Lajmet Ditore nga Bota 01.07.2008

[GRUDJANE]

Franca merr sot presidencën e rradhës të Bashkimit Evropian

Zëri i Amerikës
01-07-2008

Franca merr sot presidencën e Bashkimit Evropian me shpresë për të çuar më tej integrimin evropian në çështje politike si imigracioni, mbrojtja, mjedisi dhe bujqësia.
Presidenti francez, Nicolas Sarkozi, ka parashtruar objektiva ambicioze për Bashkimin Evropian për 6 muajt e ardhshëm nën presidencën e radhës së Francës. Ai synon të vendosë politika evropiane më të bashkuara dhe më të ashpra për imigracionin dhe strehimin politik të të huajve, duke harmonizuar ligjin e Bashkimit Evropian dhe duke shtuar kontrollet në kufi. Zoti Sarkozi kërkon gjithashtu një mbrojtje më të fortë evropiane, objektiv ky që shkon paralel me planet për kthimin e Francës në krahun ushtarak të NATO-s.

Presidenti francez shpreson gjithashtu që Evropa të bjerë dakord mbi një marrëveshje të BE-së për ndryshimet klimatike dhe të fillojë një debat mbi të ardhmen e politikës së përbashkët bujqësore të Bashkimit Evropian.
Gjatë një interviste mbrëmë për televizionin francez, presidenti Sarkozi tha se është me rëndësi që BE-ja të mbrojë qytetarët e vet.
"Një rast i tillë është shkurtimi i taksave të karburantit në Evropë për të ndihmuar makinistët everopainë që të përballojnë çmimet në rritje të karburantit".
Zoti Sarkozi parashikoi se arritja e një marrëveshjeje evropiane mbi ndryshimet klimatike do të jetë objektivi më i vështirë i presidencës franceze.
"Evropa duhet të japë shembullin e saj në mënyrë që të bindë vende të tjera si Shtetet e Bashkuara, Kina, Brazili dhe India, që të pakësojnë çlirimin e gazeve, që shkaktojnë efektin serë".
Zoti Sarkozi bëri të qartë objektiva të veçantë të Bashkimit Evropian, pakësimi me 20 për qind i konsumimit të energjisë nga Evropa dhe çlirimi i gazeve që dëmtojnë mjedisin, ndërkohë që shtohet me 20 për qind përdorimi i energjive alternativë, të gjitha këto deri në vitin 2020, pa sakrifikuar konkurencën e Evropës në sektorin industrial.
Franca merr presidencën e radhës në një kohë kur Bashkimi Evropian përballet me krizë pasi Irlanda hodhi poshtë të ashtuquajturin Traktati i Lisbonës me anë të një referendumi muajin e kaluar. Irlandës i është dhënë 4 muaj afat që të përcaktojë hapin e saj të ardhshëm. Mes 27 vendeve anëtare të BE-së, Irlanda është e vetmja deri tani që hedh poshtë këtë dokument, i cili synon krijimin e një blloku më të fortë dhe më të bashkuar. Skenari më negativ është që traktati i Lisbonës të mos miratohet, ashtu siç ndodhi me kartën më ambicioze, që i parapriu traktatit.
Thomas Klau është drejtor i zyrës së Parisit për Këshillin Evropian mbi Marrëdhëniet me Jashtë.
"Është tepër herët të thuhet nëse zoti Sarkozi do të arrijë të gjejë një zgjidhje deri në fund të vitit. Kjo varet pjesërisht nga përpjekjet e tij si dhe nga zgjuarsia dhe takti i tij diplomatik. Kjo varet natyrisht edhe nga zhvillimet politike".
Por një numër analistësh mendojnë se statusi i traktatit të Bashkimit Evropian mund të mos e dëmtojë medoemos presidencën e Francës. Mes këtyre analistëve është edhe Klara O'Donnell në Qendrën për Reforma Evropiane me seli në Londër.
"Ekziston mundësia që Franca të bëjë shumë. Presidenti Sarkozi ka një plan shumë ambicioz dhe do që të bëjë shumë gjëra. Ai mund të mos arrijë të bëjë çdo gjë, por do të ketë disa arritje. Natyrisht që Traktati i Lisbonës do të ketë rëndësinë e vet, por nuk ka nevojë të mbizotërojë të gjitha debatet".
Presidenti Sarkozi ka thënë se Bashkimi Evropian duhet të ofrojë zgjidhje konkrete për problemet e qytetarëve evropianë.
Planet e zotit Sarkozi për të krijuar një partneritet të ri mes Evropës dhe Mesdheut, mes vendet anëtare të Bashkimit Evropian dhe vendeve të Afrikës së Veriut dhe Lindjes së Mesme janë pritur ftohtë.
Megjithatë, presidenca e Bashkimit Evropian mund t'i japë mundësinë presidentit Sarkozi që të ketë sukses, pas vitit të parë të trazuar si president i Francës. Gjatë kësaj periudhe popullariteti i tij ka rënë ndjeshëm pasi shumë francezë kanë mbetur të zhgënjyer nga stili ekstravagant i jetesës së tij, ekonomia e rënduar e Francës dhe ndjenja se udhëheqësit francezë bëjnë premtime që nuk mund t'i bëjnë realitet. Një presidencë 6-mujore e sukseshme me në krye presidentin francez mund të përmirësojë imazhin e tij, thotë analisti Thomas Klau.
"Do të ishte e tepëruar të thuhej se presidenca e radhës do të jetë një faktor vendimtar për suksesin e zotit Sarkozy sepse nuk është kështu. Por popullariteti i tij i ulët dhe mendim i përgjithshëm jo pozitiv për të gjatë vitit të parë në detyrë, bëjnë që suksesi i tij në krye të presidencës së Bashkimit Evropian të ketë rëndësi të veçantë".
Megjithatë një anketë e opinionit publik e botuar nga një gazetë franceze muajin që sapo kaloi arrinte në përfundimin se vetëm një e treta e francezëve besojnë se presidenca franceze e Bashkimit Evropian mund t'i japë jetë Traktatit të Lisbonës të Bashkimit Evropian. (ze)


VOA

[GRUDJANE]

NYT: Vonohen planet për komando amerikane në Pakistan

01-07-2008

Gazeta New York Times njofton se ka një plan sekret për të vendosur komando amerikane në zonat fisnore të Pakistanit, përgjatë kufirit afgan, në ndjekje të terroristëve që strehohen atje. Por gazeta thotë se plani nuk është vënë në zbatim për shkak të shqetësimeve rreth ndikimit të operacioneve të tilla.
Gazeta njofton se plani ishte hartuar për t'u dhënë fund mosmarrëveshjeve mes agjensive qeveritare amerikane rreth mënyrës së ndjekjes së udhëheqësve të rrjetit terrorist të Al-Kaidës. Por gazeta thotë se të njëjtat mosmarrëveshje kanë ndaluar zbatimin e planeve.
Në veçanti, gazeta thotë se ka shqetësime rreth ndikimit mbi qeverinë e Pakistanit, një aleat kryesor i Shteteve të bashkuara, në se prania e trupave tokësore amerikane do të bëhej publike.
Gazeta The New York Times njofton për "shqetësime në rritje" në Departamentin amerikane të Mbrojtjes rreth vonesave të vazhdueshme në zbatimin e planit. Por zëdhënësi Bryan Whitman thotë se megjithëse nuk mund të komentojë në se plane të tilla sekrete ekzistojnë, ai nuk është në dijeni të ndonjë shqetësimi rreth mos përdorimit të trupave amerikane në ndjekje të terroristëve brenda Pakistanit.
"Unë, nuk kam vënë re një lloj shqetësimi të tillë. Kam vënë re të njëjtin lloj shqetësimi që ju keni dëgjuar nga komandantët tanë ushtarakë: kemi të bëjmë me një rajon kufitar aq të gjatë, sfidues dhe poroz, me një zonë ku operacionet janë kryer në të kaluarën, dhe ku disa elementë duket se gjejnë strehë në Pakistan, dhe me përpjekjet e Pakistanit për të zgjidhur këto shqetësime".
Përdorimi i territorit të Pakistanit përgjatë kufirit afgan si strehë nga al-Kaida dhe grupe të tjera terroriste ka qënë shkaku i shqetësimeve në rritje mes zyrtarëve amerikanë. Grupet dërgojnë rregullisht militantë përtej kufirit për të sulmuar forcat amerikane, afgane dhe ato aleate. Pakistani thotë se një sulm ajror amerikan kundër një grupi të tillë vrau 11 ushtarë pakistanezë në fillim të muajit.
The New York Times thotë se raporti bazohet në më shumë se 12 intervista me zyrtarë të tanishëm dhe të shkuar amerikanë e pakistanezë. Gazeta thotë se al-Kaida tani ka një brez kampesh në zonën kufitare të Pakistanit që i jep asaj kapacitet të ngjashëm me atë që kishte në Afganistan tetë vjetë më parë, kur planifikoi sulmet e 11 shtatorit.
Sipas artikullit, gjenerali pakistanez përgjegjës për rajonin i hedh poshtë akuzat e një pranie të fuqishme të terroristëve, por citon gjithashtu zyrtarët amerikanë që janë kritikë rreth përpjekjeve të gjeneralit për të grumbulluar faktet.
Tani për tani, Shtetet e Bashkuara po kryejnë vetëm sulme ajrore në zonë, bazuar në informacionet e zbulimit ose të ndjekjes së njësive terroriste. //rd//


VOA

[GRUDJANE]

Tadiq: Rikonfigurimi, i paligjshëm

01.07.2008

Çfarëdo rikonfigurimi i UNMIK-ut pa lejen e Serbisë dhe vendimin e Këshillit të Sigurimit të OKB-së është i paligjshëm, deklaroi presidenti i Serbisë, Boris Tadiq.
Ai sot në Athinë ka thënë se për këtë e ka informuar sekretarin e përgjithshëm të OKB-së, Ban Ki-Moon dhe ka përkujtuar se më parë ka parashtruar qëndrimin e Serbisë për këtë çështje në mbledhjen e Këshillit të Sigurimit.
Rikonfigurimi i pranisë civile në Kosovë duhet të bëhet me lejen e Serbisë nëse do t’i respektojmë parimet në të cilat mbështet sot bashkësia ndërkombëtare.
Ai ka paralajmëruar se për zgjidhjen e këtij problemi përsëri do të bisedojë me Ban Ki- Moonin dhe përfaqësuesit e bashkësisë ndërkombëtare.
Sipas Tadiqit, qeveria e Serbisë nuk dëshiron të shtyjë Serbinë në izolim, por për zgjidhjen e çështjes së Kosovës do të bisedojë me faktorët ndërkombëtarë.
“Parimi nga i cili nuk do të tërhiqemi është se nuk njohim kurrfarë pavarësie të Kosovës”, tha Tadiq.
telegraafi

[GRUDJANE]

Alain Le Roy, shef i misioneve paqësore të OKB-së

01.07.2008

Diplomati francez, Alain Le Roy është emëruar nga sekretari i përgjithshëm, Ban Ki-Moon, si shef i Misioneve Paqësore të Kombeve të Bashkuara. Le Roy, ka qenë i angazhuar në administratën e UNMIK-ut në Kosovë.
Ai ka punuar edhe si koordinator i Francës në Paktin e Stabilitetit dhe si përfaqësues i posaçëm evropian në Maqedoni. Le Roy do të zëvendësojë ish-shefin e deritashëm të misioneve paqësore, Jean-Marie Guéhenno, një njohës i mirë i zhvillimeve në Kosovë, që ka vizituar Prishtinën disa herë në dekadën e fundit.
Ardhja e Le Royt si shef i misioneve paqeruajtëse, pastaj marrja e udhëheqjes së Bashkimit Evropian nga Franca që nga dita e sotme dhe në gjashtë muajt e ardhshëm nën udhëheqjen e kryediplomatit të saj Bernard Kouchner, gjithsesi është një lajm i mirë edhe për Kosovën.

[GRUDJANE]

Presidenti polak nuk do të nënshkruajë traktatin e Lisbonës

01.07.2008

Presidenti polak, Lech Kaczynski, u shpreh kështu në një intervistë dhënë së përditshmes polake, Dziennik, ndërsa Franca mori presidencën e BE-së.
Përpara se të hyjë në fuqi, traktati i Lisbonës duhet të aprovohet nga 27 vendet anëtare të BEsë.
Ky proces u çekuilibrua dy javë më parë kur votuesit irlandezë i thanë jo këtij traktati, gjatë një referendumi.
Detyra kryesore e presidentit francez Nicolas Sarkozy, tani që Franca morri presidencën e BE-së, do të jetë që të kthejë ratifikimin sërish në fazën fillestare.
Fjalët e presidentit polak është e sigurt që nuk do ta ndihmojnë atë.
Zoti Kaczynski tha se ishte e vështirë të thuhej se si do të vazhdohej më tej.
Ndërkohë zoti Sarkozy, duke folur në TV kombëtar ndërsa Franca morri drejtimin e BE-së, tha se Evropa duhej rindërtuar në mënyrë që t'u vinte në ndihmë njerëzve në jetën e tyre të përditshme. /BBC/

[GRUDJANE]

Jep dorëheqje shefi i armatës franceze

Paris, 1 korrik

Shefi i armatës franceze, gjenerali Bruno Kushe (Cuche), ka dhënë dorëheqje pasi gjatë një ushtrimi ushtarak janë plagosur 17 vetë, ndër të cilët katër rëndë, në mesin e tyre edhe një fëmijë, njofton BBCVorld. Gjenerali Kushe i kishte ofruar dorëheqjen sot (e martë) Presidentit Nikola Sarkozi, i cili e ka pranuar. Ushtarët kishin përdorur plumba të vërtetë në vend të atyre të manovrave gjatë ushtrimeve në jug të Francës.

[GRUDJANE]

Prokurorët rusë thonë se vrasësi i gazetares Politkovskaja fshihet në perëndim

Moskë, 1 korrik

Prokurorët rusë thanë se i akuzuari për vrasjen e gazetares Ana Politkovskaja fshihet në vendet perëndimore. Rustan Makmudov, banor i Çeçenisë akuzohet për vrasjen, para banesës së saj në Moskë, në tetor të vitit 2006. Prokurorët nuk dhanë informacione për shtetin, në të cilin sipas tyre fshihet i akuzuari.qik