Ja lëndët e provimeve me zgjedhje, për maturantët

[BENI]

Thuajse të gjitha lëndët e gjimnazit janë përfshirë në provimet e Maturës Shtetërore. Matematika, Fizika, Letërsia, Historia, Gjeografia, Gjuhët e Huaja etj, nuk do të mungojnë në programin e Ministrisë së Arsimit. Edhe pse janë 13 lëndë, ato u krijojnë mundësi maturantëve t’i alternojnë në degë të ndryshme dhe të zgjedhin më shumë se një degë për të “konkurruar”. Kështu lënda e Matematikës, i jep mundësi një maturanti të konkurrojë në disa fakultete njëherësh, në Fakultetin Ekonomik, atë të Shkencave të Natyrës, Inxhinierisë, Elektronikës etj. E njëjta gjë ndodh edhe me lëndët e tjera si Historia, Gjeografia, Kimia, Biologjia etj. Mesatarja e të cilave u lejon maturantëve të aplikojnë në më shumë se një degë dhe të provojnë se ku i kanë shanset më të mëdha për të studiuar. Të kufizuar në zgjedhjet e tyre, maturantët janë vetëm në një numër shumë të vogël lëndësh, siç janë ato të Gjuhëve të Huaja, të cilat të krijojnë mundësi vetëm për të studiuar në Fakultetin e Gjuhëve të Huaja. Pjesa tjetër e lëndëve të Maturës Shtetërore, përbëjnë mundësi të shumta për zgjedhje, madje të njëjtat lëndë kanë koeficientë të ndryshme.
Programi
Vetëm tri ditë më parë, Ministria e Arsimit dhe Shkencës, publikoi të plotë tabelën e lëndëve që duhet të mësojnë maturantët. Për të gjitha lëndët mësimet fillojnë që nga viti i parë, duke i kushtuar rëndësi më të madhe, atyre temave që i ndihmojnë maturantët edhe për degën që kanë zgjedhur. Nga ana tjetër temat nuk janë kufizuar vetëm në vitin e parë, ato janë nga të katër vitet e gjimnazit për të gjitha lëndët. Për hartimin e këtyre programeve ekspertët lëndorë për arsimin e mesëm të këtij instituti, kanë punuar si fillim për një seleksionim të materialit, pasi programet e plota për çdo lëndë jepen në fillim të vitit nga MASH. Për të pasur një gjithpërfshirje të aktorëve kryesorë në këtë proces, hartues programesh e tekstesh dhe specialistë të MASH organizuan tryeza të rumbullakta me mësues të lëndëve të ndryshme për të nxjerrë në pah edhe shqetësimet e vërteta të nxënësve, vështirësitë dhe me qëllim përditësimin e këtyre programeve. 10 grupe pune të përbërë nga 30 anëtarë, u rekrutuan më vonë në këtë institut dhe punuan për lëndët: Letërsi, Matematikë, Gjuhë e Huaj, (Anglisht, Frëngjisht), Histori, Gjoegrafi, Fizikë, Kimi, Biologji, Njohuri për Shoqërinë, Hyrje në Filozofi dhe Ekonomi e Zbatuar, në bashkëpunim edhe me specialistë të Drejtorisë së Zhvillimit të Kurrikulave të dikasterit të arsimit. Këto programe do të jenë baza për hartimin e testeve të provimeve të Maturës Shtetërore nga Qendra Kombëtare Arsimore e Vlerësimit të Provimeve.

[BENI]

Te dhena
Ja lëndët që do të jepen provim
1 – Letërsia - Do të jetë provim me detyrim për të gjithë maturantët, pavarësisht dëshirës për të ndjekur studiuar apo jo.
2 – Matematikë - Do të jetë provim me detyrim për të gjithë maturantët, që i ndjekin apo jo studimet e larta.
3 - Gjuhë e huaj - Do të jetë provim me detyrim për maturantët e gjuhëve të huaja, që do ndjekin studimet e larta në këtë fushë.
4 – Anglisht - Do të jetë lëndë me zgjedhje për maturantët që duan të ndjekin Fakultetin e Gjuhëve të Huaja.
5 – Frëngjisht - Do të jetë lëndë me zgjedhje për maturantët që duan të ndjekin Fakultetin e Gjuhëve të Huaja.
6 – Histori - Do të jetë lëndë me zgjedhje për maturantët që duan të studiojnë kryesisht këtë lëndë, por edhe Juridikun.
7 – Gjeografia - Do të jetë lëndë me zgjedhje për maturantët që duan të ndjekin studimet e larta.
8 – Fizika - Do të jetë lëndë me zgjedhje për maturantët që duan të studiojnë kryesisht në Shkenca Natyrore.
9 – Kimia - Do të jetë lëndë me zgjedhje për maturantët që duan të studiojnë kryesisht në Shkenca Natyrore.
10 – Biologjia - Do të jetë lëndë me zgjedhje për maturantët që duan të studiojnë Shkenca Natyrore dhe Mjekësi.
11 - Njohuri për Shoqërinë - Do të jetë lëndë me zgjedhje për maturantët që duan të studiojnë në Shkencat Sociale.
12 - Hyrje në Filozofi - Do të jetë lëndë me zgjedhje për maturantët që duan të studiojnë në Shkenca Politike dhe Sociale.
13 - Ekonomi e Zbatuar - Do të jetë lëndë me zgjedhje për maturantët që duan të ndjekin fakultetet profesionale, kryesisht Inxhinieri.

Provimet korrigjohen në QKAVP, me totalin e pikëve
Të gjitha provimet e maturantëve do të dërgohen për korrigjim në Qendrën Kombëtare Arsimore të Vlerësimit të Provimeve. Kjo edhe për arsyen se programet e miratuara që janë edhe baza për hartimin e testeve të provimeve të Maturës Shtetërore, kanë dalë pikërisht nga kjo qendër. Më pas ato u janë shpërndarë të gjitha drejtorive Arsimore Rajonale dhe Zyrave Arsimore nëpërmjet postës elektronike dhe me shkresë zyrtare, ku Ministria e Arsimit dhe Shkencës ka udhëzuar informimin e të gjitha shkollave të mesme. Provimet në këtë qendër, do të dorëzohen jo vetëm nga maturantët e kryeqyteti, por nga të gjithë maturantët e vendit. Dhe po nga kjo qendër do të dalë më pas përllogaritja e pikëve për secilin maturant dhe nota përkatëse e secilit prej provimeve.

[BENI]

4208 Kuota
Janë propozuaar nga Universiteti i Tiranës. Këtu përfshihen trojet si dhe 100 kuota të filialit të Fakultetit të Ekonomisë në Sarandë.

25 000 Lekë
Do të jetë tarifa e regjistrimit e propozuar nga Universiteti Politeknik dhe ai i Tiranës, për të gjithë studentët e vitit të parë.

30 000 Maturantë
Në të gjithë vendit do të zhvillojnë këtë vit për herë të parë, një skemë të re provimesh, të njohur tashmë me emrin Matura Shtetërore.

4 Provime
Zhvillohen këtë vit akademik, në të gjitha gjimnazet. Dy janë të detyruara dhe dy të tjera me zgjedhje, vetëm për ata që duan të ndjekin shkollën e lartë.

10 rregullat për Maturën Shtetërore
Ministria e Arsimit, vendos 10 rregulla kryesore, për provimet e Maturës Shtetërore. Gazeta “Tirana Observër”, i publikon ato të plota, bashkë me kriteret e tjera, që duhen respektuar në mënyrë rigoroze, nga të gjithë maturantët. Mësuesit e gjimnazeve do të jenë vetëm vëzhgues në provimet e Maturës Shtetërore. Ata jo vetëm nuk do të marrin pjesë në hartimin e tezave të provimit, por as edhe në korrigjimin e tyre. Sipas të dhënave nga Ministria e Arsimit dhe Shkencës, tezat e maturantëve do të korrigjohen nga Komisioni i Maturës Shtetërore, i përbërë nga 9 anëtarë. Pasi të përfundojnë provimet sipas datave të përcaktuara, të gjitha tezat, nga i gjithë vendi, do të grumbullohen në Qendrën Kombëtare Arsimore të Provimeve dhe Vlerësimit në kryeqytet. Maturantët nuk do të shënojnë në fletën e provimit as emër, mbiemër dhe numër klase, ata do të kenë vetëm një kod, i cili do të jetë i njohur për vetë maturantin dhe anëtarin e Komisionit të Maturës Shtetërore, që do të bëjë sekretimin e tezave. Në bazë të këtij kodi, maturantët do të marrin edhe përgjigjen për numrin e pikëve që kanë marrë në zhvillimin e provimit, si dhe notën përkatëse. Sipas specialistëve në Drejtorinë e Arsimit, kjo bëhet për të eliminuar të gjitha abuzimet dhe “marrëveshjet” për një notë të pamerituar.
Penalizimet
Për të gjitha rastet, kur komisioni do të ketë dyshime në lidhje me plotësimin e tezës, e aq më tepër kur do të vërejë se dy teza të ndryshme kanë të njëjtat gabime, maturantët do të penalizohen. Në këtë rast, nuk do të merret parasysh se kush e ka plotësuar vetë tezën, apo kush e ka kopjuar, “ndëshkimi” do të jetë i njëjtë për të dy maturantët, të cilëve do të hiqen të gjitha pikët nga përgjigjet e dyshimta. Mendohet që teza e provimit, si për lëndët me detyrim ashtu edhe për ato me zgjedhje do të ketë të njëjtën strukturë. Një pjesë e pyetjeve do të jenë vetëm me alternativa, një pjesë tjetër me zgjidhje dhe mendohet të ketë edhe pyetje në të cilat të jenë shkrirë të dyja variantet. Që do të thotë që, pasi maturantët të kenë përzgjedhur përgjigjen që e mendojnë si të saktë, do të japin edhe shpjegimin përkatës, brenda së njëjtës pyetje. Përgjigjet e provimeve do të merren vetëm mbas disa ditësh, ato do të afishohen në sekretaritë dhe drejtoritë përkatëse të shkollave të mesme. Në rast pakënaqësish apo vërejtjesh, maturantët gëzojnë të drejtën e ankimimit, e cila duhet depozituar në Ministrinë e Arsimit brenda një periudhe të shkurtër kohore, pas marrjes së rezultatit. Kjo e drejtë vlen për të gjithë maturantët dhe për të gjitha provimet dhe është e trashëguar që nga sistemi i shkuar, i përzgjedhjes së maturantëve me konkurs për në universitet.

Rregullat per provimet përfundimtare

1-Mësuesit e lëndëve përkatëse nëpër gjimnaze do të jenë vetëm vëzhgues në provimet e Maturës Shtetërore.
2-Provimet e tyre do të korrigjohen nga Komisioni i Maturës Shtetërore, i përbërë nga 9 anëtarë
3-Në tezat që do të plotësojnë maturantët do të shënohet vetëm kodi përkatës
4-Kodin sekret do ta kenë vetëm maturantët, si dhe njëri prej anëtarëve të komisioni që do të merret me regjistrimin
5-Provimet do të zhvillohen vetëm me shkrim, përgjigja e tyre do të merret pas tri ditësh
6-Teza do të përmbajë pyetje nga katër vitet e gjimnazit, për secilën lëndë që maturanti do të zhvillojë provimin
7-Pjesa më e madhe e përgjigjeve do të jenë me alternativa, ndërkohë që do të ketë edhe përgjigje me zgjidhje
8-Në rast se do të vihen re të njëjtat gabime në dy teza të ndryshme, ato të verifikohen për të parë nëse përgjigjet janë kopjuar
9-Maturantët mund të regjistrohen edhe në më shumë se dy fakultete¸në të cilat mendojnë se kanë shanse për të fituar
10-Në këtë rast, nëse lëndët me zgjedhje që duhet të japin provim, përkojnë me njëra-tjetrën, atyre nuk u duhet ta përsërisin provimin.

[BENI]

Ministri i Arsimit takon homologun maqedonas

Pollo: Do hartojmë programe të njëjta

Bashkëpunimi i universiteteve, projekte të përbashkëta të kërkimit shkencor, tekste që mund të përdoren në të dy vendet, shkolla të binjakëzuara, janë disa nga çështjet për të cilat ministri i Arsimit, Genc Pollo ka diskutuar ditën e djeshme me homologun e tij të Maqedonisë, Azis Pollozhani. Në janar, në Tiranë dy ministrat nënshkruan një program ekzekutiv të kërkimit shkencor dhe numri i projekteve të paraqitura deri tani për të përfituar nga ky program është shumë i lartë. Në Shkup ata ranë dakord që struktura e të dy palëve, shqiptare e maqedonase, të paraqesin projekte të përbashkëta për programet e Bashkimit Evropian, Paktit të Stabiliteti dhe UNESKO-s. Gjithashtu do të ngrihen grupe pune për të ndjekur përqasjen e kurrikulës universitare dhe ecurinë e procesit të Bolonjës, duke synuar një mobilitet më të lartë midis studentëve dhe profesorëve të të dy vendeve. Një ndër çështjet më të rëndësishme, që u diskutua ditën e djeshme ishte edhe përafrimi i planeve mësimore, në mënyrë që tekstet shkollorë të njërës palë të jenë të përdorshëm në vendin tjetër.

Formularët, që duheN plotësUAR
Dy do të jenë formularët, që duhet të plotësojnë maturantët për të shkuar në shkollë të lartë. I pari do të jetë për aplikimet në universitet dhe i dyti për provimet me zgjedhje. Në formularin me zgjedhje nxënësit do të shënojnë degën, fakultetin dhe universitetin ku janë regjistruar, dy provimet me zgjedhje që dëshirojnë të japin dhe të tjera elemente teknike. Ai do të jetë pa pagesë.

Tarifat
Tarifa për çdo provim me zgjedhje në Maturën Shtetërore do të jetë 1.500 lekë. Ndërkohë që tarifat për pranimin e kërkesave për studim në shkollat e larta publike do të jetë 300 lekë. Të njëjtin çmim me tarifën për provimet me zgjedhje do të kenë edhe regjistrimet për në universitet, të cilat do të kushtojnë 1.500. Regjistrimet kanë nisur në 1 mars dhe do të mbyllen më 30 prill 2006. Procedurat do të kryhen nga kandidati pranë sekretarive të fakulteteve të Universiteteve dhe të Shkollave të Larta

Maturantët
Dje në ditën e tretë të regjistrimeve, numri i maturantëve që janë regjistruar nëpër fakultete është shumë i vogël. Madje në disa fakultete si Gjuhë-Letërsi, Gjuhë të Huaja, Shkenca Natyrore etj., ende nuk ka asnjë emër të regjistruar. Vetëm në degët kryesore si Juridiku, Mjekësia dhe Elektronika, sekretaritë përkatëse kanë mundur të regjistrojnë disa kandidatë. Mendohet që maturantët ende nuk e kanë kuptuar plotësisht Maturën Shtetërore, për këtë janë ngritur komisione sqaruese në të gjitha gjimnazet e vendit.