Xhani nuk i lëviz shpejt gurët, gjithçka do të bëhet shumë më e vështirë.

[wxz]

I riu Enco Malindi, sipas marrëveshjes së presidentit, do të kalojë tek AEK-u për 20mijë euro.


Gjatë takimit miqësor në "Tofik Jashari" ndaj Erzenit vendës, trajneri Lika ka aktivizuar në pjesën e dytë edhe Enco Malindin, i cili në fillim të shkurtit pritet të transferohet në Greqi tek AEK-u. Aktivizimi i Malindit në sulm, duke pasur parasysh marrëveshjen e arritur me klubin grek, duket paksa i çuditshëm. Nëse një lojtar do të largohet nga skuadra, futja e tij në lojë, qoftë në një ndeshje miqësore, duket e pabazë. Ky veprim i Likës të bën të dyshosh se Malindi do të jetë pjesë e Partizanit deri në fund të sezonit. Drejtori teknik i të kuqve, Bejkush Birçe, i pyetur për largimin e Malindit, është shprehur se kjo lëvizje, sidomos në këtë situatë që po kalon Partizani, nuk duket e zgjuar. "Për mendimin tim, Malindi duhet të qëndrojë te Partizani të paktën deri në fund të sezonit, pasi ai është lojtar që do t'i shërbejë skuadrës në këtë periudhë. Pastaj forma e tij vjen gjithmonë në rritje, çka do të thotë se klubi do të përfitojë më shumë para nga shitja e tij. Unë ia kam thënë mendimin tim edhe presidentit Xhani, megjithatë shpresoj të veprohet në mënyrën më të drejtë,"- është shprehur Birçe. Sipas burimeve pranë lojtarit, shuma që klubi grek do të derdhë në arkën e Partizanit është 20 mijë euro. Mësohet se njëshi i të kuqve ka pretenduar për më shumë, por në fund është dorëzuar te kjo shifër, që për një ekip me tradita si Partizani nuk mund të jetë aspak e konsiderueshme. Pavarësisht marrëveshjes paraprake të arritur para një jave, i riu i Partizanit ka shumë mundësi që të luajë në Tiranë të paktën deri në fund të sezonit, duke shpresuar në rritjen e çmimit të tij. Lika e aktivizoi Malindin me Erzenin jo pa qëllim, çka do të thotë se lojtari i ri i talentuar mund të qëndrojë deri në fund të sezonit.

[wxz]

Në Vlorë moti është i ftohtë, me diell e pa lagështi. Kjo situatë është favorizuese për seancat stërvitore të Flamurtarit. Sipas zëvendëstrajnerit Roland Iljadhi, të mendosh kështu është paradoks, por secili ka objektivat e veta në punën e tij, kur thotë: "Na ndihmoi moti me diell që të dielën u kthyem përsëri në fushën e aneksit. Në fakt, është paradoks që të shprehësh kënaqësinë për mungesën e reshjeve të shiut, në një moment krize energjitike. Gjithsesi, Flamurtari ka objektivat e tij. Për skuadrën tonë e rëndësishme është kapërcimi me sukses i ndeshjes të 2 shkurtit me Vllazninë, për të cilën tanët duhet të jenë të përgatitur plotësisht." Stafi teknik i Flamurtarit, por edhe Iljadhi, shprehen optimistë për lojën dhe rezultatet e ndeshjeve miqësore ndaj Besëlidhjes, Hajdukut të Kulës, Teutës e Lushnjës, por edhe nga interpretimi cilësor i 2 3 lojtarëve me moshë të re. "Skuadra ka përfituar shumë nga organizimi i 4 ndeshjeve miqësore, veçanërisht në aspektin taktiko teknik. Në skuadër janë kthyer përsëri nga Sopoti 2 3 lojtarë të rinj, të cilët ishin të larguar, por edhe 4 lojtarë nga ekipi i të rinjve. Tani në lojën e skuadrës ka më shumë gjallëri, por edhe rivalitet. Në ndeshjen ndaj Lushnjës nuk janë aktivizuar dy lojtarët afrikanë, Bokatola dhe Delain, për shkak të vonesave në fazën përgatitore të janarit. Këto mungesa mendoj se nuk kanë ndikuar ndjeshëm në mënyrën e ritmin e lojës së skuadrës në miqësoret," ka theksuar më tej ish mbrojtësi potent i Flamurtarit, Iljadhi. Sipas Iljadhit, ndeshja ndaj Vllaznisë nuk duhet nënvlerësuar, por as mbivlerësuar, sepse mund të na ndodhë ashtu si Vllaznia, kur Flamurtari ishte shumë pranë fitores deri në sekondat e fundit në Shkodër. "Ndonëse skuadra jonë është përgatitur për t'iu kundërvënë Vllaznisë në pikat më delikate, kujdes do të tregojmë edhe në sektorin e prapavijës, pasi shkodranët luajnë shpejt edhe shënojnë befasisht. Vllaznia është ndër skuadrat më të mira të vendit tonë dhe luan një futboll të bukur, duke i krijuar mundësi kundërshtarit të luajë hapur e me iniciativë. Gjithsesi, ne i kemi porositur lojtarët tanë të futen në lojën me mentalitetin e fitores, pa krijuar artificialisht ngarkesa mbivlerësimi apo nënvlerësimi të kundërshtarit," ka përfunduar numri dy i stolit të Flamurtarit, Roland Iljadhi.

[wxz]

Për ndeshjen e së premtes së ardhshme në Vlorë ndaj Flamurtarit vendës trajneri Josa sërish nuk do t'i ketë të gjithë lojtarët të gatshëm. Mungesat e shumta që e shoqëruan atë në gjithë ndeshjet e fundit para ndërprerjes së kampionatit, duket se do të vazhdojnë sërish. Kështu do të ndodhë edhe për ndeshjen e radhës, atë ndaj vlonjatëve, kur trajneri i kuqebluve nuk do të ketë në dispozicion as Licin dhe as Hotin. Të dy këta lojtarë, në takimin e fundit me Kastriotin kanë plotësuar numrin tre të kartonëve të verdhë dhe për pasojë këtë javë do të jenë të detyruar të pushojnë. Megjithatë, fakti se tashmë në skuadër kanë ardhur disa lojtarë të tjerë, ia shton mundësinë stafit drejtues për të përzgjedhur formacionin që do të hedhë në fushë ndaj vlonjatëve.

[wxz]

Pas një dite të djeshme pushim absolut, sot pasdite kuqeblutë e Vllaznisë do të nisin përgatitjet për sfidën e parë të këtij viti, atë me Flamurtarin. Fakti që kjo ndeshje, sipas kalendarit, do të luhet ditën e premte, bën që shkodranët të përshpejtojnë diçka në programin e tyre stërvitor, duke u bërë gati për këtë ndeshje. Pritet që sot të gjithë futbollistët të jenë në dispozicion të trajnerit Josa, duke filluar kështu ndërtimi i planeve për ta kaluar me sukses edhe Flamurtarin. Vllaznia e pati mbyllur 2006 ën me fitore dhe kështu kërkon ta nisë edhe 2007 ën.

[wxz]

Kur u mendua se shkodranët nuk do të hynin në merkato, çdo gjë është përmbysur dhe do të ketë edhe një blerje.

Afrimi i fundit të merkatos së dimrit ka shtuar edhe lëvizjet në kampet e çdo skuadre të kampionatit tonë për të arritur atë çfarë nuk kanë bërë gjatë këtij muaji. Kështu po ngjet edhe me Vllazninë, e cila megjithëse ka afruar tre lojtarë deri tani në radhët e saj, ende nuk ndihet "e ngopur". Kështu Gudjabit, Miroçit dhe Canit në ditët e ardhshme mund t'u bashkohet edhe një tjetër futbollist dhe bëhet fjalë për një mesfushor nga Mali i Zi. Lajmi bëhet i ditur nga burime pranë klubit shkodran, sipas të cilëve në shënjestër është Ivanisheviç. Lojtari në fjalë para dy sezonesh ka qenë pjesë e skuadrës së Dinamos për pak kohë, ndërkohë që më pas u largua nga kampionati ynë. Ai luan në qendër të repartit të mesfushës, por edhe pas dy sulmuesve, vend të cilin në fakt duket se e ka "privatizuar" Bejzade. Për rrjedhojë, malazezi kërkohet për ta vënë në qendër, për të marrë përsipër kështu organizimin e lojës së shkodranëve, element taktik ky që ka çaluar kohët e fundit te Vllaznia, ngaqë nuk ka pasur një lojtar stabël për këtë problem. Bisedimet me Ivanisheviçin kanë nisur këto dy ditët e fundit dhe pritet të konkretizohen pas kthimit në Shqipëri të presidentit Fushaj. Nëse bëhet realitet një blerje e tillë, atëherë Vllaznia me plot gojën mund të quhet e plotësuar, sepse që në fillim objektivi i drejtuesve të saj ka qenë për të blerë 3 lojtarë në merkaton e janarit. Fillimisht u sigurua Gudjabi, më pas u tentua për të marrë kosovarin Popova, por në vend të tij erdhi një tjetër kosovar dhe pikërisht Miroçi, ndërkohë që i treti nuk po dukej në horizont. Kjo pasi disa nga lojtarët e kërkuar nga shkodranët, ose nuk pranuan të vinin në "Loro Boriçi", ose nuk u lanë nga skuadrat me të cilat ata luajnë aktualisht. Bëhet fjalë këtu për lojtarë të tillë, si Vinçetiç, Sina e Kaçi, ndërkohë që u tentua edhe për malazezin e Buduçnostit Sekuliç, por deri më sot nuk u arrit në asnjë përfundim. Sakaq ka ardhur edhe një lojtar, i cili në fazën e parë luajti si i huazuar te Shkumbini, pikërisht sulmuesi Nevian Cani, i cili gjatë fazës përgatitore është paraqitur shumë mirë. Në këtë logjikë, mendohej se çështja e përforcimeve për shkodranët u mbyll, por së fundi doli në skenë malazezi Ivanisheviç. Nuk dihet ende se si janë bërë lidhjet me këta lojtarë, por mbase "shkues" për të janë bërë dy malazezët e Vllaznisë, Radusinoviç e Vukçeviç. Dita e sotme pritet të jetë vendimtare për fatin e mesfushorit nga shteti fqinj, sepse mbyllja e merkatos tashmë është në prag. Ashtu siç duhet të marrë zgjidhje edhe problemi i Gudjabit, për të cilin duhet arritur marrëveshja përfundimtare me Dinamon, e cila kërkon të mos e lëshojë. Në këtë logjikë, këto tri ditët e fundit të këtij muaji pritet të jenë shumë të ngarkuara për presidentin Fushaj dhe stafin e tij, të cilët më pas do ta kalojnë topin në fushën e Josës dhe bashkëpunëtorëve të vet.

[wxz]

Presidenti i ekipit të Teutës, Edmond Musabelliu, ka arritur ta bindë sulmuesin vlonjat Daniel Xhafa të vijojë të luajë edhe pjesën e mbetur të kampionatit në Durrës. Burime brënda klubit të Teutës bëjn të ditur se bisedimet midis F.Xhafës dhe Hasanbelliut kanë konkluduar në mirëkuptimin të plotë. Kësisoj, Daniel Xhafa pritet të mbërrijë sot nga Turqia në Durrës dhe t'u bashkohet "djemve të detit". Ai ishte në Antalia në një "zbor" disaditor me kombëtaren B, nën drejtimin Oto Bariçit. Ndërkohë, disa ekipe turke dhe ukrainase janë interesuar për shërbimin e sulmuesit shqiptar.


Blloku dhe Vila, "gjaku" i ri te Teuta
Dy sulmuesit Blloku dhe Vila, të ardhur nga kontigjenti i ekipeve të të rinjve, kanë pasur inkurajimin e plotë të trajnerit të Teutës, Sulejman Starova, i cili nga sa është parë, në takimet miqësore dhe në stërvitje u ka dhënë shumë hapësira këtyre futbollistëve. Të konsideruar si dy talente të spikatur, të dy këta futbollistë do të jenë në stolin e ekipit durrsak për pjesën e mbetur të kampionatit, së bashku me mbrojtësin Likmeta, i cili pasi u huazua për një fazë tek Erzeni, tashmë është përsëri pjesë e ekipit të Teutës.

[wxz]

Takimi miqësor me Dinamon tregoi forcën e vërtetë të ekipit durrsak, që ka rimarrë forcën pas ngarkesës së fazës përgatitore dhe tashmë gradualisht po vjen në gjendjen e tij normale. Sipas Bledar Mancakut, në ndeshjen me Dinamon ekipi funksioni siç duhet, duke fituar jo vetëm me rezultat, por edhe me lojë, përballë një ekipi cilësor. Pavarësisht se nuk do të jetë në përballjen me Tiranën në kryeqytet, Mancaku është shprehur se në sulm me Kulin në krye do të mbulojë çdo boshllëk që do të krijohet nga mungesat që ka ekipi në vijën sulmuese. Sipas tij, mekanizmi i ekipit ka filluar që të funksionojë më mirë se në pjesën e parë të kampionatit. Duke komentuar largimin e Daniel Xhafës, Mancaku ka deklaruar se Kuli është në futbollist tek i cili mund të mbështetesh për vetë cilësitë e spikatura që ka dhe formën që gëzon aktualisht. Një fakt inkurajues për Mancakun është dhe se disa prej futbollisëtve që kanë pasur probleme dëmtimesh tashmë janë rikuperuar dhe ata do të jenë të gatshëm për përballjen me Tiranën. "Jemi një ekip grupi dhe jo individësh. Ekipi nuk do të shkojë në Tiranë për t'u mbrojtur, por për të kërkuar tripikëshin," - është shprehur fantazisti Mancaku. Duke iu referuar fazës përgatitore, Mancaku deklaron se kjo fazë ishte nga më cilësoret që ka zhvilluar ekipi dhe se karikimi që ka marrë ekipi do të japë rezultate konkrete në fushën e lojës. Realist në komentet e tij, Mancaku do të shtonte se në ndeshjen në kryeqytet favorite është Tirana jo vetëm se luan në fushën e saj, por edhe se është kryesuese e kampionatit. Mancaku i ka bërë thirje të hapur tifozërisë durrsake që të qëndrojë më pranë ekipit, pasi përkrahja në pjesën e parë të kampionatit ka lënë shumë për të dëshiruar. Në lidhje me faktin se pas largimit të Xhafës do të jetë ai "violinë" e parë te Teuta, sulmues durrsak ka deklaruar se te Teuta "violinë" e parë është grupi dhe se vetëm përmes lojës në grup mund të ëndërrohet për kreun e tabelës së klasifikimit.

[wxz]

Në orën 15:30 të ditës së djeshme, delegacioni bardheblu zbarkoi në aeroportin "Nënë Tereza". Ndryshe nga dy javë më parë, kur shkuan në Kemer, në kthim udhëtimi për kryeqytetasit zgjati disa orë më pak, pasi nuk qëndruan për shumë orë tranzit në Stamboll. Pasi janë kthyer në Tiranë me autobusin e klubit, më pas lojtarët dhe stafi drejtues janë shpërndarë pranë familjeve të tyre, ku dreka i gjeti duke u çmallur me të gjithë pjesëtarët.

[wxz]

Pas kthimit nga Turqia ditën e djeshme, sot kampionët e dimrit do t'i kthehen stërvitjes në kryeqytet. Në orën 15:00, bardheblutë do të zbresin në stadiumin "Selman Stërmasi", për të zhvilluar seancën e parë të përgatitjeve në kuadrin e ndeshjes të së shtunës ndaj Teutës. Sipas stafit drejtues, ngarkesa stërvitore gjatë gjithë këtyre ditëve do të jetë në kuota minimale, pasi lojtarët vijnë pas periudhe që nuk kanë bërë pushim, madje zhvilluan edhe tri ndeshje miqësore.

[wxz]

Lojtarët e vetëm me probleme shëndetësore në kampin bardheblu janë Vioresin Sinani dhe Abada Fish. I pari vuan një tërheqje muskulore të pësuar në miqësoren e fundit me ekipin kombëtar, ndërkohë që kamerunasi po shfaq problemet e vjetra me gjurin. Nuk dihet me saktësi koha e riaftësimit të dy futbollistëve, teksa shpresat më të mëdha janë vetëm për riaftësimin e shkodranit, që shihet si pikë referimi në sulm pas largimit të Salihit.

[wxz]

Përgatitësi atletik i bardhebluve, Rauf Dimraj, vlerëson me nota të larta ditët përgatitore në Turqi.


Pas dy javësh stërvitje në Turqi, bardheblutë zbarkuan ditën e djeshme në Tiranë. Të lodhur nga udhëtimi, lojtarët dhe stafi drejtues janë shpërndarë menjëherë pranë familjeve të tyre, ndërkohë që sot mbasdite do të zhvillojnë seancën e parë në kryeqytet. Përgatitësi atletik, Rauf Dimraj, i kontaktuar nga gazeta në lidhje me ditët stërvitore në Kemer, u shpreh me nota pozitive për atë se çfarë arriti skuadra të merrte. "Duke filluar që nga ndeshja e së shtunës me Teutën, do të shikoni një tjetër Tiranë në fushë, e cila do të jetë në gjendje të vrapojë deri në minutën e 90-të. Në krahasim me gjendjen fizike kur ndodheshim në kryeqytet, mund të them me bindje se skuadra ka bërë hapa përpara në këtë drejtim, çka më ka lënë shumë të kënaqur mua si përgatitës atletik, por edhe trajnerin Shkëlqim Muça. Tani Tirana do të ketë edhe një "turbinë" më shumë në këmbët e saj, e cila do të na japë mundësinë të luajmë me sukses ndeshjet e mbetura në kampionat dhe kupë,"- bën të ditur përgatitësi i njohur atletik, që më parë ka punuar me sukses edhe në radhët e ekipit të Apolonisë dhe Elbasanit. Ditët e para të mbërritjes në Turqi, kryeqytetasit i shfrytëzuan për të kryer testet fizike, ndërkohë që fill pas tyre fituan 2-1 miqësoren me Istambulsporin. Gjatë 12 ditëve stërvitje, lojtarët stërviteshin me dy seanca, ku fillimisht në sallë force dhe më pas me vrapime të gjata dhe të shkurtra, të cilët shërbenin për rritjen e rezistencës. "Të gjithë planin stërvitor e kishim hartuar në bashkëpunim me stafin drejtues, në mënyrë që secili prej nesh të bënte në mënyrën më të mirë punën e tij. Sigurisht, vëmendja u përqendrua në aspektin fizik, por mënjanë nuk u la as përgatitja tekniko-taktike, ku në tri miqësore që zhvilluam Tirana luajti mirë, pavarësisht se nuk i fitoi të trija. Personalisht, do të jepja vlerësimet më të mira për grupin e lojtarëve, të cilët i zbatuan me rigorozitet detyrat tona, çka na ka nxjerrë në përfundimin se në Turqi u zhvillua një fazë përgatitore e nivelit profesionist,"- shton më tej Rauf Dimraj.
Si rrjedhojë e punës stërvitore mjaft të ngjeshur, bardheblutë nuk shpëtuan as nga dëmtimet, ku fillimisht ishte Oriand Abazaj që pati probleme me gjurin, për t'u pasuar në fund nga Vioresin Sinani, me një tërheqje në kofshë. Për stafin mjekësor, vetëm sot do të vlerësohet shkalla e dëmtimit të shkodranit, ndërkohë që përgatitësi atletik Dimraj ka besim se ai do të jetë i gatshëm ndaj Teutës. "Shpresoj shumë se Sinani do të luajë përballë durrsakëve, sepse tërheqja muskulore e pësuar mund të riaftësohet gjatë fillimit të javës. Për Abazajn mund të them se është gati dhe sot do të bashkohet me grupin, ndërkohë që problemi më i madh na paraqitet me Fishin. Kamerunasi ka një problem delikat me gjurin, madje edhe testet fizike nuk arriti t'i kryente, që do të thotë se nuk është gati për rifillimin e kampionatit. Në lidhje me këtë javë stërvitore që do të zhvillojmë në kryeqytet, dua të them se ngarkesa fizike do t'u ulet në maksimum djemve, në mënyrë që i gjithë grupi të rehabilitohet dhe të japë më të mirën kur të zbresë në fushë,"- përfundon Rauf Dimraj.