Valbona Selimllari, nëna që u bë nuse pas tre vitesh

[GRUDJANE]

Valbona Selimllari, nëna që u bë nuse pas tre vitesh

http://i46.photobucket.com/albums/f103/Grudjane/Gruda/ValbonaSelimari.jpg

04/05/08


Me plot sharm, elegancë dhe klas. Nuk e kemi parë kështu kurrë më parë dhe vetëm dje ajo vendosi të bëhej nuse. Valbona Selimllari, Missi i parë shqiptar ka qenë në vëmendjen e qindra shikuesve të mbledhur në Hotel ‘Sheraton’ për ta ndjekur atë drejtpërsëdrejti. Ka qenë dasma e saj? Në fakt jo, nuk bëhet fjalë për asgjë të këtij lloji. Valbona Selimllari është bërë nënë prej tre vjetësh, me një djalë, lindje të cilën e kreu në Itali. Dashuria e saj për babain e fëmijës, nuk mundi të kurorëzohej më dasmë, për shkak të disa rrethanave që nuk mund t’ja lejonin këtë kënaqësi. E dje pas kaq vitesh ajo veshi fustanin e nusërisë, atë që s’mundi ta bënte para se të lindte djalin.
Ashtu si edhe çdo vit tjetër, pasarela e fustaneve të nusërisë është organizuar në mënyrë perfekte nga ‘Geraldina Sposa’, në Hotel ‘Sheraton’. Që prej vitit 2004 gjithmonë në të njëjtin vend bëhet hapja zyrtare e sezonit të dasmave, gjithmonë në pasarelën e të papërsëritshmes ‘Geraldina Sposa’. Dhe drejtuesit janë dy, Armand Peza bashkë me bashkëshorten e tij, Marçela të cilët sjellin në fund një bashkëpunim të konsoliduar në të gjitha detajet, një aktivitet që tashmë e ka krijuar traditën e vet. Një eveniment mode që ka hyrë në axhendën kulturore të kryeqytetit dhe që çdo vit pritet me shumë interes. Për ta mbyllur këtë pasarelë nga ‘Geraldina Sposa’ ftohet një person publik nga profesione të ndryshme dhe këtë vit qershia mbi tortë ka qenë bukuroshja Valbona Selimllari. Nuk është bërë kurrë nuse deri më sot dhe një ndjesi të tillë e provoi në publik këtë vit, ndërsa prej tre vitesh është bërë nëna e një vogëlushi. E ka pranuar me kënaqësi ftesën e bërë dhe emri i saj është zbuluar vetëm në provat gjenerale të sfilatës. Për t’i bërë një surprizë të ftuarve, por edhe mbarë publikut kurioz, Valbona Selimllari nuk u lakua asnjëherë gjatë provave nga organizatorët, ndërsa provat e fustanit dhe të grimit i bënte në mënyrë të fshehtë për t’i qëndruar besnike surprizës. Dhe në fund publiku është mrekulluar. Me të mbaruar sfilata e modeleve me veshjet e tyre të nusërisë, përpara të gjithëve shfaqet Valbona Selimllari me një pamje hyjnore. Me një muzikë dhe koreografi ndryshe, shumë profesionale të diktuar nga kompania spanjolle ‘PRONOVIAS’, e cila është lider në botëror në veshjet e nusërisë me një eksperiencë shumë të madhe, 450 të ftuar të një niveli kulturor të respektueshëm kanë përcjellë nga afër lëvizjet fine dhe plot elegancë të Valbonës, e cila dukej qartë që ndihej më mirë se kurrë.
Por si zgjidhen fustanet?
Sipas Mandit, asnjëherë zgjedhja nuk është rastësore. ‘Geraldina Sposa’ në çdo pasarelë propozon tek klienti modelet e reja dhe me tendenca të koleksioneve të ndryshme, dhe dashur padashur i imponohet tregut me modelet më ‘IN’ të momentit. “Duke pasur luksin që në pranverën e çdo viti ne zgjedhim veshjet e vitit pasardhës (kështu funksionon tregu i nusërisë në Perëndim), marrim ngacmim maksimal për ta transmetuar më pas tek të interesuarit në këtë fushë. Natyrisht që eksperienca në vite na bën që të mos gabojmë në zgjedhjet tona dhe në modelet që i ofrojmë tregut”, - tregon Armand Peza.
Modelet
Po sipas Mandit dhe Marcelës, për të qenë modele tek pasarelat e ‘Geraldina Sposa’ nuk mjafton të jesh thjesht e bukur. E rëndësishme është që modelet të mos jenë thjesht bukuri të fjetura, por të kenë sharmin skenik dhe karakter shprehës. Të reflektojnë klas, elegancë, feminilitet kulturë dhe inteligjencë, tipare këto që identifikojnë klientelën tonë. Dhe në fakt të dy bashkëshortët në zgjedhje nuk kanë gabuar. Veç Valbona Selimllarit, imazhit VIP të këtij viti, modelet në pasarelë janë Orinda Huta dhe Eneida Xhelili, të cilat kanë qenë të pranishme edhe në sfilatën e fitit të kaluar. Po kështu, veç tyre është edhe Xhemi, e njohur tashmë për linja perfekte trupore. Këto si edhe modele të tjera që në thelb kanë sharmin dhe elegancën.
Cili është modeli ideal i këtij viti?
Përgjithësisht modën në veshjet e nusërisë nuk mund ta përmbledhësh në një stil të vetëm. Janë katër kolonat ku mbështetet klasifikimi i veshjeve të nusërisë. Klasiket, modernet, romantiket, dhe viktorinet (veshjet e ngushta). Ka marrë këtë emër nga mbretëresha Viktorja.
Miksimi i këtyre linjave me njëra-tjetrën dhe ngjyrat e pëlhurat e modës, na jep koleksionet e reja të nusërisë. “Sapo kemi bërë zgjedhjet për vitin 2009 dhe ajo që mbizotëronte në koleksionin e ardhshëm ishin dantellat gjysmë të pambukta (si dantellat e gjyshes). Prerjet elegante deri në vithe, e pjesa e poshtme e veshjeve me plot kinda asimetrike që japin një siluetë tepër femërore (prezente kjo modë edhe në 2008). Fjongot “tendencioze” plot ngjyra (të konsumuara që prej 2007-ës) ishin zhdukur krejt në koleksionet 2009.
Fjongo të mëndafshta të lidhura nën gjoks në të njëjtën ngjyrë me veshjen....nuk mungonin materialet e rrudhura...dantella gjithmonë prezente... .xhaketina te rafinuara...gurë të ndritshëm ose mat...aksesor të mëdhenj për akonçaturat...këpucë në ngjyra neutrale silver ose gold.... materiale shantung”, -tregon me detaje Mandi.
Familja Peza në provat gjenerale të ‘Geraldina Sposa’ Prej ditësh kanë qenë shumë të zënë dhe nuk kanë mundur dot të gjejnë pak kohë as për veten e tyre. Mandi dhe Marçela duan që gjithçka të shkojë mirë në mbrëmjen Gala të zhvilluar në “Sheraton” dhe në të vërtetë kështu ka rezultuar në fund. Ja ku i shohim në këtë foto bashkë me vajzën e tyre të vogël lindur një vit më parë, teksa e përkëdhelin.
Ndërsa e pyet Mandin se cila është këshilla që ai i jep vajzave shqiptare në ditën e tyre të dasmës, ai përgjigjet: “Mos bëni eksperimente në ditën tuaj të dasmës, qoftë në veshje, në llok, ashtu edhe në organizimin e ceremonisë. Ajo ditë për ju duhet të jetë e shenjtë. Konsultohuni me revista mode të kësaj fushe. Kërkoni të gjeni në ndihmën tuaj, profesionistë të vërtetë të cilët ju japin siguri me eksperiencën e tyre”.
Kur kupton se je në qendër të vëmendjes...
Ndër modelet që sfiluan dje në pasarelen në Hotel “Sheraton” ishte edhe Eneida Xhelili, prezantuesja e emisionit të mëngjesit në News24, Vila24. Nuk është hera e parë që Eneida sfilon me fustan nusërie. Për të dytin vit radhazi ajo ftohet nga organizatorët e sfilatës së ‘Geraldina Sposa’, duke u paraqitur përpara publikut me gjashtë fustane të ndryshme. Ndërsa e pyesim se si ndihet nën petkun e fustanit të bardhë, Eneida thotë: “Fustani i nusërisë të bën të mendosh për një nga ditët më të rëndësishme që kalon në jetë. Të bën të jesh në qendër të vëmendjes dhe që të tjerët të të shohin me ëndje. Është një veshje që vetvetiu të jep një nur. Ky është viti i dytë që unë marr pjesë tek kjo sfilatë dhe më pëlqen sepse ‘Geraldina Sposa’ është biznesi më i njohur i fustaneve të nusërisë”. Eneida ndër të tjera tregon se mundohet të jetë selektive në pjesëmarrjet nëpër sfilata, nuk sfilon shpesh, thuajse fare. “Më pëlqen mënyra sesi Mandi dhe Marçela trajtojnë modelet. Njohjet e mia me Mandin dhe Marcelën janë të vjetra, rreth dhjetë vite që njihemi.
Kur më erdhi vitin e kaluar oferta e tyre, ndoshta e dinin që unë nuk e kisha profesion të sfiloja dhe mu bë qejfi që më morën në telefon. Edhe për hir të njohjes, njëkohësisht edhe të mënyrës sesi ka ecur biznesi i tyre, pranova dhe u ndjeva mirë”, - shton ajo. Gjashtë fustanet me të cilat Eneida sfiloi janë të stilit të viteve ’40. “Në fakt në momentin që provon fustanet dhe ke dëshirë të bësh një përzgjedhje, mendon se duhet të veshësh fustanet më të bukur. Të gjithë janë shumë të bukur, por mund të them se kam fustane vërtet të këndshëm. Më pëlqejnë. Janë tjetër stil nga viti i kaluar dhe më pëlqen sepse nuk dominon e bardha”, -përfundon Eneida.

GazetaShqiptare